👧كرونيك يقتل :لعنة -أنثى 💗💓❤️‍🔥

41

#الحلقة_41❤❤
#لعنة_أنثى 🔥🔥
#خولة_عزيز 🌶🌶
_كان في غرفتوا ... جبد سيجار ومشى للبالكون يدخن ... جات عينوا على سيارتهم وقت توقفت نزلوا وهو يضحكوا مع بعض ...حس بالعصب والغش عمل نيران داخل عيونوا .... كون صاب راهو مشالهم لزوج ردخهم بطريحة من شويا برك خلاها في غرفتها وقتاش لحقت تخرج ... خرج وخبط الباب وراه ... على دخلتهم من الباب قابلهم واقف يڨحرلهم ... رائد فهم عليه ... اما هي طفاتوا على اللخر وكملت تحكي مع رائد كانوا مش واقف يغزرلهم ... زادت شعلت ناروا أكثر بعملتها ... رائد ودعهم ومشى لغرفتوا وهي جات طالعة ... تعداتوا مش معبراتوا بالكامل .... جات تغلق باب غرفتها حست بيد وقت وقفاتوا دز الباب وغلقوا وراه حصرها مع الحيط .. عوجلها يدها ورا ظهرها.. عيونوا تقدح نار داخلو غش ينهش فيه نهيش ... صدروا يطلع وينزل نفسوا يحرق في وجهها ... عرفاتوا واصل لتوبوا وليلة ليلتها .... وجعها اكثر وقت زير على يدها
جيلان : وو.ووجعتنننني ... وهو مش جايب خبر لروحوا النار لي داخلوا عماتلوا عينيه ...
أيهم : شتعمل مع رائد في هذا الوقت
جيلان : (تتغوصر ) شمدخلك ياخي نعمل لي نحب عليه ... ياخي المهمة لي عطيتهالي نقوم بها كيف ماتحب ... اما حياتي الخاصة ماتهمكش
أيهم: تهمني ( ماحسش كيف نطقها )
جيلان : (مستغربة من ردة فعلوا ) شتقصد .
أيهم : حياتك الخاصة تهمني اي غلطة تعملها بش طيح فوق راسي انا من اليوم دخلاتك وخرجاتك راح يكونوا بعلمي فاهمة ....
جيلان : لا هنا واوقف ... جنيت ياخي ... انا صحيح نخدم تحت يدك .. انت مسؤول عليا وقت المهمة وبس اما لي نعملوا خارج المهمة مادخلكش فيه ... حتى ولو لقيتني نبوس في حد ماتدخلش ... على كلامها جن ... ولي زاد به حركة شفايفها لي ترجف وقت كانت تحكي ... هز يدوا وكبس على رقبتها ... غاطس في شفايفها يبوس فيها بكل غل .وغش ... ماسيبها غير وقت حسها تقطعلها النفس ...جبينوا مزال على جبينها تحاول تجبد نفس رجليا فشلوا عليها ... يحكي عند شفايفها
أيهم: هاني بستك وإعتبرها خارج المهمة ... .. دزاتوا لبعيد تحاول تكبس على دموعها
جيلان : شتسخايل في روحك تعمل ... ماتنساش انو انت رئيسي ماتحاولش تتجاوز حدودك معايا ... قرب منها وحط يدوا على الغوب لي لابسها حكمها بصبعوا
أيهم : وهذي الشلقة مانحبش نشوفها على بدنك ... ماخلاها تحكي وعطاها بظهروا وخرج ... تسب وتلعن فيه
جيلان : الساقط ماحاولش حتى يعتذر وفوقها يدخل في لبستي اما والله بش نردهالك ولا مايكونش إسمي جيلان .. تحب تلعب توا نلعبوا الكل ... وخليك تقاومني ...وتبسمت بخبث
_قامت صباح تحس في راسها رزين تفاجئت وقت لقات روحها في غرفتها ... مش متذكرة شي .... قامت عملت دوش ولبست نزلت لقات بوها وامها قاعدين على الطاولة وقت شافها كرز جات تسلم عليه دزها ..
حاتم : شنوا التخبيص لي تعمل فيه ... شنوا تحب تنزلي اسمي في الارض ... على الاقل اعمل حساب لراجلك مش بايتة سهرانة للفجر ..
ميرنا : بابا سامحني اما كنت مخنوقة ... كل شي ضاغط عليا في هذيك الدار ...تصور طاطا جهيدة لبارح سبتني وعملتلي فيلم قدام لؤي خلاتوا يضربني
صفية : شنواااا .. الله يكسر ايدهم ... وڨحرت لحاتم
حاتم : ماهيش بش ترمي عليك بلاها من غير ماتعمل شي توا تحمل روحك وتمشي لدارك ... فاااهمة (لاز على اخر كلمة )
ميرنا : بابا .... ماخلاهاش تحكي وقام خرج ... صفية تبسمت بخبث جاتها الفرصة انها تسترجع ثقة بنتها وانها تنتقم من جهيدة في نفس الوقت ... قدمت منها وحاوطت وجهها بيديها تحكي
صفية : ماتبكيش عزيزتي اذا هو ماوقفش معاك انا بش نكون معاك مستحيل نخليهم يكسروا شوكتك ... ميرنا تصدمت من أمها ومن الحنان لي نزل عليه فجأة
ميرنا : كيفاااش
صفية : (جات في بالها صورة جيلان وتبسمت بخبث ) خلي كل شي عليا ... باستها وقامت مشات للشركة ... تعدات طول لمكتب سي عمر دقت الباب ودخلت
💥 جام ورأيكم في الريبوند 💥