الثانية عشر بتوقيت شوكي

اسكربت "جالي عريس"

واحدة من أقرب الاصدقاء المقربين مني جداً بشكل شخصي بعتتلي من يومين الرسالة دي.

اعتبرتها نوع من أنواع الفضفضة وأنها محتارة زي أي بنت مترددة في اختيارها لشريك حياتها خصوصًا لو الموضوع جاي صالونات.

دخلت اتكلمت معاها وقولتلها:

-أولاً مبارك عليكي ويارب يجعله خير ليكي بإذن الله، احكيلي ونفكر سوا.

ردت وقالتلي كلام عجيب جداً، بتقولي:

-يا شهيرة مبارك إيه بس، أنا هرفضه ومش هوافق أصلاً حتى أقعد معاه.

كنت مقدرة خجلها وتوترها من الرؤية الشرعية وقولتلها:

-اهدي بس يا بنت الناس أنتي كبرتي خلاص وطبيعي تمري بمواقف زي دي مينفعش ترفضي كده بلا سبب يمكن ربنا كاتبلك فيه الخير، أنتي رفضاه ليه قوليلي؟

جاوبتني بكلام اغرب لما قالتلي:

-الشخص ده مُريب يا شهيرة. عمري ما شوفته ولا كلمته ويعرف عني كل حاجة حرفياً.

سألتها:
-هو اتقدملك إزاي أصلا ؟

ردت وقالتلي:

-بصي أنا هحكيلك من الأول خالص الموضوع جه إزاي.
أنا ياستي من أسبوع كنت في فرح واحدة صحبتي وزي مانتي عارفة هيصة الافراح واللي بيحصل.

كان في شاب واقف يتتبعني بعينه من بعيد بشكل ملحوظ لدرجة أن صحابي كلهم خدوا بالهم.

ولما خرجت من القاعة حسيت بخيال ماشي ورايا لكن لما كنت بتلفت مَكنتش بلاقي حد..!؟؟

رجعت البيت وتاني يوم الصبح لقيت ماما فرحانة اوي وبتباركلي وبتقولي "مبروك جالك عريس"؟؟

قولت بردو عادي وجايز حد من المنطقة ولا الجيران أو من قرايبي والموضوع محطتهوش في دماغي.

لكن لقيت رقم غريب بيبعتلي على الواتساب تاني يوم بنفس صورة الشاب اللي كان في الفرح وبيقولي "دخلت البيت من بابه أهو ومرخمتش عليكي"..؟؟

أنا وقتها اتجنتت.. الشخص ده جاب رقمي منين وعرف بيتي ولحق يوصل لأهلي كمان كل ده في ليلة واحدة من بعد الفرح؟

وسيبك من كل ده أنا قولت جايز أنه يعرف حد من صحابي وقدر يوصل لكل المعلومات دي بسهولة مثلاً الكارثة كلها بقا في اللي جاي.

أنا كل ده بسمعها ومذهولة ومن جوايا بقول هيحصل إيه أكتر م الهباب اللي بتحكيه ده وقولتلها:

-كملي سمعاكي.

كملت كلامها اللي حرفياً رعبني أنا شخصياً وقالتلي:

-قولت أتعرف عليه بما إنه كده كده اتقدم خلاص وحددوا زيارة بعد أسبوع وسألته عن بياناته وحياته والاسئلة العادية خالص بتاعت أسمك وسنك ومنين.