(((((السكة شمال ٢))))))))
#لولو_محمد
الحلقه ٢٠
مرام / انا مش عوزاه يراضينى خلاص يا عمتى الموضوع انتهى و كل واحد راح لحاله
مديحه / يابنتى البيوت ياما بيحصل فيها و الجدع باقى عليكى مشوفتيش امبارح كان هيموت عليكى ازاى و لولاه الله اعلم كان هيجرالنا ايه
مرام / لولاه كان زمانا دلوقت عايشين فى هدوء و سلام و مش خايفين من حد و لا شايلين هم حد
مديحه / الجدع بيحبك يا مرام
مرام/ و انا بكرهه
مديحه / كدابه بتحبيه بس بتكابرى
مرام تبصلها
مديحه / خلاص براحتك بس مترجعيش تندمى
مديحه تسيبها و تقوم و مرام تقعد تتفرج عالفيديو تانى
....................
فى الصيدليه
شيماء قاعده بتتفرج عالفيديو و هى فى منتهى السعاده و عمر متابعها و الصوت عالى
صوت مازن / عاكستها و لا لا
صوت احمد / عاكستها عاكستها
صوت مازن / ليه
صوت احمد / مش هعمل كدا تانى
شيماء / عشان مش راجل
صوت مازن / لا قول عشان مش راجل
صوت احمد بيصرخ
صوت احمد / عشان مش راجل
صوت مازن / مش سامعك على صوتك
صوت احمد عالى / انا مش راجل
عمر / تعرفى ان دى عاشر مره تتفرجى فيها عالفيديو
شيماء / و فى يجى خمسين مره اتفرجت عليه فيها فوق
عمر / اول مره اعرف انك ساديه اوى كدا
شيماء / يعنى ايه ساديه
عمر / ههههههههههه عندك كام سنه عالسؤال ده يعنى بتستمتعى بالم الاخرين اللى يشوفك يقول بيعاكس حد من اهلك
شيماء / مهى دى حقيقه الحيوان ده كان بيتحرش باختى فى الكليه
عمر / رؤى
شيماء / لا نهله اختى الكبيره
عمر يستغرب
شيماء / انت متعرفهاش متجوزه و مسافره بره مع جوزها دلوقت الحيوان ده هو اللى سادى و بيعيش على اذيه الناس يبقى يستاهل افرح فيه و لا لا
عمر / يستاهل
شيماء / انا لو عديت المصايب اللى الحيوان ده عملها مش هتعرف تسكتنى و لا بعد مليون سنه
عمر / لا و على ايه و هو العمر فيه كام مليون سنه اضيعها فى الرغى معاكى
شيماء تبصله و تبص الناحيه التانيه
عمر / على فكره دى كانت نكته يعنى لو مكنتيش خدتى بالك
شيماء / بايخه اوى على فكره
عمر / لا والله مش بايخه خالص اللى هو قال يعنى هتقعدى مليون سنه ترغى فعلا
شيماء / لا انك تشرح نكته بايخه ابوخ من النكته نفسها على فكره
عمر / كنت بحاول ابسطهالك يعنى انتى عارفه احيانا النكت بتكون عميقه و كدا و مبتوصلش
شيماء / دكتور عمر تعرف تسكت
عمر / عوزانى اسمعها مليون سنه و مش عاوزه تسمعنى خمس دقايق و بيقولوا الستات مش رغايين
شيماء / هههههههههههههههههههههه
عمر / حلوه دى يعنى و التانيه كانت وحشه
شيماء / اه هو مزاجى كدا
عمر / ماشى يا ستى احنا فى خدمه مزاج سعادتك
زبون يدخل شيماء تقوم تبص عالروجته اللى معاه تبص على عمر تلاقيه مركز معها و مبتسم
.................................
فى شقه المعلم اسعد
اسعد يدخل هو و مرته و بناته و شايلين الحاجات اللى كانت معاهم
اسعد / انا نازل افتح الدكان
اسعد يمشى و مروه تدخل اوضتها الست تدخل وراها
الست / نعم يا ست البنات جايه تعدى انتى
مروه / عشان خاطرى يا ماما سيبينى فى حالى مش طايقه حد
الست / لا يا حبيبتى مهو الشقه دى مش هتنضف روحها بقالها كام يوم مقفوله و الغدى كمان مش هيطبخ نفسه انا تعبانه و منمتش من امبارح قومى انتى و اخواتك ظبطوا الدنيا على مريح ساعتين
مروه / هو فى ايه انا لو فلبينيه
الست / لا ياختى مش فلبينيه انتى مصريه و البت المصريه بتشيل اهلها لحد متتجوز و لما تتجوز بتشيل جوزها و اهله لحد ما تخلف و تجيب بت حلوه زيك كدا تشيلها يلا تتمسى بالخير
الست تمشى و مروه تنفخ و تروح تفتح البلكونه و تبص منها تلاقى محمود واقف مع ابوها فى الشارع تبص عليه بحزن يرفع عينه و يبص عليها تبص الناحيه التانيه بزعل يكمل كلام مع المعلم
..........................
فى شقه مرام
مرام تفرش السرير
سميحه / اهو خلصنا و رجعنا كل حاجه فى مكانها بكره تنزلى تشترى الحاجات اللى ناقصه على طقمين بيت على طقمين خروج عشان الكليه و شوفى لو فى حاجه نفسك فيها هاتيها
مرام / واخلص القرشين اللى حيلتنا و نقعد نشحت بعدها مش كدا
سميحه / لا اله الا الله ربنا اللى بيرزق يا مرام و بعدين انتى مش قولتى للناس اننا رجعنا للشغل تانى و نزلتى عروض كويسه
مرام / اه يا تيته بس محدش طلب و حتى لو طلبوا هو الاكل اللى هيطلبوه مش هيحتاج حاجات نطبخها لحمه فراخ كفته خضار
سميحه / هتدبر يا مرام هتفرج احنا لسه اول امبارح كنا فى الشارع و النهرده اهو هنبات فى بيتنا و نتغطى و يتقفل علينا باب و الحياه حلوه انتى اللى معقداها
مرام / صح هنتغطى باللحاف اللى عمتى ادتهولنا مع طقمين الملايات و الجلبيه اللى عليكى و العبايه اللى عليا بقالها اسبوع لما نتنت و هنام عالسرير اللى بيزيق ده اللى هو مش سريرنا دا سرير الناس لمولنا تمنه من بعض
سميحه / غيرنا بينام فى الشارع فى البرد يا مرام احمدى ربنا انتى مكنتيش كدا ايه جرالك
مرام / مجراليش انا بس مش عاوزه ابعزق القرشين اللى باقيين على حاجات تافهه لحد عالاقل منقف على رجلينا مش عاوزه اتحوج لحد حتى لو عمتى انا عارفه انها مش هتتاخر علينا عارفه اننا طول عمرنا بيت واحد و تلاجه واحده بس احنا لما كنا بناخد كنا عارفين اننا هنرد لكن الحوجه وحشه وحشه على طول عمرها بتدى
سميحه / عزراكى و حاسه بيكى بس انتى برده نسيتى ان كل ده مش بايدك و لا بايدى و لا حتى بايد عمتك كلو بايد ربنا خدى الصوف اللى دفعت فيه دم قلبى و لسه زى ما هو فى الكيس و اشتغلى ورينى هتخلصى فى قد ايه اعمليلك بلوزه و لا اتنين اعمليلك كام كفيه تبيعيهم اعمليلى شال يدفينى اعملى اى حاجه احسن من قعدتك تندبى حظك انا مرتبكيش تبقى انهزاميه كدا انا ربيتك تحاربى و مهما حصل تحاربى هتيجى دلوقت مع اول مشكله حقيقيه فى حياتك
مرام تبص لسميحه و تبص فى الارض
سميحه / ان كان عالحاجات اللى استلفناها من عمتك بكره ربنا يكرمنا و نجيبلها بدالها جديده و ان كان عالحاجات اللى الناس لمولنا تمنها بكره نجاملهم فى الفرح احنا اصلا عمرنا متاخرنا على حد فيها ايه يعنى لما يساعدونا فى ازمتنا يعنى انا مش عاوزه اسمع منك الكلام ده تانى اتفقنا
مرام / حاضر
سميحه / تعالى يلا هاتى حضن لتيته
مرام تبتسم و تجرى تحضن سميحه
سميحه / ابدئى بالشال الاول لحسن انا عضمى واجعنى
مرام / ههههههههههه من عنيا
سميحه / اعمليهولى حلو كدا و نقيلى اللوان حلوه و ارسميلى فيه ورد كدا زى اللى كنتى عملاهولى فكراه
مرام / حاضر
سميحه / و يا سلام بقى لو تحطيلى فيه خرز كدا عشان يلعلط
مرام / ههههههههههههه حاضر
سميحه / و يا سلام بقى
مرام / جرا ايه يا تيته انا حفيدتك مش مصباح علاء الدين
سميحه / كلبه زى امك
مرام / هههههههههههههههههههه
سميحه تدحك و تاخد مرام فى حضنها
..........................
فى المخزن
شريف يدخل المخزن يلاقى مازن معلق شوال و لابس جلوفزات و لابس التاريننج و نازل فى الشوال ضرب
شريف / مساء النشاط بتعمل ايه
مازن / بتمرن تعال تعال البوكسينج احسن حاجه تطلع طاقتك السلبيه و فنفس الوقت تتمرن
شريف / طاقه سلبيه ايه دانا بعد الفيديو ده عندى فرط فى الطاقه الايجابيه لدرجه انى بفكر اصدر
مازن / و ماله تعال صدرها فى البوكسينج برده عادى
مازن يروح يجيب جلوفزات متعلقه من على حيطه و يحدفهاله شريف يلبسها
شريف / تعرف انا طول عمرى كان نفسى اللعب بوكسينج اوى
مازن يكمل ضرب فى الشوال
مازن / و ايه اللى منعك
شريف / مش عارف و انا صغير كنت بهتم بالكوره اكتر يعنى مع العيال فى الشارع و لما كبرت شويه بقيت بلعب كراتيه مكنش فى مكان بيمرن بوكسينج جنبنا يعنى مانت عارف الليله بتمشى ازاى
مازن / عادى احنا فيها انا همسكلك اضرب اضرب
شريف يضرب فى الشوال
مازن / مالك حنين كدا ليه دا مرام بتضرب احسن منك
مازن يضرب البوكس جامد و بعدين يمسكه لشريف يضرب زيه
مازن / لما كانت زعلانه جاتلى كانت على اخرها و عاوزه تسيب البلد كانت زعلانه من مصر اوى يوميها لما كانت زعلانه جتلى النهرده انا سبب زعلها متضرب عدل يا شريف الله
شريف / مانا بضرب اهو الله الا هو الشوال ده غريب هو فيه ايه
مازن / وسع
مازن يفتح رباط الشوال من تحت يقع منه واحد من البلطجيه متربط و متكمم
شريف / ايه ده يا عم
مازن / الحيوان طلع عينى مالصبح مش عاوز يتكلم و يقول توفيق فين و انا خلقى ديق
شريف / و هيتكلم ازاى و انت مكممه
مازن / مانا عارف انه متنيل متكمم انا اللى كممته عمال يصرخ و انا بضربه صدع امى
شريف / تصدق ليك حق بتصرخ ليه يابن الجزمه انت متنضرب و انت ساكت
شريف يضربه بالشلوت مبيتحركش
شريف / شكله مات باين
مازن / لا لا تلاقيه مغمى عليه بس
شريف / طيب طمنتنى
مازن يشاور للرجاله يشيلوه و يرموه فى الاوضه جوه مع تلاته زيه و يجيبوا واحد سليم بيقاوم
مازن / هتتكلم و لا تحصلهم
الراجل / والله يا باشا معرف مين توفيق الحو ده اساسا انا والله اللى اعرفه قولته يا باشا اللى اعرفه قولته
مازن / يووووه انا مصدع كمموه و عبوه فى الشوال
الراجل / يا باشا والله كل اللى اعرفه قولته يا باشا والله قولت كل حاجه معرف يا
الرجاله تربطه و تكممه و تعبيه فى الشوال و يعلقوه و مازن يطرقع رقبته و ينفخ و ينطر ايديه
مازن / استعنى عالشقا بالله
شريف / عاش يا وحش بس يمكن العيال دى متعرفش حاجه فعلا
مازن / يعنى هو احنا جايبينهم مالجامع يا شريف ماحنا لقطينهم مالخناقه كانوا فى الخناقه و لا مكانوش
شريف / كانوا
مازن / لو مكناش لحقناهم كانوا اذوا مرام و لا ماذوش
شريف / كانوا
مازن / يبقى ينضربوا و لا يتسابوا يا شريف متضرب عدل يابنى متفورش دمى الله
شريف / مانا بضرب اهو ياعم الله
.............................
تانى يوم فى دبى
ابراهيم بيمضى على ورق و احمد بيديله شيك
احمد / مبروك عليا يا اونكل حضرتك مش متخيل انا سعيد قد ايه باللحظه دى
ابراهيم / انا بعتلك الاسهم بس عشان متزعلش من مازن على اللى عمله معاك
احمد / لا يا اونكل متقلقش مازن دا اخويا برده و انا مقدر اللى هو فيه بس متقلقش حضرتك دى مجرد مرحله و هتعدى يعنى فى الاول و الاخر دى مجرد بنت
ابراهيم / دا عشمى برده يا احمد
احمد / انا عارف ان وقت حضرتك مشغول و مش هعطلك اكتر من كدا طبعا دا كلام انا يادوب اللحق اروح انا و زيزو نتفسح شويه قبل منزل مصر بكره
ابراهيم / هههههههههههههههههههه ماشى يا سيدى متعطلش نفسك
احمد / ميرسى تانى اوى يا اونكل عن اذن حضرتك
احمد يمشى و زياد يشاور لابراهيم و يحصله
زياد / مش ناسى حاجه
احمد / عيب عليك اللى اتفقنا عليه و اكتر
احمد يدى لزياد شيك
زياد / والله انا خايف من فلوسك دى يا احمد شكلها طلعت حلال و متهنتش عليها
احمد / يا راجل طب دا حتى سمعت ان الشركه كانت عامله ارباح زى الفل الكام شهر اللى فاتوا
زياد / هحط اضعاف اضعافهم عشان تجديد الاسبا لحماتى
احمد / والله حماتك دى يا اخى ... ياض انشف عليهم شويه متبقاش بقره و هما نازلين فيك حلب
زياد / مانت عشان حمار بتقول كدا لكن انا بالنسبالى عشان الورد اللى فى حضنى مفيش مشكله اما نسقى العليق اللى هو امها
احمد / لا فى دى معاك حق على كل انا نازل بكره مصر
زياد / و هتاخد جيجي معاك
احمد / لو لزماك اخليهالك
زياد / هههههههههههههههههه لا ياعم مليش فى المضروب
احمد / ماشى يلا سلام
زياد ياخد الشيك و يطلع على اوضته
.............................
فى اوضه مرام
مرام قاعده بتشتغل كروشيه جرس الباب يضرب مرام تلبس الطرحه و تروح تفتح تلاقى مازن شايل شنط هدايا تتفاجئ و تلم نفسها
مرام / خير
مازن / ازيك
مرام / خير
مازن / على الاقل خدى منى طيب
مرام / مش عاوزه اخد منك حاجه و اتفضل امشى من هنا
مازن / دى حاجتك على فكره حبه من هدومك اللى كانت عندى
مرام / مش عوزاها البسها
مازن / مش هتيجى على مقاسى للاسف
مرام/ انت جاى تستظرف على فكره تيته مش هنا هناك روح خبط عليها
مازن / ماشي مع اننا لسه فى العده
مرام تعوج بقها باستهزاء مازن يحط الشنط فى الارض و يروح يخبط على مديحه و مرام واقفه بتابعه و هو بيبص عليها مديحه تفتح الباب
مديحه / اهلا يابنى ازيك
مازن / عندكوا شاى يا عمتوا مصدع و محتاج كبايه
مديحه / طبعا اتفضل اتفضل
مرام / انت
مازن يبصلها
مرام / لم زبالتك من قدام باب بيتنا متسبهاش هنا
مازن / يا شيخه اتقى الله طب ياريت كل الزباله كانت زى دى على كل حاضر
مازن يروح يشيل الشنط و يدخلها عند مديحه مرام تدخل وراه
مازن / جايه ورايا ليه يا رخمه ايه معندكيش اخوات صبيان
مرام / انت جاى تستظرف
مازن يعدل خصله باينه من طرحه مرام
مازن / اعدلى بس شعرك الاول
مرام تزق ايده
مرام / اوعى
مازن / خلاص خلاص اعصابك
مديحه / عيب يا مرام خشى اعملى شاى
مرام / مش عامله مش فاتحينها قهوه احنا
سميحه / مرام
مرام تنفخ و تدخل المطبخ
سميحه / خير يا مازن فى حاجه
مازن يطلع شيك و يديه لسميحه
مازن / انا جبت لمرام حبه من هدومها اللى عندى و ده شيك بالمؤخر
مازن يطلع ظرف و يديهولها
مازن/ دا مبلغ بيتهيالى هيكفى مصاريفها و ان شاء الله هديها زيه اول كل شهر دا يعنى لو لا قدر الله الزعل استمر للشهر الجاى و لو حضرتك شيفاه قليل او لو مكفاش فى اى وقت كلمينى عادى او قولى لمحمود يقولى و انا هزود الفلوس عادى
مرام تدخل ترزع الصينيه كبايه الشاى تتكب و تتطرطش على مازن يقوم يقف
مديحه / ايه ده يا مرام
مرام / من بخته كنت حطاله فيها سم صراصير
مديحه / انت كويس
مازن / كانت بارده اساسا عملاها بميه الحنفيه باين
مازن يبتسم و يجى يمشى
مازن / عن اذنكوا
مرام / مازن
مازن يبصلها
مرام / قولتلك لم زبالتك فى ايدك انا مش عاوزه منك حاجه
مازن / دا حقك
مرام / فلوسك نجسه زيك و هتنحسنى
مديحه / لا اله الا الله عيب يا مرام
مازن يرجع و يقرب من مرام
مازن / زى مكسبت قلبك فى تلت ايام هجبلك حقك و اصالحك فى اقل من تلت شهور
مازن يمشى و يرزع الباب وراه مديحه تتخض
مديحه / ياختى
سميحه / ليه يا مرام كدا دا مهما كان فى بيتنا مش كدا يا بنتى
مديحه تمسك الشيك
مديحه / يا لهوى نص مليون جنيه
مرام تاخد منها الشيك و تقطعه مليون حته
مديحه / ليه يا قادره حد يرفص النعمه
مرام / مش عاوزه منه حاجه مش عاوزه مش عاوزه
مرام تمشى و ترزع الباب وراها
مديحه / الباب هو فى ايه هو كل واحد يزعق بكلمتين و يتشطر عالباب دا ايه الغلب ده بس ياربى عاجبك كدا يا حجه
سميحه / هههههههههههههههههه حقك عليا يا مديحه تعالى اقعدى
مديحه / دانا عاوزه يجى علبه دوا ضغط بحالها بعد اللى بنتك عملته ده نص مليون جنيه يا ناس نص مليون جنيه كداهو فى الارض
سميحه تطبطب عليها و تقوم و تسيب الظرف عالترابيزه و تمشى و تقفل الباب بالراحه مديحه تفتح الظرف تلاقيه مليان فلوس كلها متينات تطلعها و تعدهم
.................................
فى اوضه لبنى
زياد يدخل يلاقى لبنى قاعده فى السرير بتلعب فى الموبايل
زياد / ايه قلبى عامله ايه دلوقت بطنك هديت
لبنى / جبت تزاكر الطيران انت وعدتنى هننزل مصر
زياد / يوووووه يا بنتى بقى مش قولتلك استنى اما احمد ينزل الاول و ياخد الطريحه الاول
لبنى / يادى خوفك ده مدام مانتش قد مازن بتعاديه ليه
زياد / بصى كدا الشيك ده و قوليلى هيكفى تصليحات الاسبا لمامى و لا ازود الرقم شويه
زياد يديها الشيك متبصش فيه
لبنى / معرفش و انا اعرف منين الموضوع هيتكلف كام اصلا
زياد / يا بنتى بصى فى الشيك الاول عشان تعرفى بس ان جوزك مش محتاج لمازن و لا فلوس مازن
لبنى تبص فى الشيك و عادى
زياد / فى ايه مالك
لبنى / يعنى لما قولت فلوس مازن قولت انك هتطلع بميه مليون يعنى و لا حاجه انت كنت بتاخد من مازن ضعف الرقم ده بيس عادى
زياد / بكره اخد اضعاف اضعافه بكره الليله دى كلها هتبقى بتاعتى انا بس انتى خليكى واثقه فيا شويه مش انا نفذت كلامى ناحيه مرام
لبنى / ماشى يا زياد سبنى ارتاح بقى لو سمحت
زياد / ماشى هسيبك
زياد يبوس راسها و يقوم يطلع بره و يقفل الباب لبنى تطلع موبايلها و تلعب فيه
........................
فى شقه اسعد
محمود / طبعا كنت عارف ان البطجيه هيهجموا امال كنت بصحيكوا ليه
مروه / انت مصحيتناش انت روحت تصحى الست هانم و بس
محمود / لو كنتى صبرتى كنت جيت صحيتك
مروه / و هى اهم منى تصحيها الاول مش كدا
محمود / انتى ايه مشكلتك معاها عملتلك ايه عشان تكرهيها كل ده
مروه / انا مبكرههاش هى مش فدماغى اصلا
اسعد / متتكلمى عدل يا بت انتى الله عيب كدا
الست / خليهم يتراضوا يا معلم خليهم يتصافوا اقولك قوم و سيبهم لوحدهم عشر دقايق و انا متاكده انهم هيتراضوا
اسعد يبصلها
محمود / بعد اذنك يا معلم
اسعد ينفخ و يقوم و الست تقوم معاه
محمود / هى مش مرام دى اللى كنتى معسكره عندها طول الوقت دلوقت بقت وحشه
مروه / انا مقولتش وحشه بس انت خطيبى انا و من حقى اغير عليك
محمود / بس مش معنى انك بتغيرى عليا انك تجرحى فى الناس خصوصا لو الناس دول مش حمل كلمه زى مرام
مروه / انت بتحاميلها كلكوا بتحامولها
محمود / عشان مسكينه حالها يصعب عالكافر
مروه / و الحمد لله انى مش كافره
محمود / يعنى مفيش فايده يعنى اقوم امشى
مروه / قول بقى كدا انت جاى تقضيه واجب
محمود / لا اله الا الله يا مروه انتى بجد حالتك صعبه
مروه تبصله
محمود / انتى رميتى الدبله فوشى و زعلتينى و جيت و جايب ورد اهو
محمود يشيل الورد من عالترابيزه و يحطه تانى
محمود / و جاى اصالحك و انتى برده بتتكلمى فى ايه و ازاى ينفع كدا
مروه تبصله
محمود / مروه احنا لسه عالبر و مرام دى اختى و تيته دى اللى ربتنى يعنى عندى زيها زى امى و انتى بنت اصول و اللى حصل ده عيب انا مش هقولك راضيهم و لا اى حاجه بس اللى حصل ده مايجيش منك
مروه تبصله يطلع علبه صغيره فيها الدبل
محمود / خدتها مالارض ينفع كدا
مروه تمدله ايدها يلبسهالها
محمود / نكبر و نعقل بقى ماشى نكبر و نعقل
محمود يمدلها ايده تلبسه دبلته و هى مبتسمه
محمود / هو مفيش حاجه ساقعه و لا شربات و لا اى حاجه و لا ايه
مروه تقوم تجرى على جوه
...............................
فى شقه سميحه
مرام / قولت مش عاوزه منه حاجه
سميحه / طب خلاص خلاص بناقص نخلى محمود يرجعهمله
مرام / اه خليه يرميهم فوشه و يقوله انى قطعت الشيك لا ياخدله الشيك متقطع و يرميه فوشه
سميحه / طب اهدى
مرام / انا اصلا مش فاهمه ازاى يجى لحد هنا جاب الجرءه دى منين لا و بيهزر معايا كمان كانه معملش حاجه
سميحه / يعنى مش احسن مكان بعت الحاجه مع شريف
مرام / مكنش يبعتها خالص انا مش عاوزه منه حاجه
سميحه / خلاص اهدى اهدى الموضوع مش مستاهل
مرام / لا مستاهل هو عارف انى محتاجه و باعت الفلوس دى عشان فاكرنى هريل و ارجعله
سميحه / الحق يتقال بقى لا دا لو بيفكر كدا مكنش اداكى الفلوس كان سابك محتاجه عشان تحتاجيله و ترجعيله
مرام / شوفتى بقى بيدينى الفلوس عشان يقولى ملكيش لزمه فى حياتى خدى قرشين و غورى
سميحه / لا اله الا الله يا مرام هو انتى معاهم معاهم عليهم عليهم
مرام / يووووه بقى انا اتخنقت لما شوفته اصلا عصبنى
سميحه / اتخنقتى برده و لا حاجه تانيه
مرام تبصلها بغضب و تخرج مالاوضه و سميحه بتدحك
سميحه / ههههههههههههههه طب خلاص حقك عليا خلاص تعالى انتى يا بت
..........................
فى المطار فى مصر
احمد و جميله طالعين مانجين و هى عماله تدحك و مبسوطه يقابلوا تمانيه بودى جارد كبار
راجل / حمد الله عالسلامه يا باشا
احمد / كلو تمام
الراجل / تمام يا باشا
واحد ياخد عربيه الشنط و الباقى يحوطوا على احمد و جميله لحد ما يركبوا العربيه و عربيه قدامهم و عربيه وراهم و اتنين بودى منهم راكبين معاهم فى العربيه
جميله / انت شايف ان الموضوع محتاج الحراسه دى كلها
احمد / ابدا دا بس لزوم الفشخره هههههههههههههههههههه
التلت عربيات تتحرك و فى حته فاضيه مالطريق عربيتين واقفين سادين الطريق و السواقين بيتخانقوا مع بعض عربيات احمد تهدى و فجاه موتسكل يعدى عليه اتنين ووراه موتسكل تانى عليه اتنين الموتسكل الاول يلزق فى عربيه احمد و اللى راكل ورا يخبط الازاز بحديده يدش جميله تصرخ و اللى وراه يعدى يحدف ازازه ملوتوف عالعربيه من فوق النار تمسك فى العربيه و الموتسكلات تطلع تجرى و احمد و جميله ينزلوا مالعربيه بيجروا و الرجاله ينزلوا من العربيتين التانين يجيبوا الطفايات و يحاولوا يطفلوا الحريق و الاتنين اللى كانوا بيتخانقوا يركبوا عربياتهم و يجروا باقصى سرعه موبايل احمد يرن يطلعه من جيبه و يبص فيه يبتسم
احمد / حبيبى
مازن / حمد الله عالسلامه
احمد / مكنش له لزوم التعب دا والله
مازن / ههههههههههههه لا تعب ايه دا مجرد ماس كهربى صغنن هديه صغننه بمناسبه رجوعك ارض الوطن بالسلامه مش انت بالسلامه برضه يا حماده و لا ايه طمنى عليك يا حبيبى و ان كان عالتامين ربنا يعوض عليك اصلى نسيت ادفع قسط التامين مش مشكله فداك فداك
احمد يبص لجميله و للعربيه و مش فاهم
...............................
