👧كرونيك يقتل :لعنة -أنثى 💗💓❤️‍🔥

42

#الحلقة_42❤❤
#لعنة_أنثى 🔥🔥
#خولة_عزيز 🌶🌶
صفية : صباح الخير مايسالش نشرب معاك فنجان قهوة
سي عمر : كان جيت تحكي على لي صار لبارح إنسي ... صفية عملت روحها مش عارفة على شنوا يحكي
صفية : علاش شنوا صار لبارح
سي عمر : تلبك ... وحاول يغير الموضوع الظاهر بنتهم ماخبرتهم بشي
صفية : أنا جيت بش نحكي على جيلان
سي عمر : لمعوا عيونو وقت تذكرها وهذا لي صفية تحب توصلهولوا ... تحبوا يقرب منها اكثر ... تحب الحب اللي تدفن يحيا من جديد ... تحب تحرق قلب جهيدة أكثر ماهو محروق ...
صفية : انا قلت بما أنوا جيلان صارت شريكة معانا وتملك الحصة الأكبر قلت نحتفلوا بهذي الشراكة ونحاولوا نتقربوا منها أكثر خاصة أنها عندها علاقات ياسر في امريكا
سي عمر : ممممم فكرة باهية شرايك نعملوا حفلة ونعرفوا الناس بشراكتنا
صفية : وانا هذا لي قلت عليه خلينا نعملوها عندك في الفيلا احسن من الاوتيل ... سي عمر بلا مايفكر وافق طول ... صفية تبسيمتها الصفرة مافارقتهاش كامل ...ستأذنت وخرجت ...مرت على مكتب جيلان ... لقات الدنيا مقلوبة .. ولؤي يعارك وحاتم وجهيدة يحاولوا يهديوه اما جيلان واقفة ومكتفة يديها تغزرلوا ببرودة دم ... عجبتها شخصيتها القوية وقررت انها تصاحبها وتخليها ضمن مخططاتها  ... لؤي دزهم وتعدا لجيلان مسكها من ذراعها ضاغط عليه وجعها على اللخر اما حاولت تتمالك نفسها وماتبينلوش
لؤي: توا تلم غراضك الكل وتشوف مكتب اخر ... من كل هذوا الغرف جاتك على غرفتي ... جملت قوتها ودزاتوا تحكي
جيلان : كان نسيت روحك خليني نذكرك ... انا هوني نملك اكبر نسبة في الاسهم ونجم نطردك من غير مايرفلي جفن ... انت هوني كيفك كيف اي موظف ولازم تحط هذا في راسك ... جهيدة صايي كرزت مشات ليها تحكي
جهيدة : لا انت غلطانة لؤي هوني مش مجرد موظف ... لؤي شريك هوني .... الكل تصدم من كلامها ... كيفاش ووقتاش رجع شريك ...
جهيدة : مش انتي برك لي تشري اسهم الشركة من غير مايعرف حد ... انا زادة نقلت اسهمي في الشركة للؤي ... صفية حست الأرض لعبت بها ... ماكانتش متوقعة يصرا هكا ... اما حاتم تبسم بمكر جاتو على قلبوا كيف لعسل ...لان في الاخير لؤي ولدوا والشركة راح تبقى تحت يدوا .... لؤي يغزر لجيلان ويتبسم بإنتصار أما هذا كلوا ماخلاهاش تضعف بالعكس اليوم زاد حقدها عليهم أكثر
جيلان : اسهمك في الشركة 5% مقارنة بأسهمي انت ماتجمش تفرض عليا شي ونعمل لي نشوفوا مناسب للشركة .. وكان تحب نخدموا مع بعض لازمك تتقبل وجودي وتحترمني او تبيع لحد فينا اسهمك وتمشي ...
لؤي :( قرب منها لين مابقاش بينهم مسافة تغلغلت ريحتها في انفوا حس بإحساس غريب ... اما وقت فاق لروحوا ضغط على لسانوا ويحكي بحدة ) تحلم كان نبيعلك اسهمي ونخليلك الساحة... وهز صوتوا كمل كلاموا .. تنجم تاخذوا المكتب لان مايلزمنيش بعد ماستعملتوا ... ومشى خلاها ... غمضت عيونها تحاول تتمالك نفسها مزالها ترجف من قربوا ريحتوا رهوجتها ... ماعرفتش شنوا صايرلها ... جهيدة غزرتلها بغزرة تقتل ومشات لحق وراها حاتم يحكي
حاتم : وقتاش نقلت اسهمك لؤي
جهيدة : ڨحرتلوا ... من توا وماتفرحش ياسر ياحاتم وعطاتو بظهرها دخلت لمكتب محامي الشركة بش تعمل اجراءات نقل الاسهم للؤي
صفية بعد ماخلاتهم خرجوا كلهم قربت لجيلان ...   الام وولدها ناقمين عليك هكا تقول قتلتلهم عزيز
جيلان  فهمت حركاتها وتصرفاتها اما قررت تمشي معاها في الخط يمكن تستفيد منها
جيلان : نعرفش علاش بالرغم اني مانعرفهمش من قبل ولا تعاملت معاهم
صفية : بالنسبة للأم انا نعرف علاش تكرهك ... هزتلها جيلان بحاجبها بمعنى علاه .. قالتلها تقعد بش تحكيلها
صفية : من عشرين سنة كانوا ثلات أصحاب شركاء في هذي الشركة وواحد منهم كان عندوا مشفى .. لي تخدم فيها ليان بنتي توا ... هو اخ جهيدة طبعا جهيدة اختوا الغير شرعية ... (  حطت يديها مصدومة وقالتلها تكمل  )
وجهيدة كانت تحقد عليه ونقمت عليه اكثر وقت جاب وحدة اسمها جنان وعرفنا عليها ... بوقتها عمر وجهيدة كانو متزوجين اما ماعندهمش ولاد ... ومع الايام عمر بدا يميل لجنان وقرر يطلق جهيدة ... وجهيدة قررت تجيب صغير بش تربطوا بها ... وحملت أما صغيرها كان من راجل آخر .....
جيلان : شنوااااااا ... يعني لؤي ... هزتلها صفية براسها ... ايه لؤي مش ولد عمر ... من راجل اخر لان عمر مايجيبش صغار
جيلان : شكون بوه ... صفية تلبكت وعملت روحها ماتعرفش بوه اما جيلان حست انها تعرفوا ومخبية عليها ماحبتش تضغط عليها أكثر
جيلان : وشنوا صار مع جنان ووينها توا
صفية : بعد ماعرفت بحمل جهيدة بعدت على عمر وبش تنتقم منوا تزوجت شريكوا أدم ... وماتوا في حادث ... وتعرف انو انتي طبق الاصل على جنان ... كانوا هي قاعدة قدامي توا ... جيلان توسوست من الحكاية بالسهولة هذي تنسحب من حياتهم وفوقها تموت في حادث ...
جيلان : وعلاش تحكيلي في الحكاية ... صفية وجهها مشى اشكال وألوان من نبزتها ...وبعدها رجعت لحالتها وقت شافت جيلان تضحك
جيلان : هههههه شبيه وجهك تخطف هكا ... كنت نفدلك معاك
صفية : هههههه والله حبيتك وحبيت تفدليكك ... ايه قبل لا ننسى ... احنا بش نعملوا حفلة لحضرتك وعمر قرر يعملها في الفيلا متاعو وقت يتحدد الموعد نعلمك
جيلان : اووه مرسي كلوا من ذوقكم ... سلمت عليها صفية وخرجت تتبسم كاللفعة ... ظنت انها قدرت تعديهم عليها وخلاتها طعم في سنارتها لي بش تصيد به جهيدة ... اما هي ماتعرفش انها فتحت نار على راسها ...
💥 جام ورأيكم في الريبوند 💥