💔الجزء 179💔
كانو مجموعين فصبيطار..مصدومين مافاهمين والو وماعارفينش منين خرج ليهم هدشي...واقفين حدا غرفة،العمليات كيتسناو وقلبهم كيضرب فلمية..ربعة دسوايع ومازال ماسالات..
طاهرة متكية على الحيط وكتبكي خايفة تخسر ولدها
نرجس واقفة اونفاص مع لباب والدموع فعنيها كتقرا القرأن وطلب من ربي ينجيه..وهي كانت جالسة فوق الكرسي ومرجعة راسها اللور غير كتشوف بعنيها بحال شي جمد لا دموع لا حتى تعبير فوجها
على برة
كانو واقفين مجمعين كيحاولو يفهمو شهادشي واقع
ناصر :حنا فاش سالينا هدشي ماخلينا تاشي عداوة مع شي حد
كمال لي جا ملي سمع لخبار:عارف..وهدشي لي وقع ماشي صدفة..راه كان مقصود .شي حاجة ماشي هي هديك
ناصر:بغيت نعرف غا شكون ..وغندمو على نهار لي تجرأ وهجم على داري
كمال:ناصر هدشي ماغاينفع بوالو..نتوما خرجتو من هدشي ادن ماتوليوش تورطو
ناصر:وهداك لي لداخل راه ولدي لي كانو ايقتلوه
كمال:راه انلقاوهم وايتحاسبو انا بيدي انشوف هاد القضية
عماد:ناصر صافي كلشي غيتحل وانعرفو اش كاين
ناصر:نشوف فين وصلات ااعملية
دخل وتبعوه مالقاو تاشي خبر
ناصر:مالهم تعطلو
طاهرة تنهدات:ماعرفتش ..خايفة اناصر بزاف على ولدي..عنداك توقع ليه شي حاجة
ناصر:ماتخافيش ماعندو مايوقع ليه ايكون بيخير
طاهرة:الله يحفضو لينا
داز الوقت خرج الطبيب ميد لكمامة على فمو تجمعو عليه من غيرها هي بقات فبلاصتها
الطبيب:بصعوبة باش قدرنا نزولو القرطاسة جات مابين الرية والقلب اي غلط كنا انخسروه..الرية تجرحات شوية ولكن مع الوقت اتولي مزيان..المريض تعدى مرحلة الخاطر دابة ماغايفيق تا لغدا فصباح
كلشي بقة كيحمد الله فرحانين
ااطبيب:يمكن لشخص واحد يدخل يشوفو ويبقة معاه فليل
نرجس:انا عفاك.انا مراتو
الطبيب:نتي هي عائشة ..قبل نبداو العملية كان كينطق بسميتك حتى فقد الوعي..عرفتها اتكون مراتو..دخلي ابنتي شوفيه وتطمني عليه وجودك معاه غيعاونو..نخليكم
بحال شي سطل دلما تكب عليها وهي كتسمع لكلامو .بلعات ريقها ..كلشي كان كيشوف فيها بقات فيهم..نزلو دموعها مسحاتهم بالخف :اندخل نشوفو
تلاقاتها الممرضة عطاتها رداء طبي وكمامة ودخلات بقات واقفة كتشوف فيه وهو ناعس بصدرو لعاري فيه لفاصمة وشي سلوكة ديال نبضات القلب..وسيرو فيديه..قربات لعندو بشوية وشدات ليه فيديه نزلو دموعها وقربات باست ليه يديه وهمسات ليه:خفت توقع ليك شي حاجة كنت غنموت
وسكتات وهي كتشوف فيه ودموعها نازلين رجعات همسات ليه:حتى ونت كاتموت كتنطق فسميتها لهاد الدراجة انا ماكانسوة عندك والو ايوسف..خايفة بزاف نكون خسرتك
تنهدات:كنطلب من ربي هدشي يتبدل ويحنن قلبك فيا
سمعات صوت الممرضة:مدام المريض خاص يرتاح تفضلي معايا علامن نضرب ليه شوكة
هزات راسها باه وخرجات
طاهرة:واش راه بيخير
نرجس وهي كتحيد الرداء وتمدو للممرضة:راه مزيان
طاهرة:صافي ابنتي سيري ترتاحي بحالك فالدار راك عييتي
نرجس هزات راسها بلا:غا خليني اخالتي بغيت نبقة
طاهرة شافت فعائشة لي ملي جلسات ماتحركاتش من بلاصتها وغير كتشوف بعنيها قربات لعندها:دخلي تشوفيه
عائشة شافت فيها وجاوباتها ببرودة:لا
طاهرة جلسات حداها:راكي سمعتي شنو قال طبيب كان كينطق فسميتك قبل يغيب
عائشة:سمعت.راه مازال يفيق ونشوفو اخالتي
طاهرة:عائشة قوليلي اش واقع ..فصباح كنتي ماشي هي هديك.. نزلتي كتبكي..ودابة شوفي حالتك كيف دايرة
عائشة:ماكاين والو اخالتي كوني هانية .غير من هدشي لي وقع
طاهرة:ولاش كنتي كتبكي قبل يوقع داكشي
عائشة تنهدات داكشي مازال كيحرق فقلبها:والو اخالتي غير تزايدت انا ونرجس فالهضرة داكشي لاش
طاهرة شافت فنرجس:ماتديش عليها ..خصوصا فهاد ااايام
عائشة هزات راسها باه وكملات الصمت ديالها غا كتشوف بعنيها
داز الوقت
دوزات نمرتو:عصام عفاك اجي مورايا
عصام:واخة ياك لاباس
عائشة:والو غا عييت
عصام:شوية ونكون عندك
عائشة ناضت ومشات بلا مايحسو بيها نزلات لتحت كتسناه ..حتى وصل وركبات معاه
عصام شاف فيها وفحالتها كيف دايرة:ياك قالو راه ولا بيخير والعملية هي هديك لاش دايرة هاد الحلة فراسك
نزلو دموعها:والو اخويا راه غير ماجالي
تنهد مابغاش يضغط عليها
عائشة:ديني لدار ماما ..
هز راسو باه وغير الاتجاه لدار الزاهية ..طلعات .حلات ليها لباب
الزاهية:على سلامتو ابنتي صافي دازت الحمد الله
شافت فهارون لي مفرشين ليه فالارض ومدورين بيه الالعاب..ملي وقع داكشي.،عطاوه لزاهية يبقة معاها حسن..قربات وهزاتو..عنقاتو..وبدات كتبكي..تا تسمع صوتها..مازال كلامو كيتردد فودنيها..مازال داك نار شاعلة فقلبها..جرحها بزاف وكواها فكبدتها
الزاهية تحنات لعندها:ابنتي ماديريش هاد الحالة فراسك..يوسف راه ولا بيخيير صافي
عائشة غير كتبكي ودافنة ولدها فصدرها..كتبكي عليه وهو بين يديها بحاليلا مات...راه صعيبة عليها ولدها مايبقاش ولدها وهي عايشة..مسجل بسمية مرا خرا ..زيرات عليه ماهتاماتش لكلام الزاهية لي كتصبر فيها
خرجات سارة من لبيت على صوت بكاها ..بقات واقفة منضرها كيضر فالقلب وهي شادة ولدها وكتبكي..وتاهو ناض يبكي معاها...
الزاهية نزلو دموعها:غير قوليلي ابنتي مالك ماتخلينيش هكا..شنو دارو ليك قلقك لهاد الدراجة..انا ناخد لبنتي حقها غا قوليلي..ياك انا ماماك لي واقفة معاك..قوليلي شكون أداك
عائشة بصوت باكي:تا واحد اماما انا أديت راسي براسي..انا لي حمقة وهبيلة نستاهل
وكملات بكاها تا حسات بدموعها صافي نشفو ..ناضت وهارون فيديها ودخلات للبيت وسدات عليها..تكات فوف النموسية وجبدات ترضع هارون ..غمضات عنيها ونعسات هي وياه
فالجيهة لوخرا
كانت جالسة هي ومها فلكافيتريا دطبيب..كتشرب قهوة وهي ساهية ..وجها شاحب وتحت عنيها زورق..شعرها مجموع باهمال
تنهدات:يلاه تمشي بحالك معايا.ونسايه عليك.وعيشي حياتك بعيدة عليه
شافت فيها:مانقدرش اماما
ملاك (روبي)ضربات فوق الطبلة بيديها حتى قفزات وهضرات وهي عاضة على سنانها:شهاد الدل لي نتي فيه.ماسمعتيش طبيب..راه كيهترف بسميتها وهو بين لحياة والموت ..شنو بغيتي كتر من هدشي..شوفي حالتك كيف ولات..عتارف بيها مراتو من بعد ما قالك غا زواج مؤقت ..طلي على صحافة كلشي كيهضر على زواجهم ..ماعرفتش منين جبتي هاد النفس
نرجس نزلو دموعها:ماكايهمنيش.ماغانسمحش فراجلي ونخليه ليها..هي هدشي لي باغة...هو راجلي قبل منها وهي لي غتنساحب ماشي انا
ملاك:كتبقاي فيا والله
وناضت وخلاتها جالسة بوحدها
نرجس رجعات شربات من قهوتها ودموع نازلين من عنيها.ماحسات براسها تا زدحات كاس دلقهوة مع الارض وغوتات:الله يااااخد فيك الحق
كلشي بقة،كيشوف فيها..حطات راسها فوق الطبلة وهي كتبكي..بقات شحال هكاك..هزات راسها كان كلشي كيشوف فيها.مسحات دموعها وناضت طلعات لفوق
داز هاد النهار..وجا نهار جديد
حل عنيه بشوية..حس بشي وجع على صدرو ..تنهد ودور وجهو فاش حس بشي حد شاد ليه فيديه..كانت نرجس غير شافتو بتاسمات بفرح:على سلامتك احياتي..ماتصورش شحال فرحانة..باش كتحس ياك لاباس
هز راسو باه:مزيان
قربات وباست ليه يديه:انمشي نعيط للطبيب
خرجات شافتهم قدامها:يوسف فاااق راه بيخير
كلشي فرح دخلو لعندو..وهي مشات جابت طبيب
فحصو الطبيب وتأكد من صحتو:كلشي مزيان.غير خاص ترتاح ومادير تاشي مجهود ..تبع دوة ديالك وصافي اتبقة معانا هاد النهار وغدا ان شاء الله يمكن ليك تمشي لدارك..والحمد الله على سلامتك..
وخرج
طاهرة تحنات باستو على راسو:الله يخليك لينا اولدي
ناصر ضرب ليه على كتافو بشوية:خلعتينا عليك
هز راسو غا باه وهو كيقلب عليها بعنيه
نرجس:انا غنكون ديما معاك حتى تولي بيخير
وحطات راسها على كتافو
طاهرة:مسكينة بقات معاك ليل كامل مانعساتش واخة قلت ليها تمشي لدار وترتاح مابغاتش ..دابة عاد رجعات فيها روح
شاف فنرجس بعد شعرها على وجها وباسها على راسها:صافي دابة راني بيخير..سيري ترتاحي
لابغيتي
بتاسمات وهزات راسها بلا:بغيت نبقة معاك تاتخرج من طبيب
مسح ليها بشوية على شعرها ودور وجهو كيشوف جيهت لباب..نطق وهو كيشوف فطاهرة:عائشة فين هي
طاهرة:راها عند مها هي وهارون..كانت عيانة.مشات ترتاح
يوسف ببرود:عيطي ليها تجي
طاهرة:واخة
نرجس:انا معاك غير خليها ترتاح
ماجاوبهاش ..وهو كيشوف فصدرو..وكيفكر فداكشي لي وقع لبارح..شاف فناصر:ماعرفتوش شكون هادوك
ناصر:لا مازال كنبحتو
يوسف هز راسو بآه وتفكيرو مع داك الهجوم..
طاهرة خرجات من الشومبر ودوزات نمرتها:بنتي كي صبحتي
عائشة:الحمد الله اخالتي
طاهرة:وهارون لاباس عليه
عائشة:تاهو بيخير
طاهرة:ماغاتسولينيش على يوسف
عائشة تنهدات ماباغة تسمع والو:ايكون بيخير
طاهرة:اه فاق عاد دابة وراه مزيان
عائشة:ايوا الحمد الله
طاهرة:سول عليك وقالك اجي..جيبي هارون ابنتي واجيو هنا نصيفط ليك الشيفور
عائشة:عيانة اخالتي ماقادراش نجي..نرتاح ونولي مزيان ان شاء الله و نشوفو
طاهرة:اجي غا شوية وسيري..حشومة
عائشة:سمحيلي اخالتي ولكن والله مانقد نجي..نرجس راها معاه
طاهرة تنهدات:صافي واخة رتاحي
وقطعات ودخلات تاني للشمبر..كانت كتعاونو يشرب دوة..شاف فيها:راها جاية
طاهرة:قالتلي ماقادراش تجي عيانة..تا صوتها باين عيان ..ترتاح وتجي
قوص حواجبو وماجاوبهاش
دخلات الممرضة:سمحولي المريض خاص يرتاح ..
خرج كلشي ضربات ليه الممرضة برا ورجع نعس
