الثانية عشر بتوقيت شوكي

تخفيض فنادق2

ردت مي عليا ببرود وقالتلي "ياعم مانا كمان مش مي، خلينا نكمل ونلعب شوية وخلاص"؟؟!.

اتفزعت مكاني ونطيت من على الكرسي وانا بقولها "نععععممممم يختي".

ضحكت بصوت عالي وهي بتقولي "شوفت بقا مش لوحدك بتاع مقالب".

كنت محتاج اتأكد أنها مي مراتي فعلاً وحبيت اختبرها وسألتها "طب عشان اتأكد أنك مراتي بجد، قوليلي أول مرة قولتيلي بحبك كانت أمته؟؟".

قعدت تصقف بأيديها وهي بتضحك وبتقولي "يابني أنا لحد دلوقتي مقولتهاش أصلاً".

وقتها اتاكدت أنها مي مراتي فعلاً لأنها عمرها ما قالت كلام حلو ولا رومانسي وبتعتبره من المحرمات رغم إني جوزها بردو.

خدت أنفاسي بالعافية وانا بتنهد وبقولها "حرام عليكي يا شيخة وقعتي قلبي، ده وقت هزار ده".

ردت وقالتلي "ده حاجة بسيطة من المقالب اللي بتعملها فيا، وعلى فكرة أنا كنت في الاوضة لوحدي أنت كنت بتاخد دش وبتجيب الأكل ولقيتك صرخت وجريت فعرفت أنك بتعمل مقلب كالعادة فقعدت أكل لوحدي وقولت أنك هترجع بس معرفش أنك هتكبر الموضوع كده وتلغي الرحلة، عشان خاطري يا حسام أنا ملحقتش أفرح خلينا ع الأقل يومين هنا".

دماغي لفت ومبقتش عارف اللي شوفته فوق أنا والعامل ده فعلاً تخاريف ولا هي بتقولي كده عشان تكمل شهر العسل وخلاص؟؟.

فضلت تزن عليا وهي بتترجاني وتقولي "عشان خاطري يا حسام ده أول طلب اطلبه منك، أنا أول مرة اكون مبسوطة كده متكسرش بفرحتي عشان شوية هلاوس، بعدين ماهو لو في عفريت كنت أنا أول واحدة هربت لكن أنا مشوفتش حاجة نهائي ".

على أي حال مقدرتش ازعلها واعتذرت للاستقبال وبلغتهم أني هكمل الحجز خلاص وده كان سوء تفاهم مني.

طلعت الاوضة مع مي وأنا كُلي خوف أشوف الست العفريتة دي من تاني وبدعي كلام مي يطلع صحيح وإني بهلوس من كتر المقالب اللي بعملها مش أكتر.

الاوضة كانت عادية فعلاً ومفيش فيها أي اشباح أو حاجة بتحصل، قعدت اتغديت لأني مكلتش من الصبح وحسيت إني محتاج أرتاح من اليوم المتعب اللي مريت بيه.

طفينا النور ونمت على جنبي الشمال ومي ورايا قاعدة ماسكة تليفونها كالعادة قبل النوم.

دقايق وحسيت بأيد بتتحرك على ضهري وحاسس بوجود ضوافر بتخربش بشكل بسيط؟؟

قومت مفزوع وانا برمي الغطا من عليا وبصرخ "رجعت تاني رجعت".

لقيت مي فاتحة الكشاف وقاعدة على السرير مصدومة وبتقولي "في إيه يا حسام بصور المانكير على ضهرك عشان التيشيرت بتاعك ابيض وهيوضح الصورة".

حسيت وقتها فعلاً إني موهوم وبتخض من أي شيء رغم إني معتاد حركات التفاهة دي من مي لكن أنا دلوقتي بربط كل حاجة بتحصلي بالست الممسوخة اللي شوفتها.