الطحان ده يبقى جدي"
قولتله الكلمة اللي مكنتش قادرة انطقها من بدري، وفضلنا احنا الاتنين قاعدين بنبص لبعض بدهشة مش عارفين المفروض نقول أي ؟!....
لقيته بيسألني بحيرة وبيقولي "جدك إزاي؟ ده معروف أنه بيت مسكون من زمان وأي راس الست اللي شوفتها دي كمان؟"
فجاوبته يمكن اللي هقوله ده يربط حدث بالتاني خصوصاً أن الحادثة اللي حصلت زمان راس جدتي اختفت وقتها وقولتله:
_من حوالي عشر سنين كده جالنا خبر عن حادثة بشعة حصلت في بيت جدو.. كنا حوالي الساعة ٢ بليل لقينا تليفون بابا رن ولقينا حارس البيت عند جدو بيقوله "ألحق يا بيه في كارثة في بيت البيه الكبير هنا"
كلنا اتخضينا ونزلت أنا وماما مع بابا وروحنا ع البيت على طول لقينا بوليس وإسعاف وناس كتير مجتمعة جوه وبره البيت، شوفتهم وهما بينقلوا جثة جدي وبيحققوا مع بابا في شوية أسألة من بتوعهم، لكن كان أبشع موقف شوفته وقتها لما خرجوا جدتي ملفوفة وقالوا لبابا "للأسف راس جثة السيدة دي مش مش موجودة!؟"
وكان العجيب إننا لقينا جثة واحد غريب مضروب بالرصاص موجودة معاهم في نفس مكان الواقعة.
حققوا مع البواب ومع الجيران وسألوهم لو شافوا اي حد داخل او خارج في الليلة دي غير الراجل المقتول اللي محدش يعرفه ده، لكن محدش شاف حاجة نهائي ومحدش بقا فاهم مين الراجل ده وأي علاقته بجدو وتيتا وليه مات معاهم؟ وتقريباً ده كان الشاهد الوحيد ع الحادثة ومات زيهم عشان الحقيقة تختفي معاهم.
ومن يومها البيت ده مقفول زي مانت شوفت كده ومحدش بيروح هناك إطلاقاً، لكن أنا لاحظت شئ غريب أوي وانت بتتكلم وبتحكي!
رد وقالي "حاجة اي؟ والله ما أعرف جدك يبنتي بعدين أنا كنت طفل يعني أخري مسدس ماية"
ضحكت على اسلوبه اللي بيتكلم بيه بجد وقولتله:
_لا مش قصدي... بس انت قولت ان في شباب كتير راحت هناك ومرجعتش صح؟ طب اشمعنا انت خرجت؟ وليه راس جدتي اللي اختفت يوم الحادثة ظهرتلك؟ هل ده معناه انها موجودة في البيت ومحدش شافها مثلاً ؟
لقيته هو كمان حط أيده على راسه وهو بيفكر وبيحاول يربط معايا الأحداث وقال:
_يمكن عشان أنا بركة شوية مثلاً ومبخافش ف جدتك قررت تظهرلي؟ واللي قبل مني يمكن سابوا الشغل وهربوا مثلاً من الخوف مختفوش ولا حاجة؟
فكرت في كلامه وانا حاسة أن في حاجة غلط بتحصل، وأن اكيد كل دي مش مجرد صدف عابرة!
معنى ظهور راس جدتي في البيت أن راسها لسه موجودة ومحتاجة تدفن أكيد مع باقي جسمها، فسألته سؤال يمكن يربطلي حدث بالموضوع وقولتله:
_طيب متعرفش هل رقم بيت الطحان بيتصل ع الماركت بتاعكوا انتوا بس؟ ولا سمعتوا مثلاً أن الحدث ده اتكرر في مكان تاني جنبكوا؟
أنت تقرأ
الثانية عشر بتوقيت شوكي
Horrorقصص قصيرة رعب بالعامية المصرية، حكاية جديدة كل يوم اتنين و خميس
