بصتلها وانا مفزوع وقلبي هيتخلع من مكانه وهي بكل هدوء قامت وقفت ونفضت هدومها وقبل ما تمشي قالتلي "رجلي لسه مرجعتليش..هستناك ترجعها"؟!...
اتسمرت مكاني من الصدمة.. مبقتش فاهم حاجة!
أنا مخدتش شئ من الجثة عشان ارجعه وليه بتظهرلي أنا رغم أنها اتدفنت؟!
طلعت البيت وأنا قلبي مقبوض من اللي بيحصلي وقولت هطبق للصبح لحد ما أروح الجامعة وافهم من الشباب أي اللي بيحصل بظبط..
كان البيت عندي كله نايم فدخلت اوضتي ريحت جسمي ع السرير قولت أشغل وقتي واقلب ع السوشيال في أي شئ لحد ما الصبح يطلع...
شغلت محاضرة متسجلة للشيخ حازم شومان واندمجت معاه ونسيت كل شئ تقريباً وفجأة لقيت محتوى الفيديو اتغير والشاشة قلبت اسود وظهر منها عين فقط بتبصلي وبتربش!؟
رميت التليفون تلقائي ولسه هتحرك لقيتها في وشي.. مقربة مني ومش ظاهر منها غير عيون لونها ابيض مبرقالي وبتقولي "إياك تنسى"
سنانها ظهرت وهي بتتكلم وانفاسها كانت بشعة لقربها مني.. رجعت بضهري بسرعة وقعت الناحية التانية من السرير بصيت لقيتها اختفت في لحظة...
الموضوع ميتسكتش عليه وشكله أكبر مما أتخيل... خرجت في الصالة شغلت الشاشة وفضلت قاعد بتمنى الليلة الصعبة دي تمر عليا بسلام..
صحيت والدتي على صوت الشاشة وخرجت قالتلي "أي يا علاء الصوت ده واي اللي مصحيك لحد دلوقتي؟"
مكنش ينفع اقولها حاجة وقولتلها "معلش يا ماما سهران شوية مش جايلي نوم"
سابتني ودخلت الحمام وبعد دقيقتين لقيت والدتي خارجة من الاوضة تاني وبتقولي "أي يا علاء الصوت ده؟ وأي اللي مصحيك لحد دلوقتي؟"
قلبي اتقبض والدم وقف في عروقي؟ هي إزاي خرجت تاني والمشهد بيتكرر قدام عيني؟ طب ومين اللي دخلت الحمام دي!؟
رديت عليها نفس الرد بس وانا بتكلم بالعافية وصوتي متقطع من الخوف "معلش يا ماما سهران شوية..مش جايلي نوم"
ردت وقالتلي "ماشي يحبيبي بس وطي الصوت شوية عشان ابوك ميصحاش.. عايز حاجة؟"
هزيت دماغي بعلامة الرفض ورجعت هي الاوضة من تاني.. عيني بقت ع الحمام ومبقاش عندي ثقة في أي حد حتى أهل بيتي...
سمعت صوت باب الحمام بيتفتح وبتخرج منه أمي اللي بتمشي على رجلين حيوانات...!؟ هي نفس اللي شوفتها تحت في الجنينة..
وقفت على باب أوضة ماما وقالتلي "اياك تنسى"
ودخلت الاوضة وعيونها كلها شر..!
أنا بقيت خايف على أهلي مش على نفسي وبس.. واضح انها مش هتسبني وأنها قدرت تعمل كل ده في يوم واحد يبقى اكيد اللي جاي مش خير...
قعدت مفتح عيني ومركز كويس أوي مع باب أوضة والدتي مستعد لأي حاجة تحصل من تاني.. ومعرفش إزاي وسط كل التركيز ده انا غيبت في النوم بدون ما أشعر!...
أنت تقرأ
الثانية عشر بتوقيت شوكي
Horrorقصص قصيرة رعب بالعامية المصرية، حكاية جديدة كل يوم اتنين و خميس
