-بابا، باااابااااا.. هاتلي العروسة دي.
رجعت بالزمن للذكرى اللي عيشت أعاني بسببها، عروستي المفضلة "سمر".
أنا عارفة أن الإسم غريب والمفترض أسميها أي أسم ينفع للعرايس اللعبة، لكن أنا سميتها سمر على إسم صحبتي في الحضانة اللي اختفت فجأة وقالولي إنها سافرت.
وطبعًا لما اكتئبت وحزنت أن سمر خلاص مش هشوفها تاني، سمعت ماما بتكلم خالتوا في التليفون وبتقولها "لميس مكتئبة جدًا بسبب موت سمر، أنا خايفة عليها تتأثر وخايفة أنها تسمع في الحضانة من أي شخص أن سمر ماتت مسافرتش".
خدت صدمة كانت مهلكة على عمري وقتها، ومن خوفي مقولتش لماما إني سمعتها واتصنت عليها، لكن اشتد تعبي لدرجة أني قطعت اكل وشرب لمدة أيام لحد ما دخلت مستشفى واتحجزت.
أزمة موت سمر مَكنتش هينة عليا وقتها، وتعتبر دي أول صدمة اقابلها في حياتي.
لما خرجت من المستشفى أهلي كانوا بيحايلوني بكل الأشكال علشان ينسوني غياب صحبتي المتوفية، ونقلوني كمان لحضانة تانية واتصاحبت فيها على بنات جديدة.
لكن بردو مَكنش فيهم حد زي سمر.
وفي مرة كنت ماشية مع بابا لفت نظري عروسة موجودة في محل ألعاب بسيط.. لكن دي ماكنتش زي أي عروسة والسلام لأ.
كانت نسخة من ملامح سمر وشعرها وجمالها، أول ما شوفتها مقدرتش أتحرك من مكاني ووقفت اقول لبابا بأزعاج وسط الناس رغم أنه مَكنش سلوكي " بابا، بابااااا.. هاتلي العروسة دي".
كان في اعتقادي إني هقدر اعوض غياب سمر بوجود العروسة دي في حياتي، وقد حدث بالفعل.
عروستي سمر بقت أقرب شخص ليا واكتر حد بلعب معاه لدرجة أني رميت كل الألعاب بتاعتي واستكفيت بيها هي وبس.
محدش في البيت كان منزعج نهائي من إسم العروسة ولا تعلقي بيها، حمدوا ربنا إني خرجت من الاكتئاب خلاص وقدرت استرجع نفسي وطفولتي اللي كانت مطفية.
لما كبرت ووصلت الثانوية كنت دايمًا من الأوائل ومتفوقين الدفعة. كان معايا شلة بنات أربع بنات وأنا الخامسة بتاعتهم.
كلهم كانوا عارفين بقصتي مع سمر في الطفولة وصورتلهم العروسة اللي عاشت معايا عمري كله ومستغنتش عنها.
لكن طبعًا مَكنتش بلعب بيها وأنا شحطة كده لأ، الدراسة خدتني واتلهيت وسمر بقت مجرد دمية في رف مكتبتي وجودها بس بيخليني اترحم على صحبتي لما افتكرها.
لما نجحنا أنا وصحابي وربنا كرمنا ندخل نفس الجامعة اللي هنتغرب فيها ونسافرلها لأننا من الصعيد.
كان افضل خبر سمعناه في حياتنا، هو ده فعلاً حلم حياتنا اللي تعبنا وانتظرناه بفارغ الصبر وسهرناله الليالي الصعبة.
أنت تقرأ
الثانية عشر بتوقيت شوكي
رعبقصص قصيرة رعب بالعامية المصرية، حكاية جديدة كل يوم اتنين و خميس
