(((((((السكة شمال ٢))))))))
#لولو_محمد
الحلقه ٤٥
مازن يطلعلهم و هو بيبص فى التليفون و يوريهم صوره ماليه الشاشه
مازن / ده البلطجى اللى كسرلكوا المعرض
فادى ياخد منه الموبايل و يبص فيه
فادى / ايوه هو
مازن / اتفضلوا معايا جوه ثوانى و انا هثبتلكوا انى مليش اى دعوه باللى حصل اتفضلوا
تهانى تبص لمصطفى و تبرقله يبص فى الارض و يدخلوا كلهم
مازن / اتفضلوا اقعدوا ... تحبوا تشربوا حاجه
فادى و تهانى يقعدوا و فادى يشد مصطفى يقعده
تهانى / لا شكرا
مازن يبتسم و يتصل بحد فى التليفون
مازن / الو ازيك عامله ايه
.............................
مرام / الحمد لله خير فى ايه
مازن / بصى مصطفى و مدام تهانى هنا ممكن اكلمك فيديو
مرام / هو فى ايه انا مش فاهمه حاجه
مازن / مفيش والله هسالك عن حاجه
مرام / طب ثوانى اللبس الاسدال
مازن / ماشى ... دى مرام بيتهيالى مستحيل تشهد معايا لو ماكانتش صادقه و لا ايه يا مدام تهانى
مرام تتصل بمازن على الواتس مازن يفتح
مازن / ازيك
مرام / الحمد لله خير
مازن / بصى فى واحد اتهجم على المحل بتاع مصطفى و هبعتلك صورته انا متاكد انك احسن واحده هتتعرفي عليه
مرام / ماشى
مازن يبعت الصوره
مرام / دا توفيق الحو
مازن / ممكن تحكيلهم انا علاقتى عامله ازاى بتوفيق ده يعنى
مرام / بتكرهوا بعض مره فكلك فرامل العربيه و مره انت ضربت عليه نار فى رجله و مره ضرب محمود فى جنبه بالمطوه و انت ضربته
مازن / طب معلش توضحى اكتر ليه المشاكل اللى بينى و بينه دى
مرام / الموضوع بدا انه كان بيعاكسنى و انت ضربته و بعد كدا جه اتقدملى و رفضناه فاتهجم عليا بعد الخطوبه و من يومها و هو بيحاول يدايقنى
مازن / ميرسى يا مرام شكرا هبقى اكلمك تانى كمان شويه
مرام / ماشى
مازن يقفل و يبص للى قاعدين و يروح يقعد قدامهم
مازن / انتوا مامنين ؟؟
فادى / ايوه و كلمت شركه التامين هتغطى جزء كبير منها بس طبعا بعد التحقيقات ما تخلص يعنى مجرد وقت
مازن / لا متقلقش انا هخلصلك الموضوع ده بمكالمه تليفون
مصطفى / كتر خيرك مش عاوزين منك حاجه
مازن / بس ثوانى هههههههههههههه انت كنت جاى لوحدك تتخانق معايا ههههههههههههههه
تهانى / مكنش جاى يتخانق
مصطفى / تحب تقوم تجرب
مازن / لا محبش
فادى / مصطفى اتلم
مازن / متعرفناش
فادى / فادى عبد الغنى
مازن / تشرفنا مازن منتصر
تهانى / فين الاولاد اللى عندك يا مازن بما انى جيت ممكن اشوفهم
مازن / زمانهم نايمين فى الشقه اللى تحت ثوانى هكلم خليفه عشان ياخدك عشان انا مقدرش ادخل الشقه بسمه بنته بايته تحت مع الاولاد
مازن يقوم و يتكلم فى التليفون ثوانى
فادى / شكلنا بقى فنله حمالات مقطعه قدام الراجل
مصطفى / و انت صدقته
فادى / ماشى هو كداب طليقته كمان كدابه دانت يومك مش معدى النهرده
تهانى / بس راجع
مازن / اتفضلوا معايا
مازن ياخدهم و ينزلوا تحت
..............................
فى شقه مصطفى
الحج / انت بتستهبل و لا انت جرا لمخك حاجه
مصطفى / انا لا بعمل حاجه غلط و لا حرام
الحج / و انت كنت عارف يا فادى
فادى / انا مكنتش اعرف هى مين اصلا و كلمته فى الموضوع و قولتله يشيله من دماغه
تهانى / بس البنت كويسه جدا و انا اشهد باخلاقها
ست / انتى بتقولى ايه يا تهانى هو الواد معيوب و لا باير عشان ياخد واحده زى دى انا بجد مش مصدقاكى دانا كنت فكراكى بتحبيهم زى ولادك
تهانى / انتى بس
ست / دى واحده مفضوحه و سيرتها على كل لسان
مصطفى / بالظلم
الحج / و انت مالك و مالها اصلا تصرف زى ده ميطلعش منك يا مصطفى يا خيبه املى فيك
مصطفى / كل ده ليه يعنى
الحج / دانت حافظ كتاب ربنا دانا كنت بضرب بيك المثل فى الايمان جاى تعمل كدا
مصطفى / كل ده عشان مطلقه يا بابا والله البنت ما تتعيبش قولى حاجه يا خالتو
الحج / وبعولتهن أحق بردهن في ذلك إن أرادوا إصلاحا صدق الله العظيم يعنى جوزها اولى بيها دى لسه فى عصمته
مصطفى / بعد كل اللى عمله فيها
فادى / نفس الكلام
مصطفى / فلتقل خيرا او لتصمت يا فادى مش ناقصه شعلله لو سمحت
الست / انت تشيل الكلام ده من دماغك و البت دى تنساها خالص
تهانى / مصطفى لا كلم البنت و لا حتى لمحلها هو كلمنى انا عشان ان شاء الله لما العده تخلص
الست / تخلص و لا عنها ما خلصت البت دى تنساها انت لا باير و لا معيوب عشان تاخد واحده مطلقه
مصطفى / انتى اللى بتقولى كدا يا ماما
الست / ايوه البنت دى متنفعناش
فادى / البت دى انت نفسك مكنتش طايقها فى الاول مبالك بكل واحد شاف الفيديو هتمشى تسلم عالناس واحد واحد يا جماعه طلعت مظلومه
مصطفى / ولعتها و ارتحت يعنى
فادى / انا عاوز مصلحتك
مصطفى / انا عارف مصلحتى كويس اوى شكرا
الحج / اخر كلام البت دى تنساها و تشيل الفكره دى من دماغك و ان فكرت يا مصطفى ان فكرت بس
مصطفى / البنت ملهاش حد يا بابا و الحيوان ده محتاج حد يقفله
الست / و ماله نقف جنبها مقولناش حاجه لكن مش نتجوزها يا مصطفى
مصطفى يبص فى الارض و هو بيغلى
الست / انا بسيبه يروح الجمعيه عشان فكراكى بتحبيه لكن النهرده
مصطفى / خالتو ملهاش دعوه انا مش صغير
الحج / قال مش صغير قال
مصطفى يبص لابوه و يدخل الاوضه و يرزع الباب وراه
تهانى / الموضوع مش مستاهل كل ده الموضوع مجرد كلام
الحج / و لا حتى فكره الموضوع مرفوض بكل اشكاله
تهانى / ماشى بس مصطفى مش صغير و عندى و مبيجيش بالطريقه دى
الحج / هيكبر على ابوه يعنى
تهانى / مقولتش كدا بس هو انا يعنى هعرفه اكتر منكوا اتكلموا معاه بالراحه و اسمعوه وصلوله وجهه نظركوا
فادى / اضعف الايمان ناجل الكلام خالص فى الموضوع لحد عدتها ما تخلص و يمكن من هنا لوقتها يمكن يكون شالها من دماغه خالص
الست / يارب خبطتين فى الراس فى يوم واحد
فادى / يا ماما مصطفى عاقل و عارف ربنا
الست تبصله و تبص لتهانى و تتنهد
...............................
تانى يوم قدام المخزن
الشباب بيعبوا شنط كبيره فوق الميكروباص مرام تدخل شايله شنطه كبيره على ضهرها مصطفى ينزل من فوق الميكرباص و يروحلها
مصطفى / مرام
مرام تبصله
مصطفى / كنت عاوزك فى كلمه ثوانى
مرام و مصطفى يروحوا فى جنب
مرام / انت عامل ايه صحيح مازن حكالى اللى حصل على فكره توفيق ده عيل ابن حرام
مصطفى / متشغليش بالك انتى حوار اهبل اصلا
مرام / بس انت عارف ان مازن معملهاش صح
مصطفى / و توفيق ده يعرفنى منين
مرام / معرفش اللى اعرفه انه بلطجى بيتاجر و صدقنى مش عاوزه افكر ان ده ممكن يكون حصلك بسببى عشان بجد مش هسامح نفسى ابدا
مصطفى / ليه يعنى بصى متقلقيش كدا كدا التامين هيغطى كل ده
مرام / مازن قالى
مصطفى / يعنى الحمد لله لقانى حجه يكلمك
مرام / مش طبعه على فكره انت لسه متعرفوش
مصطفى / هو انتى اللى صوتيلى امبارح
مرام / لا بس عندى فكره مين
شريف يركن العربيه و ينزل هو و شيماء مرام تشوف شيماء يجروا يحضنوا بعض
شيماء / وحشتينى وحشتينى وحشتينى
مرام / و انتى كمان وحشتينى اوى
مصطفى / ايه نمشى و لا ايه
شريف / مازن جاى فى الطريق
مصطفى/ مازن عارف المعاد كويس مش هنضيع اليوم نستنى الباشا يصحى من النوم و لا ايه
شريف / صاحى من بدرى بس كان وراه مشوار و زمانه
مازن يدخل بسرعه و يركن العربيه و ينزل لابس بلوفر و كوفيه اللى مرام عملاهومله
شريف / وصل
مازن / سورى على التاخير
مصطفى / اهلا
شريف/ انا هسيب شيماء امانه معاك بقى
مازن / اهلا
شيماء تشاورله و هى مبتسمه شريف يوطى عليه يوشوشه
شريف / انا قولت يمكن تفك معاكوا و نخلص من الهم ده
مازن / فى عنيا
شريف / همشى انا بقى هتعوزوا حاجه
مرام / ما تيجى معانا يا شريف هتنبسط والله
شريف / مره تانيه ورايا شغل بالهبل حتى الجمعه مبنرتاحش يلا سلام
مرام / ربنا يعينك
شريف يشاورلهم و يركب عربيته و يمشى
مازن / صباح الخير فطرتوا ؟؟ انا جايب فطار
مصطفى / يلا البنات تركب و الباقى يجى معايا فى عربيتى
مازن / انا طالع بعربيتى و مرام و شيماء هيجوا معايا لو حد تانى يحب يجي اهلا و سهلا ... يلا اركبوا
مصطفى / البنات هيركبوا سوا اصلا عربيتك الحلوه خساره تروح الحتت دى تتوسخ سبها هنا احسن
مازن / لا خليها تتوسخ ارميها و اجيب غيرها متشغلش انت بالك
مازن يفتح باب العربيه اللى ورا شيماء تركب مازن يقفله قبل ما مرام تركب تبصله يفتحلها الباب اللى قدام و هو مبتسم تبصله و تركب يقفل الباب و يبص لمصطفى و هو مبتسم مصطفى هيطرشق
مها / طب ايه ده هركب لوحدى يعنى
مازن يفتح الباب اللى ورا مها تركب عربيه تقف و سحر تنزل منها مرام تشاورلها تعالى تجرى تركب
سحر / سورى للتاخير راحت عليا نومه سورى
مازن يقفل الباب
مازن / احنا وراكوا علاطول اتفضل مش هنضيع اليوم كله بنبص لبعض انا حلو اه بس مش للدرجادى
مصطفى يفتح بقه مازن يدحك باستفزاز و يروح يركب الكل يركب الميكروباص و مصطفى يركب جنب السواق و الميكروباص يمشى و مازن يطلع وراه
..................................
فى الجمعيه
مرام 2 تدخل و تروح ناحيه البنت
مرام 2/ لو سمحتى انا روحت المخزن لقيته مقفول هو مافيش فرز النهرده و لا ايه
البنت / لا فى لو تحبى ابعت حد يفتحلك
مرام 2/ ههههههههههه ميرسى اوى هو محدش من المتطوعين جه النهرده ليه متعرفيش هيجوا يعنى
البنت / اصل النهرده فى قافله ملابس لو كنتى جيتى بدرى عشر دقايق كنتى لحقتيهم
مرام 2/ مفيش مشكله انا معايا عربيه بره ادينى العنوان و انا احصلهم
البنت/ تمام ادينى ثوانى اجبلك العنوان بالتفصيل و هكتبلك كمان رقم مستر مصطفى عشان لو لاقدر الله تهتى فى الطريق
مرام 2/ تمام ميرسى اوى
..........................
فى عربيه مازن
مازن / فى عندكوا ورا سندوتشات لو حد مفطرش
مها / ميرسى بس كلنا فطيرنا
مازن يبصلها فى المرايه
مازن / طب ممكن اى حاجه انا مفطرتش
مها تبص فى الكيس على رجلها
مها / تحب ايه
مازن / اى حاجه
مها تناوله واحد يعزم على مرام
مرام / فطرت شكرا بالهنا و الشفا
مازن يبتسملها و ياكل و هو سايق مرام تحط شنطتها فى الارض و تفتحها و تطلع منها شله و ابره و تبدا تشتغل
مازن / كنتى موعدانى بجاكت صوف
مرام تبصله باستغراب
مازن / انا عاوزه كحلى
مرام / مش فاضيه زى مانت شايف
مازن / مش مستعجل كدا كدا الشتا خلاص بيفنش اللبسه السنه الجايه
مرام / ربنا يسهل
مازن / نمتى كويس امبارح
مرام تبصله مازن يبتسم
مرام / المهم يا شوشو اخبارك و اخبار الكليه ايه
شيماء / الحمد لله على فكره انا مكنتش اعرف انك جبتى تليفون
مرام / انا مغيرتش رقمى
شيماء / قشطه هبقى اكلمك
مرام / مفيش اخبار عن صافى
شيماء / ابيه مسافرلها عاملها مفاجاه
مرام / ربنا يتملهم على خير
شيماء / على فكره صحيح ماما بتسلم عليكى كتير
مرام / وحشانى موت اه سورى جدا عقلى فين شيماء صحبتى سحر و مها اجدع و احلى بنات هتقابليهم فى حياتك
شيماء / اهلا و سهلا
مها / انتى اللى وصلك ده اخوكى
شيماء / اه ابيه شريف
مها / كان معانا فى الفطار امبارح امال مجيتيش معاه ليه
شيماء / مرضاش قالى مينفعش اول مره تروحى فى اكل و كدا حتى هو مكنش ناوى ياكل مكنش صايم اصلا ههههههههههههه
مرام / على فكره شيماء استاذه فى الكيكه تقريبا بتعمل صينيه جديده كل يوم و بتتنسف نسف
مازن / والله ساعات بتعمل كل ساعتين مش كل يوم فاكره يا شيماء
شيماء / بحاول انسى
مازن / هههههههههههههههههههههههه
مازن يحط ايده على ايد مرام عشان تبصله تبصله باستغراب و تسحب نفسها بعيد
مازن / يوم ما فجروا عربيه شريف هما حلفوا مهو نازل روحتله البيت و كدا و اتصلنا بيهم فى الشركه يجولنا و يوميها كل عشر دقايق حد داخل و حد خارج و هو كان فرحان فيهم اوى تانى يوم سابوه ينزل الشركه عادى هههههههههههههههههه اللى هو غور و كدا
سحر / خد بالك حودوا يمين
مازن / شايفهم شايفهم
......................
فى مكان زى مخزن فاضى مفيهوش غير شويه ترابيزات و فيه قرب السقف شبابيك عليها حديد بتطل على زريبه
البنات يدخلوا و الشباب ينزلوا الشنط من الميكروباص
مها / و دا المفروض مركز شباب و لا ايه
مرام / حاسه انى هرجع مش قادره الريحه صعبه اوى بجد
مرام تطلع بره تجرى و هى بتهوى بايدها بسرعه و تحاول تقاوم انها ترجع مازن يدخل يحط الشنط اللى فى ايده فى الارض و يروح ناحيه عربيته اللى العيال بيلعبوا حواليها و يفتح و يركب و يفتح التابلوه و يطلع الشنطه اللى فيها البرفيومز و ينقى النوع اللى مرام بتحبه و يدخل المركز تانى و يرش فى كل الاركان
مها / ربنا يباركلك والله
مازن يبتسم و يطلع يلاقى مرام واقفه بره
مازن / المكان بقى جاهز سموك
مرام تبصله و باين عليها التعب مازن يديها الازازه فى ايدها
مازن / البرفيوم اللى بتحبيه
مرام / الناس بتبص علينا احنا فى بلد ارياف
مازن / واحد و مراته اللى عاوز يبص يبص
مرام تسيبه و تدخل جوه و هى بتحاول تدارى دحكتها
مازن / شكلك مروحه معايا النهرده يا مزتى
مازن يروح يشيل معاهم شنط تانيه و يدخلها يحطها فى الارض
مصطفى / مازن انت هتقف هناك
مصطفى يشاور فى ناحيه بعيد
مصطفى / و هتمسك الجزم ابدا رصها انا عاوز فى الواحده عشرين جنيه ورينى هتبيع قد ايه
مازن / مش شويه عشرين
مصطفى / والله ان جبت اكتر مش هقول لا بس مش اقل يعنى
مازن / تمام
مازن يشيل شكارتين كبار و يفضيهم فى الارض هناك و يفرش شكاره فى الارض و يقعد عليها على ركبه و يبدا يرتب الجزم و يفرزهم
مصطفى / مرام و البنات اتقسموا مرام طبعا انتى عارفه هتعملى ايه هتقعدى على الكرسى هناك
مصطفى يشاور الناحيه التانيه خالص من مازن و مها و سحر هيمسكوا الحريمى و انا و العضوه الجديده هنمسك الاطفال و الشباب هيمسكوا الرجالى
مرام / معلش يا مستر ممكن سحر تبقى بدل شيماء يعنى
مصطفى / مفيش مشكله
مرام توطى على سحر
مرام / افتكرى الجمايل
سحر / اما انتى جزمه صحيح
مرام / من اعمالكم
سحر / طب يارب يردك
مرام / امشى يا جزمه
سحر / ههههههههههههههههه مش اول مره على فكره عادى بارد اصلا
مرام / يمكن يلا عن اذنك اما اروح افرد حاجتى على ترابيزتى المخصوصه بتاعتى
مرام تتكلم بعنجهيه و تدحك و تسيب سحر و تروح مكانها و تقعد مصطفى يروح ناحيه مازن
مصطفى / انت بتعمل ايه
مازن / زى مانت شايف بسعر
مصطفى / جزمه ايه اللى مستعمله بميه جنيه
مازن / انت عاوز فيها عشرين صح
مصطفى / اه
مازن / خلاص هجيبلك فيها عشرين بس سبنى اخلص ... هو انت مش المفروض تروح تفرد حاجتك و لا مها هتعمل الشغل كله و انت هتفضل تهنكر و تتنقل بينا كدا و الاسم مستر مصطفى
مصطفى / انا هحاسبك على الكلام ده بس بعدين لما نخلص القافله و تورينى الباشا عمل ايه
مازن / انا هنا عشان ربنا مش عشان اثبت لسعادتك اى حاجه صفى انت بس نيتك عشان تؤجر يا شيخ مصطفى
مصطفى / شوفوا مين بيتكلم اصلا
ماجد يدخل
ماجد / اوعى القطر يا عم الحج بقولك يا مازن متشوف حته تانيه لعربيتك العيال هتبهدلها
مصطفى / قولتله بس هو بقى غاوى فشخره
مازن / استنانى هنا ثانيه
مازن يطلع بره يلاقى العيال قاعدين فوق عربيته ينقى ولد كبير شويه و يطلع ورقه بمتين و يديهاله
مازن / هو انا لو استاذنتك تحرسلى العربيه لحد ما القافله تخلص و تاخد دى هتكسفنى
الواد ياخد منه الفلوس و يجرى على العيال و فى ايده طوبه
الولد / اوعى ياض منك له من على عربيه الباشا اللى هيقرب من العربيه هنشه بالطوبه اوعى يا وله
العيال كلها تجرى مازن يدخل جوه و هو مبتسم و مصطفى متابعه ماجد يروح ناحيه مازن
ماجد / انت بتعمل ايه يا مازن الحبه اللى انت كاتب عليهم ميه جنيه دول مش هيتباعوا يابنى متوحد السعر على عشرين و لا تلاتين حتى عشان الفصال
مازن / بستخدم نقطه ضعف المستهلك المصرى
ماجد / ازاى يعنى
مازن بيكتب حاجه على ورقه
ماجد / خد واحده عليها واحده هديه خد اتنين عليهم تلاته هديه ... لا شكلك فاهم يا نصه
مازن / هههههههههههههههههههههههه
.............................
ناحيه مرام
مرام قاعده و فى بنات كتير ملمومين حواليها بتعلمهم الكروشيه و كلهم ماسكين من السورتيتات بتاعتها فى ايديهم
مرام / و نسحب من هنا كدا نبقى خلصنا الورده
بنت1 / الله دى حلوه اوى دى كمان هتبقى بعشره جنيه
مرام / ايوه
البنت1 / طب هاخدها
بنت 2/ انتى خدتى واحده انا عاوزه دى
مرام / معايا غيرها هنا كتير نقوا اللى يعجبكوا
البنات ينقوا و مرام تبص ناحيه مازن زحمه رهيبه مش شيفاه مرام 2 تدخل سحر تشوفها تنفخ
مرام 2 / اخيرا لقيتكوا
ماجد / اهلا و سهلا ازيك
مرام 2/ كدا تمشوا و تسيبونى دانا طلعت روحى لحد ما جيت
ماجد / حقك علينا لو كنا نعرف كنا اكيد استنيناكى ها تحبى تقفى مع سحر فى الاطفال و لا مع مها و شيماء فى الحريمى
مرام 2/ يااااه هناك زحمه اوى و هو واقف لوحده هروح اساعده عن اذنك
ماجد يبصلها باستغراب مرام 2 تروح ناحيه مازن
مرام 2/ ايه الشطاره دى برافو عليك
مازن / ازيك
مرام 2/ الحمد لله سورى اضطريت امشى بدرى امبارح بس على فكره بعتلك طلب صداقه بس شكلك لسه مشوفتوش
مازن / مفتحتش
مرام 2/ مفيش مشكله على فكره انا اسمى مرام تانيه اداب اعلام مش فاكره اننا اتعرفنا
مازن / اهلا و سهلا هستاذنك زى مانتى شايفه الناس
مرام 2/ مانا هنا عشان اساعدك
مازن يبصلها ويبتسم مجامله و يروح للراجل و يناوله جزمه
مازن / على فكره دى احلى بكتير من اللى معاك و هتعييش بص هنا شكل النعل
.........................
ناحيه مصطفى
سحر متابعه مرام 2 و مركزه معاها مصطفى يطلع هدوم كتير بالتيكت من شنطه و يحطها و هو متفاجئ
مصطفى / انا مش فاكر الهدوم دى
سحر / مازن اشتراها امبارح كان عاين الشنطه فى عربيته و جابها معاه قالنا عليها فى العربيه كلها براندات
مصطفى / باين من اسعارها
سحر / انا كنت بفكر نخليهم تبرعات للايتام احسن الناس دى مش هتشترى بالاسعار دى و لا بنصها
مصطفى / والله نعرضها و نشوف
سحر / على فكره انا صوتلك امبارح
مصطفى يبصلها
سحر / يعنى انا شايفه انك تعبت اوى لحد الاذان و انت كنت بتشتغل حتى الوقت اللى احنا ريحناه فى الاخر انت مرتاحتوش
مصطفى يبتسملها سحر تروح ناحيه شنطتها و تطلع شيكولاته
سحر / اتفضل
مصطفى / شكرا بس انا لو كلت شيكولاته دلوقت نفسى هتتسد و هيفوتنى الرز المعمر الفلاحى اللى على حق
سحر / امممم مدوقتش انت الرز المعمر بتاع ماما مكنتش موجود انت يوم ما جبته معايا
مصطفى / بس سمعت عنه الافطار الجاى ابقى خليها تعملنا
سحر / اكيد ان شاء الله
مصطفى يبص ناحيه مازن زحمه جدا
سحر / ما نعمل زيه على البراندات دى الناس بتحب العروض
مصطفى / لا خلينا زى ماحنا و اللى يسال نبقى نقوله
سحر / اوك براحتك
ماجد يطلع على ترابيزه و يسقف
ماجد / بسبعه و نص و تعال بص و بسبعه و نص و تعال بص طب سبعه بس سبعه بس
ناس كتير تروحله و البنات بتبص عليه و تدحك
ماجد / مانت مش بتاع عروض لوحدك يا ميزووووو
مازن / طب الواحده عليها اتنين هديه و ان شالله معن حد حواااااااااااااش
صوت الاذان
مصطفى / هنكمل بعد الصلاه يا جماعه بعد الصلاه
سحر / احنا ممكن نكمل لحد ما ترجعوا
مصطفى / مش عاوز اسيبكوا لوحدكوا
سحر / متخافش علينا احنا بنات اه بس رجاله اوى
مصطفى / عاش يا وحش الصلاه يا شباب الصلاه
...................................
