كرونيك : #وتين #الوحش 🔥
ممنوع النقل بدون إذن 📢📢📢
التعليق داخل الحلقات 📢📢📢
أي فكرة تعجبني راني رايحا ناخدها بعين الاعتبار لذلك من الاحسن تشاركوني آراءكم ❤
الكرونيك راهي قيد الكتابة. 💝
#حب #غموض #غدر #خيانة
❤❤❤❤❤❤الكاتبة نهاذ❤❤❤❤❤❤❤
( أستفيق فجأة من رسالة منك تعود بي الى قلبك بعد ان أوهمتني الحياة أنها عادت إلى مجراها .... وهنا اشتعلت شكوك الماضي و افتراضات المستقبل وحرمت علي نومي ، فهل ستكون لي شيء أم كانت تلك احدى ترهاتك الليلية .. التي تستيقظ منها عند شروق الشمس )
الحلقة 1 : 🚩
فاقت فجأة لقات روحها في بيت بيضاء كلها و الخيوط داخلة في كل بلاصة في جسمها الصغير الي كان كلو كدمات .... حاولت تذكر وين راها و واش صرا أما في هاذيك الدقيقة ما تعرف شي حتا من اسمها ناسيتو.. قطع شرودها كي دخل من الباب و هو لابس طابلية بيضاء خرجت مع خصلات شعرو الأبيض وتبسيمتو الي حسستها بالراحة و الامان بالرغم من انها جامي شافتو و لكن تبعت احساسها وتبسمتلو .
منير : صباح الخير صغرونة .
بعد كلامو حاولت انها تنطق أما بدون فائدة حاسة ب آلام في حنجرتها و آلام في كل جسمها و حايبا تعرف واش صرالها ... شافها تحاول قدر يفهم المشكل كمل يحكي وهو يقرب ليها يقيس في نبضها ويعمل الاجراءات المناسبة .
منير : علابالي ماراكي فاهمة والو ... مي حاولي تكوني معاي ، الشي الي نقدر نقولهولك انك هنا لمدة عام .. دخلتي في غيبوبة و انا عارف انك تتوجعي .
بعد ما كمل هدرتو شاف في عينيها الي بانت عليهم الصدمة .
منير : انتي قوية ولازم تعرفي انو نسبة نهوضك من الغيبوبة كانت مستحيلة . ودرك بما أني تأكدت من صحتك نخليك ترتاحي و تخمي بلاك تشفاي على حاجة .
... كانت تستنا منو هو يشرحلها الي صار أما جملتو الاخيرة كملت على ما بيها خلاتها تدخل في دوامة ... جا رايح قدرت تحكمو من طابليتو بيديها الصغار .. تلفت يشوف فيها وهي تحاول تحكي ، قلبو وجعو متوقعش انها متقدرش تحكي ... كل الي عارفو انها تعرضت لعملية خنق و ضرب شديد ، تبسملها وحكم يديها لزوج و قال .
منير : متخافيش حسب فحوصاتك مكانش مشكل في الاحبال الصوتية ديالك ... معناها مع الوقت انشاالله و بإصرارك نتيا تقدري تحكي أما دركا متحمليش روحك فوق طاقتها .
رتاحت من كلامو و اتبسمت معاه .. مين شافها رتاحت رتاح هو تاني وخرج من البيت قابلو مدير المستشفى .
رشيد : راهي مليحة ؟ فطنت ؟
منير : ايه أما عندها مشكلة مراهيش تحكي .
رشيد : مممم يمكن من الصدمة برك.
منير : هذا الي قلتو ليها .
رشيد: مخبرتهاش بلي تكفلها ؟
منير : لالا مقدرتش صدمتها تكفيها ... مع الوقت راني نخبرها .. مارانيش عارف واش صرالها طفلة صغيرة كيفها واش دارت لدرجة انها تتخنق و تتضرب و تترما لبرا وهي في حالة .
رشيد : و الغريب لدرك مابان والو على والديها أو شكون عمللها هاذ الشي .
منير : راني خايف من ذاكرتها .. من الهدوء تاعها استنتجت الي هي متشفاش .
رشيد : لوكان جربت سقسيتها على اسمها .
منير : اييييه كيفاه غاب من بالي ... من خوفي عليها نسيت بلي راني طبيب ولازم نعمل هاذ لحوايج .
رشيد : معليش منير راك باباها درك أكيد تخاف عليها .
على كلمة باباها دق قلبو تفكر بنتو هاجر الي توفات قبل عام وبالتحديد قبل سمانة من نهار لقا الطفلة هاذي غايبة في وسط الطريق .. على هاذي كفلها وسماها على اسم المرحومة بنتو هاجر . رجع شاف مع باب بيتها وعينيه تعمرو دموع يتذكر في هذاك النهار المشؤوم .
فلاش باك : 🔷🔷🔷
خرجت تجري من بيتها لابس طابليتها بطريقة تضحك حتا انو قفالها كاين الي محلول وكاين الي مقفول اما مش في مكانو ، مين شاف مظهرها ضحك من قلبو و قال .
منير : هاجر يا بنتي وكتاه تنحي عادتك هاذي نوضي بكري وفرزي شغالك ..ف الدقيقة الاخيرة تولي تجري .
هاجر : يا بابا راح الحااااال ياااه هاتلي حاجة ناكلها ول نقلك لالا راني رايحا .
قدم ليها حكمها وعدللها طابليتها و شعرها وتبسم أرواحي بنتي تفطري براحتك ليوم نوصلك انا ل مدرستك .
هاجر : صح بابا .. ياااااي راني ميتة من الجوع .
خداها جيهة الطابلة الي كانت كلها ماكلة و قعدها وباسها على خدها .وقعد حتا هو يفطر ويقرا فكتابو و ساعة ساعة يشوف معاها و يتبسم . بالنسبة ليه هاجر أمانة زوجتو المرحومة الي توفات كي كان في عمر هاجر 4 سنين و درك راهي 10 سنين ، مر على موتها 6 سنوات ، تعذب فيهم بزاف و عانا بزاف من تربية بنتو كانت ديما تبكي على فراق أمها . اما درك راهي تحسنت وتقبلت الواقع ، المشكلة فيه هو الي مقدرش يتعدا موت زوجتو ، اما بنتو هاجر هي الوحيدة الي قدرت تنسيه ألم فراقها بضحكتها و طيرتها و عمايلها . سرح هايم في ملامح بنتو الي تشبهلها ، فجأة قاطعتو بصوتها الصغيرون .
هاجر : بابااا باباااا
منير : اه بنتي .
هاجر : مالك من الصباح و انا نهدر معاك .
منير : سامحيني بنتي سرحت في جمالك .
هاجر : احم احم علابالي علابالي نهوووبل . هايا درك فضو صواردك متبقاش تشوف فيا اديني نقرا، راني متحمسة اليوم تجي وحدة جديدة عندنا ياااااي راني حاسة رايحا نكونو انا وهي اعز اصدقاء .
تبسم و حكم يدها متوجهين للباب و مخليها تحكي وتسخايل في صديقة احلامها الي رايحا تتلقاها اليوم ، فتح باب السيارة وركبها . وركب هو وديمارا .
بعد نصف ساعة وصلو ل مدرستها وصاها على قرايتها و وصاها أنها تستناه كي تخلص يجي يديها.
هاجر : حااضر بابا متخااافش كالعادة ، باااي باااي
قفلت باب السيارة بقوة خلعتو ، شاف فيها شوفة هربت تجري وتضحك كي وصلت لباب المدرسة شافت معاه و خرجتلو لسانها ودخلت ، ضحكة على شقاوتها وراح متوجه لسبيطار وين يرتاح في غرفة العمليات و بين مرضاه .
