👧كرونيك يقتل :لعنة -أنثى 💗💓❤️‍🔥

الجرء 1

#الحلقة 1

خرجت من البيرو تاع الدكتورة .. تمشي بخطوات متثاقلة.. تتمايل ... كلام الدكتورة مزالوا يرن في وذنها تحس في غصة قلبها مزير عليها .. تكات على الحيط تحاول تجبد نفس و توازن وقفتها ... هزت يدها عداتها على كرشها ... بالوقت تبسمت .. تملكها احساس جديد .. احساس عمرها ماحساتوا من قبل... فرحة مخلطة بخوف ... فرحانة خاطر حاملة في بطنها ولد الراجل لي حباتو .. وخايفة من ردة فعل خالتها وراجل خالتها كون يعرفوا بحملها  ... غمضت عينيها بالقوي وكبست عليهم .. جبدت نفس قوي تحاول تتمالك نفسها ... فيقتها من سرحتها لمسة يدوا لي تحطت على كتفها
فتحت عينيها مخطوفة تشوف في راجل طول ووهرة ... عضلات مشدودة...لابس توني تاع الجراحين مكبوسة على جسموا زاداتوا وهرة وجاذبية... حاط يدوا على كتفها لمسة ايدوا خلات رعشة تسري في بدنها ... فطنت من شرودها وقت تكلم
باسل : مدموزال انتي مليحة ؟؟؟
جيلان: أاه إيه مليحة مليحة ... مرسي على اهتمامك
باسل : من غير مزية .. هذا واجبي ...
تبسمتلوا ومشات كملت طريقها ....
باسل يحكي : كنت خارج من بيرو رئيس قسم الاطباء ... نشوف في وحدة ماسكة في الحيط وشعرها مغطي وجهها ... حطيت يدي على كتفها ... نشوف كان محتاجة مساعدة مع هزت راسها وجات عينها في عيني غرقت في بحر عيونها ...جذبتني لمعتهم ... كأنهم مغناطيس ...نعرفش شنوا صارلي اول مرة بعد وفاة ديالا تجذبني مرأة ... تي قنبلة مش غير تجذبني تي عيونها يسحروك ويخلوك تغارق فيهم .... فطنت على روحي وسألتها كان مليحة ... بالوقت جاوبتني تي طلع حتى صوتها حنين وارق من جمال وجهها .... شكرتني ومشات بقيت نتبع فيها بعينيا لين ختفات .... حسيت على روحي وقت سمعت صوت ليان
ليان : شنوا باسل لتوا لا وجدت روحك
باسل : لواش نوجد روحي
ليان : اووووه تي لحقت تنسى مش تفقنا نمشيوا نتغادو مع بعض
باسل: اه تفكرت سامحني بربي ليل كامل مارقدتش على هذي نسيت .... باهي توا نغير ونلحق عليك استناني
ليان : باهي (وتبسمت مش مصدقة انوا وافق يمشي معاها )
_خرجت من الكلينيك لاحت يدها في صاكها جبدت تلفونها كومبوزات نيمروه رن مرة وزوج بلا مايرد .. عاودت عيطت بالوقت ريبوندا
ميرنا : الووو
مع سمعت صوت مرأة قلبها تقبض عليها بعدت تلفون من وذنها تحاول تستوعب الصوت لي سمعاتوا وعاودت رجعاتوا وحكات
جيلان : ياخي هذا موش تلفون لؤي ولا ني غالطة في النميرو
ميرنا : لا موش غالطة .. ولؤي حبي يعمل في دوش شكون انتي وقت يخرج نقولوا
جيلان : أنا أنااا .. انا حتى حد سامحني على الازعاج .. وسكرت عليها الخط ... بالوقت نزلت دمعتها .. اخر شي توقعاتو انو لؤي يخونها .. لؤي لي كان يحلف براسها يخدعها ... تي كان كون يشوف حد يخزرلها يشرب دموا ... جات تلوح خطوة ماحستش على روحها كيفاه جات طايحة ....
_باسل وقتها كان خارج هو وليان هي تحكي معاه وهو في عالم اخر مطفيها على اللخر ... دور وجهوا للجهة لاخرى يشوف فيها كيفاش تتمايل وشادة راسها كأنوا بها شي ...ماحسش بروحوا كيفاش جرا وتنطر ليها لقفها قبل لا طيح ... يضربلها في خدودها بكفوف خفاف
باسل: مدموزال انتي مليكة .. افتحي عينيك خليك معايا
وهي كانها جثة بلا روح تحس في راسها رزين تشوف في صورتوا مضببة حاولت تحكي اما لسانها ثقال عليها .. بعدها داخت .... حملها وجرا بها لداخل قدام عيون ليان لي مصدومة من ردة فعلوا كانوا يعرفها من قبل ... بالرغم انها موالفة تخدم معاه اما عمرها ماشافتوا خايف ومرعوب على مريض هكا