👧كرونيك يقتل :لعنة -أنثى 💗💓❤️‍🔥

21

#الحلقة_21❤❤
#لعنة_أنثى 🔥🔥
#خولة_عزيز 🌶🌶
تمشي في رواق المشفى والعصب ماكلها تقرت الارض نقير ... لازم تمنع هذا الزواج بأي طريقة ... جبدت تلفونها عيطتلوا مايردش .. كلمت السكرتيرة في الشركة قالتلها لتو لا جاء حملت روحها وقصدت داروا...دقت الباب فتحتلها الخادمة
جهيدة : ميسيو حاتم هوني
الخادم : ايه في مكتبوا تفضل مدام جهيدة توا نخبروا
جهيدة : لا خلي عليك بش نمشيلوا بروحي ...خلاتها واقفة في بلاصتها وزدمت عليه في بيروه دزت الباب وخلاتوا مشقوق شوي
في الوقت لي دخلت جهيدة ... كانت صفية لحقت طلبت من الشوفور يتوقف مايفوتش بالسيارة لداخل ... نزلت تسرع في خطواتها بش تلحق عليها وتفهم شنوا تعمل هوني ... فتحت بابا الفيلا (بصفتها كانت مرتوا من قبل وام ولادوا مزال عندها مفتاح الفيلا ) دخلت تتسلسل غزرت يمين ويسار مالقات حد .. مشات دخلت للصالون مافما حد كانت بش تطلع للدروج سمعت صوت جاي من البيرو تقدم بخطوات خفيفة حتى مايشلق عليها حد
_حاتم كان في بيروه تلفوناتوا ماتوقفتش ... راح يجن وين ختفات البنت ... حتى دخلت هي وجهها مايتفسرش
جهيدة : وين حاب توصل بتخبيصاتك هذوا
حاتم مستغرب من دخولها العنيف اصلا مش ناقصها توا : فاش تخرف انتي 
جهيدة : كيفاش توافق على زواج ميرنا ولؤي
حاتم تصدم هو ماكانش عندوا حتى علم بهذا الشي اما عجبتوا الفكرة من داخل تبسم بخبث
جهيدة : على شنوا تتبسم ... هي كلمة وحدة انت بش تجبد بنتك على ولدي ..
حاتم : علاش نجبدها ياخي بش يتزوجوا على سنة الله ورسولوا
جهيدة : ماتجننيش ببرودة دمك انت وانا نعرفوا مليح انو زواجهم مستحيل يتم
حاتم : علاش مستحيل ... عن نفسي انا موافق مانلقاش واحد لبنتي كيف ولد شريكي (وتبسم بخبث)
جهيدة (تڨحرلوا ) : انت باز جنيت من تورطك ياسر في الحرام  .. كان نسيت خليني نذكرك لؤي مايجيش يتزوج بميرنا خاطرها اختوا
حاتم : ههههههههههههههههه وشكون قالك انها اختوا ميرنا موش بنتي بنت صفية من ادم ....
جهيدة : صاييي جنت من كلاموا ... الارض لفت بها قربت شدت في الكرسي قبل لا طيح ... اما هو بقى يتبسم ببرودة دم كأنوا ماهموا شي كل يوم تعرف حاجة جديدة عليه زعما شنوا يكون مخبي اكثر
حاتم : شفت يالالا جهيدة انت لثاني تحملني ذنب اخطاءك ... نسيت انوا انا السبب في نجاح زواجك .. نسيت اني منحتك صغير لي ماقدرش عمر يمنحهولك ... انتي بفضلي انا مزالك عايشة مع عمر ... كون ماكان لؤي كان رماك من زمان .... عمر عايش معاك على خاطر ولدي انا ... انتي وانا نعرفوا مليح اتوا عمر كان يعشق جنان ... وكان بش يعمل اي شي باش يحصل عليها
جهيدة : اسكت ... سكر فمك ... اسكت خلاص
حاتم : الحقيقة توجع ياسر ... اخرج من الوهم لي عايشة فيه ياجهيدة عمر مانساش جنان وماراحش ينساها 😂😂😂
جهيدة : كلوا بسببك انت دخلتها لحياتنا ... كون ما انت كون ماصار شي ...
حاتم: انا زادة تخدعت فيها ... ماكنتش نعرف اانها عميلة .. هي لعبت بينا كلنا وخذات جزاتها كيفها كيف أدم لي .....
ماخلاتوش يكمل كلاموا ... وصاحت
جهيدة : يزي ... يزي ماتجبد في الماضي كل شي تدفن بموتهم ... الله يحرقها في قبرها كيف ماهدمتلي حياتي .... مسحتها دموعها
وريڨلت روحها مشات للباب بش تخرج وبعدها تلفتت عندوا .... (صفية غير حست انها راح تخرج مشات تجري خرجت من الفيلا قبل لا يشوفها حد لي سمعاتو توا بش يخدمها ياسرها وبش تستغلوا لصالحها  )
جهيدة : ميرنا بنت من ؟ شكون بوها ؟
حاتم : بشنوا يهمك تعرفي
جهيدة : لازم نعرف مرت ولدي شنوا اصلها وفصلها ...
حاتم : ههههههه تهنى اصلها من اصلك ... ميرنا بنت خوك ادم راجل المرأة لي يعشقها راجلك (لاز على كلاموا كأنوا يحب يحرقلها قلبها)
جهيدة : شنوااااا .. انت تكذب ... مستحيل ادم يعملها .. هو كان يحب جنان ومستحيل يخونها ومع شكون مع صفية باز تكون كذبة من كذباتك
حاتم : ماعندي علاش نكذب ...ادم وقت تفارق مع جنان سكر وصفية ستغلت الفرصة وعملت معاه علاقة خاطرها كانت تحب تنتقم من جنان ... وحملت منوا ... وانا عرفت بالصدفة ... وخليتها جابت الصغير وعطيتوا اسمي بش نستخدموا ضد ادم ... اما صار الشي لي ماكنتش نتوقعوا انو ادم كان متزوج جنان بالسر وطعننا في ظهرنا وقت حب يتوقف على الشراكة معانا ويخرج من الحلقة ...
جهيدة : هه وطبعا انت ستغليت الفرصة لصالحك وعمرت راس عمر ضد أدم
حاتم : ادم زادا ماكانش ملاك ... نسيت كيف كان يعاملك خاطرك اختوا الغير شرعية من بوه ... هو ماكنش يعتبرك اختوا بالمرة ... الاخت الوحيدة لي كان يعترف بها هي سلمى ... تتذكر سلمى (وتبسملها بخبث ) جهيدة غير سمعت اسم سلمى تلعثمت ووجهها تخلخل ماعرفتش شنوا تجاوبوا كأنوا ماضيها الحقير فتح ابوابوا ورجع بش يخنقها ... هزت روحها وخرجت بلا ماتنطق بحرف ... مستحيل تخلي شي يهدم كل شي بناتو هوما ماتوا وخذاو سرهم معاهم مالازم تفتح ابواب جهنم على روحها وماعليها غير توافق بزواج ميرنا وولؤي ركبت سيارتها ورجعت لدار ماهيش قادرة تشوف حد ولا تتكلم مع حد
💥 جام ورأيكم في الريبوند 💥