أحببت زوج أختي 🩸مكتملة🩸

🩸الجزء 114🩸

🩸أحــبــبــت زوج أخــتــي🩸

   بقلم: ✍🏻 YOUSRA ANGEL  ✍🏻

#مــاذا__لــو__أحـبـك__سجين__وأصبحت__أنت__حريته🔥🕊️

         📿 بارت 114 📿

رانيا فديك اللحظة بحالا صرفقتيها ... دموعها دايزين فوق خدودها وجسدها مفيكسي ماكتحركش لكن فالداخل ديالها بحال أول نهار تلقات فيه خبر موت خديجة لي لحد الان مزال مانساتوو ولا غادي يتحيد ليها من البال ... طبيب لي من موراها غير سمع ديك الهضرة تقدم عند الطبيب الاخر وهو كيقول : كنظن راك غالط ... (أشار لرانيا) هادي راه من عائلة سي عيسى ...

الطبيب شاف فيها ورجع شاف فالملف لي فيديه وقال بتساؤل : علاش هاد البنت ماشي من عائلة أحمد السفياني ...

طبيب عيسى حرك راسو بلا وقال : لا هادي راه مرات سي عيسى ...

الطبيب حرك راسو بالايجاب وهز الملف الثاني لي كانت مكتوبة فيه سمية عيسى وبقى كيهضر وهو مدقق النظر فداك الملف : المريض هنا حالتو مستقرة ولكن الضربة لي خدا خلاتوو يفقد الوعي ويدخل فغيبوبة مؤقتة وعاد زيد هو عندو شيء مرض ياك ...

هز عينيه فالطبيب ديالو وفرانيا لي كانت غير ساكتة وكتعاود فودنيها ديك غيبوبة مؤقتة بينما طبيب عيسى تقدم لعند الطبيب الاخر وقال : وي ديجا كان عندو التصلب اللويحي ...

الطبيب : كنتي متبع معاه الحالة ادوكتور ياك ...

طبيب عيسى : بيان سيغ واخا فالبداية مكانش شيء تقدم حيث ديما كان مسطريسي مي مع المدة والحمية لي نصحتو بها ولا مهدن ...

الطبيب شاف فرانيا وقال : بصراحة امدام حالة ديال راجلك ماشي خطيرة بزاف ولكن العملية دازت شوية صعيبة نظرا للمرض لي كان عندو مي الحمد لله تجاوزنا الخطر ولكن الاشكال لي بقى هو امتا ايفيق ...

رانيا بزز باش قدرات تخرج دوك الكلمات من فمها وتقول : وشحال تقدر طول المدة ؟؟

الطبيب : حنا حاليا انديرو لي فجهدنا وغادي نخليو ميسيو عيسى تحت المراقبة حتى نشوفو امتا يحل عينيه وبخصوص المدة هادشي راجع المريض ...

طبيب عيسى شكر الطبيب الاخر ومشى خرج من بعد ما جر رانيا معاه وقال ليها تمشي للدار مي هي مبغاتش وبقات كتسنى تما حتى جات الممرضة وعطاتها أغراض المساعد وهي كتقول : سلام ختي هادو أغراض سي السفياني لي توفى ...

رانيا هبطات عينيها لديك ساعة وليوسبي والقلم وبقات كتشوف فيهم وساكتة من بعد هزات عينيها فديك الممرضة وقالت : شكرا ...

الممرضة مشات وخلاتها بينما هي بقات شادة فدوك الاغراض وساكتة واخا ماشي ديالها ولايني مقدراتش تهضر ولا تشرح ولا تفسر راسها عامر بزاف وقلبها مجروح وكيضرها 💔

عند موسى ...

غير تافق مع أمو بالوقت والنهار لي ايمشيو يضربو الكحل فالأبيض خرج يقضي شغالو ويكمل البحث كيف وصاه عيسى بينما لالة مينة لبسات عليها ومشات عند عائلة سارة هاد الاخيرة لي كانت فبيتها ناعسة على ظهرها فوق الناموسية وكتشوف فالسقف وهي مدكدكة بالمعقول حيث من صباح وهي تجري ... واخا تبان للناس بلي رياضية وسبورتيف مي هي ما كتجمعها مع رياضة غير الخير والإحسان ومعكازة من الدرجة الاولى وخصوصا انها شحال ما دارت شيء حاجة داكشي علاش صعيب تنوض تعاود ديرها ...

وهي متكية سمعات صوت لالة مينة كتهضر مع أمها وباها ومجمعين ... وبسرعة ناضت جامعة الوقفة وبدات تسنط من ورا الباب ولكن ما سمعات والو الشيء لي خلاها تحل لباب وتهبط لتحت كتسلت حتى للدرجة الاخيرة عاد جلسات وهي شادة فدوك الحديدات وكتسمع ...

ولي فهمات من كلامهم بلي موسى قبل بداك الزواج وقرر بلي فاواخر هاد السيمانة غادي يجي للدار يخطب ويضرب الكحل فالبيض ... وعلى إثر سماعها هادشي خرجات عينيها على الجهد وهي كتقول : واش هادا مسطي ... مالو على هاد الزربة ...

تحطات شيء يد موراها الشيء لي خلاها تقفز مخلوعة وهي مغوتة : اعععععع

أدم زرب عليها دغيا وسد ليها فمها قبل ما تجمع عليه جوقة : ابشوية البقرة هادا غير أنا ...

سارة ضربات على يديه وكتفوو وهي كتخنزر فيه : خلعتيني الويل مكتعرفش دير الحس ...

أدم بميوعة : ونتي لي جالسة هنا كتسنطي ومادايراش الحس شنو نقولو عليك ؟؟

سارة نخلاتو وضارت كتشوف فالصالون لي بعيد واش باقين كيهضرو ساعة صقلو : يخخ على المرض ماعرفتش اشنو ايكونو كيقولو دابا ...

أدم بطنز : مابقاش بزاف ونتهنى منك هههه

سارة : غير كون هاني غادي نسكن غير حداك ...

أدم صغر فيها عينيه وقال بتساؤل : كيفاش اتسكني غير حدايا... علاش ماشي دار خالتي مينة بعيدة على الحي ...

#يتب...ع