💘بقايـــــــــــــا القلوب💘
💘الجزء 196💘
عائشة⬇️⬇️
كانت واقفة فلبالكون وكتشوف لبعيد وكاس دلقهوة كحلة فيديها مرة مرة كتجغم منها لابسة بينوار بيض دالحمام وشعرها طويل مبلول كينقط بلمماا كان الجو بارد بزااااف وشتا كتنقط.وهي ماحاساش بداك البرد ..حطات داك القهوة فوق الطبيلة لي حداها ورجعات تاني كتشوف لبعيد هزات يديها وحطاتها على قلبها ونزلات دمعة حارة من عنيها خلاتها على راحتها تا نزلات مع عنقها وهبطات للارض اليوم عيد ميلادو غيكمل 7سنين عارفة هاد النهاار ايدوز عليها طويييل وكحل ..زيرات على قلبها لي بدا كيضرها وحطات يديها على لحديدات دلبالكون كتحاول تنفس ..عنيها عمرو بدموع ولات كلها كترجف فكل عام بحال هاد الوقيتة فعيد ميلادو كتبدة تحس بقلبها غيوقف وكيضرها بزاف..فتلت سنين لولا كانو كيهزوها لسبيطار كاع تبات فيه ليلة كاملة كدوزها كلها بكة..كتجيها صعيبة انه ولدها كيزيد عام فعمرو وهو بعيد عليها كيكبر ويتعلم يمشي ويهضر وهي ماشي حداه ..ولي كتسالي معاها فاش كتخايلو كيقول ماما لوحدة خرا ...زيرات على الحديدات كتر وكتر وليد لوخرا على قلبها كيتعصر كيضرها بزاف دموعها ولاو شلال كاتمة شهقاتهااا ...حتى كتسمع صوتها من موراها:ماما
بقات واقفة عاضة على شفايفها طلعات يديها مسحات دموعها وتنهداات كتحاول تنفس رجعات سمعات صوتها:ماما صباح الخير
جلسات فوق اقرب كرسي كان حداها حيت مابقاتش قادرة توقف على رجليها مسحات دموعها وشافت فيها وهي مبتاسمة ماباغاش تبين لحريق لي كينهش فقلبها :اجي اماما عندي اجي
💎جوهرة💎 بتاسمات وقربات لعندها عنقاتها بالجهد كتبوسها على راسها وكتبكي بصمت
جوهرة بعدات شوية وشافت فيها:ماما مالكي
هزات راسها بلا وهي راسمة ابتسامة على وجها بالسيف:والو ابنتي غير دخلاتلي شي حاجة فعيني
جوهرة بدات كتنفخ ليها على عنيها:صافي هاهي اتمشي اووف اووف
عائشة كتشوف فهاد الجوهارة لي عطاها الله هي لي مخلياها متمسكة بالحياة هي لي مصبراها ومخلية قلبها مايوقفش هي لي مبردة عليها واحدة الجزء من العافية لي كتحرق فيها هادي سنين
خدات ليها يديداتها وباستهم:صافي مابقة والو وليت بيخير
جوهرة بتاسمات:مزيان اممم شنو غنديرو ليوم
عائشة كتلعب ليها فشعرها طوييل ورطيطب..طولاتو ليها ملي كانت صغيرة عمر لمقص ماجا فيه تا ولا كيوصل ليها لحد خصرها شبهات ليها فالشعر من غير لقصيصة لي دايرة ليها على جبهتها وتاتها بزاف ..شافت ليها فملاميحها كتشبه ليه عندهم نفس الملاميح نفس لعنين لمجبدين..نفس التغوبيشة فاش كيتعصب..تا الابتسامة هي نفسهاا..عضات على شفايفها بالجهد خلا ليها نسخة منوو ومشا
جوهرة:ماما واش كتسمعيني ليوم ماكاتخدميش وقلتيلي هاد النهار ديالي
عائشة:اه ديالك ولي بغيتيه نديروه احبيبة
جوهرة :بغيتك تبقاي معايا وصافي وتكوني فرحانة ماتبقايش مغوبشة
عائشة خربقات ليها شعرها:انا مغوبشة
وباستها على خدها:حبيبة سيري غسلي وجهك وحكي سنيناتك علامن نوض نلبس عليا تانا باش نقولك واحد المفاجأة غتعجبك
جوهرة بحماس:بصااح عفاك قوليهالي دابة
عائشة:لا تاديري هدشي لي قلت ليك وسيري دغية
جوهرة رجعات اللور وهي فرحانة:-واخة اماما كنبغييك بزااف
ومشات كتجري وشعرها طويل طاير موراها لابسة بيجامة فلغوز شكلها كان كيوت
عائشة وقفات بصعوبة وتمشات تا وصلات لبيتها حلات لمجر وجبدات دواها ..دارت حبة ففمها وسرطاتها بلا ماتشرب لما وتكات فوق النموسية حاطة يديها على قلبها كتسنة ترتاح شوية بشوية حسات براسها ولات بيخير رجعات ناضت دخلات لبيت تبدلال لبسات عليها سروال تجنس وبودي ديال صوف سخون لونو حمر سرحات شعرها بسوشوار خلاتو على طولتو مسرح ماقطعاتوش كاع غير لا قاداتو شوية ملتحت حافضات ليه على طولتو
وقفات حدا لمراية كتقاد فلماسكارا وتقاد لعكار فشفايفها .بقات كتشوف فراسها وبتاسمات لراسها فلمراية بحاليلا كتقوي راسها وتنهدات..حسات بحاليلا اتبدا تمرض من البرد لي وقفات فيه فلبالكون وشعرها فازك خدات واحد الدوة دنزلة قبل تزيد تمرض ماناقصاش وخرجات من البيت كتقلب عليها دخلات للكوزينة شافتها دايرة كرسي وكتسخن لحليب فالميكرو بقات واقفة حاضياها وهي مبتاسمة..جبدات لحليب من الميكرو ودارتو فجوج زليفات وكبات فوقهم لكونفلكس .ومدات يديها لواحد المجر جبدات جوج معالق
عائشة بتاسمات وقربات تا لعندها وعنقاتها من اللور وهزاتها وهي كتبوس فيها:وينوووو بنتي كبرات وولات توجد لي لفطور
جوهرة كضحك عاجبها الحال ماماها صابحة معاها حيت طول الاسبوع كتكون خدامة فالشريكة وهي كتكون فالمدراسة:ماما كنبغيك بزاف كاع صحباتي فالمدراسة كيقولولي ماماك زوينة وشعرها زوين
عائشة كتبوسها على خدها:تانتي كتحمقيي
وحطاتها فوق لكرسي ومشات هزات دوك جوج زلايف وحطاهتهم فوق طبيلة لي فلكوزينة وجلسات تاهي وبداو كياكلو
عائشة:امممم هدشي بنين كيف درتي ليه
جوهرة:وصفة سحرية اماما
عائشة بقات كضحك عارفة بنتها مأترين عليها الرسوم ..تاهي مبلية بسبايستون :اهااا وما اتقوليش لماما الوصفة
جوهرة كتهز راسها بلا:لا باش نبقة نديرهالك غا انا بحدي
عائشة بتاسمات وكملات ماكلتها بجوج كيحماقو على الكونفليكس
جوهرة:ماما شنو هي المفاجأة
عائشة:عرفتي شنو اليوم
جوهرة:اه اليوم الحد ماكاتخدميش فيه
عائشة:اه وحاجة خراا
جوهرة:شنو هي
عائشة:ليوم عيد ميلاد خوك هارون خاص نحتافلو بيه
جوهرة بدات كتنقز فبلاصتها فرحانة:واااااو انديرو حفلة بحال داك العاام
عائشة وهي مبتاسمة :اه
جوهرة ناضت كتنقز وتغني عيد ميلاد سعيد
وعائشة كتشوف فالاميرة ديالها وهي مبتاسمة ..هدشي لي ولات كدير فكل عام كتحتافل بعيد ميلاد هارون مع عائلتها وكتشري لكادو وكتخبيه على امل شي نهار يرجع ليها وتعطيهم ليه:اجي معايا تلبسي باش نمشيو عند لميمة الزاهية وخالو عصام
زادت فرحات:هووووباااااا انا فرحانة بزاف
مشات كتجري لبيت وعائشة تابعاها لبسات ليها حويجاتها ومشطات ليها شعرها :يلاه نمشيو
كانت حدا لباب واحد لخزنة حلاتها جبدات مونطو ليها ولبنتها لبسات عليها وولبساتها تاهي مونطو حميمر جا معاها وشدات ليها فيديداتها وخرجو ركبو فالمصعد نزلهم لسطلاسيون دطوموبيلات ركبات بنتها اللور فبلاصتها وركبات تاهي وقلعات بالوطو ديالها الرونج حمرة
قبل يوصلو وقفات حدا المول نزلات هي وياها
دخلو للباتيسري دوموندات حلوة مكتوب عليها اسم هارون وخرجو علامن توجد ليهم ..كتمشى هي وياها فالمول شادة ليها فيديداتها تا وصلو لواحد المحال ديال المجوهرات دخلو :عفاك نلقة عندك براسلي دليد مكتوب فيه سمية هارون لوليد عندو سبع سنين
بتاسم ليها:مرحبا الالة كلشي كاين انوريك الموديلات ونتي ختاري بالنسبة لقياس فيهم واحد سميطة كتزيدي وتنقصي فيهاوكيف بغيتي
هزات راسها باه جبد ليها كاع الموديلات وجلسات كتختار هي وجوهرة
عائشة:شوفي معايا لي زوين
جوهرة كتشوف:اممم هدا.
عائشة بتاسمات:هو لي عجبني تاناا صافي غناخدوه
وشافت فمول لماحال:جمع ليا هدا عفاك وزيدني واحد اخور فيه جوهرة
جوهرة فرحات بزاف تعلات كتختار لبراسلي ديالها جمع ليها كلشي وخرجو..جوهرة كتنقز:انشوفو لحلووة اماما
هزات راسها باه ودخلو خداو الحلوة وشراتوالجواهر داكشي لي خاصها وخرجو من اامول نيشان لدار ليلى وعماد حيت عصام ودينيس عايشين معاهم وماخلاش الزاهية تبقة بحدها نتاقلت لعندهم عايشين مجموعين فدار وحدة من غير عائشة لقررات تعيش بحدها هي وبنتها مستقلة فدارها
وقفات الطموبيل ونزلات وفيديها داكشي لي شرات وجوهرة تابعاها شدات ليها فيديداتها ودخلو استقبلاتهم الزاهية عنقات عائشة عارفة هاد النهار كيدوز عليها خايب باستها على راسها:كي بقيتي ابنتي
عائشة شافت فيها دوك الشوفات لي كيطيحو فيها النص شوفات مكسورين:الحمد الله فهاد الساع
الزاهية:كلشي غيدوز ابنتي الله كبير
عائشة تنهدات:والنعم بالله
الزاهية شافت فجوهرة وبتاسمات تحنات هزاتها:جوهرة دياليي توحشتك ابنتي
جوهرة:تا انا الميمة بزاف
الزاهية:ما كايجي هاد الحد تا كنقرب ناكلك من جنابي
جوهرة بقات كضحك مافاهماتهاش
دخلو للصالة كانت ليلى جالسة هي ودينيس وفاتي
ناضو سلمو عليها وفرحو بجوهرة لي ولات دايرة جو فهاد العائلة ولفو بيها مدلعينها على الاخر ماكاينش لي كيخسر ليها خاطرها
دينيس:اجي جلسي حدايا
جوهرة:لا مابغيتش فين هي سلمى
دينيس:وتي غا جلسي اناري سلمى راه مع عصام ايتسخرو ويجيو
دلات شفايفها:اووف كون تسناوني نمشي معاهم
دينيس كتلعب ليها فشعرها:راه غير قريب هنيا وغيجيو
هزات كتافها :واخة ..انتفرج علامن يجيو
ليلى:هاني نشعل ليك التلفازة
مشات شدات بلاصة اونفاص مع التلفازة
ليلى:اشنو بغيتي ندير ليك
جوهرة:سبايستون
دينيس:مامشات عائشة حتى بلاتك بسبايستون
عائشة:خليها بنتي وانا حرة فيها
دينيس:يا الويلة
عائشة:اه
فاتي :وراه هي ومازال مقابلة سبايستون اش كتسناي من بنتها
عائشة وقفات:ومالي شرفت راه 23عام احبيباتي باقة صغيرة
دينيس بتاسمات وهي كتشوف لكاطو ولكادو لي حطات فوق الطبلة :تانا شريت هاد العام الكادو
فاتي:-تا انا
الزاهية:تانا شريت لحفيدي كادو
ليلى:وتانا
كلهم جابو الكدوات لي شراو وحطوهم فوف الطبلة ..بتاسمات عارفاهم كيبغيو يخففو عليها الوجع لي فقلبها ولكن ماعارفينش انه داكشي ولا عايش معاها:خاص يجي عصام باش نحتافلو مجموعين
على هضرتها دخل وهو هاز سلمى وهاز شي ساشية فيديه
جوهرة -غير شافتهم ناضت كتجري لعندهم وكتشبط فيه:-ياااك أخالو مشيتي وماديتينيش معاك
عصام حط الساشية فالارض وتحنى هزها تاهي :لغزالة دخالها هنااا .مشيت دغية وجيت
جوهرة:عارفني كنجيي ليوم
عصام:صافي سموحاات المرة جاية نخرجك تانتي
هزات راسها باه باسها على خدها
سلمى:بابا وانا
باسها تاهي وهو كيضحك هازهم بجوج..جوهرة لقات فعصام حنان الاب لي تحرمات منو وهي صغيرة ديما كيدير ليها فالخواطر ولي بغاتها كيجيبهالها كيخرجها ويساريها ويعاملها بحال بنتو سلمى لي دخلات فست سنين ..جوهرة كبر منها بشي شهورة فقط
