👧كرونيك يقتل :لعنة -أنثى 💗💓❤️‍🔥

11

#الحلقة_11❤❤
#لعنة_أنثى 🔥🔥
#خولة_عزيز 🌶🌶
_ دخلت لقاتهم واقفين يستناو فيها ... عرفتها بلي بش ترسالها في عركة .. هي زادة ما ابهمها مروحة في نص الليل   وتستنى منهم يستقبلوها بالاحضان
جميل : شنوا ياهاملة كون زدت شوي خير ... تعرف قداشها الساعة تي حتى رجال يروحوا قبلك ...
تلاح عليها مسكها من شعرها ويكركر فيها دزها جابها طايحة على الارض ... على اخر عمري تجي ساقطة كيفك تفضحني في وسط الحي ... كيف مايقولوا اقلب البرمة على فمها تطلع الطفلة لامها ... على اخر كلاموا كرزها والعصب تمكنها ... وقفت جات مقابلاتوا
جيلان : مانسمحلكش تحكي عليا وعلى امي هكا ... يزي ماهنتني ... عامل روحك محترم وانت كل ليلة تتسرسب لغرفتي تسرق نظرات مني ... كان تحسب مانيش شالقة عليك تكون غلطان ... انا كل ليلة رجعت نخاف نرقد ... تعرف شنوا عيني ماتجيهاش النوم تي انت كيف الشيطان في ملامح ملاك ... يزي ماخبيت داخلي ... ايه ياخالتي راجلك المصون .. كل يوم يخزرلي بخبث خزراتوا خلاوني نتقزز من روحي ... الشيب والعيب
فريدة هزت يدها ولفتها بكف ..: صحيح طلعت ناكرة للجميل ياساقطة .. ندرا في شنوا كنت تعمل وجايا ترمي بلاك على راجلي .. لا يكون مفكرتني بهيمة ونصدقك لا تكوني غلطانة .. ومايجيش انتي لي ترمي روحك عليه .. يمكن هذي الصفة ورثتها من امك ياساقطة تحملتك وتحملت كلام الناس وفي الاخر تحب تخربلي داري ... توا تخرج من هوني ومنظرك لا عاد نشوفوا
جميل : صحيح كلامك هي لي كل مرة تعرض روحها عليها وانا مطفيها .. ونقول العن ابليس ياجميل هذي كيف بنتك  مايجيش تفضحها مع خالتها ... اما هاك ريتها توا كيف ترمي في بلاها على غيرها وتحب تقلب الطابلة لصالحها ماخبثها قليلة الحياء وانا لي كنت خايف ومقلق عليها خاطرها مادخلتش لدار
جيلان مصدومة منوا ... ولا خالتها لي كذبتها وهانتها على جال راجلها .. ماهو باين تجي في صفوا هي شكون حتى تصدقها .. طول عمرها حاطتها كيف الخدامة حتى قرايتها وحبوا يبطلوها منها ... بش تخدم عليهم وتجيبلهم لفلوس ... اما صايي فاض الكاس والقلب ماعندوا وين يهز ..خلي تحارب الغابة لي برا ولا تعيش وسط وحوش ينهشوا في بدنها وروحها البريئة بعينيهم ولسانهم
جيلان : بلا ماطردني خاطرني مانجمش نعيش في دار كيف هك ..
فريدة : اه ياهاملة توا داري رجعت ماتعجبكش وقت كنت تاكل وتشرب وترقد ماشفتش ... روحي عند لي موالفة تبيعيلهم روحك ياساقطة يابنت الساقطة ... الله لا يطلع نهارك ... نشوف فيك يوم ..
جيلان : بش يجي يوم وتندم على كل كلمة حكيتها في حقي انتي وراجلك بش تتمناو رضايتي ونعفسكم برجلي وخرجت تمشي ماتعرفش لوين تروح ولا رجليها لوين يهزوها .. تلكمتت في مونطوها ودموعها خذاو طريقهم على خدها ... كأنوا الحياة حالفة لا تفرحها ...
في المشفى : جاي رايح على عصابوا راح ينخر الارض بصباطوا ... خايف تجرا حاجة لبوه هو صحيح يتقلق منوا وقت يحب يتحكم فيها ويعصب عليه اما في الاخير يبقى بوه لي يسند ظهروا عليه ... تهزت على صورة الدكتور لي خرج من غرفة العمليات
لؤي : ها دكتور طمني كيف حالتوا
الدكتور : لاباس جاتو جلطة وتعدا مرحلة الخطر اما نبه عليكم يلزموا يبعد على كل شي يغششوا ... لؤي خزر لميرنا بعيون حومر جمر ... ومسكها من يدها يطرد فيها .. وهي تحاول تفلتلوا يديه .. اما هو شي حالف لا يقتلها كون تبقى مقابلتوا كلو جرايرها .. تلاح خنقها واموا تحاول تفكوا اما هو تقوى عليها بالوقت شفتهم ليان جات تجري
ليان : جنيييت شي سيب اختي بش تقتلها ياهم .. سيبها ...
اما هو حالف ليلة ياقاتلها ياقاتلها ... ليان كيف عرفت انوا جن وماهوش بش يفلتها عيطت لسكيريتي تاع المشفى وطلبت خوها فهد في تلفون
ليان : فهد اجري لؤي بش يقتل ميرنا بالله ايجي
سكرت عليه ورجعتلوا لقاتوا مزالوا في حالتوا والكل يحاول يفكها منوا ماسيبها غير وقت ليان ضرباتو ب extincteur لراسوا طاح في الارض
جهيدة : نزلت لارض حملت راس ولدها وتخرنن ولدي قتلتي ولدي ... اختك جلطت راجلي وانتي قتلتي ولدي ...
ليان : اهدي خالتي جهيدة هو دايخ برك وبعد شوي يفيق وطلبت من لممرضين لي واقفين يحملوه ويهتموا به ... وجهيدة راحت مع ولدها تبكي قلبها محروق على راجلها وولدها ... بالوقت جاء فهد يشوف فيهم محملينوا وميرنا وجهها ارزق قطرة دم ما
فهد : شنوا صار وعلاش لؤي تهجم عليك شنوا عملت .. حكاتلوا ميرنا كل شي حتى حكاية الفيديو وموضوع جيلان وانوا هو محملها ذنب بوه ... ضمها فهد لصدروا يحاول يهديها
فهد : ششششش خلاص صغرونتي ماصار شي
ميرنا : انا نحبوا وعملت هكا على جالوا مانجمش نشوفوا متزوج بوحدة مايحبهاش
فهد : نعرف نعرف يزي من لبكاء تعرفي دموعك يحرقوني ...
فهد بالرغم السلبيات لي فيه ومساوئو إلا ان يحب خواتوا ياسر وماينجمش يرقد من غير مايشوف ضحكتهم كان ديما البو والام بالنسبة ليهم وكل طلباتهم اوامر ويعمل كل شي على جالهم حتى ولو كان بالقوة ... كيف حسها تهدنت وترخفت في حضنوا جبدها منو شوي ويحكي
فهد : هيا خلينا نروحوا تي الفيلا بلا بك كيف الظلام
ليان : شنوا سي فهد توا رجعت الدار ظلمة علاش انا وين رحت
ميرنا : شنوا ياخي حتى في شوي دلال وحسدتني فيه انتي اصلا نص وقتك هنا في المشفى انا لي كل ليلة مايرقد كان على بوستي
فهد ضحك على هبال خواتوا ضمهم لصدروا ومشاو روحوا ... حضنوا خلاهم ينساو كل شي صار من قبيل
💥 جام ورأيكم في الريبوند 💥