الثانية عشر بتوقيت شوكي

أم البنات

عمرك سمعت عن سحر مربوط على فم الطير؟ وكلما طار الطير ذهب عقل المسحور معه؟؟

طب تعالى يا صديقي احكيلك عن فتحية جارتنا اللي قتلت عيالها بسبب السحر وإزاي اكتشفنا السر.

فتحية يا سيدي دي ست غلبانة فاتحة بقالة صغيرة من شباك شقتها اللي في الدور الأرضي. ست طيبة جداً وعلى قد حالها جوزها سابها بتلت عيال أصغرهم طفل يدوب عنده تلت سنين وبنتين تؤام ست سنين.

ولأننا في العمارة كلنا عارفين قصتها وعارفين قد أي جوزها راجل ندل صاحب كاس وسيجارة وقد أيه فتحية كانت بتعاني معاه محدش فينا أستغرب لما فجأة جوزها اختفى وطفش وسابها بالعيال في رقبتها.

على قد ماقدرنا كل واحد كان بيطلع اللي يقدر عليه ويساعد فتحية لحد ما جابت شوية كانتين أطفال وفتحت شباك بيتها تسترزق من الشارع.

لكن الحدث اللي قلب الشارع كله لما في يوم سمعنا صريخ بصوت عالي وناس كتير واقفين قدام باب العمارة منهارين ومش مصدقين اللي شايفينه.

بنت من بنات فتحية مشنوقة على باب العمارة وهدومها متقطعة وباين على جسمها علامات تعذيب بشعة على طفلة في سنها.

مكانتش مجرد علامات حفر بالسكين لأ.. كان وشها سايح من النار كأن حد كان بيرسم لوحة عليها وبيشكلها على مزاجه من أول وجديد.

فتحية من بعد الحادثة ومحدش بقا عارف يكلمها ولا يهون عليها بأي شكل.. مهو اللي شافته في بنتها مكنش قليل بردو أن أي أم تتحمله.

أنا ساكن في الدور الأول وللأسف ممكن اغيب بالاسابيع عن البيت بحكم شغلي، لكن في مرة عملت مشكلة كبيرة مع مديري وسبت الشغل في وقت متأخر ورجعت البيت.

وأنا داخل الحوش سمعت صوت بكى مكتوم جاي من شقة فتحية.. كأن في طفل بيتعذب لكن حد مانعه يصرخ فاللي ظاهر منه عبارة عن أنين خفيف.

كنت محرج أخبط على فتحية في وقت زي ده لاتفهمني غلط.. مانا راجل غريب بردو ومش من حقي.

طلعت فوق لقيت أمي صاحية بالصدفة.. قولتلها "ماتنزلي يا حجة كده تخبطي على فتحية عشان كنت سامع صوت غريب من شقتها وخايف يكون حد فيهم تعبان ولا حاجة.. وأديني موجود بالمرة يمكن محتاجة مساعدة"

أمي ست طيبة أول ما قولتلها لبست خمارها ونزلت تطمن عليها.. مفيش خمس دقايق ولقيتها طالعة وشها جايب ألوان ومخضوضة بشكل غريب..!

حاولت أفهم منها مالها لكن مقالتش غير "أعوذ بالله.. أعوذ بالله متهوبش ناحيتها تاني دي مش طبيعية.. دي اتجننت خلاص"

الفضول أشتغل جوايا أكتر للأسف ولقيت نفسي مش عارف أبطل تفكير في فتحية وعيالها وقعدت افتكر في جثة بنتها اللي شوفتها بعيني متعلقة على الباب بشكل غريب والقضية اللي اتأيدت ضد مجهول.