👧كرونيك يقتل :لعنة -أنثى 💗💓❤️‍🔥

دعم

#الحلقة_14❤❤
#لعنة_أنثى 🔥🔥
#خولة_عزيز 🌶🌶
_ كان في غرفتوا مكسل في فرشوا تهز على الباب لي تحل بقوة
باسل : ياخي ماكش بش تبطل عادتك هذي .. كيفاش تحكي مع البنية بهذيك الطريقة .. خليتها تحس انو موش مرحب بها
أيهم : شبيه دين امك داخل تعارك في نص ليل .. وزايد بسبب فرخة .. تي لي ضربتوا يدوا ماتوجعوا
باسل : فاش تخرف انت .. وايجى هوني انت منين تعرفها حتى تحكي هكا
أيهم : مانعرفهاش ... وتوا برا خليني نرقد ... باسل نفخ بالقوي وخرج خبط الباب وراه خوه طول عمروا هكا غامض وماتعرف فاش يخمم ولا على شنوا ناوي ...
أيهم يحكي : نعرفش علاش تعصبت وقت شفتها .. بالرغم اني مانعرف لا اصلها ولا فصلها .. يمكن لان عندها علاقة بهم ... حتى ولو من بعيد أما مجرد تفكير انو وحدة منهم معايا تحت صقف واحد يخليني نجن .. تي انا كبرت على حاجة وحدة وهي كرههم ونقمتي عليهم ...فديت من التخمام تقلبت على يمين نحاول نرقد وننسى شوي
_عند لؤي : فطن حاس راسوا رزين عليه يشوف في اموا قاعدة مقابلتوا وماسكة يدوا .. حاول يستوعب شنوا صار .. وعلاش هو هنا راقد .. تعصب وقت تفكرها .. بسببها هي كل شي تقلب .. فاق على صوت اموا لي تسألي فيه على حالتوا وبشنوا حاس
لؤي: مليح امي مليح ماتخافش وبابا كيف صار
جهيدة : على حالتوا اما الطبيب طمني وقالي بش يخف مع الوقت اما لازموا يبعد على اي شي خايب ... وغزرتلوا بنظرات كلها لوم ... كأنها تسأل فيه وتقولوا علاش عملت هكا ... علاش كل مرة تخون الثقة لي نمدهالك .. علاش تخليني نحس اني قصرت في تربيتي ليك ... وهو زادا ماكانش احسن منها وفهم كل شي حبت تقولهولوا بلا ماتحكي ... غمض عيونو وكبس على يدوا بقوة
لؤي : كل شي بش يتصلح نوعدك امي
جهيدة : ان شاء الله ولدي ان شاء الله خاطرني بش نموت كون تجرالك حاجة
لؤي: اششش ماتعاودش تحكي هكا باهي ... هزتلوا براسها وعاوناتوا يقوم ومشاو للغرفة لي كان فيها بوه ... لقاوه ممدود على الفرش عيونوا مسكرة وجهوا شاحب  والسيروم في يدوا ... يسمعوا كان في صوت لباراي تاع القلب ... غزر لأموا وبعدها غزر لبوه وحضنها .. هو السبب في لي جرا لبوه كان لازم هو يكون محلوا موش بوه .. بسبب استهتارو ولامبالاتوا ... تقلب كل شي ... حس بالذنب تجاه بوه وتجاه جيلان زادا بسبب لي عملوا فيها ... خاطروا يعرف ومتأكد انو هي ضحيتوا زادا ... كبس على بونيتوا حس بشي داخلوا كيف البركان ويتمنى انوا ينفجر ويريحوا ... جو المشفى خانقوا ... رجع خطوات لورا وقعد على الكرسي حاط راسوا بين يديه
💥 جام ورأيكم في الريبوند 💥