خلات ليها ضور خافت وخرجات من لبيت تفكيرها مشوش بزااف..دخلات لبيتها شربات دواها وتخشات فبلاصتها معنقة لمخدة نعاس طاير من عنيها كيف غتنعس وصباح ايكون ولدها هناا فالمغرب قريب ليها تنهدات وهي كتشوف كليفونها كيصوني باسم (كريم المجاهد)بقات كتشوف فلابل صونا تا شبع وقطع ..ورجع تاني صونا جاوبات:الو
كريم:كي بقيتي
عائشة:الحمد الله شكرا
كريم:ماديري فبالك والو احم انا ديما اتلقايني معك واي حاجة حتاجيتيها غتنفد..
رجعات شعرها اللور وجاوبات:شكرا ولكن ماغانحتاجكش حيت قادة براسي
ميل فمو لابتسامة خفيفة هدشي لي كيعجبو فيها:ماتعرفي دنيا وزمان هادي وماشي اي واحد كنعرض عليه مساعدتي غا ناس لعزاز عليا
تنهدات :اهاا
كريم:المهم نخليك ترتاحي تصبحي على خير
عائشة :تصبح على خير
وقطعات وهي مازال هازة طليفون بغات تدخل لسوشيل ميديا تشوف الاخبار ولكن ماقدراتش رجعات طليفون لبلاصتو وتكات على الخدية كتفكر
دازت هاد ليلة وصبح صبااح جديد
واقفة حدا الشرجم كيطل لبرا ليل كامل مانعسات ومازالة فايقة والو واش نعاس جاها كل تفكيرها مع ولدهاا لي غيكون دابة وصل حطات راسها على زاج دشرجم كتشوف شتا كطيح سمعات طليفونها كيصوني كانت لا لاغم زعمة توقيت باش كتفيق للخدمة قربات وحبسات صوني .وخرجات من الكوزينة خاصها قهوة باش تصحصح قداتها وجلسات كتشربها ..داز الوقت حتى كتسمع صوت طليفون ديال دار عرفاتو طرونصبور مشات جاوبات:شكون
جاوبتها اامرافقة ديال الطرونصبور:الطرنصبور جوهرة امدام
عائشة:جوهرة ما غاتقراش اليوم تا لغدا ان شاء الله
المرافقة-:ياك لاباس
عائشة:والو باس غير عندنا شي الضروف
المرافقة:مايكون باس
وحطات طليفون فبلاصتو وكاسها فيديها كتشرب منو ماتقدش تصيفطها للمدرسة اكيد دنيا اتكون مقلوبة والهضرة بزااف وكلشي سايق لخبار .خليها فدار حسن تفاديا لشي حاجة بقات غادة جاية فدار متوترة بزاف حطات الكاس وبدات كتماصي فعنقها يحيد هاد التوتر لي طير عليها نعاس ليل كامل وكيكمل عليها دابة
دورات وجها فاش شافتها خارجة من لبيت كتمسح فعويناتها:ماما صباح الخير
عائشة:صباح الخير بنتي
جوهرة:ماغانمشيش لمدرسة
عائشة هزات راسها بلا:لا احبيبة تا لغدة
حلات عنيها فاش تفكرات شنو اليوم:مامااا ليوم خويا وبابا غيجييو يلاه نمشيو نستقبلوهم عفااك
عائشة:حبيبة غتشوفي خووك وكلشي ولكن صبري شوية صافي
جوهرة دلات شفايفها:ولكن انا بغيت نمشيو..
قاطعاتها:كنواعد اتشوفي خوك صافي اجي معايا
جوهرة:واخة ماما
دخلات للكوزينة توجد لفطور دماغها مشوش مامركزاش شهقات فاش طيحات من يديها لكاس رجعات اللور كتشوف فيه مهرس ساطت وهي كتشوف مع جنابها باش تجمع داكشي
جوهرة:ماما مالكي
عائشة تحنات كتجمع داك زاج:والو ابنتي والو
جمعات داك زاج ووقفات كتنهد:صاافي اعائشة غيدوز مزيان
وكملات توحاد لفطور وحكاتو فطبلة كتشوف فبنتها كتامل ودوي ولكن دماغها سارح لبعيد كلات شوية على ود دوة ...شرباتو وتكات فوق الطبلة وهي كتسمع فكلام جوهرة لي غير كدوي وتقول داكشي لي فقلبها مازال بريئة ماعارفاش اش داير بيها
شافت طليفونها كيصوني جاوبتها قالتلها ماغاتجيش غدوز هاد النهار فدار
نمشيو لبلاصة خرا وبالضبط فالمطار
نزل وهارون شاد ليه فيديه موراه يحيى ولينا..لقا واحد المجموعة من الصحفيين لتحت ولحراسة متشددة ..نزلو وهوما كيصورو مابغة يقول تاشي حاجة حيت كلشي واضح..دخلو للمطار ورحالو كيكملو الاجراءات خرجو لعلى برة ووقف وهو كيشوف بزااف دناس مستقبلينو ولاد بلادو كيرحبو بيه الصوت تصفاار وسميتو مسموع بالجهد ولافيتات وكلشي باغي يسلم عليه بتاسم حس بواحد الفرحة فشكل وهو وسط بلادو لي غبر عليه كيشم ريحت بلادو كترجع فيه الروح بقة كيشوف فيهم وهو راسم على وجهو ابتسامة..هارون فرحان وكيدير ليهم باي باي بيديه ..حل ليه الشيفور لباب ركب هو ولدو ومعاهم لينا ويحيى ركب فطموبيل ديالو وتوجهوو لدار لقصر الزعيم
قصر الزعيــــــــم
بصعوبة باش قدر يدخل للدار من صحافة لي كانت مجموعة قدام الدار ...غير دخل لقا استقبال من نوع اخر من طرف عائلتو لي كانو ايطيرو بالفرحة طاهرة كتبكيي وتعنق فيه وتبووس فرحانة بيه وهارون كيهزوه واحد بواحد كلشي باغي يتعرف عليه شبع تعناق وبوسان وهو غا مبتاسم كيشوف فعائلتو جديدة لي كان بعيد عليها ..ساعة دلمكانة كلها استقباال ماقاداهمش الدنياا..طاهرة كتزغرت بحاليلا ليوم عييد راه كتر من لعيييد حفيدها وولدها رجعو ليها سالمين اش بغات..ناصر لي كيحس بروحو رجعات ليه وامة كان صابر هاد السنين ولكن راه كبدتو لي غبراات طرف منووو كان عندو احساس انه ولدو قاد براسو وغيرجع علىزخييير حيت لي ضحة على قبل عائلتو هادي اعوام ودمل لواحد العالم مسخ على ودهم وما تأداش وماعرفو تاواحد قادر يتغلب على هاد الست سنين ويرجع على خير وبيخير..كل يوم كيزيد فخرو بولدو لي علا ليه راسو قدام العلام ماشي غا المغريب
جلسو محموتين ضايرين بيه وهارون هازاه طاهرة كتفرح بيه ودموع مابغاوش يحبسو ليها كتشوف حفيدها كيهضر وكبير وزوين .منوبعد مافارقهم وهو باقي بي بي باست ليه يديداتو:الله ياربي على فرخة ياربي مادومها علينا ياربي
كلشي قال امين
يوسف كان جالس وسط ناصر وبدر وهو مبتاسم
يوسف شاف فباه وهز ليه يديه وباسها احتراما ليه :واعد نفسي قبل نمشي باش نرجع ونرفع راسك لفوق الوليد وهنا وفيت بكلمتي
ناصر ضرب ليه على كتافو:الله يرضي عليك
طاهرة شافت فلينا جالسة وكتشوف فيهم عاجبها هاد الجو العائلي:بنتي سمحيلي ماعطيناكش صوابك مرحبا بيك عتابري راسك من هاد العائلة
لينا:ربي يخليك اخالتي وعلى سلامة يوسف وهارون ملي تجمعو مع عائلتهم
طاهرة:الحمد الله ياربي
شافت فيحيى:مرحبا بيك تانت اولدي
فهاد اللحضة دخلات ليلى وعماد وفاتي
ليلى عنقاتو بالحهد وهي كتبكي:على سلامتك اولدييي الحمد الله ملي رجعتي لميمتك وعائلتك
بتاسم ليها وباسها على راسها :الله يسلمك
تحنات هزات هارون وعنقاتوو :الله ياربي شحال كبرتيي الله يحفضك ياربي
عماد رحب بيه تاهو وتبادلو العناق ..وفاتي سلمات تاهي ..وهي تجي عنيها عليه تبلوكات كتشوفو جالس وعنيه عليها وهو مبتاسم تلفات لدرجة دخلات فطبلة كانت حداها كوما شداتش راسها كون طاحت ..غلباتو ضحكة مسح على راسو وهو كيشوفها كتقلب فين تجلس تالفة..جلسات وشافت فيه وبتاسمات ليه ..شافها تبدلات مابقاتش كيف كانت شعرها طوال تا لباسها ولا مختالف ولات كمية هائلة من الانوثة .عاد انتابهت لهاديك لي جالسة حداه دغية ختافات ابتسامتها فاش جا فبالها انها مراتو نزلات راسها لتحت كتلعب بصبعانها شغا يوقع فيها لاكان بصاح مزوج بيها ..رجعات علات راسها لقاتو كيهضر معاها ومبتاسمين بجوج حتى كتشوفها حطات يديها على دراعو كضحك..عضات على شفايفها غا لمابغاتش تفهم راسهاا
كلشي شاف فهارون فاش نطق:فين هي ماما
ماعرفو مايقولو كيتسناو يوسف يجاوب
يوسف وقف :اجي معايا
قرب لعندو شد ليه فيديه:هانت غتشوفها
هارون تحمس بزاف ..تاواحد ما علق كيفكرو غي كيف غيكون هاد اللقاء ..خرج من دار وهو كيهضر فالطليفون ركب فطموبيل هو وولدو وديمارا ومشاا
فجيهة خراا
كانت جالسة معاهم وكتسمع لحديتهم وعنيها على التلفازة كتشوفو نازل من طيارة تا خرج من المكار نزلو دموعها كتشوف هارون كبر عضات على شفايفها وهيوكتمسح فدموعها شافت فكمال كيديوي:لا خاص يتحاكم قدام وكيل لمليك
نرجس:زعمة يخرج براءة
كمال:غالباا ابنتي حيت عندو ملف كامل مع ادلة قوية
نرجس:وايلا تقلبات شي حاجة ضدو
وسكتات عاد كملات:بحال هدشي كيوصل للاعدام
كمال:مامانصنش النتي ماغايكون غا لخير .نطلبو هاد الجلسة دوز تلى خير
رجعات شافت فتلفازة وهي كتقول امييين
عائـــــــــشة
كانت فصالة جالسة على اعصابها كتاكل فدفارها طليفونها مابغاش يحبس من الصووني ..كلشي كيعيط ليها صحاافة ناس لي خدامين معاها العائلة وبزااف دلميساجات كيقولولها ولدك رجع .كمام داك لبيجامة لي لابسة شنتفاتهم بسنانها .حاسة بقلبها ايوقف فاي لحضة تامن جوهرة صيفطاتها مع عصام حيت مابغاتش تسكت باغة تمشي تشوفهم تا بدات كتبكي ليهااا .جا موراها عصام وداها بغات تبقة بحدهااا مابغات تا واحد يشوفها فهاد الحالة وقفات كتمسح على قلبها وتزير عليه حاسة بيه ايوقف فاي لحضة وبداها الوجع تاني ..راه بالسيف وهو تحت هاد الضغط كاامل ماشي ساهل علييها فكرة ولدها قريب ليها كتحمقهاا افكارها مامرتبينش مشوشة خاص تفكر ولكن فين هو تفكير ماعارفاش اش ادير ..مشات لبيتهاا حلات لبلاكار جبدات شغا تلبس ..قدات شعرها ووجها وهزات مونطوها ولبسات صباطها ..وخرجات وساكها فيديها لجلاس فدار ماعندو باش يفيدهااا خاص تخرررج ولا غتحماق مافيهاش..اتخلي رجليها يديوها فين بغاااو ..غير فاتت باب لعمارة وهي تشهق فاش هجمو عليها ثحافة كيسولوو فيها ..مكملةةكريها وهوما تابعينها جمعات عليها المونطوو وسعرها مكيرو ريح فسماا مع البرد ..بلعات ريقها وهي كتحس بداك الدوخة تاني وقفات فاش بداو كيفشلو عليها رجليها تمتمات بهمس ويديها على قلبها:ماشي وقتك عفاك
هزات راسها وهي كتسمع صوت لكلاكسوون خلا الصحافة يتفرقو كان ايدخل فيهم ..هنا مابقات كتسمع والو وهي كتشوفو نازل من طموبيل ..حاسة براسها كتحلم لدرجة بدات كترجع اللور باغة تهرب ..ماحدو كيقرب وقلبها كيبغي يوقف كتقول هنا غنفيق ماشي هوو لا مايمكنش مازال مامستعدة تشوفوو ..مزال مادارت حساب لهاد اللقااء لا مايمكنش خاص تفييق عنيها مفيكسين عليه كتحس بزمان وقف فهاد اللحضة عضات على سنانها وهي مازال راجعة باللور وهو كيقرب .. كيشوف فيها وجاي فتيجاها ورجال ديالو قايمين بالواجيب بعدو كاع الصحافة وخواو ليه طريق كيشوف فيها وحاس بطريق طويلة ..باغي غير فوقاش يوصل ليها وياخدها فحضنو واخة تغوت ضربو تسبوو لمهيم يحس بيها بين يديه ..اول مرة ايحس بواحد الرجفة فشكل فكاع جسموو وهو كيشوفها قداموو وقف اونفاص معاها كيشوف فعنيها لي شتاق ليهم بزااف..توحش يكون قريب ليها ..دابة عاد رجعات فيه الروح وهي قداامو..بغة يزيد يقرب وهي ترجع اللور كتشوف فيه بحال شي قطة متوحشة زاد قرب بغة يهز يديه وهي تهضر بصوت كلوو حقد :ماتحاااولش تقرب لييي
وتمات غادة وهو يجرها:ست سنين اعائشة هدا هو اللقاء عندك
كان عارف كلامو ماعندو تا معنى ولكن هدشي لي جاا فكلاامو
ضارت لعندو وهي كتنتر يديه وقربات تا لوجهو هزات يديها تا لسما وكتجمع معاه بصقلة تا دار وجهو لجيهة لوخراا :هز كلابك وسير بحالك انا ماكانعرفكش وعلى اشمن ست سنين كتهضر
ضربات يديها مع بعضهم وهي كلها كترجف: عائشة لي كانت قبل داك ست سنين باااح ماتت تدفنات سمعتيني سير قلب عليها فجيهة خرا
بقة غير مخرج فيها عنيه
كملات كلامها وهي معلية حاجبها:كنعرف ولدي وبس
عطاتو بالضهر وكملات طريقها حتى كتحس بخطواتو موراها غمضات عنيها وهي كتحس بقوتها بدات كتلاشة شوية بشوية تا طاح ليها ساك من كتافها شداتو قبل يطيح ووقفات كتشوف فالارض كلشي كيدور بيها غمضات عنيها وهي كتحس بيديه على خصرها حط راسها على صدرو قبل طيح..هزات يديها بوشية بغات دفعو ولكن عيانة بزاف شوية تهزات ترخات كلياا حلات عنيها بشوية شافت فيه ورجعات غيبات..غادي بيها لجيهة دطموبيل وعنيه عليها كيتامل فملاميحها واخيراا ولاتوبين يديه ..عيا باس يوصل ليهاا ومن اليوم ما اتفرقو عليها غير المووت
