أحببت زوج أختي 🩸مكتملة🩸

🩸الجزء 110🩸

🩸أحــبــبــت زوج أخــتــي🩸

   بقلم: ✍🏻 YOUSRA ANGEL  ✍🏻

#مــاذا__لــو__أحـبـك__سجين__وأصبحت__أنت__حريته🔥🕊️

         📿 بارت 110 📿

عيسى بدون مقدمات جرها لعندو معنقها وغمض عينيه وسكت ... كانت قادرة تسمع صوت تنفسو الغير منتظم وتحس بالطريقة لي معنقها بيها ... مزير عليها بدراعو وخاشيها فظلوعو بحالا هادي اخر مرة ايعنقها وكيف بغات تدوي حس بيها بغات تسولو الشيء لي خلاه يقول ديك الكلمة لي كانت هي باغا تسمع باش تسكت ومتبقاش تسول بزاف ...

- كنواعدك ...

ديك الكلمة كانت نابعة مم قلبو بلي غادي يواعدها ولكن ماشي باش ما توقع ليه والو حيث ماشي هو لي كيحدد مصيرو ولكن كيواعدها بلي غادي يخليها تولي أحسن سوى كان معاها ولا لا ... وبهدوء بعد عليها وناض ونوضها معاه وهي غير ساكتة كتشوف فيه  ...

قاد ليها بلاصتها باش تنعس وجلسها عاد هز فيها عينيه وشافها مازحزحاتش عينيها عليه الشيء لي خلاه يبتاسم ليها وهو كيردد كلامو : نعسي دابا راه مشى الحال ... غادي نجيب ليك داكشي لي كتحتاجي ونرجع ...

رانيا حركات راسها بالايجاب وتكمشات بلاصتها ومتبعة ليه العين حتى طلع للدار الفوق ... جاب داكشي لي اتحتاج كامل وهز بنتو وهبطها ليه باش تبقى معاها ... غير شافتها تبسمات ونسات كاع داك الالم لي فيها ... وبسرعة شداتها من عندو كتلعب معاها وتبوس فيها وتحاول ضحكها وألاء كتصدر دوك الاصوات الطفولية وضحك ببراءة ...

كان بعيد عليهم شوية كيقاد ليها شيء حاجة سخونة تشربها وعينيه عليهم بجوج كيفاش كيضحكو ويلعبو ... وهنا فين عرف بلي راه تعطاتو فرصة ثانية باش يعيش فراحة ويطيع الله ويحمدو ويشكرو وهادشي هو كيظل يتفكرو نهار وليل ... وهنا خاص الانسان يعرف بلي لا تحيدات ليك شيء حاجة كتبغيها فأكيد غادي يعوض بما حسن منها و الله ما كيحيد لعبدو شيء حاجة الا وكانت فمصلحتو حيث يقدرو يكونو الناس باغين ليك الشر والضرر ولكن الله لا ... داكشي علاش خاص ثقة الانسان بالله عز وجل عمرها تزعزع ... وفنفس الوقت ياخد رضاه وحبو عن طريق تطبيق داكشي لي أمرنا به ...

عند موسى ...

سايق فالسكوتر بسرعة متوسطة حتى وصل قدام واحد العمارة ... وبهدوء دخل مع لباركينغ ووقف فواحد من الصفوف الخاوية وسارة كتشوف فيه ومتبعاه شنو كيدير ... وغير بان ليها هبط هبطات حتى هي وهي كتحيد الكاسك من راسها ...

سارة وهي كضور عينيها فالمكان : واش هنا ساكنين ؟؟

موسى حيد لكاسك وهز سوارت سكوتر وقال ببرود : تبعيني ...

خلات داك لكاسك تما وتبعاتوو كتزرب حيث خطواتو كبار على ديالها حتى وصلو للشقة ... حل بساروت لي عندو ودخل ... كانت دار خاوية ومطفي فيها ضوء ... تقدم موسى فالاول وشعل ضوء عاد دار عندها هي لي كانت وافقة بدون ماتفوت عتبة الباب وببرود نطق بتساؤل : واش غادي تبقاي وافقة تما ؟؟

سارة شافت فيه بحدة وقالت : ماغاديش ندخل لشيء دار قبل ما يعطيوني ناسها الإذن ...

موسى ببرود : تقدري دخلي ...

سارة شافت فجنابها ودخلات كضور فعينيها من بعد ما سدات الباب وقالت بفضول : ديالمن هاد دار ...

موسى وهو متوجه للداخل يجلس : دار (سكت) ...

سارة بإستغراب : دار ...

موسى ضور راسو للجنب ونطق بصوت مبحبح : غتكون دارنا ...

سارة بعدم فهم : دار من ؟؟

موسى غمض عينيه بقلة صبر وضار لعندها كيشوف فيها بشوفات ديال من نيتك من بعد قال بهدوء : أنا وياك ...

سارة توجهات لعندو وجلسات جنبو وبدون مقدمات حطات يديها على جبهتو ودوزاتها على وجهو من بعد بعدات يديها وقالت بطنز : وانا نقول سيد مالو كيهتر قوول السخانة دارتها ...

موسى قاس جبهتو ولقى نيت سخانة طالعة وبدون ما يجاوبها ناض كيقلب على شيء دوا تما ديال سخانة حتى سمعها كتسولو ...

سارة بصوت عالي : وفين غنعس أنا ...

موسى خدا دوليبران لي لقى تما وخرج متوجه للكوزينة يهز كاس ديال الماء وبسرعة تبعاتو سارة كتشوف وكتدوي بفضول

- اشنو غادي تشرب ...

موسى ضار لعندها بنص وجهو وقال : مكتعيياش من الأسئلة

سارة زادت بوجهها كتشوف فديك دوليبران وقالت بعفوية : واش ماعندكش شيء حاجة كتكال راه فيا الجوع ...

موسى بعدها بذراعو حيث تشخات فيه بزاف وقال : راه كنشرب غير الدواء

سارة وهي كترمش بشفارها ببراءة : وبغيت ناكل ...

موسى اشار ليها للثلاجة : راه فين تشوفي ماشي فيا أنا ..

سارة تحركات من تما وزادت للثلاجة كيف حلاتها بانت ليها كتصفر ومافيها حتى حاجة من غير الماء ... غمضات عينيها مزيرة عليهم وضارت لعندو وقالت بسخرية : لا باين كاين ما نشوف نيت ...

موسى ببرود : انا غندخل نعس راه كاين البيت لاخر فيه الفراش مقاد تقدري تباتي فيه ... تصبحي على خير

سارة خرجات عينيها على الجهد وهي كتشوفو غادي للبيت ينعس ... اويلي هادا ما كيفهم لا فرومانسية لا فزفت ... نوغمالموو خاصو يجيب ليها شيء حاجة تاكلها حيث فيها الجوع ولايني والو سيد زرك ... وبقلة صبر تنهدات ومشات دخل للبيت تنعس حتى للصباح وترجع لدارهم وتاكل لي بغات ...

#يتب...ع
باقين معايا 🙄