أحببت زوج أختي 🩸مكتملة🩸

🩸الجزء 27🩸

🩸أحــبــبــت زوج أخــتــي🩸

   بقلم: ✍🏻 YOUSRA ANGEL  ✍🏻

#مــاذا__لــو__أحـبـك__سجين__وأصبحت__أنت__حريته🔥🕊️

         📿 بارت 27 📿

أصبحنا واصبح الملك لله ...

فدار عيسى الناس مجوقة والعائلة كل فين شاد بلاصتوو ها لي كيبكي وها لي كيجذب بعيد وها لي ساكت وكيتسنط ولكن كلامهم ما مسموعش من كثرة ما صوت كلام الله مطلوق بجهد ...

كاين من الناس لي كيسمع للقران ويتمعن فكلام الخالق ويعرف بلي الدنيا فانية وكاين لي غير شاد راسوو وكيسول ... كيفاش ماتت وامتا وباش وديك الاسئلة الاعتيادية لي ولفوها المغاربة ... والكلمة الشائعة ولي ميمكنش ليك ما تسمعهاش فجو الجنازة هي تلقي العزاء من ناس وبالظبط ديك الكلمة ديال " البراكة فراسك " كتجبد عليك وجع كبير وكتفكر كل ثانية باشنوو واقع وشنو ضاير بك وكتفكرك بلي هادي نهاية اي واحد ولي هي الدار الاخرة اولا ما يسمى بدار البقاء ...

جلسو العائلة فالصالون الكبير كيستقبلو الناس لي كيدخلوو يعزيو فديك الوقيتة بينما الرجال مشاو للمقبرة باش يدفنو المرحومة من بعد ما صلاو عليها صلاة الظهر ...

وهاكا داز داك الصباح وكلشي رجع الا هو بقى جالس حدا داك القبر ومكيتحركش ... يديه محطوطين على التراب وعيونو ساهيين فشيء حاجة بعيدة وبالرغم من انه ما مركزش فداكشي لي كيشوف الا وانه عارف فين هو ولاش جا غير الفكرة ديال انه يبدا يتقبل جاتوو صعيبة ...

بدا كيمرر يديه على داك تراب ويشوف فالاسم لي مكتوب على واحد اللوحة ديال الخشب وساكت ما نطق بكلمة وماهاموش بلي راه تعطل وكلشي مشى وخلاه تما ...

ما كيدوي ويخرج داكشي لي فقلبو ولا يدير شيء ردة فعل فقط ساكت وكيشوف حتى تسللات من عيونو دمعات حارة ترجمو كدموع الوداع لاعز واقرب انسانة عندو كانت صديقة صالحة قبل ما تكون زوجة صالحة ... بالنسبة ليه ما كانش كيشوف فيها غير مرتو بل ختو وبنتو وصديقتوو ... مكيخسرش ليها الخاطر ومكيبغيش يقول ليها شيء حاجة تعصبها داكشي باش كره يونس كره لا يطاق فاش عرفو عاود ليها كلشي ودابا واخا يوقع لي يوقع عمرو يحلا ليه ولا يوقف قدامو ويتلاقاه حيث فاش كيخسر معاه شيء حد ضوسي كيضرب عليه فمرة ومكيعاودش يشوفو ...

غير حس براسو بلي صافي راه تعطل ناض جامع الوقفة ومديماري راجع للدار يشوف ناس لي جايين يعزيوه ومنها نيت يشوف بنتو لي ما شافها كاع من لبارح فاش خداتها رانيا من عندو ...

وصل للدار وسطاسيونا على برا ودخل ... لي تلاقا معاه كيقول ليه البراكة فراسك وبطبيعة الحال حتى هو كيعطيه صوابوو وكيقول ليه ما مشى معاك باس يزيد ... ما كيجمع مع حد ما يفتح نقاش مع حد خاطيه هاد الخزعبلات وخصوصا فهاد نهار ...