👧كرونيك يقتل :لعنة -أنثى 💗💓❤️‍🔥

20

#الحلقة_20❤❤
#لعنة_أنثى 🔥🔥
#خولة_عزيز 🌶🌶
شد فران قوي ونزل حملها كلها دم ... نفسها ضعيف ... ودخل بها تعدا طول لاول غرفة قابلاتوا أمر رجال لي لثم يجيبوا الطبيب الخاص بهم ... حاول يمسحلها الدم لي على وجهها اما ماقدرش وجهها تضرر ياسر وزجاج ماليه في كل شبر ... تلفت على دخلة الطبيب لي يسأل فيه شنوا صارلها
أيهم: حادث تقلبت بها السيارة نفسها ضعيف ويمكن عندها كسر في انفها ووجهها متضرر... طلب منوا الدكتور يبعد تفحصها وعملها سيروم وقرعة اكسجين ... وتلفت لعندوا يحكي معاه
الدكتور: حالتها مستقرة اما وجهها تضرر وخسر وماهوش بش يرجع كيف ماكان
أيهم : المعنى
الدكتور : الاول لازمها عملية جبر لأنفها وبعدها نستدعوا طبيب تجميلي يشوف كان يقدر يعملها حاجة ... هزلوا ايهم براسوا وغزرلها اخر نظرة وتلفت خارج ... بعد ماحرص على رجالوا يفتحوا عيونهم ...... تعدا لغرفة التعذيب قابلوا مربوط بسلاسل يتوجع من الرصاص لي في رجلوا ... تبسم على جنب ومشى هز سكينة حادة وحطها فوق نار ... والراجل كأنوا فهم في شنوا يعمل
هو : عيشك سيبني انا عبد مأمور ... ايهم غزرلوا وغزر للسكين لي في يدوا ... الراجل بلع ريقوا ... نزل على مستواها وغرس السكين فيرجل الراجل لي رغى بكل جهدوا من لوجيعة ... خرج الرصاصة من الجرح وقام وقف مقابلوا عدا السكين على وجهوا بخفة وتكلم
أيهم : تحت امر شكون تعملوا
الراجل : والله مانعرف ..
ايهم : سؤالي مانعاودوش ... منين تاخذ الاوامر
الراجل : العرق لب كل جبينوا ... رجليه مش حاملينوا ... جاوبوا بكل خوف ورعب : احنا تجينا اوامر في تلفون ولا مرة قابلنا الراس الكبير كل المهمات لي نقوموا بها ياتوصلنا في ميساج او رقم سري .... أيهم فد وتعصب اكثر ... يعني كل شي يعملوه بدقة ولا مرة خلاو وراهم خيط او دليل خبط الكرسي لي مقابلوا ... كل مايقول قرب للنهاية يلقى روحوا بدا من جديد خرج وخلاه يتلوى من الوجيعة ... حمل حالوا وخرج
_ لؤي بعد ما حكى مع ميرنا ووافق على عرضها توجه للمشفى دخل طمن على بوه ... لي حالتوا مزالها على وضعها ... الندم يحرق فيه حاس انو هو المذنب الاول في الشي لي صرا كون ماخبص مع جيلان كون بوه ماصرالوا هكا نقم عليها اكثر بعد ماسمع الكلام لي حكاهولوا راجل خالتها ... حلف انو يندمها على كل شي وينتقم منها ... بالوقت دخلت اموا
جهيدة : اووه لؤي انت هوني علاش مامشيتش للشركة موش لازم تهملها بوك كان واقف عليها .. بربي ولدي ماتخليش تعبوا يمشي هكاكا
لؤي: كنت بش نمشي امي انا وعدتك اني نتغير ونكون مسؤول ... وبش نهتم بكل شي حتى يوقف بابا على رجليه
جهيدة : عيشلي ولدي الراجل هكا نحبك ... اوقف على املاكك وماتخليش الغير يسيرهم ... (تلمحلوا على حاتم وولدوا فهد وهو فهم عليها ) 
لؤي: امي عمي حاتم شريك بابا وفهد صاحبي وعشيري اكيد ماهمش بش يعملوا حاجة في ظهري
جهيدة : نعرف نعرف اما مايسالش تكون انت على راس خدمتك ...
لؤي: باااهي يااغلى ام في الكون ... ممممم امي حبيت نخبرك بشي (هزتلوا جهيدة بحاجبها تتساءل ) أنا بش نعرس بميرنا ..... جهيدة تصدمت ... وجهها مايتفسرش نقطة دم مافماش ....
جهيدة : شنوووووا جنيت انت
لؤي: امي نعرف انوا ميرنا طايشة وماهيش تاع مسؤولية .. وماتناسبنيش اما كون مانتزوجهاش هي بش تنشر الفيديو ... وانت شفت شنوا صار فمابالك وقت تنشروا ...
جهيدة : خليها تفسخ الفيديو وهكا نتهناو كل ... زواج لا يالؤي مستحيل نخليك تتزوجها
لؤي: امي تي مفكرتها سهلة باز يكون عندها الف نسخة وفوق هذا الشي هي حكات لليان وفهد كل شي معناتو كون يصيرلها شي كل اصابع الاتهام تتوجه ليا وانتي اكيد ماترضاش ولدك يدخل للسجن
جهيدة : بعيد الشر .. الله لا يسمع ... الساقطة إلا مانوريها
لؤي: بربي امي ماتعمل شي يعقد المشكلة اكثر .. اصلا انا بش نتزوجها على الورق برك ويعدها نطلقها ... افهمني امي انا كل لي نعملوا على خاطر بابا وخاطر
جهيدة : اه يالؤي بش تجيب اخرتنا اه منك اه .... ومشات خرجت خلاتوا غارق في تفكيرو علاش اموا رافضة هذا الزواج ...
💥 جام ورأيكم في الريبوند 💥