أحببت زوج أختي 🩸مكتملة🩸

🩸الجزء 53🩸

🩸أحــبــبــت زوج أخــتــي🩸

بقلم: ✍🏻 YOUSRA ANGEL ✍🏻

#مــاذا__لــو__أحـبـك__سجين__وأصبحت__أنت__حريته🔥🕊️

📿 بارت 53 📿

لاحت ليها كلامها وهي غادة لعندو كتلعن فراسها ... كيفاش قالت هكاك وفاش كانت كتفكر فاش قالتها ... واش لهاد الدرجة هاد خونا محفور فدماغها ... وشنو غادي تسمي هادشي لي كتعيشوو ... ماغاديش تقول دابا بلي كتبغيه حيث مستحيل شخص بحالو تجمع معاه تحت سقف واحد وفبيت واحد حيث الضد كون كان بنادم ايتجسد فيهم بجوج ... وعاد زيد هو مريض وماخاصووش يبقى يتعصب بزاف يعني حتى لو فكرات تكون معاه خاصها تعطيه الخاطر وهي براسها كتقلب على لي يعطيه ليها ...

وهي غادة فطريقها للطونوبيل عقلها ما حبسش من التفكير فهاد الموضوع حتى طلعات جنبوو نافخة زنافرها وماعاجبها حال ... دارت سانتير وهي مغزفة بلاما ترد لبال بلي ألاء راها فلور ...

عيسى شاف فيها بنص عين وديمارا لوطو محرك وهنا ست الحسن عاد تفكرات البنت صغيرة وضارت لعندو وقالت بانفعال باين ...

رانيا : واش خليتي ألاء بوحدها فدار ...

عيسى وهو راد البال مع طريق : راه هي موراك ...

رانيا ضارت بزربة لور وهي تلقاها ناعسة فالكرسي ديالها الخاص والمسطة ضايرة بها ... بلعات ريقها لي نشف بصعوبة ورجعات لوضعها العادي ... ديما فمها سابقها ودغيا كتبغي تجبد العيب وهاد النوع ديما كيكون فمو ماضي واي حاجة جات فخاطرو كيقولها ديك ساعة ... ما يهمو لا بشر ولا زعتر مهم داكشي لي فبالو بخصوص شيء موضوع كيطرحوو والا غلط فالهضرة مستحيل يعتذر ولا يقول الغلط مني فقط كيبدل الموضوع ويدوز وهادشي لي دارت رانيا فاش عرفات راسها سبقات الاحذاث ...

رانيا وهي كتشوف فطريق قدامها : فين غادي نمشيو ؟؟

عيسى سحب واحد اليد من على الفولون وشعل بها موسيقى هادئة وكانت بعنوان Breaking down كلماتها مخلطة بين الكورية والانجليزية ...

رانيا عقدات غوباشتها منين مافهماتش بعض الجمل وقالت : اشمن لغة هادي ؟؟

عيسى بهدوء : الكورية ...

رانيا ميلات راسها للجنب وهي كتحاول تفهم كلمات الاغنية ساعة والو ماقشبلات حتى وزة : كلماتها غرابين بحالك سبحان الله ...

عيسى: سدي وذنيك وما تسمعيش ليها ...

رانيا ميلات شفايفها بملل وهي تقلب الاغنية لوحدة عزيزة عندها ولي هي moonlight ديال Ali agatie ولي مع طلقاتها ردات راسها على لكوسان وغمضات عينيها عايشة مع كلماتها واللحن لي مستحيل تنساه ...

عيسى ضور وجهو لعندها وقال بهمس : عنداك تنعسي ليا هنا راك ماغاديش نفيقك ...

رانيا وهي حالة عينيها : هيهي ماضحكتينيش ...