أحببت زوج أختي 🩸مكتملة🩸

🩸الجزء 112🩸

🩸أحــبــبــت زوج أخــتــي🩸

   بقلم: ✍🏻 YOUSRA ANGEL  ✍🏻

#مــاذا__لــو__أحـبـك__سجين__وأصبحت__أنت__حريته🔥🕊️

         📿 بارت 112 📿

وبجسد فارغ هبطات دوك الدرجات ويديها كيرجفو بينما العساس جنبها وكل مرة كيشوفها كتقرب طيح وتخلخل فالوقفة كيشد فيها وكيقول لا حول ولا قوة الا بالله ... بقاو على داك الحال حتى وصلو لمكان الحاذثة ... كانو البوليس وصلو وحتى الاسعاف لي بدات كدير خدمتها و كتخرج فعيسى والشخص الثاني ولي غايبين على الوعي تماما ...

رانيا غير لمحات عيسى محطوط فوق واحد ناقلة مشات كتجري لعندو ودموعها دايزين فوق خدودها بصمت وكيف بغات تقرب لعندو حبسوها البوليس : الالة فين غادة ممنوع دوزي ...

العربي جا كيجري وشد فيد داك الشرطي وقال بترجي : عفاك اوليدي لاما خليها تشوف راجلها...

البوليسي شاف فرانيا لي عينيها غير على عيسى وهو يسحب دراعوو وقال بهدوء : دوزي اختي ... دوزي ...

رانيا غير سمعات ديك دوزي رجليها فشلوو عليها وبزز شجعات راسها وقربات لعندو ... وبدون مقدمات شدات فيديها لي مجروحة وبدات كدوز عليها صباعها بهدوء بحالا خايفة تفيقو حيث ناعس ...

صحاب الاسعاف بقاو كيشوفو فبعضياتهم ويشوفو فيها وفحالتها لي باينة الصدمة لعبات عليها وغير من الطريقة كيفاش شادة فيديه بيد واليد الثانية كدوزها على وجهو وكتشوف فيه عرفوها بلي متجاوزاتش هاد القضية ...

قربات لعندها واحد البنت وشدات فكتفها وقالت : ختي تقدري طلعي معانا للاسعاف راه خاصنا نتحركو دابا ...

رانيا شافت فيها بدون ماتنطق حرف وزادت طالعة فنفس اللحظة لي تهزات ديك النقالة لي ناعس فيها عيسى ودخلات لداخل سيارة الاسعاف عاد تبعاتها ديك البنت وتحركات الاسعاف وهي صادرة من موراها صوتها المعتاد باش يبعدو السيارات لاخرين من طريق حيث الحالة مستعجلة ....

بينما فمكان الحاذث بقاو كيتسناو الاسعاف الثانية تجي باش تنقل الشخص الثاني والبوليس كيشوفو فمكان الحاذثة ويسولو الناس واش شافو شيء حاجة ... الحاصول الدنيا تقلبات والخبار انتاشرات حتى وصلات للحي كولو وهادا هو حال المغرب ميمكنش طرا شيء حاجة وماتنشرش ولا ما يسيق ليها حد الخبار ...

عند سارة ...

طلع الصباح وهي باقية مخشية بلاصتها ... شعرها مخربق فوق الوسادة وواحد الرجل خارج من الغطاء ولاخر مخشي أما يديها كل وحدة فين مليوحة ... تحل عليها الباب وهي مزال غارقة فنعاسها ...

دخل لعندها بخطوات سريعة وملامحوو حادة ماتعرفو فاش كيفكر ... كيف وقف ليها على راسها دق فوق الكوافوز لي جبنها جوح دقات حتى تشقلبات للجهة الاخرى مغمضة عينيها ولايني من عاود دق الدقة الثالثة بجهد ناضت قافزة وهي كتمسح فمها لي نزلو منو ريوك ...

سارة وهي كتشوف بدون ما ترمش : شكون نتا ؟؟

موسى عرفها باقا مضهشرة وببرود جاوبها : عزرائيل ...

سارة حكات راسها وهي كتفوه وتغمض فعينيها باينة ماشابعاش نعاس : شحال الساعة دابا ...

موسى ببرود : سبعة ديال الصباح ...

سارة بسرعة هزات فيه راسها وهي مخرجة عينيها على الجهد : ولاش مفيقني دابا ... راه مزال الحال ..

موسى شافها اترجع تنعس وهو يشدها من يديها حتى جلسات وقال : تحركي نديرو امارش ونرجعوو ...

سارة بقلة صبر : وبغيت نعس انا مافيا لي يتمشى ولا يجري ...

موسى نوضها بزربة حتى حطات رجليها فالارض بالحفى : عندك 5 دقائق ... تحركي ...

سارة وهي كدفع فيه من كتفوو : خرج خرج ...

موسى يالاه وصل للباب وهو يضور لعندها وقال بتحذير : عنداك ترجعي تنعسي ...

سارة وهي كتفوه : ماغاديش نرجع غير خرج ...

موسى دار راسوو سد الباب ومع بغات سارة ترجع لبلاصتها رجع موسى حل الباب وقال بصوت عالي حتى قفزها : اش قلنا ...

سارة تنهدات بسخط وهي كتغووت : وفهمناااا صااافي اوووووف ...

بقى متبع ليها العين حتى دخلات للحمام عاد نزل لتحت وهز تجاكيط ديال توني فالاسود لبسو وبقى غادي جاي بلاصتوو حتى تمات هابطة لعندو وهي لابسة توني فالاسود ... طلعها ونزلها بعينيه وزاد سبقها غير بانت ليه حطات رجليها برا العمارة وهو يبدا يجري من بعد ما قال ليها تبعوو ... فالاول السيدة بغات دير فيها حاضرة جرات معاه فنفس الريتيم مي غير ضربت ضورة وحدة وهي تبدا تعيى وتقاتل غير باش تلحق عليه حتى تسالا ليها الجهد ووقفات وهي محنية على ركابيها وكتنفس بسرعة بحالا كانت فالماراطون ...

#يتب...ع