أحببت زوج أختي 🩸مكتملة🩸

🩸الجزء 121🩸

🩸أحــبــبــت زوج أخــتــي🩸

   بقلم: ✍🏻 YOUSRA ANGEL  ✍🏻

#مــاذا__لــو__أحـبـك__سجين__وأصبحت__أنت__حريته🔥🕊️

         📿 بارت 121 📿

عند رانيا ...

دخلات دادة ميمونة وهي كاع ما متيقة داكشي لي كتشوف ... عينيها ماتزعزعوش من على عيسى لي كان غير كيشوف فيها هو الاخر ... رانيا استغلات الوضع وخرجات تعيط على الطبيب بينما دادة ميمونة جلسات جنب عيسى والابتسامة واصلة ليها لما عرفت فين وقالت بحنية : على سلامتك اولدي ... والله ايلا قلبنا بقى مشوش عليك واخا الطبيب قال لينا بلي راك بخير

عيسى بابتسامة : ربي يخليك شكرا (سكت)

دادة ميمونة بقلق : امضرا اولدي ياكما كيضرك شيء حاجة ولا باقي مقصح ...

عيسى حرك راسو بلا وقال : لا انا بخير بلاما تشوشي ...

بدا كيضور راسو فالبيت يشوف رانيا فين تعطلات الشيء لي خلا دادة ميمونة تفهمو وتنوض وهي كتقول : انا غنوجد ليكم طبلة ونطلعها ليكم هنا ...

عيسى دار ليها اشارة بيدو بمعنى مكاين لاش من بعد قال : غير رتاحي دابا ... شخصيا مافيا لي ياكل ...

مع نطق بهاد الهضرة دخلات رانيا وهي شادة تيليفون فيديها ومبتاسمة فوجهو وكتقول : غير بلاما تحاول ... الماكلة ضاروري منها ...

دادة ميمونة : هادشي لي كنت باغية نقول ليه (شافت فرانيا ) بنتي واش غادي تسيفطي ألاء فالعشية للروض باش نقاد ليها ماكلتها ...

رانيا بهدوء : لا ماغاديش تمشي اليوم غير بلاما تعذبي راسك ... غير هو اخالتي واخا تبقاي معاها شوية وتردي ليها البال حتى يمشي الطبيب ...

عيسى تدخل وقال ببرود : مكاين لاش من الطبيب ... ( كيخاطب دادة ميمونة ) لا فاقت جيبيها ليا

دادة ميمونة شافت فرانيا حتى دارت ليها اشارة بعينيها باش دير بكلامو عاد شافت فعيسى وقالت بابتسامة : هي الاولة اولدي

عيسى ابتاسم ليها كشكر وبقى متبع ليها العين حتى خرجات عاد شاف فرانيا وقال بحدة : عاونيني نوض ...

رانيا تقدمات لعندو وهي كتسولو بقلق : علاش فين باغي تمشي ؟؟

عيسى : خاصني نتأكد من واحد الحاجة ...

رانيا شدات فكتفو حابساه وقالت : قول ليا اشمن حاجة بغيتي وانا نجيبها ليك

عيسى مابغاش يقول : دابا واش اتعاونيني ولا نوض لراسي ...

رانيا ساعداتو حتى ناض وضورات يديها على ظهرو وبقات كتمشى بجنبو بشوية وهو مضور يديها على كتفها حتى وصلو لبيت عيسى لقديم ... مع حلات رانيا الباب باش يدخلو سمعو صوت دادة ميمونة كتجري وتعيط باسم رانيا ....

رانيا سحبات يديها من لبواني وشافت فيها باستغراب وقالت : شكون كاين اخالتي ...

دادة ميمونة شافت فيها و وجهها صفر وبدون مقدمات اشارت ليها لباب لتحت وقالت بقلق : بنتي البوليس لتحت وكيسولو عليك ...

رانيا شافت فيها ببرود مامبينة حتى شيء ملامح على وجهها : واخا اخالتي ... قولي ليهم يتسناو علاما ندي عيسى للبيت

عيسى شاف فيها وكيفاش كتهضر بطريقة عقلانية ومامبينة كاع الخوف ولا التوتر الشيء لي خلاه يشد فذراعها بقوة خفيفة ويقول بحدة : علاش بغاوك البوليس ؟؟ واش وقعات شيء حاجة من مورايا ...

رانيا ضورات يديها على ظهرو وخلات ليه ديك اليد لي باقي شاد فيها مابعداتهاش : اجي نرجعو للبيت ومن بعد نشرح ليك كلشي ... اصلا انا براسي ماعارفاش علاش كيسولو عليا ...

عيسى بحزم : لا ... غنهبط معاك

رانيا خرجات عينيها على الجهد وهي كتشوف فوجهو وقالت بحدة : واخا تقول قلتيها غير بالضحك مايصلاحش

عيسى شاف فيها ديك شوفة ديال من نيتك وقال : واش بنت ليك كنضحك ...

رانيا طبطات عليه من ظهرو بديك اليد لي مضورة على يديها وقالت بحنية : عفاك ... غير تسناني فالبيت ... (بعيون حادة) غير غادي نشوفهم شنو بغاو وانرجع

شافت فيه بترجي وبدوك العينين ديال المشة وهو يضور وجهو لجهة أخرى كيفكر حتى فاجأتو منين عيطات على دادة ميمونة لي كانت جنبهم : خالتي عفاك ... واخا تعاوني عيسى يرجع لبيتو انا غنشوفهم شنو بغاو ونرجع ...

دادة ميمونة حركات ليها راسها باه وزادت شدات فعيسى وهي كتقول: اجي اولدي راك عاد فقتي وخاصك ترتاح

رانيا طلقات من يديه وهي كتقاد فالزيف لي واسع وفضفاض من بعد ابتاسمات بحب فوجه عيسى عاد هبطات وقبل ما توصل لحدا الباب غيرات ملامحها فمرة واختافات ديك الابتسامة فرمشة عين ... وكيف حلات الباب بانو ليها جوج رجال من البوليس كيهضرو ...

رانيا بدون ما طلع عينيها فيهم مكتافية تشوف لبعيد بنظرات حادة : فاش يمكن ليا نعاونكم

الشرطي شاف فالورقة لي فيدو : الانسة سملال ياك ...

رانيا هزات فيه حاجب ونزلات لاخر بتخنزيرة واضحة وقالت ببرود : مادام البرنوصي هادي ...

الشرطي شاف فصاحبو وقال بهمس : ياكما غلطتي فالعنوان ...

رانيا بدات كتشوف فيهم باستغراب وهي مصغرة عينيها من بعد ضحكات بسخرية وقالت : نتوما ماشي من البوليس ياك