((((السكة شمال ٢))))))
#لولو_محمد
الحلقه ٢٩
شيماء / امال بتتصل كل شويه تتطمن عليه ليه
شريف /عشان العشره متهونش غير على ولاد الحرام يا شيماء صحيح مجتش فرصه اسال هو دكتور عمر امبارح
شيماء / كان جاى يطمن عليا ان كنت هنزل الصيدليه تانى و لا لا
شريف / ايوه ايوه
شيماء / انا قولتله هظبط مواعيد الاول عشان الكليه و كدا
شريف / كوس برافو عليكى
شيماء / ينهار ابيض هنتاخر و لسه على منلاقى تاكس
شريف / لا لا انا جاهز اهو يلا
شريف و شيماء يقوموا و يمشوا
.................................
فى الكليه
محمود يركن و ينزل من العربيه مرام تنزل و تقفل الباب و تاخد نفس و تعدل شنطتها و تتحرك جنب محمود بكل ثقه و العيون عليها و هى عينها قدامها مبتبصش على حد لحد ما يدخلوا المدرج
مرام / فى مكان هناك جنب البنات فاضى هروح اقعد فيه
محمود / تمام و انا هرجع ورا جنب سعد
مرام تهز راسها و تروح فى حته فاضيه عالحرف وسط بنات كتير مرام تقعد و تطلع كشكول من شنطتها و تحطه قدامها و تطلع قلم و تحطه فى الكشكول و بعدين تجيب الشنطه على رجلها و تطلع الخيط و الابره و تشتغل كروشيه و عينها فى الشنطه و الطلبه اللى فى المدرج عمالين يتهامسوا عليها تدخل بنتين يروحوا ناحيه مرام ياخدوا كشاكيلهم من عالبنج جنبها و يرجعوا ورا مرام مبتتحركش و تكمل شغل لحد مالدكتور يدخل و يبدا المحاضره
................................
فى الكافتريا
زياد يدخل يلاقى لبنى قاعده على ترابيزه لوحدها يسحب كرسى و يقعد قدامها
زياد / حبيبى زعلان منى لسه
لبنى / لا مش زعلانه
زياد / امال مش بيكلمنى ليه
لبنى / انا محتاجه شويه وقت عشان اعيد حساباتى تانى
زياد / طب و الفرح
لبنى / اكيد هيتاجل طبعا معدش فى سبب نستعجل عشانه
زياد / و لا حتى انك تبقى مع حبيبك
لبنى / هيفرق فى ايه الفرح عن غيره يعنى كلها مجرد شكليات
زياد / انتى اول بنت فى الدنيا تقول عالفرح شكليات
لبنى / انا مش فى المود عشان كدا
زياد يشد الكرسى و يروح جنبها و يطلع علبه من جيبه فيها خاتم سولتير لبنى ما تهتمش و تبص الناحيه التانيه
زياد / انا عارف انه مش هيعوضك عن اللى راح بس يعنى ممكن تعتبريه عربون لبنى انا بحبك اوى و مش بقدر اشوفك زعلانه
لبنى / مفيش اخبار عن مازن
زياد / والله مفيش جديد من ساعه ما خرج من المستشفى و هو حابس نفسه فى البيت و اونكل كان عنده امبارح بيقول انه مبيقومش مالسرير نايم طول الوقت
لبنى بحزن / دمرناه يعنى
زياد / و احنا مالنا
لبنى تبص لزياد و تبص فى الارض يمسك دقنها و يرفع عنيها فى عنيه يلاقيها مليانه دموع
زياد / ميستاهلش صدقينى دا حتى عمره ما عاملك حلو
لبنى / كان بيعاملنى كويس لحد ما ارتبطت بيك
زياد يبصلها باستغراب
لبنى / اقصد ان مازن حتى لو كان اوبن مايندد و كدا هو مبيعترفش بالعلاقه بره اطار الجوار زى حواره مع مرام كدا
زياد / اه فهمت
لبنى / عشان كدا احتقرنى بقى يتعامل معايا على انى شمال زيى زي باقى البنات التانين
زياد / عشان حمار مبيعرفش يقدر قيمه الناس كويس
لبنى / معاك حق عشان كدا عمره مشاف كرهك ليه لحد مدمرته
زياد / انتى ايه حكايتك
لبنى / قولتلك انا مش فى المود انا مروحه
لبنى تقوم زياد يقوم
زياد / تمام تعالى اوصلك
لبنى / معايا العربيه متتعبش نفسك
لبنى تمشى و زياد عينه عليها ثوانى و يمشى وراها
.............................
فى المدرج
المحاضره خلصت و الكل بيطلع و مرام قاعده فى مكانها لحد ما الكل يطلع محمود يروح جنبها تلم حاجتها و يقوموا يطلعوا بره و الكل عينه عليهم
محمود / فى ساعتين فاضيين على المحاضره التانيه تحبى نروح الكافتريا
مرام / لا انا هطلع اقعد فى المكتبه احسن
محمود / متاكده
مرام / اه لو عاوز روح انت الكافتريا و نتقابل كمان ساعتين قدام المدرج
محمود / لا هاجى معاكى تعالى
مرام ترفع عينها بالصدفه تلاقى بنتين بيبصوا عليها و بيتكلموا عين مرام تيجى فى عنيهم يسيبوا المكان بسرعه و يمشوا محمود ياخد باله
محمود / متحطيش فى دماغك دول عالم متخلفه
مرام / مش حاطه يلا
مرام و محمود يمشوا
...........................
فى شقه مديحه
مديحه / الله اكبر طب والله فرحتلها اوى كدا بقى مش هنحتاج للجروب تانى
سميحه / مين ده دى امبارح نزلت عروض بالهبل واحده مينى تارت هديه على كل اوردر حلويات و على المكرونه البشاميل اشترى تلاته و خد الرابعه هديه و حاجات تانيه مش فكراها
مديحه / ايوه مانا شوفت العروض دى بس برده محدش بيطلب حاجه مننا خالص يا حجه احنا بقالنا سنه كامله مشتغلناش فى الجروب ده زمان زباينا لقوا ناس تانين يجيبوا منهم دا دلوقت بقى فى فكل شارع واحده بتشتغل فى الاكل البيتى
سميحه / ربنا يرزق الجميع يا مديحه محدش بياخد رزق حد
مديحه / ايوه يا حجه بس الوضع ده مينفعش يكمل كدا متنسيش شكل محمود قصاد نسايبه بعد مساب الشغل
سميحه / يا سلام و هو لما كان خطب مروه كان شغال فين
مديحه / بصراحه يا حجه انا مش هخبى عليكى و محمود زي ابنك زيه زى مرام بالظبط
سميحه / طبعا يا مديحه قولى
مديحه / انا عارفه ان محمود و مرام الاتنين تعبوا طول السنين اللى فاتوا بس بصراحه محمود محتاج التعيين اكتر منها هو فى الاول و الاخر راجل و محتاج وظيفه عشان يفتح بيت لكن مرام بكره ربنا يرزقها بابن الحلال اللى يصونها و كمان الحمد لله اهو ربنا فتحلها سكه بالكروشيه و الحلويات اهو يعنى مش هتحتاج التعيين فى حاجه
سميحه / والله يا مديحه انا عمرى مفكرت فى الموضوع من الناحيه دى انا دايما بقول المنافسه اللى بنهم بتخلى كل واحد يعملى اللى عليه و الباقى على ربنا
مديحه / انا مقولتش حاجه بس انا بس
سميحه / يا مديحه كل حاجه بايد ربنا محدش عارف بكره مخبيلنا ايه و محدش عارف ان كان الخير فى التعيين و لا لا متحطيش الحاجات دى فى دماغك دا احلى حاجه فى عيالنا ان المنافسه دى ماثرتش على علاقتهم ببعض و نفسنه
مديحه / عارفه والله يا حجه و انا لو كنت عامله تكليف او قصدى حاجه وحشه مكنتش صارحتك باللى جوايا و ربنا وحده اللى يعلم غلاوه مرام عندى
سميحه / دى مفيهاش شك يا مديحه دانتى اللى مربياها من بعد امها ما ماتت و ربنا وحده اللى يعلم غلاوتك عندى و عندها
مديحه / يعنى مش زعلانه منى يا حجه
سميحه / لا مش زعلانه بس لو مقومتيش تعمليلى كبايه شاى حلوه من بتاعتك هزعل
مديحه / ههههههههههه و انا مقدرش على زعلك حالا تكون عندك احلى كبايه شاى
سميحه / هههههههههههههههههههه و انا مستنيه
...............................
فى الكليه
مرام تدخل الحمام و تدخل كبينه و تقفل الباب تدخل اريج و معاها بنتين كمان يقفوا قدام المرايه يعدلوا الروج بتاعهم
بنت 1/ هههههههههههههههههه انتوا مكبرين الموضوع اوى على فكره
بنت 2/ بس انا قولتلكوا انهم مش هيجوا
اريج / لا بس انا شوفت لبنى و زياد فى الكافتيريا الصبح
بنت 2/ بس محضروش بردوا محدش منهم حضر
بنت 1/ لا بس هو غبى اوى برده جاى على اخر ترم و يخيب
اريج / و هو فارق معاه يعنى
بنت 1/ لا بس وجوده مع مرام فرق معاه
بنت 2/ يا بنتى هو مكنش عارف مرام عشان ينجح كان عارفها عشان
مرام تفتح الباب و تمشى و لا كانهم بيتكلموا
بنت 1/ اوووووبس تفتكروا سمعت
بنت 2/ دا الحمام اللى فى المبنى التانى سمع هى مش هتسمع
اريج / و حتى لو سمعت قال يعنى فارق معاها دى باكسه مش شايفين مشيت و متكلمتش ازاى و لا كان فى حاجه
بنت 2/ كانت هتقول ايه يعنى ربنا يكون فى عونها
بنت 1/ تفتكروا اطلقت
اريج / ايه يعنى مش باين عليها اطلقت طبعا و شكله خد كل اللى اشتراهولها حتى الهدوم مش شايفين كانت لابسه ايه
بنت 2/ لا مخدش حاجه تلاقى هدومها اتحرقت لما البلطجيه ضربوها
اريج / و انتى مصدقه ان مش هو اللى باعت البلطجيه
بنت 1/ يا بنتى ازاى يعنى دا طلع لايف و اتكلم
اريج / عشان يبعد الشبهه عنه دا ممثل شاطر يعنى اللى يعمل كل ده يصعب عليه حاجه زى دى
بنت 1/ لا مفتكرش
اريج / بالنسبالى متفرقش لا مازن و لا شلته و لا حتى مرام ينفع حتى نرد عليهم السلام
بنت 2/ و انا كمان شايفه كدا و لعلمك بقى تقريبا كل البنات و الشباب فى الدفعه شايفين كدا النهرده محدش سلم عليها خالص حتى علياء و عبير لما راحت تقعد جنبهم خدوا حاجتهم و رجوا ورا
اريج / شوفتهم و بصراحه كنت هموت مالدحك
بنت 1/ والله صعبانه عليا اوى متستاهلش كدا
اريج / انتى طيبه اوى يلا يلا هنقضى اليوم كله فى الحمام و لا ايه
بنت 2/ يلا
................................
فى شقه مرام
مرام تطلع صينيه كيكه من الفرن
سميحه / الله تسلم ايدك
مرام / لما تبرد هقطع منها حته و اطلعها لامل و اقعد معاها شويه و بالمره تعرف انى رجعت ادى دروس تانى لو تحب تيجى ايه رايك
سميحه / و ماله جيرانا برده و زمانهم شامين ريحتها
مرام / و لا تبقى تطلعيها انتى احسن اصل جتلى فكره كدا فجاه يعنى انتى عارفه ان بكره مفيش محاضرات فمش هروح الكليه و كدا فا .. ايه رايك لو حضرت شويه تارتات و حلويات و لفيت بيها مع محمود مش يكون احسن
سميحه / يعنى العشر دقايق تطليع الكيكه هيعطلوكى يعنى
مرام تبص لسميحه برجاء
سميحه / مرام دول جيرانا و متربيين سوا و ان مكانوش ادخلوا فى اللى حصل عشان فى الاول و الاخر دول ولايا مش هيقفوا قدام بلطجيه يعنى لكن دا مش معناه انهم مصدقين فيكى حاجه
مرام / يا تيته مش القصه بس
سميحه / متخليش اللى حصل يقطع علاقتك بالناس ما يمكن يا بنتى هما نفسهم يوصلوا الود بنا و خايفين نكون زعلانين منهم عشان مدخلوش او نفتكرهم شمتانين فينا و لا حاجه يمكن حاجات كتير اوى يا بنتى و بعدين خيركم من يبدا بالسلام
مرام / يعنى اطلعلها
سميحه تهز راسها اه مرام تبتسم
.............................
فى الفيلا
زياد / يعنى ايه سافر فجاه يعنى ايه فى ايه فى الدنيا اهم من انه ياخد ام زفت التوكيل ده و يمضى مازن عليه
فريده / معرفش رجع امبارح بالليل قالى فى مؤتمر مهم فى الجونه و الريس هيحضر و ان وزير الاستثمار هياخده معاه و انها فرصه كويسه و لم شنطته و سافر
زياد / طب مقولتليش ليه مقولتليش ليه
فريده / كنت هتمنعه يعنى
زياد / الراجل ده هينفطنى هيشلنى
فريده / اهدى اهدى
زياد / اهدى ايه يا ماما بس اهدى ايه كنا خلاص خدنا التوكيل كنا خلاص ضمنا كل حاجه
فريده / و انت فاكر ان ابراهيم هيستخدم التوكيل ده انه يبيع مازن كل حاجه و ينقلها باسمه تبقى بتحلم ابراهيم حتى لو كانت علاقته زفت بمازن بيحبه
زياد / بس بقى هو فى راجل بيحب ابنه يعمل فيه كل ده دا مكنش فاضله غير سكينه حديد مصديه و يرشقها فى قلب مازن
فريده / لا بيحبه هو بس مبيعرفش يعبر يعنى هو كان عمل ايه لمونى هو عقله جايبه على قد كدا فاكر ان الفلوس هى اهم حاجه فى الدنيا و احسن حاجه ممكن يقدمها لولاده هى الفلوس عايش بس يلم فى فلوس عشان لما يموت يكون سايبلهم اللى يريحهم باقى عمرهم هو اعتراضه على مرام انها مش هتضيف لمازن مش هتسنده هو عاوز لمازن عروسه غنيه او من عيله مهمه منصب يعنى
زياد / هو انتى مقتنعه باللى بتقوليه اصلى حاسس انه اى كلام بصراحه
فريده / مهو اى كلام طبعا بس هو ده اللى هو بيقنع بيه نفسه انت فاكر لما مازن العربيه اتقلبت بيه ابراهيم اتجنن و جرى يجيب التليفون و ابنى و مش ابنى لكن اول ما سمع صوت مازن كنت فكراه هيقوله ابنى حبيبى لقيته بيقوله جرا ايه يا سى مازن هو انت كل يوم تعملك مصيبه مالك سايق بسرعه ليه بكره اجرى استلم جثتك من المشرحه و غيرها و غيرها تصدق حتى علاقته بيا او باميره كدا بيعبر عن حبه لينا بهدايا غاليه و خلاص لكن كلمه حلوه حنيه اى اهتمام ابدا فلوس و بس و يمكن ده اللى كان موتر علاقته باميره زمان لحد ما ماتت لكن انا فهمته و بصراحه هعوز ايه احسن من كدا يعنى
زياد / برده برده
فريده / اهدى انت بس ايه اسوء حاجه ممكن تحصل فى الكام يوم دول مازن كدا كدا لوحده و مفيش حد عارف بحالته و دلوقت كمان ابراهيم الاهبل اقنع نفسه ان ابنه المجنون اعقل واحد فى الدنيا و بما ان مفيش اى مخلوق حواليه فالتغير الوحيد اللى ممكن يحصل فى حالته هو انها تسوء اكتر
زياد / اياكش ينتحر و يريحنا
فريده / مونى هتزعل عليه للاسف
زياد يبتسم بسخريه
...................................
فى شقه امل
الباب يخبط امينه تروح تفتح الباب تلاقى مرام شايله ربع صينيه الكيك على طبق
مرام / انا عملت كيكه قولت اجيب لامل حته
امينه / تسلم ايدك يا مرام بس امل نايمه دلوقت
مرام / خلاص مفيش مشكله اديها دى و انا اجازه بكره لو هى فاضيه فى اى وقت و حبت تنزل تقعد معايا شويه
امينه / هقولها حاضر من عنيا
مرام / شكرا يا طنط
امينه تاخد الطبق و مرام تنزل امينه تقفل الباب امل تطلع من جوه و تبص لمامتها
امينه / دى مرام جيبالك كيكه
امل / ايوه بس حضرتك عارفه انى مش نايمه
امينه / اتكلمنا فى الموضوع ده قبل كدا علاقتنا بيهم لازم تبقى محدوده و بعد اللى حصل من كام يوم ده يخلينا نقطع علاقتنا بيها خالص البنت دى بقت مغناطيس مشاكل و احنا فى الاول و الاخر ولايا ملناش غير بعض
امل / ايوه يا ماما بس مرام هى الوحيده اللى وقفت جنبي فمحنتى يا ماما
امينه / هى يعنى عرفت تعملك حاجه و بعدين مش بعيد تكون عملت كدا اصلا عشان تقرب من مازن ده
امل / يا ماما حرام عليكي
امينه / انا قولتها كلمه ملكيش علاقه بمرام على قد السلام و خلاص احنا ولايا محلتناش الا سمعتنا
امل / و مرام هى اللى هتبوظ سمعتي امال لو مكناش عارفين اخلاقها كويس
امينه / عارفين و الحاره كلها عارفه بس اديكى شايفه اول موقعت محدش سمى عليها و كلو هاص فى الزيطه اسمعى الكلام و حسك عينك تكلميها انتى فاهمه
امل تهز راسها امينه تدخل المطبخ
...............
فى شقه مازن
مازن يدخل المطبخ و يشد كبايه كبايه تانية تقع تتكسر على الرخامه و مازن يفضل واقف يبص عالازاز المكسور و بعدين يمد ايده و ياخد حته كبيره و يقلبها في ايده و يفكر
////////////
صوت مازن / بتفكر فى اي؟؟؟ انت اجبن من انك تعملها... لو كنت تقدر كنت عملتها من زمان ...يمكن كان زمانك مع مامتك و خالك ....بس حتى دى مش هتطولها حتى لما تموت ... لان اللى زيك مستحيل يورد على جنه .. ايه نسيت اللى عملته نسيت القرف اللى كنت بتهببه ... ياريتك عملتها من زمان ساعتها مكنش زمانك جرحت مرام بالشكل ده... دانت حتى صاحبك الوحيد دخلته هو و اهله اللى ملهمش ذنب غير معرفتك السوده فى قرف و مشاكل و عيشتهم فى رعب ... كل ده هينتهى بموتك ...انت اصلا عايش ليه انت عندك كل حاجه الناس بتتمناها ...فلوس ملهاش عدد شكل و جسم و صحه ... فيلل و عربيات و شركات ناقصك ايه ؟؟ اى شاب فسنك يتمني اللى عندك ... اى شاب فسنك بربع اللى عندك عايش سعيد وسط اهله انما انت وحيد ملكش حد محدش طايقك محدش بيحبك دانت ابوك نفسه مبيحبكش...قولى انت عملت بكل نعم ربنا اللى عندك ايه ؟؟؟ لا عارف تحب و لا عارف تعيش و لا تصاحب و لا في حد طايق وجودك في الدنيا ... كل الناس دى هترتاح بموتك مش هتلاقى حتى كلب يمشى فى جنازتك او حتى يترحم عليك عشان انت عيل
صوت مرام / انت عيل
صوت شريف / انت عيل
صوت ابراهيم / انت عيل
صوت مرام / انت عيل
صوت ابراهيم / انت عيل
صوت مرام / انت عيل
صوت مازن / انا مش راجل ... انا عيل
/////////////////////////////
مازن بيعيط و الدموع بتنزل من عنيه
مازن / انا مش راجل ... انا عيل
مازن يلف الازازه فى ايده و يفرد ايده التانيه و يبصلها و ايديه الاتنين بيترعشوا و الدموع بتنزل من عنيه و يبدا يعور نفسه خليفه يدخل المطبخ
خليفه / كويس انى لقيتك صاحى
خليفه يشوف الازاز المكسور و مازن ماسك الازازه فى ايده يبعدها عنه و ايده اللى كان ماسك بيها الازازه متعوره و ايده التانيه متعوره مطرح محاولته لقطع شريانه
خليفه / انت بتعمل ايه يا مازن بيه مش حرام عليك نفسك الحمد لله انى طلعتلك تعرف انا كنت جاى اصحيك تيجى معايا نصلى الفجر سوا فى الجامع زى مكنت بتعمل طول الفتره اللى فاتت دانت كان فى ايام كنت انت اللى بتصحينى و تاخدنى فى ايدك
مازن بيبص لخليفه و مش مركز
خليفه / تعال يابنى تعال
خليفه يشد مازن بعيد عن المطيخ و ياخده الحمام و يفتح الحنفيه و يشد ايدين مازن الاتنين تحت المايه و مازن مبيقاومش و مبيديش اى رد فعل خليفه يجيب الفوطه و ينشف لمازن ايديه الفوطه تتملى دم
خليفه / اضغط عليها شويه الدم هيقف اصلها مش تعويره كبيره يعنى الحمد لله انها جت على قد كدا و لا تحب نروح مستشفى انا شايف انها مش مستهله
مازن باصص لخليفه و مفيش اى رد فعل اذان الفجر ياذن
خليفه / اهو الاذان اذن اهو تعال معايا نصلى جماعه بقى هتغير هدومك و لا هتيجى كدا اقولك انت كدا زى الفل تعال يا راجل تعال
خليفه يشد مازن من ايده و الفوطه فى ايده و ياخده و يطلعوا بره الشقه و خليفه يقفل الباب و بعدين يفتحه تانى و يرمى الفوطه جوه و يقفل الباب تانى
.................................
فى شقه مرام
مرام بتصلى الفجر
مرام / السلام عليكم و رحمه الله السلام عليكم و رحمه الله يارب انا عاوزه اشكرك انك ساعدتنى الفتره اللى فاتت انى اظبط حياتى و خلتنى ادخل الكليه و انا رافعه راسى مش خايفه من حاجه بس انا طماعه يارب انا عوزاك تكفينى الناس حتى لو مش بيبان عليا حتى لو عرفت ادارى بس بيدايقونى الناس مبترحمش يارب و انا معملتش حاجه غلط يارب عشان يبصولى بالطريقه دى يارب وفقنى فى شغلى الجديد و وسع رزقى و ابعد عنى ولاد الحرام يارب ارزقنى بالحلال و اغنينى يارب عن السؤال
مرام تمسك المصحف و تقرا فيه
..................................
فى المسجد
الامام / بسم الله الرحمن الرحيم الذين يوفون بعهد الله ولا ينقضون الميثاق والذين يصلون ما أمر الله به أن يوصل ويخشون ربهم ويخافون سوء الحساب والذين صبروا ابتغاء وجه ربهم وأقاموا الصلاة وأنفقوا مما رزقناهم سرا وعلانية ويدرءون بالحسنة السيِئة أولئك لهم عقبى الدارِ جنات عدن يدخلونها ومن صلح من آبائهم وأزواجهم وذرِياتهم والملائكة يدخلون عليهم مِن كل باب .... الله اكبر
الام يركع و الكل وراه و مازن معاهم
الامام / سمع الله لمن حمده
الكل / ربنا و لك الحمد
الامام / الله اكبر
الكل ينزل يسجد
مازن / سبحان ربى الاعلى سبحان ربى الاعلى سبحان ربى الاعلى سبحان ربى الاعلى سبحان ربى الاعلى سبحان ربى الاعلى سبحان ربى الاعلى سبحان ربى الاعلى
الامام / الله اكبر
الكل يقوم يقعد و مازن يقوم متاخر ثانيتين
الامام / الله اكبر
الكل يسجد تانى
مازن / سبحان ربى الاعلى سبحان ربى الاعلى سبحان ربى الاعلى سبحان ربى الاعلى سبحان ربى الاعلى سبحان ربى الاعلى سبحان ربى الاعلى سبحان ربى الاعلى
الامام / الله اكبر
الكل يقوم يقف و يتساوا الصف و مازن الدموع بتنزل من عينه
الامام / بسم الله الرحمن الرحيم الحمد لله رب العالمين الرحمن الرحيم مالك يوم الدين اياك نعبد و اياك نستعين اهدنا الصراط المستقيم صراط الذين انعمت عليهم غير المغضوب عليهم و لا الضالين امين
الكل / امين
الكل يقرا الفاتحه فى همهمه بسيطه
الامام / بسم الله الرحمن الرحيم سلام عليكم بما صبرتم فنعم عقبى الدارِ والذين ينقضون عهد الله من بعد ميثاقه ويقطعون ما أمر الله به أن يوصل ويفسدون في الأرضِ أولئك لهم اللعنة ولهم سوء الدارِ الله يبسط الرِزق لمن يشاء ويقدر وفرِحوا بالحياة الدنيا وما الحياة الدنيا في الآخرة إِلا متاع ويقول الذين كفروا لولا أنزِل عليه آية من ربه قل إن الله يضل من يشاء ويهدي إليه من أناب الذين آمنوا وتطمئن قلوبهم بذكرِ الله ألا بذكرِ الله تطمئن القلوب.... الله اكبر
الامام يركغ و الكل وراه
.........................
فى شقه مرام
سميحه تطلع من الحمام و هى بتفرد كم العبايه بتاعتها تلاقى مرام قاعده بتقرا قران
سميحه / مش قولتلك واطيه زى امك صليتى و قاعده تقرى قران طب صحى ستك الغلبانه تاخد الثواب
مرام / مانتى بتظبطى المنبه علاطول لو الاذان مصحاكيش المنبه بيصحيكى
سميحه / طب دعيتيلى
مرام / ههههههههههههههه لا
سميحه / مش قولتلك واطيه زى امك
مرام / خليكى اكرم منى و ادعيلى انتى
سميحه / هدعيلك ربنا يريح قلبك و يروق بالك و يسعدك
مرام / الله حلوه اوى يا تيته امين يارب
سميحه / شكلك مبسوطه
مرام / الحمد لله هعوز اكتر من كدا ايه
سميحه / عقبال متدحك عنيكى زى مدحكت شفايفك
سميحه تدخل جوه و عنين مرام تتملى بالدموع و دحكتها تتكسر
مرام / هتدحك
مرام تمسح دموعها و تمسك الكروشيه و تقعد تشتغل
...........................
فى المسجد عند مازن
خليفه و مازن يطلعوا من المسجد خليفه يتنى دراع مازن و يانجه و يتسند عليه و يمشوا سوا و مازن عنيه كلها دموع
خليفه / تعرف والله ما فى حاجه بتخلى الدنيا فيها بركه الا صلاه الفجر انا فاكر زمان لما كنتوا تقعد انت و صحابك تسهروا للصبح و انا اروح الفجر و ارجع الاقيكوا لسه شغالين كنت احزن اوى و ادعيلك ربنا يهديك انا اصلى فى البيت ده من ايام الست اميره الله يرحمها كانت دون عن سكان العماره كلهم وشها سمح و بشوشه كدا لا عمرها استكبرت على حد و لا قللت من حد كانت ست كومل و بتعرف ربنا مع انها كانت اغنى واحده فى السكان بس كانت اكتر واحده متواضعه و لما كنت بتيجى معاها و انت صغير على قد مكنت عيل شقى بس كان دمك خفيف و تتحب كانت اول ما تركن العربيه تفتح الباب و تنزل تجرى عليا و هى تنزل تجرى وراك و لما تشوفنى شايلك تهدى و تمشى عادى لحد ما توصل لعندى و تطلعوا سوا و لما ماتت الخير مات معاها والله الواحد زعل عليها اوى فى الجنه و نعيمها ان شاء الله بس تعرف يا مازن بيه الست مرام دى متتخيرش عنها فى حاجه نفس الادب و الاخلاق و بكره ربنا يصلح الحال و يجمعك بيها دنيا و اخره و بعدين هتهون عليك تموت روحك و تسيبها من غير ما تصالحها دا بدل ما تدعى ربنا يطول فى عمرك لحد ما تراضيها هانت عليك بنت الاصول
مازن يبصله و خليفه يكمل مشى و يشد مازن فى ايده
خليفه / و لا الاستاذ شريف هو يعنى عشان شديتو مع بعض بكلمتين فاكر انه مش هيزعل عليك طب دا مش بعيد يحصلك و هان عليك عمك خليفه عاوز تسبنى لمين طب تصدق و تؤمن بايه قول لا اله الا الله متقول لا اله الا الله
مازن / لا اله الا الله
خليفه / انت لو مش فى البيت ده والله شوف والله كمان مره مقعد فيه ثانيه انا اخد حاجتى و اهلى و ننزل البلد نشتغل اى حاجه الا بقى لو خدتنى اغفر عالبيت اللى انت هتسكن فيه جديد اه رجلى على رجلك تعرف الواحد ياما جت عليه ايام كان و العياذ بالله جاب اخره و فاض بيه و بعدين يقوم يتوضى و يصلى و يشكى همه للى خلق الخلق سبحان الله تفرج اصل ملناش غيره الا بذكر الله تطمئن القلوب
مازن / انا تعبان تعبان اوى
خليفه / باين عليك من يوم مجيت مع شريف بيه يوم ما الست مرام كانت هنا و اتخانقت مع السيد الوالد و انت باين عليك التعب اسمع يابنى انت كل يوم حالتك بتسوء انا بقول تكلم شريف صاحبك و لا تشوف دكتور انا مش هقدر اسيبك لوحدك و برده مش هقدر افضل واقف على راسك طول الوقت لحسن تتهف فى عقلك تانى و اكيد يابنى مش كل مره تسلم الجره الحياه نعمه يابنى متفرطش فيها محدش عارف مستنينا ايه فى الاخره
مازن يهز راسه اه
خليفه / اهو وصلنا الحمد لله تعال بقى اوصلك لفوق و هقفل البوابه بالقفل و الجنزير و اطلع معاك رجلى على رجلك النهرده مش هسيبك
مازن و خليفه يطلعوا لفوق
.................................
فى شقه مرام
تليفون مرام يرن مرام تروح تجيبه تلاقى سليمان
مرام / الو
سليمان / صباح الخير يا مرام اسف استاذه مرام
مرام / مفيش مشكله عادى يعنى ما انا بقولك سليمان عادى
سليمان / اخاف تدايقى
مرام / لا مفيش مشكله عادى خير يا سليمان
سليمان / انا لقيتك منزلتيش من البيت خفت يكون فى حاجه
مرام / لا مفيش عادى يعنى مفيش محاضرات فمروحتش
سليمان / طب الحمد لله طمنتينى كنت بفكر اعدى على المحل اللى اخد الحلويات بتاعتك اشوف يعنى خلص و لا لا و هيحتاج تانى امتى و كدا يعنى افكره بينا لحسن ينسانا و كدا
مرام / مش عاوزه اتعبك يعنى و تروح هناك مخصوص
سليمان / يا ستى انا كل يوم بالتاكس باخد البلد من شرقها لغربها اكيد يعنى فبونديره منهم هكون قريب منه هروحله
مرام / خلاص يبقى كتر خيرك
سليمان / انتى هتروحى الكليه بكره
مرام / مانا قولتلك انى بروح مع محمود
سليمان / اصلى بصراحه كنت عاوز اشوفك
مرام / خير
سليمان / خير ان شاء الله بس اصلى شوفت الكوفيات بتاعتك و بصراحه كنت عاوز واحده كدا كنت شوفت صورتها عالنت و قولت لو تعرفى تعمليلى زيها يبقى كتر خيرك انا عارف انى هعطلك بس اصل دى عجبانى و كدا
مرام / ابعتلى صورتها عالواتس و انا لو هعرف اعملهالك عادى مفيش مشكله
سليمان / بجد
مرام / اه مفيش مشكله عادى
سليمان / تمام هبعتهالك عالواتس حالا اهو
مرام / تمام مع السلامه
سليمان / هو انتى لامؤاخذه بتعملى ايه ؟؟؟
مرام / افندم !!!
...............................
