(((((((السكة شمال ٢))))))))
#لولو_محمد
الحلقه ٨
مازن / مساء الخير على كل الناس اللى بتابعنى و اللى هتابعنى انا عارف ان معظمكوا عنده سؤال مولح جدا عاوز يساله ايه اللى حصل يا مازن فى ايه يا مازن ايه اللى احنا شوفناه ده الكلام ده حقيقى و لا لا الحقيقه انا مش عارف ابدء منين لان الحقيقه ابشع من انها تتحكى فى كلمتين بس اول حاجه انا مراتى اشرف من الشرف و كل الكلام اللى اتقال عنها كدب و اكيد اللى حصل ده مش هيعدى مرور الكرام انا روحت لاكتر من مكتب محاماه كبير فى البلد دا غير المحاميين بتوع الشركه و كلهم مش هيبقى عندهم غير شغله واحده بس الفتره الجايه هى انهم يجيبوا كل كلب قال كلمه عن مراتى كل صفحه شهرت بيها كل ادمن قذر كان بيعمل بلوكات لاى حد يدافع عن مرام و يسيب اللى بيشتموا بس لكل واحد قال عنها كلمه انا مطلعتش الصبح عشان اديكوا فرصه تتكلموا و اللمكوا كلكوا عشان اربيكوا واحد واحد تانى مرام مراتى اشرف من الشرف و اللى حصل كان فيلم من بلطجيه اتسلطوا عليها مين سلطهم اهلى عيلتى ولاد الحسب و النسب اللى استكتروا عليا انى افرح و انى اكون انسان عدل مرام سابت البيت و رجعت بيت اهلها يوم الصبحيه لان الانسان الوحيد اللى اعتبرته اخويا كان مخبى نسخه من مفتاح الشقه و اتهجموا علينا مراتى راحت الحاره مش عشان انا رجعتها لما عرفت انها مش بنت مراتى اشرف من الشرف مراتى رجعت عشان انا مكنتش راجل معاها و معرفتش احميها و اى كلب هيجيب اسمى او اسمها حسابه مع المحاميين بتوعى بعد كدا مع السلامه
مازن يتك على زرار و يقفل اللاب و يقعد ينفخ
...........................
فى الحاره تانى يوم الصبح
مهندسين كتير داخلين و عربيات نقل تركن عالناصيه و عمال ينزلوا يبدؤوا يكسروا فى الاسفلت و يشيلوه و ينقلوه فى العربيات و يحفروا راجل معدى
راجل / هو فى ايه يا بشمهندسين
المهندس / هنغير شبكه المايه فى المنطقه ... اقفلى يابنى محبس المايه العمومى فى المنطقه
الراجل / الله ينور يا رجاله بس مش كنتوا قولتوا من بدرى كنا عملنا حسابنا و مالينا حلتين و لا حاجه
المهندس / المفروض انهم بلغوكوا امبارح عن اذنك عشان اشوف شغلى يابنى اقفل المحبس خلينا نخلص
الست بتاعه الخضار / حاسب يا عم الخضار استنى اما اللم حاجتى الله
العامل / خلصينا يا حجه ورانا شغل كتير
الست / بلم اهو جتكوا سرعه تسرعكوا هو فى ايه الدنيا طارت
الراجل يمشى و فجاه توصل عربيات تانيه و عمال تانين و معاهم ونش يفتحوا المحول اللى على اول المنطقه و يفصلوا الكهربا الست بتاعه الخضار تلم حاجتها و تدخلها جوه العماره عمال يركبوا الونش يرفعهم لفوق عالعمدان يفكوا سلوك الكهربا
تلت شباب داخلين الحاره و هما مخنوقين
شاب 1/ بتعمل ايه يا هندسه
العامل / بنغير سلوك الكهربا عشان قدمت
الشاب 1/ يعنى النور قاطع كملت و ايه ده كمان هو فى ايه بقى
الشاب 2 / يعنى مش عارف فى ايه مقولتلكوا مش هيسكت
الشاب 3/ و احنا مالنا يا عم بياخدوا عاطل مع باطل ليه
الشاب 1/ يا جدعان انا قولتلكوا اصلا انه كدا كدا هيمشينا هو كان مشغلنا عشان يجاملها و طلعت متستاهلش يحط علينا احنا بقى
الشاب 2/ لسه برده بتتكلم مهو طلع امبارح و اتكلم يا عم
الشاب 1/ امال يقول ايه طلعت عيل كاورك و خدت على قفايا من حته بت لا راحت و لا جت
الشاب 3/ اقعدوا انتوا ارغوا كدا فاللى لا يودى و لا يجيب و الواحد مش عارف هيطلع يقول لابوه ازاى انهم رفدوه مالشركه
الشاب 1/ هو احنا لوحدينا اللى اترفدنا دا كل اللى اتعينوا من الحاره سواء فى الشركه دى او فى غيرها بيصفوا حسابهم و يمشوا
الشاب 3/ حسبى الله و نعم الوكيل الواحد كان خلاص سستم اموره و بدء يدور على عروسه ادينا هنرجع للصفر تانى
الشاب 1/ منها لله اللى كانت السبب ربنا ينتقم منها
مهندس معدى / معلش يا شباب الوقفه دى عشان بنحدف سلوك و كدا تيجى فى حد و لا حاجه
شاب 2/ لا مؤاخذه يا بشمهندس
..................................
فى شقه شريف
شريف يصحى مالنوم يقوم يقعد و يطلع هدوم و فوطه و يقوم يدخل الحمام يقابل شيماء طالعه مالحمام تشوفه تبص فى الارض
شريف / صباح الخير
شيماء / صباح النور
شيماء تعديه يمسك ايدها
شريف / بقولك يا شوشو ممكن تكويلى طقم على مخرج مالحمام عشان مستعجل جدا
شيماء منغير متبصله / حاضر
شيماء تسيبه و تمشى و هو واقف باصص عليها
.......................
فى المستشفى عند مرام
مرام تصحى مالنوم تلاقى سميحه و مديحه نايمين تتمطع و تقوم تمشى رجليها فى الاوضه مديحه تتقلب مرام تجز و تتسحب و تطلع بره و تقفل الباب بالراحه
مازن / صباح الخير
مرام تتفزع مازن يقوم و هو بيدحك
مازن / انا اسف انا اسف والله مكان قصدى ههههههههههههههههه اقعدى اقعدى
مازن يحاول يقعد مرام تبعد ايده و تروح تقعد لوحده و ايدها على صدرها من الخضه يروح يقعد جنبها و هى على اخرها
مرام / انت بتعمل ايه هنا
مازن / بفطر تاكلى جايب سندوتشات فول و طعميه يستاهلوا بقك تعالى كليلك لقمه
مرام / الف هنا عن اذنك
مرام تيجى تتمشى مازن يقوم يجرى وراها
مازن / رايحه فين بس استنى
مرام / انت عاوز منى ايه يا مازن ما كفايا بقى بجد
مازن / عاوزك تسامحينى و تصدقى انى مليش دعوه بكل ده والله العظيم مظلوم
مرام / ماشى يا مازن مسمحاك حاجه تانى
مازن / بجد مسمحانى يعنى هترجعى معايا البيت
مرام / انهى بيت
مازن / اى بيت البيت اللى تختاريه المهم نبقى سوا
مرام / لا اله الا الله يارب صبرنى يابنى على فكره فى بنات غيرى احلى بكتير متاكده انك هتنبسط معاهم فكك منى بقى
مرام تيجى تمشى يمنعها
مازن/ و ان كنت مش عايز غيرك
مرام / لا يلدغ مؤمن من جحر مرتين
مازن / يا ايها اللذين امنوا اذا جائكم فاسق بنبا فتبينوا ان تصيبوا قوما بجهاله فتصبحوا على ما فعتلم نادمين
مرام متردش
مازن / يا مرام ربنا وحده اللى يعلم انى مكنتش بحاول اخدعك و لا ناوى اجرحك و ان اللى حصل دا كلو كان غصب عنى على فكره
مرام / و المطلوب
مازن / ارجعى معايا و انا هعملك كل اللى انتى عوزاه هعملك كل الترضيه اللى ترضيكى اوعدك انى هتغير المره اللى فاتت الضربه جتلى من اخر واحد كنت مستنى الغدر منه بس خلاص انا عرفت مين عدوى من حبيبى
مرام / انت بتطلب المستحيل طلقنى يا مازن
مازن / متبقيش انتى و هما عليا متكسرنيش يا مرام
مرام / اشمعن انت كسرتنى
مازن / انتى اللى بتكسرى نفسك انتى بتحبينى
مرام / معدتش متاكده
مازن / كدابه انا بعرف لما بتكدبى
مرام / احنا فى مستشفى على فكره
مازن / اعمل ايه اكتر من كدا عشان اراضيكى
مرام / طلقنى
مازن / مش هقدر ... مش هقدر
مرام / خلاص يبقى هخلعك و انا كدا كدا مش عايزه منك حاجه
مازن / على فكره انا امبارح
مرام / انا عرفت انت عملت ايه محمود حكالى برافو بس تفتكر فارق معايا يعنى مازن انا بقالى فوق السنه معاك انا عرفاك كويس و عارفه انت تقدر تعمل ايه فاكر اولجا
مازن / كانت بتحاول تاذيكى
مرام / و دول كمان يا مازن انت جبتلى حقى منهم عشان كانوا بياذونى فارسى الهمام بس تعرف يا مازن لما تفكر فيها كدا هتلاقى ان عمر محد حاول ياذينى قبل ما تدخل فى حياتى انت جبتلى حقى الحق يتقال جبتلى حقى من كل اللى اذونى بس بعد ما اذونى يا مازن اذونى و انا فبيتك فسريرك فحضنك اذونى و مقدرتش تحمينى جبتلى حقى بس بعد ايه مازن احنا جربنا نقرب و اتوجعنا او اتوجعت مش عارفه خلينا نبعد هنتوجع شويه يمكن بس صدقنى هنرتاح اوى بعدين
مرام الدموع تملا عنيها هى و عنين مازن
مرام / طلقنى يا مازن انا معدتش شيفاك تنفع زوج ليا
مرام تسيب مازن و ترجع تدخل الاوضه و هو مصدوم و الحزن مالى ملامحه
...............................
فى الحاره
اتنين ستات بيتكلموا على السلم قدام شققهم
ست 1/ ملاقيش عندك ازازه مايه ياختى اشطف بيها طبقين ناكل فيهم
ست 2/ والله ما فى انا حتى الحوض عندى غرقان مواعين من امبارح اصلى كنت تعبانه طول الليل فمغسلتش
ست 1/ يادى الدوخه طب مش كانوا قالولنا نملا مايه
ست 2/ ياختى هى جت عالمايه بس دا مايه و نور و اللى يفرس انهم قفلوا شغل على كدا و مشيو
ست 1/ انا هبعت الواد يملالنا جركنين من عالناصيه ملهاش حل تانى بقى مدام الموضوع مطول و يجيب شمع و هو راجع اما نشوف اخرتها
ست 2/ خليه ياخد باله لحسن يقع فى الحفر الواد عبد الله رجله اتلوت و هو راجع من الشغل
ست 1/ هو صحيح ياختى كل اللى شغلهم مازن بيه صفوا حسابهم النهرده
ست 2/ منها لله مرام بنت ام مرام خربت بيوت كتير اوى فى الحاره دى
ست 1/ كلو كوم و المعلم اسعد كوم تعرفيش خد مراته و عياله و قفلوا المحل و راحوا فين
ست 2/ لا بس شوفته و هو بينقل كل اللحمه مالتلاجات شكله كان عارف ان النور هيقطع
ست 1/ يخيبه راجل مش يقولنا طيب نعمل حسابنا
ست 2/ كنتى هتعملى ايه يعنى
ست 1 / اهو نفضى الفريزر و لا نعمل اى حاجه
ست 2/ سيبك انتى تعرفى انا كل ده ميفرقش معايا يعدى اللى فارق معايا بقى الوليه ام توفيق اما فرحت فيها فرح
ست 1/ ايوه كدا خلى الحاره تنضف بصحيح
ست 2/ هو فى بعد كدا نضافه و بكره بعد ميوصوا المايه و السلوك الجديده و يرصفوا الحاره من تانى كل مشاكلنا هتتحل باذن الله
ست 1/ على رايك اسيبك انا بقى لحسن سايبه الاكل عالنار
ست 2/ اتفضلى ياختى
..........................
فى البيت القديم
اسعد / نورت بيتك يا مرام اتفضلى بيتك و مطرحك
الست / اهلا اهلا يا قمر حمد الله عالسلامه كدا تقلقينا عليكى والله لولا انشغلت بالفرش و التوضيب كنت جيتلك
مرام / كانك جيتى بالظبط
الست / احنا سبنالكوا الاوضه الكبيره تاخدوا فيها راحتكوا انتوا التلاته و لو عوزتوا اى حاجه اى حاجه اوعوا تتكسفوا بيتكوا و مطرحكوا
سميحه / اصيله يا حجه
مديحه / الله امال مروه و البنات فين
الست / ناموا من شويه اصلهم كانوا مطبقين من امبارح اجازه بقى هههههههههههههههههههه تحبوا ادخل اصحيهم
مرام / لا ملوش لزوم احنا كمان هندخل نريح فى الاوضه عن اذنكوا
مديحه / اه والله يا مرام فى دى عندك حق اصل نومه المستشفيات دى بعيد عنك يا حجه بتعيي اه والله
الست / لا سلامتك الف سلامه خشوا ارتاحوا اتفضلوا اتفضلوا و ان شاء الله لما الغدى يجهز هبقى اجى اناديكوا
مرام و مديحه و سميحه يدخلوا الاوضه و يقفلوا الباب
مديحه / و دا هياخدنا احنا التلاته ازاى
مرام / انا هنام فى الارض جنب السرير
سميحه تبص لمرام
مرام / هبقى افرش سجاده و مخده و انام عادى
مديحه / بس كدا البرد يزيد عليكى يا مرام
مرام / لا مش مشكله مالسجاده و سجاده الصلاه فوقيها هيحوشوا عادى مش مشكله
مديحه / طيب
سميحه باصه لمرام و ساكته
مديحه / اهى النومه و هتدبر طب و اللقمه يا حجه هنعمل ايه
سميحه / متشيليش هم يا مديحه ربك بيرزق
مديحه / ايوه يا حجه بس ربنا قال اسعى يا عبد و انا اسعى معك و الانسان مهما كان تقيل يعنى و المعلم اسعد ان شالنا النهرده مش هيشيلنا بكره ان كان عليه يشيل بس مراته احنا عارفينها كويس مش هتسكت
مرام / احنا طول عمرنا بناكل من عرق جبينا نرجع نشغل الصفحه تانى و نشوف هيحصل ايه
مديحه / و انتى فاكره لما هتفتحى الصفحه تانى هتلاقى الناس مستنينك بالطلبات متلاقيهم لقوا غيرنا و ظبطوا امورهم
مرام / هنزل كام عرض كويسين نشد بيهم الزباين و هعمل دعايا هنا فى المنطقه الجديده دى و بكدا نبقى كسبنا زباين جداد و ربنا هيرزق
سميحه / ينصر دينك يا مرام هو ده التفكير
مديحه / بقى يا حجه هنرجع للشقا تانى بعد مكنا ارتحنا انا كبرت عالحاجات دى خلاص و معدش ضهرى حمل قعاد على حلل المحشى و لا نقاوه الرز
مرام / ربنا يقدرنى و اعمل قد اللى كنت بعمله و اكتر متشيليش هم يا عمتى هترزق
مديحه / ايوه يا مرام بس لازم تفهمى ان الشقه معدش فيها حاجه و هنحتاج فلوس عشان نفرشها و نظبطها و حوار الاكل ده كان على يدك يادوب كان بيكفينا اكل و شرب و مصاريف هنعمل ايه بقى
مرام / هنستحمل يا عمتى هنستحمل كلها كام شهر و اتعين و ربنا يفرجها اعمل ايه يعنى
سميحه / متعمليش يا حبيبتى متعمليش بكره ربنا يفرجها من عنده متشيلوش هم
سميحه تقلع غويشتين و حلق و تديهم لمرام
سميحه / خلى محمود يبيعهم و يشوف هيجيبوا كامو شوفى ايه اللى محتاج يتعمل و اعمليه هاتى اللى انتى محتاجاه و انا معاكى لاخر نفس فيا و طول ما ربنا مطول فى عمرى ايدى على ايدك اساعدك بس انتى قولى يارب
مرام تبتسم / يارب يا تيته يا رب
................................
فى الشركه
شريف شغال عاللاب مازن يفتح الباب و يدخل
مازن / ايه يا شريف لعب العيال ده بقى حته بت زى دى مش عارفين نمسكها
شريف / على موصلوا البيت لقوها لمت حاجتها و مشيت بس الرجاله شغاله والله مش هيسكتوا عملت ايه مع مرام كلمتها
مازن يهز راسه اه بحزن
شريف / مفيش فايده برده
مازن / جابت مالاخر قالتلى الحقيقه فوشى انا مش عاوزه واحد يجبلى حقى مالناس اللى بياذونى انا عاوزه واحد يحمينى منهم و ميسمحلهمش ياذونى
شريف / بتوجع دى
مازن / بس معاها حق
شريف / هى بتقول كدا بس من ورا قلبها لكن لما هتهدى
مازن / و لحد ما تهدى يا شريف هيكون ايه تانى حصل احنا طول الوقت بناخد رد فعل بس
شريف / مهو للاسف يا مازن مهما حاولت مش هتقدر تتخيل مستوى الانحطاط اللى هما بيفكروا بيه و تتوقع هيعملوا ايه عشان تامن نفسك
مازن / طب و العمل يا شريف هسيبها كدا ياذوها هسيبها كدا يعنى
شريف يبصله و يبص الناحيه التانيه
مازن / مالك انت كمان
شريف / هيكون مالى يعنى هو الباشا مكنش معانا فى المستشفى و سمع مرام قالتلى ايه
مازن / مانت لسه قايل من ورا قلبها و لما تهدى
شريف / طب خد عندك بقى امى اللى كانت بتصحينى بنفسها و احضرلك الفطار يا حبيبى تقريبا اختفت من المشهد خالص و شيماء بتتجنب تبصلى و الكلمه على قد السؤال لولا اصلا انى شوفتها صدفه يمكن كانت اختفت هى كمان زى اخوتها
مازن / ما يمكن صدفه
شريف يبصله
مازن / طب كلمهم شوف فى ايه
شريف / فكرت والله اسال شيماء فعلا الصبح بس قولت يمكن ميكونش فى حاجه و دى برانويا منى
مازن / هيبان
شريف / هيبان
.............................
فى الصيدليه
عمر يحاسب زبون و الراجل يمشى
عمر / هو فى ايه
شيماء / نعم
عمر / فى ايه مالك دا رابع زبون يدخل و متقوميش تشوفى عاوز ايه مش عادتك يعنى انتى عادته بتسابقينى عليهم
شيماء / هاه ؟؟ معلش سورى بس النهرده تعبانه شويه
عمر / لو مرهقه اطلعى ارتاحى
شيماء / لا مش مرهقه خلينى هنا احسن
عمر / هو فى حاجه مديقاكى
شيماء تبتسم / لا مفيش عادى يعنى
عمر / مش عارف بس انتى مش مظبوطه عالعموم
زبونه تدخل شيماء تقوم تبتسملها و تاخد منها الروجته و تبص لعمر متابعها و مبتسم
.........................
مرام نايمه عالارض و بتتقلب كتير و بعدين تقوم تقعد و تسند المخده عالحيطه و تقعد تفتكر
///////////////
مرام / يعنى هتحافظ عليا
مازن / انتى كتبتى انك بتدورى فالراجل عالامان و صدقينى مفيش حد فالدنيا ممكن يحميكى قدى
مرام / و مين يحمينى منك يا مازن
مازن / انا .. انا عمرى مهاذيكى و لا هجرحك
مرام / و انا ايه يضمنلى ده
مازن / انى بحبك
/////////////////
مرام / مازن انت بتحبنى بجد
مازن / والله اللى عمرى محلفت بيه كدب ما قولتها غير ليكى و اسالى اى حد ماللى يعرفونى قوليلهم مازن قالى بحبك شوفى هيقولك ايه
مرام / توعدنى انك عمرك مهتجرحنى و لا تخلينى اندم
مازن / اوعدك
///////////////
مازن / ادى المفتاح اهو خديه
مازن يمد ايده لفوق تمد ايدها و تشب و تقرب و يناوله بين ايديه الاتنين مرام تحاول تجيبه و ترفع ايديها الاتنين يعديه من تحت باطها و يشدها من ضهرها عليه و يبوسها تزقه يقع يسند عالتسريحه و الحاجه اللى عليها تقع
مرام / انت اتجننت
مازن / هو انتى سبتى فيا عقل
مرام / والله لقول لتيته والله لوديك فستين داهيه والله
مازن / للمره المليون انا ... جوووووزك
////////////////
مرام تحط ايدها على شفايفها و تبتسم
//////////////
مازن / انا عارف انى دخلت حياتك لخبطتها بس انتى دخلتى حياتى عدلتيها يا مرام
مرام تبصله
مازن / انا لاول مره فحياتى سعيد لاول مره فحياتى عندى سبب اقوم عشانه الصبح عندى سبب اعيش عشانه عندى هدف عاوز اوصله هدف حقيقى لاول مره احس
مرام / تحس بايه
مازن / باى حاجه حتى لو كانت الخوف اول مره خوفت كانت عليكى خايف اخسرك خايف يجرالك حاجه اول مره احس حتى بالزعل زعلت عشان مش قادر اكون جنبك بالفرح عشان بقيت جنبك اول مره احس بكل حاجه كانت معاكى و بسببك و عشانك انتى مليتى الفراغ اللى فروحى كملتينى و مش هسمحلك و لا هسمحلك و لا هسمح لجنس مخلوق انه يفرقنا فاهمه و لا لا
///////////
مرام تدحك و تبص الناحيه التانيه مازن يحاول يمسك ايدها تسحبها
مرام / الناس
مازن / الناس ؟؟
مازن يقوم يقف و يطلع القسيمه و يرفعها لفوق و مرام تدارى وشها مالخجل
مازن / مراتى يا جدعان ... القسيمه اهى دى مراتى ... متسبينى امسك ايدك بقى يا فوزيه الله
الناس تدحك يقعد جنبها و يلزق فيها هى عماله تغطى وشها بايدها
مرام / فضحتى
مازن / شكلك عسل و انتى مكسوفه كدا و خدودك حامره كدا
مرام / انت مجنون على فكره
مازن / و انتى سبتى فيا عقل
مرام / ابعد شويه
مازن / خلاص الكل عارف انك مراتى محدش له حاجه عندى
الراجل يجيب الرز بلبن مازن يقعد عدل و مرام بتبصله و تبتسم و تبص الناحيه التانيه بسرعه مازن يملا المعلقه و يحطها على بق مرام
مازن / خير صدقه لقمه يضعها الرجل فى فم زوجته
مرام تفتح بقها و تاكلها يملا غيرها
مرام / شايفه انك بتستغلنى كويس
مازن / انتى اللى فتحتيلى السكه لما قولتى سوره النساء كملت و عرفت حقوقك و حقوقى و ناوى استغل الموضوع لاقصى حد
مرام / طب و هو انا كمان ممكن استغلك
مازن يفتح بقه مرام تحطله المعقله مازن يبص حواليه يلاقى الكل متابعهم و مبتسمين
مازن / انا بقول ناخد اطباقنا و نكمل فى العربيه احسن
مرام تهز راسها موافقه و ياخدوا اطباقهم و يمشوا و الكل متابعهم
////////////////////
مرام تبتسم ابتسامه مكسوره و الدموع تنزل من عنيها تمسحها
///////////////
مازن يغمض مرام تبوسه من خده و تطلع تجرى يطلع يجرى وراها يلحقها قبل متطلع من باب الشقه و يمسكها و يشيلها
مرام / هههههههههههههههههه نزلنى اوعى سيب
مازن / مش قبل مترجعى اللى سرقتيه منى جوه
مرام / مش هتكلم غير قدام المحامى بتاعى
مازن / هتعترفى بالزوق و لا اوريكى وشى التانى
مرام / بريئ يا بيه
مازن / احنا هنكدب من اولها مش سرقتى منى بوسه جوه رجعيها
مرام / هههههههههههههههههه شوف و انا اللى كنت فاكره هتقول سرقتى قلبى و عقلى و كبدتى وفشتى
مازن / هههههههههه لا مالحاجات دى ربنا يعوض عليا فيها مش هترجع حتى لو عملت اللالى بس البوسه ممكن ترجع و انا مش هسيب حقى
مرام / طب مانت كمان سرقت منى بوسه قبل كدا كنت اتكلمت خلاص دى قصاد دى
مازن / لا دى مش قصاد دى بصى ايه رايك انا ارجعلك اللى سرقته و انتى ترجعيلى اللى سرقتيه و نبقى خالصين
///////////
مرام تدحك
سميحه / بتفكرى فيه
مرام تتخض و تبص تلاقي سميحه نايمه عالسرير و بصالها
مرام / هو مين ده
سميحه / الوحيد اللى بيخلى وشك يدحك كدا مازن
مرام الحزن يملا وشها سميحه تقوم تقعد فى الارض جنبها مرام تساعدهت تقعد
سميحه / واحشك
مرام / اكدب لو قولت لا
سميحه / امال مشيتيه ليه زعلان
مرام / طب اعمل ايه اسيبه يدحك عليا تاني
سميحه / قلبي بيقولى مظلوم
مرام عنيها تدمع
مرام / و انا كمان قلبي مش راضي يصدق انه ممكن يعمل فيا كدا قلبي مش راضي يطاوعنى و لا يرحمنى عماله اراجع زكرياتنا سوا نفسي الاقي اى حاجه اى حاجه
سميحه / مش هتلاقي
مرام تعيط / طب اعمل ايه
سميحه / احنا ولاد اصول يا بنتي لو الدنيا جت على اجوازتنا بنقف جنبهم لو الناس ظلموهم احنا ننصفهم يا ضنايا
مرام / و لو طلع كداب
سميحه / حسابه عند ربنا و انتى عملتى اللى عليكي تفتكرى مش هيجي عليكي يوم و يوحشك و تقولى ياريتني سمعتله تفتكرى هتنسيه بالسهوله دى و بعدين الجدع يعمل ايه اكتر من كدا عشان يثبتلك انه مظلوم و انه شاريكي و باقي عليكي
مرام / يعني اعمل ايه
سميحه / قومى كلميه خليه يجي يخدك قوليله انك مصدقاه قوليله انك لسه بتحبيه
مرام / بس انا خايفه
سميحه / اغزى شيطانك يا بنتى الجدع شاريكى بقى معقوله ياربى كل الحاجات الحلوه اللى بنكوا دى تطلع فى الاخر تمثيل و كدب
مرام تفكر
مرام / بس انا معيش تليفون سبته عند مازن فى الشقه
سميحه / كلميه من تليفون محمود
مرام / زمانه نايم بره
سميحه / يعنى لو صحى و عرف انك اتكلمتى من موبايله هيزعل يعنى روحى هاتيه و كلميه روحى يا مرام روحى
مرام تبص لسميحه و تقوم تلبس الطرحه و تطلع تتسحب تلاقي الموبايل فى الشاحن تشده و تدخل الاوضه
................
فى شقه على
نورا بتكلم على فيديد عاللاب
نورا / انا بجد مخنوقه اوى يا على
على / مش بتقولى جوزها طلع برئها و بعدين مانتى عملتى اللى عليكى و حاولتى تردى
نورا/ مش قادره اصدق الصفح الزباله دى طب هيستفيدو ايه لما يشوهوا سمعه بنت بالشكل ده
على / الناس بتحب الفضايح يا نورا الاخبار اللى زى دى بتعلى الريتش
نورا / طب و البنت
على / بنت ايه يا نورا معظم اللى ماسكين الصفح دى من الاندر ايدج اصلا لا فاهمين و لا عارفين خطوره اللى بيعملوه
نورا / كان نفسي اقدر اعمل حاجه يا على كان نفسي اساعدها البنت دى لما الدنيا اسودت فوشي فمصر عرضت عليا تشاركنى سريرها و لقمتها البنت دى اطيب كتير من انها تتظلم بالشكل ده انا خايفه عليها اوى يا على خايفه تبقي زيي خايفه يجبروها تتوسخ خايفه يدمروها يا على
على / انتى مش بتقولى جوزها بيحبها يبقي مش هيسيبها نورا انا مقدر زعلك اوى بس فنفس الوقت احنا مفيش فى ايدنا حاجه نعملهالها و كمان مينفعش نضيع المكالمه اليتيمه اللى بنا فى الكلام عن مازن و مشاكله
نورا تسكت و تبص بحزن
على / انا اسف مقصدش انا عارف انك
نورا / انا اللى اسفه يا على بجد اسفه اوى
على / على ايه انك انسانه و لسه عندك مشاعر و بتهتمى بغيرك لا يا ستى متعتزريش انا اللى لازم اعتزر مش قصدي
نورا / طمنى انت عليك عامل ايه
على / عايش
نورا تبتسم بكسره
على / حاسس بوحده رهيبه من غيرك مكالمه الفيديو دى مش كفايا عاوز اكتر
.............................
