((((((السكة شمال ٢))))))
#لولو_محمد
الحلقه ٧٠
زياد / انا اسف ما كانش المفروض اتعصب عليكى كدا
لبنى / ماتت
زياد / و لا حتى الجنين مات حتى ابنها رخم زيها لا و عملنا منها بطله و التليفزيون كله ملوش سيره غيرها
لبنى / و مازن عرف
زياد / ابن الكلب غفلنا و مسافرش دخل لحد باب الطياره و مركبش لما اطمن ان رجالتنا مشيو طلع و جرى عليها و لحقها لو كان اتاخر دقيقه واحده دقيقه واحده بس نقول ايه نصيبها
لبنى / و نصيبنا احنا كمان يا زياد انا لو منك اهرب و مرجعش هنا تانى مازن مش هيغفرلك اللى انت عملته
زياد / يروح يحاسب ابوه ابوه اللى كلم احمد الدهبى و اتفق معاه و ابوه اللى دفع و التحويلات كلها سهل تتجاب من البنك و مش بس كدا احمد نفسه مسجل المكالمه و الاتفاق
لبنى / انا سمعتك و انت بتتكلم فى التليفون سمعتك بودنى و انت بتتفق انت تدحك بالكلام ده على اى حد مش عليا
زياد / لبنى متضيقيش خلقى مش عاوز اتغابى عليكى تانى
.............................
لبنى / تعال تعال و اضربنى تانى انا اصلا كنت عارفه ان كل ده هيحصل بعد الجواز كنت عارفه انك هتفتكر انى خلاص بقيت بتاعتك و تعاملنى كدا عشان كدا ما كنتش عاوزه اتجوزك
زياد / ما تلفيفيش الموضوع و تحوريه بمزاجك كانت لحظه و عدت لحالها
لبنى / انا تعبت من الحرب دى و انت عارف
زياد / و انا بعمل المستحيل عشان اخرجك منها و انتى مصممه تكملى مصممه تقفى مع مازن ضدى
لبنى / انت غبى لدرجه تضحك انا مش بقف مع مازن انا بقف معانا انا و انت عداوتك مع مازن خسرتك كتير و كتير اوى كمان كان قدامك بحر واسع تغرف منه و تعبى براحتك و مش بس كدا دا كان بيدافع عنك و يغطى على بلاويك
زياد / و انتى كنتى متخيله ان الوضع ده ها يستمر لما يتجوز مرام و تسيطر عليه
لبنى / مازن عقله من راسه محدش بيسيطر عليه و مرام اهبل من انها تقدر على مازن
زياد / لا يا شيخه و ايه كمان اصل انا نسيت كلامك لما كان خاطب ماهى
لبنى / براحتك اعمل اللى يريحك انا طالعه انام بس ياريت لما مازن يجى يضربك متصرخش بصوت عالى عشان متصحييش عن اذنك
لبنى تمشى و تسيب زياد بيغلى
...............................
فى المستشفى
فاطمه / كانت ست طيبه مش هتتكرر تانى
مرام تبصلها بحزن
مرام / انا مش زعلانه انها ماتت بالعكس ارتاحت من الدنيا دى و قرفها و هى دلوقت ان شاء الله فى مكان احسن من هنا بكتير انا بس زعلانه انها ماتت بالطريقه دى هى كدا كدا كانت هتموت دا اجلها ليه مسبهاش تموت موته ربنا ليه يعذبها كدا ليه يوجعها كدا ليه يبقي اخر حاجه شافتها منظرى بالشكل ده كل ما افتكر نظرتها ليها قلبي بيوجعنى اوى
مرام تعيط فاطمه تطبطب عليها
رؤى / اهو مات و راح فى داهيه ان شاء الله يتشوى فى نار جهنم هو و كل اللى من عينته
مرام / ها يا رؤي عرفتي ليه كنت مخبيه انى حامل شوفتي بعينك
رؤي / انا مش فاهمه والله ايه الناس دى
شيماء / انا عارفه ان اللى هقوله يمكن ميفرقش حاجه بس بصي لنص الكبايه المليان الناس كلها عرفت الحقيقه و ان كل الكلام اللى اتقال عنك قبل كدا فبركه و خلاص كل الناس بقت متعاطفه معاكى
الباب يخبط و يتفتح مازن يدخل مرام تبص فى الارض
مازن / عامله ايه دلوقت احسن
مرام / الحمد لله
مازن / احنا هنروح نصلى على تيته و ندفنها
مرام/ محمود فين
مازن / محمود مع شريف بيستلمو لجثث
مرام تبصله بفزع
مرام / جثث ؟؟
مازن / المعلم اسعد كمان تعيشى انتى
مرام الدموع تنزل من عنيها
مرام / مبسوط انت دلوقت مبسوط
فاطمه تاخدها فى حضنها
فاطمه / اهدى يا مرام كدا غلط عليكى
مرام / هبص فوشهم ازاى هبص فوشهم ازاى و انا السبب فموته انا السبب فى موته ياريتنى مروحت الحفله ياريتنى مقولت لحد انى حامل ياريتنى سكت لحد مولد و لا ياريتنى مت انا و خلصت
فاطمه / اجله كدا يا مرام
مرام تبص لمازن و هى بتعيط
مرام / انت عاوز ايه لسه واقف بتعمل ايه
مازن / كنت عاوز اسالك تحبى ندفنها فين
مرام تبص فى الارض و تفرد ضهرها فى السرير بتعب و تغمض عنيها
مرام / احنا معندناش تربه معندناش ... كانت علاطول بتقول كدا علاطول بتقول نعمل حساب اليوم ده و نحوش تمن التربه و انا اقولها بعد الشر عنك
فاطمه / يا بنتى اهدى عشان خاطر اللى فى بطنك دى مش هتستحمل اللى بتعمليه ده
مرام / مش قادره والله ما قادره بحاول والله بحاول مش قادره تعبت
مرام تعيط اكتر
مازن / تحبى ادفنها عندنا
مرام تصرخ فيه
مرام / لا انت مجنون انا عوزاها ترتاح فى تربتها مش عوزاها تبقى جنب اى حد منكوا و لا من ريحتكوا هتعزبوها دنيا و اخره ما تسيبوها ترتاح بقي ما ترحموها بقي ماتت خلاص ماتت
مازن / جنب خالو ... كنت بقول ندفنها عندنا جنب خالو
فاطمه / لو مش عاوزه ممكن ندفنها عندنا احنا
مرام / انا محتاجه محمود ... محمود معاه البطاقه بتاعتى ...الكريدت كارد بتاعتى هو عارف فيها كام هو ...
فاطمه / روح يا مازن امشي شوفوا ايه صح و اعملوه متتعبهاش امشي يلا امشي
مازن يهز راسه و يمشي مرام تبص لفاطمه
فاطمه / ليه كدا يا مرام انا مقدره تعبك بس
مرام / هو اللى عمل فيا كدا هو اللى خلانى اقبل بيه هو اللى دبسنى فى الهم ده
فاطمه / الله برحمه كان راجل طيب لو كان عاي مكنش كل ده حصل و انتى عارفه الله برحمه كان بيجبك زى بنته و اكتر عشان كدا قتلوه اول واحد يا مرام قتلوه عشان كان حاميكى منهم
مرام تتكسف من نفسها و تبص فى الارض
مرام / الله يرحمه
فاطمه / انا عارفه انك موجوعه و وجعك كبير بس انتى لازم تهدى لازم تهدى عشان تعرفى تشوفى مين حبيبك من عدوك
مرام / هى عمتى كويسه بالله عليكى قولولى الحقيقه هى كويسه
فاطمه / والله ما فيها خربوش حتى كل الحكايه اعصابها تعبانه و مدينها مهدئ و حاجزينها فى المستشفى
مرام / الحمد لله الحمد لله
........................
فى العزا فى دار مناسبات كبيره جدا
محمود واقف و جنبه مازن و جنبه شريف و الناس بتدخل و فى فى الشارع صحفيين كتير جدا و بوديجاردات منعاهم و بيحاولوا يصوروا اللى بيحصل شاب يدخل يسلم على محمود
الشاب / البقاء لله
محمود / و نعم بالله
الشاب يدخل يسلم على مازن
الشاب / البقاء لله مازن بيه
مازن / و نعم بالله
الشاب / انا عارف ان الوقت مش مناسب بس لو تسمحلى بخمس دقايق بس الناس عاوزه تطمن على مدام مرام
مازن يبص لبودى جاردى الناحيه التانيه يجى يشد الشاب بره
الشاب / خمس دقايق بس يا مازن بيه خمس دقايق
شريف / يارب نخلص بقى من القرف ده
مازن يبص للصحفيين كتير جدا يبص فى الارض و ينفخ و يسيب العزا و يروحلهم اول ما يقف قدامهم كلهم يبداوا فى السؤال فى وقت واحد و باسلوب همجى و مستفز مازن يزعق فيهم
مازن / شباب شباب لو سمحتوا
الكل يسكت شاب
شاب / ايه تعليق
مازن / اخرس ... انا عارف انكوا بتعملوا شغلكوا بس دا عزا ... دا عزا ... فى ناس ماتت سامعيين ... فى ناس ماتت و احنا فينا اللى مكفينا لو سمحتوا احترموا مشاعرنا شويه ارحمونا اللى عاوز يعزى اهلا و سهلا اللى مش عاوز يتفضل يمشى و متخلونيش اكلم رؤساء التحرير بتوعكوا عشان كلامى معاهم مش هيعجبهم
مازن يسيب المكان و يدخل دار المناسبات تانى و كلهم واقفين يبصوا لبعض زى ما هم
محمود / و لا هيتحركوا و لا فارق معاهم غير الكام صوره و الكام كلمه عشان سبق صحفى انما احنا نولع الميت اللى مات يولع المهم السبق الصحفى
مازن / للاسف دا شغلهم اللى بياكلوا منه عيالهم
رجاله شكلهم معلمين بجلاليب يدخلوا يسلموا على محمود و على مازن و على شريف و يدخلوا يقعدوا
راجل 1/ البقاء لله يا محمود يا ابنى اول ما سمعنا الخبر جينا من البلد فى اول قطر
محمود / و نعم بالله يا عمى
راجل 2/ اخبار الحجه ام مروه و البنات ايه
محمود / كويسين هتلاقيهم موجودين فى عزا السيدات فى الصاله التانيه
راجل 1/ هنبقى نيجى نعزيهم فى البيت
محمود / تنوروا طبعا
الرجاله يدخلوا
محمود / دول اخوات المعلم اسعد شوفتوهم فى كتب الكتاب تقريبا
شريف / ايوه شوفتهم ... صحيح يا محمود حاول تعدى على مرام فى المستشفى مبتبطلش تسال عنك
محمود / بانهى وش
شريف / باى وش البنت لوحدها و ملهاش غيركوا مش وقت هبل دلوقت
مازن / هى اصلا مش زعلانه منك بالعكس دى حاسه بالذنب حاسه ان كل ده بسببها
شريف / صحيح نسيت اقولك انا هصرف ميه الف لاهالى الناس اللى ماتت
مازن / خليهم مليون مع ان الفلوس عمرها ما تعوض اللى راح و اصرف ميه الف لكل واحد من رجالتنا اللى كانوا هناك
شريف / تمام
............................
عند السيدات
مروه و مامتها و اخواتها قاعدين بيعيطوا و الستات تدخل تسلم عليهم و يقعدوا امينه تدخل تحضن الست و تبوسها مروه و امها يقوموا يقفوا
امينه / قلبى عندك يا اختى
الست / تعيشى يا حبيبتى
امينه / امال الحجه مديحه فين
الست / فى المستشفى مستحملتش اللى حصل
امينه / و مفيش اخبار عن مرام
مروه تصرخ و هى بتعيط
مروه / متقوليش اسم الكلبه دى هنا
الست / اسكتى
مروه / اسكت ليه مش كل ده بسببها مش هى السبب ابويا مات بسببها ابويا مات
الست / ابوكى مات عشان كان راجل ووقف زى الرجاله ابوكى مجريش مع دكوره الحاره اللى جريوا ابوكى راجل
مروه / الراجل مات و الدكوره عاشوا و بكره يجوا ينهشوا فينا
امينه / استهدى بالله يا بنتى متعمليش فى نفسك كدا
مروه / بكره الدور يجى عليكوا الدور هيجى عليكوا كلكوا مش هتهدى الا لما كلنا نموت و هتفضل برده هى عايشه
مروه تقعد على كرسيها تعيط و امها تبص فى الارض و الستات كلهم يبصوا لبعض و يتودودوا امينه تدخل تدور على مكان و تقعد و فاطمه قاعده جوه شايفه اللى بيحصل تبص فى الارض و تسكت
..........................
فى المستشفى
رؤى و شيماء قاعدين و تقى نايمه على الكنبه و مرام نايمه على السرير
رؤى / تفتكرى هيحاولوا تانى
شيماء تبص على مرام نايمه و تروح تقعد جنب رؤى
شيماء / اللى اعرفه ان اللى حصل ده مش هيعدى على خير
رؤى / قلبى بيقولى مش هيسكتوا
شيماء / مش هيسكتوا الا لما حد فيهم يخلص على التانى
رؤى / بعيد عننا يارب
شيماء / ازاى بعيد عننا مهو لو مقتلوش مازن مازن هيقتلهم و يدخل السجن و يتعدم يعنى كدا كدا
رؤى / تفى من بقك فال الله و لا فالك ان شاء الله هما يخلصوا على بعض بعيد عننا اللهم اضرب الظالمين بالظالمين و اخرجنا منهم سالمين
مرام تصحى و تبصلهم باستغراب
مرام / فى ايه محمود جه
رؤى / لا محدش جه نامى نامى
مرام / لا صحيت خلاص
مرام تحاول تقعد رؤى تقوم تساعدها
رؤى / اجيبلك حاجه تاكليها
مرام / لا مش جعانه شكرا ... حبيبتى يا تقى نامت... انا تعبتكوا اوى معايا يا بنات بجد
رؤى / لو مكنتيش راقده خلقه كنت رقدتك عالكلمه دى تعبتينا ايه يا حيوانه انتى هو فى بين الاخوات الحاجات دى
شيماء / تعرفى يا مرام بفكر لما تخرجى من هنا تيجى تقعدى معانا لحد ما تولدى انتى هتبقى تعبانه و محتاجه رعايه
رؤى / والله فكره جامده يا بت يا شوشو
مرام / انتوا اخواتى والله متفهمونيش غلط بس انا مش هقدر اتقل عليكوا و كمان شريف
رؤى / ما يروح يقعد عند مازن يعنى مش مشكله اساسا هو معظم الوقت بيبقى معاه و بنشوفه تفاريح
مرام / ايوه بس انا اصلا ليا بيتى
شيماء / هتقعدى لوحدك ازاى يا بنتى انتى محتاجه حد يخدمك الدكتور قال ممنوع الحركه عليكى انتى محتاجه ترتاحى
مرام / ربنا يبارك فى عمتى و محمود اكيد مش هيسيبونى يعنى الباب فى الباب يعنى
رؤى / انتى رخمه يا بت
مرام / ههههههههههههههههههههه بس دا ما يمنعش انكوا هتيجوا تزورونى تطمنوا عليا مش كدا
شيماء / دا احنا هنبات فى حضنك كمان لو حكمت
مرام / ربنا يخليكوا ليا يا احلى اخوات فى الدنيا
رؤى / امين امين
.......................
فى الفيلا عند زياد
زياد يدخل الاوضه لبنى نايمه تحس بيه تقوم تقعد و تبص الناحيه التانيه و تنفخ
زياد /هتفضلى مقموصه كدا كتير
لبني تبصله و ترجع تبص الناحيه التانيه زياد يروح جنبها و يطلع علبه فيها خاتم سوليتير
زياد / شوفتى بقي انا بحبك قد ايه
لبني/ و دا بقي تمن سكوتى عندك
زياد / هههههههههههههههههه لا يا قلبي اتكلمى لو تحبي اطلبلك مازن بنفسي تقوليله اللى حصل براحتك لو تحبي تتصلي بالبوليس و تبلغي عنى برده براحتك و ادى الموبايل اهو كمان
زياد يناول لبني الموبايل
لبني / للدرجادى امنت نفسك
زياد / انا اصلا من الاول مليش اى دخل باللى حصل
لبني / اه صح
زياد / جدعه اثبتي
لبني / قوم من جنبي يا زياد انا تعبانه و مش طايقه نفسي
زياد / الا قوليلي يا لولا لو انا ليا دخل باللي حصل تقدرى تقوليلي ليه لحد دلوقت مازن مجاليش و لا حتى عمل اى حاجه
لبني / عشان ملخوم لكن اول ما هيفضالك هيوريك
زياد / على فكره انتى مراتى انا تمام ... يعني لو انا جرالى حاجه مازن دا مش هينفعك ... الحقيقه ما حدش هينفعك فهمتى ... فا انا لو منك اخد الخاتم و احمد ربنا و اتعدل عشان متطلعيش من المولد بلا حمص
لبني تبصله و تاخد الخاتم زياد يقرب منها و يحضنها تزقه
لبني / اوعى الخاتم ده تمن انى انسي اللى انت عملته مع مازن لكن القلم اللى نزل على وشي مش هيتنسي بالسهوله دى
زياد / مفيش حاجه مبتتنسيش يا قلبي بكره اخدك تنقي اللى يعجبك
زياد يحاول يحضنها تانى تلف و تديله ضهرها و تنام
لبني / ابقي تعال بكره احضنى .. تصبح على خير
زياد يبصلها
زياد / هى بقت كدا ... ماشي و انتى من اهله يا قلبي
..................
فى المستشفى
مرام نايمه تصحي تلاقى مازن نايم على الكنبه تحاول تقوم تقعد و تان و هى بتتعدل مازن يصحي يبص عليها يقوم يحاول يساعدها
مازن / عاوزه حاجه في حاجه بتوجعك
مرام / انت بتعمل ايه هنا
مازن / قاعد معاكى يمكن تحتاجى حاجه
مرام / هى عمتى لسه في المستشفى
مازن / ايوه
مرام / انت بتكدب عليا صح
مازن / و اكدب ليه انتى مش اتحجزتى في المستشفى مرتين لنفس السبب
مرام تبص فى الارض و تهز راسها اه
مازن / ماما فاطمه سيبالك اكل هنا لو تحبي
مرام / لا شكرا مش جعانه... و انت ممكن تروح
مازن / و اسيبك لوحدك
مرام/ كلها كام ساعه و النهار يطلع و عمتى تروح و محمود يجي ياخدنى
مازن / طب لحد ما يجي هتفضلي لوحدك يعني
مرام / انا كويسه مش محتاجه حاجه و بعدين حتى لو احتاجت انت اللى هتساعدنى يعني كتر خيرك تقدر تمشي
مرام تبص لمازن تلاقيه باصصلها
مرام / ايه !!!
مازن / مش هقدر اسيبك لوحدك انا اسف
مرام / ما انا لوحدى بسببك اصلا
مازن / لا مش بسببي و كفايا بقي تجيبي اللوم عليا فى كل حاجه
مرام / عرفت انا ليه كنت مخبيه عنك انى حامل شوفت جرالى ايه اول ما عرفت انى حامل شوفت بعينك و اتاكدت انك خطر على حياتي و حياه بنتي
مازن / مش هدخل معاكى فى الحوار ده
مرام / ليه بقول حاجه غلط تعرف انا بقول لنفسي ياريتني قولتلك من اول يوم يمكن كانوا سقطونى بره البيت و خلصنا و ساعتها كانت تيته هتبقي عايشه هى و المعلم اسعد و الشباب اللى ملوش اى دخل بالموضوع غير انهم بيشتغلوا عندك
مازن / دا شغلهم عندى او عند غيرى دى شغلتهم و اكل عيشهم و بيقبضوا عليها كويس
مرام / و بتدفعلهم كام بقي عشان يدوك حياتهم
مازن / ايه الغريب فى كدا زيهم زى اى ظابط او جندى دا شغله على الاقل انا بصرف تعويضات كويسه عن اى اصابه
مرام / الفلوس مش كل حاجه
مازن / انا مبدفعلهمش عشان يموتوا انا بدفع عشان يحموكى انا كنت زيي زيهم و لا مخدتيش بالك
مرام تبص الناحيه التانيه مازن يروح يقعد جنبها
مازن / مرام .. انا بحبك
مرام / انا مكنتش قادره اسامحك و انت ابن الراجل اللى اذانى و فضحنى هسامحك و انت ابن الراجل اللى
مازن / و انتى اش عرفك ان هو ما يمكن زياد و لا احمد و لا يمكن توفيق عمل كدا من نفسه
مرام / عاوز تقنعني ان توفيق جاب الناس دى كلها و خطت لكل ده لوحده ما حدش ساعده
مازن / على العموم معتز بيحقق مع الناس اللى اتقبض عليهم و اى كان اللى عمل كدا انا مش هرحمه على فكره اللى فى بطنك دى بنتى انا يعني اللى يقربلها اكله بسنانى
مرام تبصله مازن يقعد على الكنبه و يطلع الموبايل و يلعب فيه و مرام بتبصله يبصلها
مازن / مش همشي ... حتى لو عمتك جت و روحتى هاجى معاكوا ان شالله حتى افرش عالسلم خلاص اهدى بقي
مرام تحاول تنام يقوم يساعدها تبصله
مازن / حمد الله على سلامتك
مرام تغمض مازن يروح يقعد على الكنبه تجيله نوتيفيكاشن مازن يفتح الموبايل يلاقي ريكورد مبعوتله من رقم غريب يبص على مرام مغمضه عنيها يطلع الهاند فرى و يحطها و يشغل الريكورد ملامحه تتغير و ثوانى و الدموع تنزل من عينه و يبص على مرام تانى يشيل الهاند فرى من ودانه و يقوم يدخل الحمام و يغسل وشه و يبص فى المرايه و هو بيعيط
مرام / مازن .. مازن
مازن يغسل وشه و يشد مناديل ينشف وشه و يطلعلها
مرام / انت كويس مالك
مازن / ماليش انا كويس تمام كنت بغسل وشي النوم كان بيكبس عليا
مازن بيحاول عينه ما تجيش في عين مرام
مرام / نام لو عوزت حاجه هصحيك متقلقش
مازن يروح يقعد على الكنبه و يبصلها بصاله يبص قدامه تانى و هو مرتبك و حزين
........................
فى المستشفي عند مديحه
مديحه نايمه عالسرير و محمود قاعد جنبها مديحه تصحي تصرخ
مديحه / سيبوا البت سيبوا البت
مديحه تقوم تقعد محمود يجرى يحضنها
مديحه / هيموتوا مرام يا محمود اللحق البت يا محمود
محمود / مرام كويسه يا ماما لحقوها اهدى مرام كويسه
مديحه / كويسه !!! امال بتصرخ ليه يا محمود بتصرخ ليه مدام كويسه بتصرخ ليه
محمود / مبتصرخش يا ماما اهدى ابوس ايدك اهدى هنادى الممرضه
مديحه / ناديها … ناديها اطمن عليها ناديها
محمود /هى مش هنا هى فى المستشفى
مديحه / سقطوها سقطت
محمود / يا ماما قولتلك مليون مره مرام كويسه و ملك كمان كويسه هى هناك بس عشان المتابعه مرام زى الفل و بكره ان شاء الله هروح اجيبها من المستشفى و اخدها عندنا البيت
مديحه / عندنا البيت !!! ازاى ؟؟ لا لا مينفعش مرام مينفعش تبقى عندنا فى البيت مرام مينفعش تبقى هنا هيقتلونا هيقتلونا يا محمود هيموتوك يا ابنى
محمود / متخفيش يا ماما محدش هيقدر
مديحه / قدروا قدروا المسدس كان على دماغى المسدس كان على دماغى يا محمود مقدرتش قولتلهم على مكانها
محمود / ايه
مديحه / انا خفت سميحه شافتنى و انا بقولهم على مكانها هعمل ايه هحط عينى فى عينها ازاى و انا بيعاها
محمود / كان غصب عنك
مديحه / لا يا محمود لا مش هقدر مش هقدر ابصلها مش هقدر اخد بالى منها خليها تروح لمازن هو هيحميها هو هياخد باله منها
محمود / يعنى اقولها مش هناخدك مش كفايا لحد دلوقت مروحناش نبص عليها
مديحه / انت لو شوفت اللى انا شوفته
ممرضه تدخل
الممرضه / معاد الحقنه
.......................
فى شركه ابراهيم في دبى
ابراهيم قاعد بيبص في ورق تليفون المكتب يرن يرد
ابراهيم / ايوه
ملامح ابراهيم تتغير و يرتبك
ابراهيم / خليه يدخل
ابراهيم يقفل السكه و بنت تفتح الباب و مازن يدخل و يقف قدام ابراهيم اللى بيبصله بعين مكسوره و كل شويه يبص في الورق اللى قدامه و يرجع يخطف من مازن نظره و بسرعه يطاطى تانى و مازن بيتحرك ناحيته و باين على وشه الحزن
مازن / صباح الخير يا .. بابا
ابراهيم يبصله و يرجع يبص للورق بسرعه مازن يضم ايده بوكس جامد
مازن / حضرتك مش بتبصلى ليه حضرتك زعلان منى فى حاجه .. انا اسف انى اتاخرت بس اصل كان ورايا عزا
ابراهيم باصص فى الارض و ملوش عين يحطها فى عين مازن
مازن / تمن اشخاص ماتوا تمانيه يا بابا منهم راجل بيجرى على تلت بنات اكبرهم فى ثانويه عامه و ست عاجوزه كانت بتشقي على حفيده يتيمه الاب و الام
ابراهيم يبص لمازن باصصله ابراهيم يرجع يبص فى الارض تانى
مازن / فى ست امهات خسروا ولادهم و كان فى ام غيرهم هتموت و هى بتحمى اللى فى بطنها
مازن الدموع تنزل من عينه ابراهيم يبصله و يقوم يقف يبص من الشباك و يدى لمازن ضهره
مازن / هو ايه الموضوع الخطير اللى يخص مونى اللى حضرتك كنت عاوزنى عشانه
ابراهيم / بعدين ... بعدين
مازن / ليه هو حضرتك عندك اهم من مونى عندك اهم من بنتك بنتك الوحيده
ابراهيم يبصله
مازن / تعمل ايه لو حد حاول يقتل بنتك
ابراهيم / انا من الصبح مقدر موقفك بس انت بتكلمنى كان انا اللى قتلتهم
مازن يصرخ / متبقاش قاتل و بجح
مازن يمسك نفسه و يبص فى الارض و يكتم فى نفسه و يرجع يبص لابراهيم و هو هينفجر من الغضب
مازن / عملتلك ايه عشان تكرهنى كدا عملتلك ايه عشان تاذينى بالشكل ده بتقتل بنتى بتقتلتى
ابراهيم / انا معملتش حاجه
مازن يصرخ / متكدبش احمد مسجلك اتفاقك معاه .. تحب اسمعهولك .. تحب اسمعك صوتك و انت بتقوله ان بنتي مش لازم تعيش و انت بتتفق مع عدوى عليا تحب اسمعك صوتك
الدموع تنزل من عنين مازن و ابراهيم واقف باصص في الارض
مازن / بصلى .. بص لابنك .. بص في عينه و قوله انت ليه بتكرهه اوى كدا .. طب لو كنت انا واحد من التمانيه اللى ماتوا
ابراهيم يبصله مازن بيعيط
مازن / قولى انك كنت هتزعل عليا قولها حتى لو بالكدب
ابراهيم / انا مكنتش اعرف ان كل ده هيحصل انا بس
مازن / كنت بس عاوز تقتل بنتي و خلاص مش كدا
ابراهيم يبص في الارض
مازن / طب حضرتك بتكرهنى حقك بتكره مرام و جدتها حقك برده لكن البنت دى ذنبها ايه لو كانت ماتت لو مكنش رحيم بيا قبل ما يكون رحيم بامها .. كان هيبقي ذنبها ايه عشان تموت .. ذنبها انها بنتى ؟؟
ابراهيم يبصله
مازن / بتعرف تنام يا بابا و فى دم على ايديك
ابراهيم / انا مكنتش اعرف ان كل ده هيحصل انا مكنتش اعرف ان فى ناس... انا
مازن / انت قتلتنى
ابراهيم يبصله
مازن / انت قتلت ابنك .. فى اللحظه اللى طلبت من احمد انه يقتل فيها حفيدتك كنت بتقتلنى فيها يا بابا دلوقت معدش عندك ابن ... اه اسف ربنا يخليك زياد
ابراهيم / مازن انا
مازن / انت مت بالنسبالى خلاص
مازن يمشي ابراهيم يجى يجري وراه ميقدرش يبص عليه بحزن و هو ماشي ابراهيم يبص فى الارض ثوانى و تليفونه يرن يروح يبص يلاقي مونى يتهبد على الكرسي و يفك الجرافاته و هو مخنوق و يرد
ابراهيم / ايوه
صوت مونى بتعيط/ قولى ان ده مش حقيقي قولى ان اللى فى الريكورد ده مش صوتك
ابراهيم يبص لفوق و هو زعلان
صوت مونى / انا مش لاقيه كلام اقولهولك ... ليه يا بابا ... ليه ... انا كان ممكن اسامحك على اى حاجه الا انك تكون قاتل ... هان عليك مازن ... هنت انا عليك ... حرام عليك يا بابا والله العظيم حرام
............................
