الثانية عشر بتوقيت شوكي

قتل مشترك

صاحبنا مات بسببنا عن طريق الخطأ، وانتقم مننا عن بأبشع الطرق.
اقدملكم نفسي أنا ناجي عندي 30 سنة من كفر الشيخ.
وناجي ده مش مجرد إسمي وبس، هتتأكدوا من معناه لما تسمعوا قصتي.

إحنا مجموعة صحاب من صغرنا ولاد منطقة واحدة (فارس و أنور و عمرو و إبراهيم وأنا ناجي)...

طول عمرنا أخوات وأصحاب ومبنفارقش بعض، واللي بتحصله مشكلة بيستغيث بالباقي ينجده.

لحد ما جه يوم مشؤوم علينا كلنا، لما صحيت من النوم على صوت جرس الباب بصوت مستمر مزعج، ولقيت إبراهيم وعمرو بيدخلوا ويقولولي:-

_كل ده نوم، قوم ألبس عشان خارجين.
طاوعتهم ونزلت معاهم القهوة مستنين باقي أصحابنا فارس وأنور يجولنا.

لقيت فارس اتصل بينا وقال أنه عايزنا ع السطح بتاعه ومعاه مشكله ضروري، كلنا اتخضينا وجرينا روحنا على سطح بيته زي ما قال.

لقيناه قاعد بيبكي ويترعش وجنبه حاجة كبيرة مغطيها بملاية!
كلنا اتصدمنا وأتاكدنا أن اللي جنبه دي جثة.
خوفنا نقرب منها وحاولنا نهديه عشان نفهم هو قتل مين؟ محدش فينا خد باله أن أنور صاحبنا مجاش. كلنا اتوترنا من شكل فارس وقعدته جنب الجثة وحالة الذعر اللي هو فيها.

ولما هدي وبدأ يحكي قال:-

_انا كنت قاعد زهقان ولقيت أنور أتصل عليا بيقولي متنزلش القهوة وأنه عايزني في موضوع مهم بس نكون لوحدنا، ولما وصل خدته وطلعنا السطح عشان محدش يسمعنا زي ما طلب مني، لكن لقيته بيطلع مسدس وبيقولي أنه لقاه في بيت ابوه، وسرقه وجالي عشان يبيعه ويخلص منه بدل ما أبوه يتهور ويعمل بيه اي مصيبة! أنا أول مرة امسك سلاح فحياتي مانتوا عارفين!
خدت منه السلاح وابتديت اقلب فيه ومعرفش أن جواه رصاص ولا بيضرب إزاي ؟ وفجأة طلعت رصاصة مني طايشة غصب عني واللي قدامكم ده أنور صاحبنا.

وبدأ يبكي وينهار من تاني وهو عمال يردد "مكنش قصدي" "مكنتش أعرف" وكلمات كتير زي دي.

كلنا اتصدمنا واتمنينا يكون مقلب من بتوع فارس. عمرو راح يشيل الملاية واتفاجئنا أن كلامه صح، والقتيل كان صاحبنا "أنور".

محدش فينا كان عارف يتصرف، اللي بدأ يعيط واللي حط أيده على دماغه واللي بقا يحضن أنور ويصرخ. كان أسوء يوم يمر علينا في حياتنا وأول اختبار حقيقي فشلنا فيه.

فكرنا نبلغ الحكومة ونعرفهم أنه كان قتل عن طريق الخطأ، لكن كلنا خوفنا صاحبنا ياخد إعدام ويزيد عدد الضحايا، فقررنا إننا نتخلص من جثته وندفنه من غير ما حد يعرف.

عمرو قال إن ترب العيلة بتاعته قريبة وهيروح يظبط مع ساكن الحوش إنه يفتحله التربة من غير ما حد يعرف ويديله شوية فلوس يسكتوه.

متبقاش غيري أنا وإبراهيم وفارس المنهار م اللي حصل. فكرنا ازاي هننزل السلم والشارع بجثة أنور ؟ ومبقيناش عارفين نتصرف. لحد ما رجع عمرو وقال أنا حضرت التربة ويلا بينا؟