👧كرونيك يقتل :لعنة -أنثى 💗💓❤️‍🔥

72

#الحلقة_72❤❤
#لعنة_أنثى 🔥🔥
#خولة_عزيز 🌶🌶
_وقفت سيارتها قدام دار جان ... دقت الباب فتحلها
جان : اوووه واخيرا جيتي ... غزرتلوا مستغربة من لهفتوا
جيلان : مش مريض صح
جان : لا بألف صحة حمد لله ... وغمزها ... تعداتوا وفاتت لصالون لقات باسل سلمت عليه وطمن على حالتوا ... وقعدت قابلاتوا ...
باسل : شبيه وجهك مقلوب
جيلان : شي تاعبة من الخدمة
باسل : ماعرفش لي صرا صح ؟
جيلان : اتهنى ماعرف شي ... وڨحرت لجان
باسل : ماتخافش جان عشيري ونوثق فيه ياسر
جيلان : ماننصحكش توثق في حد مافماش حد يستاهل
باسل : نظن صار شي هو لي خلاك هكا
جيلان : هه من يومك تقرا لغة عيوني ... قربت منوا وحطت راسها على كتفوا
جيلان : نتمنى ماتخذلنيش انت زادا ... هزلها باسل راسوا رجع وجهها مقابل وجهوا ...
باسل : احكيلي
جيلان : زعما كان نحكيلك تصدقني ولا تكذبني انت زادا ... هزلها براسوا بمعني اوثق فيا ...
جيلان : البنت لي قوصت عليك لبارح كانت اخت رائد وخطيبة خوك ... ووقت واجهتها انكرت وقالت لي هي زادة كانت مخطوفة شهق باسل وجان من كلامها ...
باسل : تقصصصصد خولة ماماتتش وهي توا عايشة ...
جيلان : باسل انت الوحيد لي كنت وقتها وشفت البنت كيف هربت ولازم تعاوني بش نثبت هذا الكلام
باسل : صحيح اما انا ماشفتش وجهها ...مانجمش نساعدك جيلان ... تعرف كون شفتها كنت خاطرت بكل شي ومشيت حكيت لأيهم اما انا ماشفتش وجهها
جيلان : (بغش ) يعني حد ماراح يصدقني ... علاش معميين هكا انا نقولكم نفسها ... كيفاش عرفتها اذا ماكانتش نفسها ... غزرلها باسل بأسف ... نفخت وضربت رجلها في الارض بغش وخرجت ... لحق وراها جان لقاها ... قاعدة على الطاولة لي في الشرفة ... جبد كرسي وقعد لجنبها
جان : مافماش حد يصدقك الا اذا كان دليل ...
جيلان : الشاهد الوحيد لي كان حاضر هو باسل اما هوكا سمعت كلاموا ..
جان : علاش تحب تثبت عكس هالكلام ... اذا هوما ماصدقوش خليهم فخار يكسر بعضوا ...
جيلان : مانجمش نحكيلك ...
جان : انتي في مهمة خاصة مش هكا ؟ شهقت جيلان كيفاش عرف
جان : ماتستغربيش انا نعرف إلي ايهم يخدم في المخابرات ... صرا موقف وهو كان بحاجتي في يوم وستلزم يحكيلي
جيلان : هو حكالك وانت مشيت حكيت سروا مش هكا
جان : لا انا ماحكيت لحد غريب ... خاطر انتي وباسل غير في ثلاثة عندكم هدف مشترك
جيلان : ماخفتش نخون ثقتك ونمشي لايهم نقولوا انك حكيتلي ... تنهد جان وهز راسوا لسماء
جان : لا ... خاطر لي تنقذ انسان وتخبي عملتوا على اكبر ضابط في المخابرات .. ماهيش وحدة متهورة ... غمزها ووقف خلاها مصدومة من كلاموا .. صحيح لي قالوا هي ماراحش تمشي وتحكيلوا خاطر كون تحكي راح تضر باسل وهذا لي مستحيل يصير  ..... جبد باسل تلفون وكلم ليان ...
ليان : باسل وينك عندي يومين وانا نطلب فيك
باسل : اهدي خليني نحكي ... انا تصاوبت ... (شهقت ليان )
ليان : وينك خليني نجيك
باسل : لا ماتخافش انا مليح واصابة طفيفة ... كلمت برك بش نطمنك ..
ليان : ماتتصورش قداشني خفت ... وقت عرفت انك خذيت اجازة ...
باسل : ماتخافش ليان ... انا مليح وتوا بش نخليك اهتمي بروحك ... ودعها وعلق عليها هز راسوا لقى جان يغزر بنظرة يعرفها مليح
جان : علاش ماتعطيهاش فرصة ... شفت البنية كيفاش مفجوعة عليك
باسل : انسى .. انا قلبي سكرتوا يوم خسرت سونا وولدي
جان : متأكد انوا سونا ماكانتش راح تقبل انك تكمل حياتك هكا ... عايش ورا الانتقام ... غطست في الخمج ولوثت يديك بدم ابرياء ... فيق باسل مزال عندك فرصة بش تنقذ روحك وتنقذ البنية لي تحبك ... نتمنى تفيق قبل لا تخسرها كيف ماخسرت ام ولدك ... مشى جان وخلاه غارق في الكلام لي قالهولوا ... كل كلمة عندوا حق فيها هو بش ينتقم قتل برشا ناس ماعندهاش ذنب ... زعما ربي يغفرلوا ويعطيه فرصة انوا يبدا من جديد ولا يعاقبوا ويخليه غاطس في الدم .... كانت واقفة تسمعلهم ... عجبها كلام جان ... لاول مرة تشوف حد ينصح في حد من غير مقابل ... تبسمت على جنب ومشات للمطبخ لقاتوا يعمل في قهوة ... طلعت فوق البوطاجي وقعد ... خلاتوا باهت فيها .. ماينكرش انوا حركتلوا مشاعروا ... وخلات قلبوا يدق بسرعة وقت يشوفها صحيح عندوا يومين برك منين عرفها اما يحسهم عشر سنين
جيلان : علاش عايش وحدك
جان : مالقيتش المراة المناسبة لي تعمر هذي الدار
جيلان : نقصد اهلك ؟ ....حس بغصة في قلبوا
جان : ماتوا في حادث سير
جيلان : اه سامحني الله يرحمهم
جان : لا عادي كلنا ليها .... وقرب ليها حط يديه على خصرها ونزلها .. يحكي قريب من وجهها
جان : وتوا هز الصينية وألحقني ... تبسمتلوا ولحقت عليه
باسل : جيلان تأخر لوقت ... لازم تمشي
جيلان : ( متلبكة ) مايسالش نرقد ليلة هوني ...
جان : عن نفسي داري مفتوحة للكل ... على الاقل فما مرأة طيبلنا وتغسلنا ... وضحكوا في زوج الا جيلان لي ڨحرتلهم وقامت تضرب في جان بالمخاد ... وباسل يضحك على تفوريخهم ....
💥 جام ورأيكم في الريبوند 💥