أحببت زوج أختي 🩸مكتملة🩸

🩸الجزء 69🩸

🩸أحــبــبــت زوج أخــتــي🩸

   بقلم: ✍🏻 YOUSRA ANGEL  ✍🏻

#مــاذا__لــو__أحـبـك__سجين__وأصبحت__أنت__حريته🔥🕊️

         📿 بارت 69 📿

وكيف وقف مقابل معاهم قال بصوت عالي مردد ديك الجملة بنبرة حادة : ماعندنا بنات للزواج ... ختي غادي تكمل قرايتها حتى تخدم وتقاد مستقبلها ... ديك ساعة لو بغات تزوج هاداك كيبقى قرارها أما دابا لا ...

ربيعة هزات فيه العين وخنزرات وقالت : ماشي نتا لي اتورينا شنو نديرو ...

حبيبة بهدوء : واقيلا جينا فشيء وقت ماشي هو هاداك ...

ربيعة حركات راسها بالنفي وقالت : حاشا غير راك عارفة ولاد هاد الوقت هاكا دايرين ...

يونس يالاه جا يدوي حتى لقى كتشير ليه بعينيها يخرج باش تدوي معاه ... وبدون ما يتسنى كثر تبعها وباين فيه معصب : اشنوو هادشي كديري فيه ؟؟؟

ربيعة بدون مقدمات نزلات عليه بتصرفيقة نيشان لوجهو خلاتوو نيت يدير علاش يتعصب عاد قالت بعصبية : اش قلة ترابي وليتي كتصرف بهم ... ضيافي فداري ونتا جالس تبندر عليهم بحالا جالسين على قلبك ...

يونس بقى شاد فحنكو وساكت ... بينما قلبوو شاعلة فيه العافية ... علاش ديما كتعامل معاه بحال هكا ... ولو يدير لي دار كيتلقى من عندها غير الكلام القاصح ... والتعامل الخايب ... بعد المرات كتشككو فراسوو لدرجة كيقول موحال نكون انا ولدها الحقيقي ... رأيو ما مسموعش بمرة وعمرو تسمع لا منين كان صغير ولا دابا ...

ربيعة هزات سبابتها فوجهوو بتحذير مرددة بحدة : سمعني نقول ليك ... داك الطغيان لي تعلمتي من ديك الفاشلة لي جبتي ليا صباح ... ما ديروش عليا فوسط داري ... لا بغيتي تمشي على هاد سياسة ... تبارك الله ... ما بغيتيش ... راك عارف الباب فين كاين ...

يونس هز عيونو فيها وهو كابح غضبوو وحزنو وألمو وكاع المشاعر لي كيحس بهم وقال : حتى هي بغيتي تبعيها كيفما بعتي خديجة ...

ربيعة مع بغات تزيدو التصرفيقة الثانية وهي تشد يديها فاخر لحظة وبقات كتشوف فيه ... كيفاش كيشوف فيها وديك الدمعة طايحة من عينيه بحرقة كبيرة وعاد زيد كلامو بين ليها بلي هادا ماشي ولدها لي من صغرو وهو ديما ساكت ...

يونس : ماغاديش نسمح ليك تخربي مستقبلها ... هي باقة صغيرة على الزواج ... وخاصها تركز على قرايتها ... ماشي تلوحيها بين ناس برانيين كيف لحتي ختها من قبل ...

ربيعة بحدة : سكت عليا ... مبغيتش نسمعك ...

يونس رجع بجوج خطوات للوراء وقال : خلي الايام توريك اشنو غيوقع ... ولكن ذنوبها ايبقاو عليك ...

ربيعة هبطات يديها واشارت ليه للصالون ونطقات بنبرة أمر : غادي دخل للصالون وتعتاذر لنسابنا بحال ناس وتجلس ونتا ساكت ما نسمعكش ... فهمتي ...