👧كرونيك يقتل :لعنة -أنثى 💗💓❤️‍🔥

26

#الحلقة_26❤❤
#لعنة_أنثى 🔥🔥
#خولة_عزيز 🌶🌶
تعدا شهر :
في الغرفة واقفة مقابلة المرايا تغزر لروحها .. تغزر لوجهها الجديد صحيح مزيان ويفتق اما شكلها القديم زادا مش خايب ... لمعة عيونها مزالها كيف قبل .. دورت راسها على الباب لي تفتح ... دخل وتعدا ديراكت للسرير قعد على طرفوا يحكي بلا مايغزرلها
أيهم : متأكدة أنك بش تنجم تمشي .
جيلان : (دارتلوا تحكي بكل ثقة هازة راسها لفوق ... لمعة عيونها مزالها كيف قبل ... اما غزرتها قاتلة ... مخلطة بلمعة وكره وحقد ... ) متأكدة اكثر من قبل ... جيلان القديمة ماتت بموت ولدها ودفنتها وقت قبلت هذا الوجه الجديد ... لي قدامك توا هي العميلة #لعنة ... ولعنتي بش تختارق قلوبهم الكل ...
أيهم : ممممم اوكي مالا في الليل نتعدالك نمشيو كيف كيف
جيلان : بش تلقاني واجدة ونستناك ... بالوقت دخل رائد .
رائد : (يصفر ) اووووووه تي طالعة قنبلة بش تجلطهم يابنتي ... متأكد انك بش تاخذلهم السيكسيو الكل الليلة  ... ڨحرلوا أيهم ... اما جيلان ضحكت ... على كلاموا الوقت لي تعداتو معاهم قربها منهم او بالأحرى قربها اكثر من رائد وخلاها تتعرف على جانبوا المرح عكس أيهم لي طول الوقت مكشر ومثقل روحوا ...
جيلان : وانت زادا بش تمشي مش هكا لازم ... خلينا نتفرهدوا الليلة كرهت وانا مقابلتك هوني
رائد : ههههههههه اكيد بش نمشي مستحيل نضيع فرصة اني نطبق وحدة من العرس خلينا نفرهدوا شوي وغمز لأيهم
أيهم : ماأبلدكم ... كان بقيت هوني بش ندفنكم ... خرج وخلاهم يضحكوا ...
جيلان : اووووه نعرفش على شنوا شايف روحوا تي نموت نشوف وجهوا مرخوف شوي
رائد : هههههههههههه مالا نبشرك من توا بش تخلد ومايلحقش هذاك اليوم ايهم ولا مرة ضحك هههههههههههه
_في فيلا سي عمر الدنيا الكل مقلوبة يحضروا للعرس ... جهيدة واقفة على كل شي ماتحبش حاجة تكون ناقصة ويحكيو عليها بالعاطل ... سي عمر  بعد ماتحسنت حالتوا شوي الطبيب سمحلوا يخرج اما لازموا ياخذ بالوا على روحوا قاعد على كرسي متحرك ... البسمة مافارقاتوش ولدوا وحيدوا بش يعرس ومن بنت صاحبوا شريكوا وشريك عمروا ... هكا يضمن انوا كل املاكوا واملاك صاحبوا يبقاو بينهم وشراكتهم مع بعض تقوا اكثر
على عكس لؤي لي كان قدام البحر في البلاصة لي كانت تجمعهم وشهدت على لقاءاتهم
لؤي : صحيح اني مع الاول كنت نتمسخر ... وكان عاجبني بدنك وكنت حابب نذوق شهدك برك ... اما طلعت غلطان كنت نكذب في احساسي تجاهك ... ووقت حبيت نصلح غلطتي كتشفت انك احقر من الكل وانوا انتي لي كنت تلعب بيا ... نعرفش قداش من واحد طبقتوا وفي الاخير كشرت على انيابك وحبيتي تلويلي ذراعي ..وكي تكشفتي هربتي وتخبيت في جحرك ... كنت مخدوع فيك ياسر ياجيلان ... نكرهك جيلان نكرهك اكثر من اي حد في الكون ... انتي سبب الشي لي انا فيك ان شاء الله تتحرق في المكان لي انتي فيه
_ميرنا فرحتها ماتعطيهاش لحد اليوم بش تتزوج بالشخص لي حباتوا من صغرها ... كانت مستعدة تعمل كل شي بش يكون ملكها ... وفرحتها زادت اكثر وقلبها رتاح وقت خبرها فهد انوا السيارة لي كانت فيها جيلان تقلبت وماتوا الكل ... توا تنجم تعيش براحة من غير ماحد يمررلها حياتها ... امها رجعت تعيش معاهم اما هي طول الوقت مطفيتها ... على عكس ليان لي بدات تقرب منها وتحكي معاها
ليان : هيا عزيزتي ادخل اعمل دوش بش تحضر روحك مابقاش ياسر على العرس
ميرنا : ماتتخيلش ياليان قداشني خايفة
ليان : ههههههه لي يسمعك يقول صح وانتو ليلة عمركم فوتوها .... كلام ليان خلا وجهها يتبدل ... وتحس بغصة في قلبها ... تمنات كون ليلتهم كانت يوم عرسهم ..
ليان : سامحني عزيزتي نعرف كلامي غششك اما عادي ... المهم بش تتزوج وتكمل عمرك معاه ... مايهمش هذوك الشكليات دخل بك قبل ولا بعد ... تبسمتلها ميرنا وضمتها ليان لصدرها ...
صفية : شنوا يابنات بش تبقاو تتحاضنوا هيا امشيو كل وحدة تحضر روحها لكوافور قريب تجي
ميرنا كيلتها وتعدات للصالدوبان اما ليان ... تبسمتلها ومشات حضنتها
ليان : ماتتصورش قداشني فرحتلها
صفية : لعقوبة ليك
ليان لمعوا عيونها وتذكرت باسل ... باست امها ومشات تحضر روحها
لحق الليل الفيلا كلها مزينة كل رجال الاعمال حاضرين وحتى الاطباء تاع المشفى بحكم سي حاتم وسي عمر الممولين متاع المشفى لي تخدم فيه ليان وباسل ... الصحافة في كل مكان مانجموش يفلتوا الفرصة من يدهم ومايصوروش عرس ولد وبنت اكبر رجال الاعمال ليان وصفية  كانوا لفوق في الغرفة لي فيها ميرنا .. وجهيدة في الحديقة تستقبل في الضيوف وراسمة ضحكة على وجهها ماتحب حتى حد يشلق عليها
_لبس كوستيم وحط بارفانتوا وريڨل شعروا ... حط ساعتوا في يدو وخرج قصد غرفتها مع فتح لباب تصدم من المنظر لي قداموا انثى بمعنى الكلمة لابسة غوب غوج مفتوحة على الصدر وعلى جنبها .. طالون في نواغ ..مسيبة شعرها تحاول تغلق سحاب الغوب مانجمتش تقدم منها وحط يدوا فوق يدها لي على السحاب بمجرد مالمس بدنها رعشة سرات في بدنوا تملكوا احساس غريب .. غلقلها السحاب وعدا عيونوا على كل شبر من بدنها عراها بعينيه ... خلاها تتلبك من نظراتوا ...وهي مش اقل منوا غرقت في لمعة عيونوا ووهرتوا لي هزت كيانها .. اول مرة تحس بملمس يدو على بدنها .. حرقها بأنفاسوا .. فيقهم من سرحتهم رائد وقت دخل ...
💥 جام ورأيكم في الريبوند 💥