أحببت زوج أختي 🩸مكتملة🩸

🩸الجزء 116🩸

🩸أحــبــبــت زوج أخــتــي🩸

   بقلم: ✍🏻 YOUSRA ANGEL  ✍🏻

#مــاذا__لــو__أحـبـك__سجين__وأصبحت__أنت__حريته🔥🕊️

         📿 بارت 116 📿

ربيعة بقات مفيكسية فيها الشوفة بنظرات حادة بدون ما تهضر بينما رانيا بادلاتها ديك النظرة بابتسامة باردة وخرجات من البيت بدون ما تهضر مع حد وفطريقها كتلاقى بليلى ويونس ... ماهضراتهمش بمرة وزادت خرجات ... بان ليها شيفور كيتسناها وهي تحبسو بيديها باش بلاما يطلع وقالت بحدة : سوارت ...

الشيفور حرك ليها راسو بالايجاب ومد ليها ساروت ... بينما هي مشات وركبات بكل هدوء عكس عيون مها لي بقاو مراقبينها كانو نظرات غير راضية على تعامل بنتها معاها بالرغم من انها كتعامل عادي الا انها كتشوفها كتنفر منها وهادي حاجة عادية بسبب تصرفاتها القديمة معاها ...

كيف ديمارات محركة من تما دوزات الخط لاول رقم طلع ليها ونطقات ببرود فاش تفتحات المكالمة ...

رانيا : امضرا لقيتيه ؟؟

موسى خرج للبالكو برا وهو حاضي سارة لي جالسة فالجردة لتحت مع أمو وخوه : كنضن بلي الخطوة الجاية اتكون صعيبة علينا فمن الاحسن نأجلو ...

رانيا قاطعاتو بحدة : لا مبغيتش نأجل ... مول هاد الفعلة خاصو يعرف راسو معامن كيلعب ولكن متبينش ليه بلي الدقة جاتو من برا خليه يشك فعائلتو وأولهم لي على راس القائمة هو باه ... متفاهمين ...

موسى حك على ذقنو وهو كيتفكر ديك الليلة لي كان قريب يموت بالغاز وسط ديك الطونوبيل وبعد البحث الطويل قدر يعرف مول الفعلة ولكن الصدمة لي خرساتوو هو مدى القرب ليه لهاد الدرجة كان كيضور غير بجنابو وهو غافل عليه وكيحفر ليه وبإستهزاء شاف فالسماء لمدة قصيرة من بعد قال : منين غيسالي هادشي شنو غادي ديري ؟؟

رانيا زادت فالسرعة وهي كتحاول توصل دغيا للدار : غنبعد ..

موسى بتساؤل : لفين ؟؟

رانيا : لبلاصة ما يعرفها حد فيها غير أنا وعائلتي فقط ...

موسى : والخدمة ؟؟

رانيا ضحكات بجنب وهي داخلة مع الفيلا : كلشي كنتكلف به من بعيد ... وحاجة أخرى متحتاجش تقول ليا خبار داك لي مايتسماش ...

موسى : كوني هانية ... ديريني دابا بحالا قضيت الغرض وبداي فالخطط لي راسمة فبالك ...

رانيا هزات راسها باه بحالا كيشوفها من بعد قالت : شكرا على أي حاجة عاونتيني فيها ...

موسى ببرود : العفو راك مرات خويا ...

رانيا فلتات ليها ابتسامة بدون ما تحس وقالت : اذن ما بيناتناش اراجل ختي ...

موسى تبسم بجنب وودعها من بعد قطع وهو باقي عينيه لتحت كيشوف فيها كيفاش كضحك مع أمو وتهضر بعفوية وضحكها عكس خوه لي كان كيتكونيكطا وفنفس الوقت كيشوف فيه بزاف ... دوك الشوفات ماعجبوهش نهائيا وخصوصا فاش كيشوفو كتفلت ليه شيء ابتسامة حيث قالت ليهم شيء نكتة هنا كيتزاد معاه الزايد وبدون ما يحس براسو لقى رجليه خارجين من البيت ومتوجهين باتجاه الجردة ...

كيف وقف عليهم شاف فسارة لي كانت كضحك بجهد مع لالة مينة وقال ببرود : ضحكينا معاك ...

سارة غير شافتو وهي ضرب طم مخليه لالة مينة دوي بلاصتها وتقول : عرفتي اولدي والله ايلا تزوجتي وعرفتي شنو تزوجتي ... راه ميمكنش هاد البلاصة شحال كتقتل بالضحك ...

موسى حرك راسو يمين شمال وقال باستهزاء : ايوا دخليها تشارك فشيء برنامج للكوميديا

سارة صغرات عينيها وهي ساكتة كتحلل فتصرفاتوو بينما إسحاق كان كيتفرج فيهم واحد بواحد حتى جات عينيه على سارة وفهاد اللقطة شاف فيه موسى وقال بحدة : نتا ماعندك ما يدار ...

إسحاق باستغراب : علاش بغيتيني فشيء حاجة ا خويا؟؟

موسى دار راسو كيخمم فشيء حاجة : سي كاينة البروجي الجديد خاصنا شيء تصاميم نقادوهم باش نديرو الاشهار للماركة الجديدة داكشي باش خاصك تمشي توقف عليهم تما ...

إسحاق شاف فمو ورجع شاف فيه : ولكن على حسب علمي هاد الخدمة كنتي مكلف بها نتا ؟؟

موسى بدون ما يبين نطق تحت سنانوو : ودابا اتكلف بها نتا واش عندك شيء إشكال ؟؟

سارة عرفات القضية حامضة وهي تنوض جامعة الوقفة باغا تسلت : خالتي مينة تفكرت بلي عندي واحد لبحث خاصني نقادو انا غادي نطلع للفوق ...

لالة مينة بابتسامة جاوباتها : ماشي مشكل ابنتي سيري ...

سارة هزات عينيها فعيون موسى لقاتوو كيشوف فيها بدون ما يحشم من أمو ولا من خوه وبتوتر دازت بزربة وقلبها كيشطح فالمئة وبدون ما تشعر ضربات واحد الكاس ديال أتاي كان فوق الطبلة حتى خواتوو على رجل إسحاق ... هاد الاخير لي ناض طافج حيث أتاي كان سخون وبدا ينقز بلاصتوو بحال شيء نعامة ... سارة بزربة وبدون ما تفكر هزات سربيتة فوق الطبلة وبدات كتمسح ليه فداك اتاي لي تكب عليه غافلة على عيون موسى لي كون كانو قرطاس كون راها دابا في عداد الموتى ...

وقبل ما يدير شيء ردة فعل ماهياش تدخلات لالة مينة وخدات من عندها سربيتة وقالت : غير خليك ابنتي انا انتكلف ...

سارة بدون ما تشوف فإسحاق : سمح ليا مقصدتش راه غير يدي ...

إسحاق دار ليها اشارة بمعنى مكاين مشكل وكمل كيسوط فديك البلاصة فين تحرق ... مع هزات راسها بان ليها هاز فيها حاجب ومنزل لاخر بشيء شوفات ديال الله يحفظ والله يستر وبدون ما تزيد تفكر كثر زادت كتجري طالعة لبيتها لفوق ... موسى بقى كيشوف فإسحاق لمدة قصيرة من بعد تبعها للفوق وكل خطوة كيدير فيها جوج وشيء حاجة فالداخل ديالو كتحرقو كلما كيتفكر داك الجيسط لي دارت قدام عينيه