الثانية عشر بتوقيت شوكي

أنس الجزء الثالث (زين)

الجزء الثالث "حكاية زين"

جريت بلهفة وفتحت الباب عليه وسألته "أنت بتكلم أنس صح؟ هو موجود؟"
لكن صدمني لما قالي "لأ يا ماما، ده زين وعايز يلعب في وشي بالولاعة" !!!......

أنا مش فاهمة ولا مستوعبة حاجة خالص، زين مين؟ معقول يكون مُدثر له أخوات تاني ضحية زي أنس؟ ولا مجرد هلوسة أطفال.

قعدت جنبه وانا بقلب عيني في الاوضة وبستفهم منه "زين مين يا حبيبي؟ وشكله عامل إزاي"

شاورلي على السرير وهو بيكمل لعب وبيقولي " هتلاقيه هنا تحت السرير، ولابس قناع زي سوبر مان بس عليه أحمر ومس حلو"

أنا استنتجت اللي مدثر يقصده في لحظتها، هو يقصد أن الطفل ده لابس قناع متخفي وكمان عليه دم أحمر وشكله تقريباً مرعب بالنسباله!

قولت لازم اتشجع وأعرف الحقيقة، قربت بشجاعة ورفعت المرتبة وأيدي اترعشت والمرتبة وقعت مني لما لاقيت تحت السرير ولاعة بجد!!..

اي اللي بيحصل ده؟ مستحيل يكون شئ تبع عصام طليقي وأنا عزلت كمان من بيتنا القديم وأستأجرت شقة بعيدة في حي راقي.

خدت الولاعة من تحت المرتبة وقعدت اقلبها في أيدي افكر في الإسم.. زين.. زين.. زين؟

افتكرت حاجة كانت بعيدة تماماً عن ذاكرتي.. من أيام خطوبتي على عصام كان له واحد صاحبه إسمه شريف فاتح كافيه وبنتقابل هناك كتير، صاحبه ده كان معاه بيبي صغير حوالي سنة ونص وقال إن إسمه زين، ايوا أنا فاكرة كويس!...

كنت بستغرب معاملة عصام القاسية مع الاطفال وقد اي كان بيرفض يشيله وبيقرف، ولما اخده من صاحبه يفضل يقولي "هنفضل في شغل الحضانة ده كتير"

ويمكن ده سبب من الأسباب اللي كانت بتقلقني منه ومن شخصيته، لكن أي هيجيب زين بعد كل السنين دي؟ وانا حتى مشوفتوش غير وهو رضيع مش أكتر ؟

مقدرتش أتحمل وقررت اروح الكافيه القديم وأسأل على شريف وأعرف مال إبنه وإيه اللي حصله، وكل خوفي ليكون عصام هو السبب في أذيته بردو.

خدت مُدثر معايا ومنتظرتش لحظة وروحتله على الكافيه لقيته موجود. اتفاجئ بوجودي ورحب بيا وسألني عن اخبار عصام لأن صداقتهم شبه منعدمة من وقت ما سافر بره.

قعدنا شوية نتكلم وسألته وانا قلبي مقبوض من إجابته اللي ممكن أسمعها "أومال فين زين إبنك يلعب مع مُدثر مش إسمه زين بردو؟"

كنت خايفة أسمع اي خبر وحش عنه ورجلي بتتهز بتوتر واضح لحد ما قالي "إسمه زين ايوا، وحالياً مسافر مع مامته بتشتغل بره"

سفر؟ هو قال سفر؟ اللي سمعته ده بجد؟ كل اللي جه فبالي دلوقتي أن مراته بتخونه ومسافرة مع عصام دبي، سألته وقولتله "هي مسافرة فين بظبط"