💎مكتملة💎
قصة حقيقية بنكهة الواقع المعاش ... أبطالها نوع آخر من الأبطال بطل صاحب شركة كبرى مزوج بمرتوو لي تفاهم معاها وزوجوها ليه واليديه بالرغم مم انه عمرو ماعرفها يعني زواجهم كان تقليدي بإمتياز 🔥🔥
بينما فالجانب الاخر مراتو كتكون عايشة معاه مع...
كمش يديه على شكل بوكس وهو كيتنفس بالجهد تقيسو يطرطق الغيرة تتاكل فيه من لداخل وتتنهش فقلبو علاش لحد الان ختو مبغاتش دخل ليه ودوي مع راجلها باش يعطيه صلاحية يسير فيها ادارة الشركة كيف واعداتوو من قبل.... وعلاش يبقى عيسى جالس فداك المنصب وماشي هو علاش ...
دخل وهو معصب بزاف لدرجة وجهو ولا كيخلع وكلما كيبغي كينسى كيتفكر ألاء لي يالاه تزادت وغادي تورث فحقوو لي هو فالاصل ماشي ديالو كيبغي ياكل راسوو بالغدايد ...
داز الوقت ...
وبالظبط عند رانيا لي كانت طاحت عندهم الظلمة ... جالسة فوق الناموسية بكل اريحية وهي لابسة شورط تجين قصير وتيشورط فوق الكرش ... وفجنبها مجموعة من الاكلات الخفيفة شكلاط كلية وعصير وحلاوي فالالوان ... كلهم مشتتين حداها تقول دايرة عيد ميلاد وقدامها بيسي كتفرج فواحد الفيلم رومانسي ومتنغمة معاه ...
وكل ما كدوز لقطة فيه كتحل فمها على الجهد وهي مافاهمة والو فداكشي لي كتشوف بحال ديك الهبيلة لي غير مبرقة عينيها ومرة مرة تغير وضعية الجلوس ديالها حيث مبقاتش مرتاحة حتى للحظة سمعات لحس لتحت وهي تسد داك البيسي فمرة وناضت بالخف هازة واحد ديكور كان محطوط جنب الكوافوز ...
كونها من الواقعة لي طرات ليها ديما كتخلي شيء حاجة ثقيلة حداها باش دافع على راسها لا تحطات فنفس الموقف ... زيرات على داك ديكور وهي نازلة دوك دريجات بشوية باش ما ديرش الصوت لدرجة لا ضار شيء واحد لعندها وحقق فيها اول حاجة ايلمحها هوما سيقانها الطوال والبيضين ...
وهي غادة كتشوف فارجاء المنزل بان ليها شيء حد واقف قدام واحد الخزانة صغيرة كاينة فبيت الجلوس وكيقلب ... ودغيا جات فبالها بلي ايكون غير شفار باغي يسوط فكلشي ويخليها على ضس ...
وبلاما تفكر كثر زادت بكل دقة حتى قربات لعندو وهو عاطيها بالظهر وبدون مقدمات نزلات عليه للراس نيشان حتى جابتوو طايح فوق الارض ...
رانيا زيرات على الديكور لي فيديها وهي كتحقق فيه باش تشوف هويتوو وغير بان ليها مزير على عينيه من حر الالم وظهرو تقاسيم وجهوو لاحت داك ديكور من يديها بدون شعور ونطقات بارتباك والصدمة متمكنة منها : ع..عي...سى ....
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
ب قربات عندو والرعدة شاداها ... واخا هادي اول مرة تشوفو وهو يشوفها فهاد لاج الا وانها بقات عاقلة عليه عكسو هو لي معرفهاش كاع مسوق غير لديك الدقة لي عطاتوو لراس ... جالس كيكمد فيها على سعدو ووعدو ...
رانيا حطات يديها الصغيرة على كتافوو العراض وقالت بصوت منخفض وباين فيه الندم : سمح ليا اخويا عيسى مكنتش عارفاك نتا لي جيتي تسحاب ليا غير شيء شفار ...
عيسى مبغاش يهز عينيه فيها وهي بداك لبس ... ناض جامع الوقفة غادي فحالو والارض كضور به حيث ناض بزربة ... وكيف تخلخل فالوقفة رانيا شدات فيه من ذراعوو وقالت بقلق : واش نعيط ليك للاسعاف تجي تديك للسبيطار
كتشوف فالدم لي فراسوو وهي عاضة على شفايفها بحالا هي لي جات فيها : كضرك بزاف ...
عيسى سحب ذراعوو بكل هدوء واشار ليها للبيت الفوق وقال بحدة : طلعي بحالك ...
رانيا ماقشبلات والو هادا مالو كيقول ليها طلعي وهي مشقة ليه نص فراسوو ... من المفترض خاصو يخليها تعاونو ماشي يجري عليها : علاش اش درت ...
عيسى غمض عينيه مصبر راسو عليها عند بالو هي بحالها بحال خوها يونس طامعين ليه غير فالورث وفاش عرف لبلان لي وقع ليها استنتج بلي هي وحدة طايشة وماعندها عقل وكتستغل فرصة انها خارج البلاد باش دير لي بغات ونهار دير شيء موصيبة ايقولو العائلة بلي راجل ختها لي توسط ليها هو لي شجعها باش دير الفضايح ... وكونو هو كان عارف هادشي ايوقع من بعد حيث هضرة الناس مكتقاداش داكشي باش سيفك صديق طفولتوو لي عايش حياتوو كلها فالخارج يبقى يحضيها فاش تخرج من الشقة لي مشاركة فيها السكن مع الطالبات باش تمشي تقرا وكذلك منين ترجع ولا تخرج لشيء بلاصة أخرى وحيث سبق هاد الخطوة اليوم وقف على واحد من القرارات الصحيحة لي دار فحياتوو ...
تخطاها بكل برودة دم وزاد لبيتو لي كاين غير لتحت وكيف دخل سد الباب بجهد خابطها بقوة الشيء لي خلا رانيا تقفز من بلاصتها خايفة من طريقة تعاملو معاها ... واخا هي غالطة بداكشي لي دارت ليه مبغاتووش يتصرف معاها هاكاك وخصوصا من بعد ديك الحاذثة أحاسيسها ولاو على سبة واي حاجة كتبكيها ...
وغير جيسط صغير بحال هكاك خلا الدموع دغيا يتجمعو فعينيها بحال الشلال لدرجة مقدراتش تسيطر على راسها وطلعات كتجري للبيت الفوق وهي كتبكي وتقول ما بكيت ...
#يتب...ع
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
