((((((السكة شمال ٢)))))
#لولو_محمد
الحلقه ١٤٩
لبنى / مازن ما بيسيبش حاجه للظروف ما ينفعش تلعب معاه
زياد / هو بس عشان ابوه سانده غير كدا ما كانش طلع من حوار ماهى
لبنى / و مال مازن و مال ماهى
زياد / ما انتى كنتى سكرانه بقى مش اخو جوزها كان متهمه ان هو اللى ولع فيها و قبضوا عليه و ابوه راح طلعه امال مازن جه تانى يوم ليه
لبنى / مش فاكره انى سمعت حاجه زى دى قبل كدا بس مازن ما كانلوش اى علاقه باللى حصل
زياد / و تفرق فى ايه اهو كان يتبهدله يومين و خلاص
لبنى / و الموضوع خلص على ايه
زياد / و لا اى حاجه حققوا معاه على ما ابوه راح خرجه و الموضوع انتهى على كدا حاجه نكد يعنى بس مش هتمشى معاه طول الوقت يعنى اكيد هيجيله وقت و يقع
لبنى / انساه بقى و شيله من دماغك
زياد / ياريت كنت اقدر بس اعمل ايه
زياد يقوم يفتح الدولاب و يطلع بدله و لبنى بتابعه
...........................
فى المطار بعد كام يوم
فريده و ابراهيم خارجين من المطار سواق يقابلهم يحط الشنط فى العربيه و يركبوا و يمشوا
فريده / انا مش فاهمه يعني انت اديتها الفيلا قولنا ماشي طب ننزل هناك ليه بعد ما كنا بننزل فى بيتنا ننزل ضيوف ما كنا حجزنا فى اى اوتيل او حتى اى فيلا تانيه
ابراهيم / احنا معزومين عندهم
فريده / يا حبيبي ما اعترضتش نروحلهم ان شاء الله حتى نقضي اليوم معاهم لكن فى الاخر نروح بيتنا
ابراهيم / انتى عامله حساسيات ليه يا فريده امال لو ما كناش بنعمل كل ده عشان نحسن العلاقه بينكوا زى زمان
فريده / نحسنها طبعا نحسنها على حسابى عشان خاطر عيون ست الحسن
ابراهيم يبصلها
فريده / سكت
فريده تبص الناحيه التانيه و تنفخ
..............
فى الاستوديو
مازن / حد عاوز حاجه يا شباب انا فى الخلعون انا
شاب يطلع من جوه
الشاب / ايه يا رياسه دا حتى اذا كان رب البيت من الشغل مزوغى
مازن / يا عم لخص عاوز ايه
الشاب / الحوار اللى سالتني عليه
مازن / خلصته
الشاب / عيب عليك
الشاب يدى لمازن ورقه مازن يبص فيها
مازن / ثقه
الشاب / عيب يا رياسه امشي ورايا و انت مغمض
مازن / مشينا قبل كدا و رشقنا فى الحيط
الشاب / لا المرادى امان
مازن / هجرب و اشوف
الشاب / طب ما فيش بونص لحبيبك
مازن / قولت هجرب و اشوف خلصنا سلام
مازن يمشى
الشاب / هتجيلى هههههههههههههههههه
الشاب يدخل جوه تانى
.................
فى فيلا لبني
فريده و زياد يدخلوا يلاقوا ناس كتير بتشتغل فى الفيلا زياد يطلع من جوه يجرى يسلم عليهم
زياد / ازيك يا ماما اهلا بابا وحشتونى اوى
ابراهيم / ايه الشغل الجامد ده هو فى حفله و لا ايه
زياد / لبني صممت انها تعمل حفله على شرف استقبالكوا و عزمت صحابنا كلهم
فريده / امال هى فين
زياد / فى الكوافير شويه و اروح اجيبها
فريده / طبعا طب احنا هنطلع نريح شويه انت عارف اونكل تعبان و الرحله كانت طويله
زياد / طبعا طبعا اتفضلوا و انا هخليهم يطلعولكوا الشنط على اوضتكوا الجديده
فريده / اوضتنا الجديده !!!!
زياد / لبني لما عرفت ان اونكل تعبان اختارتله الاوضه اللى عالبول كبيره و بحرى و الفيو بتاعها حلو جدا عن فيو الجنينه
فريده تبص لابراهيم و تنفخ
زياد / امانى نقلتلكوا حاجتكوا النهرده الصبح فيها و روقتها و على ما تطلعوا هتطلعلكوا الشنط
ابراهيم / تمام يا حبيبي شكرا
ابراهيم و فريده يطلعوا فوق و زياد يمشي
.............
فى شقه مديحه
مديحه / و هو سعد معاه لحاجه زى دى
مروه / ما اعرفش بس اكيد امال بيسال و يدور على اساس ايه و بعدين محمود قالى انه بيقبض كويس فى القاريه دى مش زى محمود طالع عينه في الحكومى بملاليم
مديحه / و انتى ايه رايك البتاع ده بيكسب
مروه / امال دا الحضانه المعفنه اللى فى الشارع اللى ورا بتا عالعيل متين و خمسين و متروسه عيال امال حاجه زى دى هيدفعوا كام بقي و بعدين رؤي دى سوسه اصلا ما تحطش عينها على حاجه الا اذا كانت مضمونه
جرس الباب يضرب مروه تقوم تفتح الباب تلاقي مرام شايله ملك بايد و بالايد التانيه شايله صينيه مليانه قراقيش مروه تشيل مينها و توسعلها تدخل
مروه / انتى ما بتفصليش يا بنتى الانبوبه بتشتكى
مرام / هههههههههههههههههه اعمل ايه في مازن بيقولى عنده ضغط شغل الفتره الجايه و عمال يصور حلقات كتير يشيلها باك اب
مديحه / اعمليلنا كبايتين شاى بقي يا مروه مع القراقيش الحلوه دى اما نساسا
مروه / احلى شاى و عامله كيكه بقي حكايه
مرام / شميت ريحتها هاتى هاتى
مرام تقعد
مديحه / سمعتى عن حوار الحضانه اللى رؤي و سعد هيفتحوه ده
مرام / لا ما حدش قالى حاجه
مديحه / عاوزين يفتحوا حضانه بتاعه ولاد الزواد دول بكميرات مراقبه و تطبيق على الموبايل تشوفى ابنك و هو فى الفصل
مرام / مازن كان حكالى عن حضانات زى دى زمان
مديحه / الله يعني صحيح بقي
مرام / لا هو حكالى ان في حضانات كدا فعلا و كان عاوز يودى ملك الكلام ده زمان لما كنا عايشين في شقته و انا رفضت قولتله دى ايام هيعملولها ايه
مديحه / لا لا لا دى لسه هيفتحوها
مرام / ما اعرفش حاجه يا عمتى والله انتى عرفتى منين
مديحه / سعد قال لمحمود
مروه تدخل شايله صينيه عليها كيكه و شاى و قراقيش
مروه / ما اعملش حاجه لملوكه الميه سخنه
مرام / لا لسه واكله
...................
فى الحفله
اغانى و الكل بيرقص و اوبن بوفيه اكل و مشروبات و فريده و ابراهيم قاعدين ابراهيم مبسوط و فريده مدايقه لبني تروح تقعد على ايد كرسي ابراهيم و تحضنه من رقبته و تبوسه من خده
لبني / ايه يا بابا الاخبار مبسوط
ابراهيم / فى حد يشوف القمر ده و ما ينبسطش برده
لبني / كول ده بقي معمول على شرف حضرتك
فريده / طب على الاقل كنتى عزمتى اصدقاءه بدل ما احنا زى عواجيز الفرح كدا
لبني / عواجيز ايه يا طنط ما تقوليش كدا دا انتى لسه شباب
لبني تعدى ايدها على الكوليه
فريده / جديد ده
لبني / اه زيزو جبهولى هديه
فريده / ربنا يخليهولك
لبني / امين اجبلكوا حاجه تشربوها
ابراهيم / ميرسي يا قلبي مش عاوز اتعبك
لبني / عن اذنكوا البيت بيتكوا
لبني تمشي
فريده / انا مش هتكلم
ابراهيم / ايه تانى يا فريده
فريده / انا هطلع اوضتى صدعت عن اذنك
فريده تقوم و تطلع فوق و لبني متابعاها
...........................
فى شقه صافى
شريف / انا خلصت خلاص
شريف بيغير هدومه و صافى بتروق السرير
صافى / انت بصراحه بتيجي على نفسك اوى مش لازم كل يوم تلف على المحلات و الورشه و تروح لمازن ما ينفعش كلو فى يوم واحد
شريف / طب تصدقي انى ما شوفتش لا المحلات و لا الورشه النهرده
صافى / امال
شريف / ببص على اماكن تنفع حضانات
صافى / انت بتهزر صح لا اقعد اقعد و كلمنى
شريف يدخل معاها تحت الغطا
شريف / رؤي لما عملت السيرش بعتته لسعد و هو ساعدها في حاجات تانيه برده المهم حكى لمحمود و الموضوع كبر فى دماغهم و كدا رؤي لما عرفت قفشت بقي
صافى / الله ليه مش مشروعها
شريف / اديكي قولتيها مشروعها ليه بقي تقول لمحمود و مروه هما يعملوه و انا لا عشان الدراسه و كدا
صافى / اااااه و بعدين
شريف / المهم سعد كلم مازن و قاله الموقف كذا كذا مازن رشق
صافى / هههههههههههههههههه و بعدين و بعدين
شريف / يا ابني انا بقولك عشان نخلع محمود بعيد عن شريف و رؤي و كدا و من غير ما يزعل و مرام ليها دلال عليهم و كدا تقوم ترشق انت كمان قاله انا هدخل شريك و رؤى لما تخلص الكليه تمسكها و ملك كلها كام شهر و تدخل حضانه و اللى يعرفها احسن من اللى ما يعرفهاش
صافى / و مرام رايها ايه
شريف / هيقولها النهرده اصلا كل ده النهرده انا لقيت مازن بيكلمنى يقولى الموضوع كذا كذا و ظبطنى كلمت السمسار و فضلنا طول اليوم من مكان لمكان
صافى / و قولتوا لرؤي
شريف / لسه سعد هيكلمها و يقولها
صافى / طب لقيتوا مكان
شريف / فى تلت اماكن هى تروح بقي و تدى الكلمه الاخيره في الموضوع
صافى / هتفرح اوى بالموضوع ده
شريف / ما يتهياليش انتى عارفه رؤي و مروه ما بيتفقوش و بصراحه رؤي عندها حق
صافى / هههههههههههههههههه بس رؤي بتتفق مع مرام كويس صدقني انا فرحانه باللى حصل جدا هو احنا ظروفنا ايه
شريف / ظروف ايه
صافى / الفلوس يعني
شريف / انتى عاوزه تدخلى معاهم انتى كمان دا اللى ناقص
صافى / لو ظروفنا تسمح يعني ما تسلفها شريف / معرفش ما هى معاها فلوس و دهب يا بنتي
صافى / هو انت مش شوفت الورق لو المشروع كويس جدا ما تقف مع اختك ايه المشكله تزود نصيبها و هى تبقي تشدهم بعدين لما تفرج حتى تقسطهملك او حاجه زى كدا
شريف / احنا داخلين على سيزون جديد و فى مصاريف جامده
صافى / انا ماليش دعوه بالشغل انت اللى متابع كل حاجه و عشان كدا بقولك هو احنا ظروفنا ايه انت شوف لو معانا ساعدها لو ما عناش يبقي يحلها حلال بقي
شريف / طب سبيها لله هشوف
صافى / تمام اطفى النور بقي عشان هموت و انام
شريف / اطفى النور !! هى بقت كدا
صافى / تعبانه خالص والله يا شريف مش قادره
شريف / ماشي امرى لله يلا تصبحى علي خير
شريف يبوس راسها تبتسم و تطفى النور جنبها و تنام شريف يطفى النور من جنبه و ينام
..................
فى اوضه فريده القديمه
فريده تفتح الباب تلاقى الشرير مفروش ورد و الارض فيها شمع مطفى و صوره لبني و زياد متعلقه مكان صورتها تنقخ و تبص وراها تلاقي لبني تدخل
لبنى / انتى هنا يا طنط
لبني تروح تفتح درج و تطلع علبه مجوهرات و تقلع الكوليه و تلبس واحد تانى
لبني / سوزى بتقول مش لايق قولت اطلع اغيره
فريده / دا احلى فعلا
لبني / كنت محتاره بين الاتنين زياد جابهوملى الاتنين
فريده تعمل مبتسمه
لبني / حضرتك كنتى عاوزه حاجه اوضتك من الناحيه التانيه
فريده / مرام لما اتجوزت مازن اشترطت يغير السرير اشترطت ما تنامش على سرير نامت عليه غيرها
لبني / ما انا ما ارضيتش افور فى المصاريف ان شاء الله لما ربنا يكرم زياد هخليه يغير عفش الفيلا كله اصله بقي اوت اوف دايت خالص و لا حضرتك رايك ايه بفكر اشيل الحيطه دى و اعمل دريسينج روم كبيره و ممكن اشيل الحيطه دى كمان و اوسع الاوضه ايه رايك
فريده / انا بقول توفرى المصاريف اصل لو دامت لغيرك ما كانتش جاتلك
لبني / ليه و هو حضرتك هتسمحى ان الفلوس دى كلها ترجع لمازن و لا ايه
فريده / افندم !!
لبني / الفلوس دى كلها هتروح لزياد و زياد هيديهانى حضرتك مش عوزاها توصلنى يبقي ترجعيها لمازن و لا حضرتك لسه ما اتاكدتيش ان زياد عمره ما هيقدر يسيبنى
فريده / لما يعرف حقيقتك هيدوس عليكي بجزمته
لبني / هههههههههههههههههه ماشي
فريده / بكره نشوف يا لبني و بكره يا حبيبتي مش بعيد
لبني / ما تعشميش نفسك بحاجه مش هتعيشي و تشوفيها و على العموم الايام بينا و لو سمحتى استاذنك هقفل الاوضه بالمفتاح الفيلا مليانه ناس و ما حدش يضمن حد كدا و لا كدا يدخل الاوضه ياخد حاجه يرمى حاجه ما عدش فى امان خالص
فريده / والله لاندمك
لبني تبتسم و تروح تقف عند باب الاوضه و تمسكه فريدن تطلع بره لبني تقفل الباب بالمفتاح و تشاور لفريده و تمشي
فريده / يا انا يا انتى يا بنت الكلب يا انا يا انتى
.........................
فى شقه مازن تانى يوم
مازن بيكلم مونى فيديو كول
مونى / والله زى ما بقولك كدا
مازن / و انتى بتقوليلى الكلام ده ليه
مونى / عادى يعني بقولك الاخبار كلها طب والله ماما عيطت و هى بتحكيلى
مازن / شوفتى اخر فيديوهات ملوكه
مونى / طبعا و حتى الصور اللى صافي شيرتها على صفحتها انا عامله هارد مخصوص بحط عليه كل صور و فيديوهات ملوكه يعني ما تقلقش عمتها عملالها باك اب هايل
مازن / ربنا يخليلها عمتها و ابن عمتها حبيبى عامل ايه
مونى / طالع لخاله بالحته اما شقى شقاوه يا مازن
مازن / هههههههههههههههههه صوريهولى واحشني جدا
مونى/ استنى
مونى تروح ناحيه سرير بيبي و مازن الصغير نايم
مونى / هذا الملاك البريئ بيتحول لوحش كاسر لما بيصحى بيكسر اى حاجه ايده تطولها
مازن / ربنا يحميه شبهك على فكره
مونى / انا حلوه كدا
مازن / احلى دا انتى ما فيش فى جمالك يا بنتي
مونى / و لا حتى مرام
مونى تغمزله
مازن / هههههههههههههههههه انتى مشكله
مونى / تلميذتك شكله بيصحى اهو
مونى تجيب الكاميره على مازن الصغير بيصحى
مونى / هروحله بقي هتعوز حاجه
مازن / سلامتك يا قلبي
مونى تحدفله بوسه و تقفل مازن يحط الموبايل و يقوم يدخل المطبخ يلاقي مرام بتغسل المواعين
مازن / قمتى ليه
مرام / ماليش مزاج اسمع مشاكل فريده هانم مع لبني مع انة مش هقدر اخبى شمتانه اوى ربنا يسامحنى بقي
مازن / هههههههههههههههههه و انا كمان يلا اياكش يولعوا في بعض و ياخدوا زياد معاهم
مرام / الواحد ما كانش كدا زمان كنت بزعل على الناس و اسامح اللى ياذيني كان قلبي ابيض انما اللى شوفته قسانى
مازن / عليهم بس على الطيبين زى الفل
مرام / صحيح كنت هنسي ايه حكايه الحضانه دى
مازن / هههههههههههههههههه ما انا جيت لقيتك نايمه ما لحقتش اقولك حاجه مروه اللى قالتلك صح اصل رؤي لسه ما تعرفش
مرام / تعرف ايه انا مش فاهمه حاجه
مازن / رؤي عاوزه تفتح حضانه و احنا هندخل معاها شركا
مرام / ازاى و انت بتقوب انها ما تعرفش
مازن / يا بنتي ايد لوحدها ما تسقفش و كمان رؤي عاوزه تعمل حاجه كبيره اوى
مرام / سمعت بس برده لازم نستاذنها دى فكرتها و على ما سمعت انها تعبت اوى فيها
مازن / و احنا كان ممكن نطنش و نخليها مجرد فكره على ورق انما احنا هنساعدها تحققها ما تنسيش كمان انها بتدرس
مرام / برده ما يمكن هى عاوزاها تفضل فكره على ورق لحد ما تبقي جاهزه الله اعلم
مازن / معاكى حق برده خلاص اخلى شريف يكلمها النهرده قبل اى حاجه شوفتى بقي الواحد بازم يستشير مراته بيبقى ليكوا نظره في الحاجه
مرام / هههههههههههههههههه كل بعقلى حلاوه كل
مازن / لا انا دايت
مرام تبصله بطرف عينها
مازن/ بايخه عارف مش لازم تحرجيني يعني ايه الستات دى يعني شجعى الشباب
مازن يسيب المطبخ و مرام واقفه تدحك
.........................
فى شقه فاطمه
رؤى / و انا المفروض اقول ايه يا ابيه
شريف / قولى كل اللى يعجبك دى فكرتك و مشروعك و مرام و صافى اخواتك
رؤى / و مروه كمان اختى
شريف / بس محمود اخو مرام
رؤى / يا ابيه محمود كويس و صاحب سعد و روحهم فى بعض بس مروه صعبه جدا ما تطاقش والله
شريف / يعنى انتى عاوزه ايه
رؤى / اللى تشوفوه
شريف / يعنى نعتزر لمحمود و نقوله لا
رؤى / و تبقى رؤى الوحشه صح
شريف / لا طبعا دا بيزنيس و دا مشروعك تشاركى اللى تتعاملى معاه و على فكره فى مبدا اسمه صاحبك لا تشاركه و لا تناسبه يعنى ممكن نعتزرله بمنتهى البساطه
رؤى / و ابيه مازن ما بينطبقش عليه المثل ده ليه بقى
شريف / عشان ابيه مازن مش بيشارك مازن بيرمى الفلوس جابت جابت ما جابتش ما بيسالش عنها فمش بيعمل اى مشاكل و لو انتى مش عاوزه مرام كمان عادى على راى صافى انا اسلفك الفلوس و انتى ابدئى مشروعك لوحدك
رؤى / انتوا بتضغطوا عليا على فكره
شريف / لا اله الا الله ليه بس مش دا مشروعك اللى تعبتى عشان تجمعى الداته بتاعته
رؤى / ايوه بس انا لسه فى الكليه و قدامى جهاز و جواز و سعد مسافر بتعجزونى
شريف / انتى عاوزه ايه يا رؤى
رؤى / مش عارفه محتاجه وقت افكر
شريف / تمام خدى وقتك على العموم دى ورقه فيها تلت اماكن حلوه جدا للحضانه
رؤى تبصله
شريف / لو تحبى تروحى تتفرجى مع سعد لما ينزل براحتك لو تحبى اجى انا معاكى تمام تحبى تروحى لوحدك قشطه برده تحبى ما تروحيش خالص زى ما انتى عاوزه
رؤى / طب لحد ما اخلص التراخيص هتبقى باسم مين
شريف / باسمى
رؤى / طب انا هصلى استخاره و ارد عليك تمام
شريف / تمام هتعوزى منى اى حاجه بقى و لا ممكن اخلع انا
رؤى تبتسم شريف يبتسم و يقوم يمشى
.............................
فى الاستوديو
مازن شغال على اللاب و بيدعك فى عينه فى اوضه يتمطع و يقوم يطلع بره يدخل المطبخ و يشغل الكاتل بنت تدخل
البنت / ايه الاخبار
مازن / بفنش اهو
البنت / قولتلك اساعدك و مش هقولها و لعلمك بقى انا كنت هطلعه احلى دا تخصصى اصلا
مازن / انا عاوز اتعب فيه
البنت / ماشى يا مستر براحتك بالتوفيق
البنت تطلع ازازه ميه ساقعه و تمشى و مازن يجيب كيس نسكافيه و يفضيه فى المج و يصب عليه الميه السخنه و يقلب و يطلع بره
............................
فى شقه مديحه بعد كام يوم
مروه / عشان لما اقولك تصدقنى انا بنت البطه السوده
محمود / يا ستى انتى مزعله نفسك ليه هو انتى يعنى كنتى هتروحى لحد هناك كل يوم عشان تشتغلى ما كدا اريح يا مروه كبرى دماغك
مروه / هى بس مساله مبدا و بعدين مرام اللى ما كانتش تعرف حاجه عن الموضوع فجاه كدا هتبقى شريكه يعنى هى كمان
محمود / مهى مرام اكتر واحده فينا معاها فلوس و مازن اللى داخل مش هى هى بره الليله خالص انتى اللى مصممه تمسكى فى الاداره
مروه / الله مش فلوسى و تبقى تحت عينى و اشوف اللى داخل و اللى خارج و ان كنت انا بدرس ما رؤى كمان بتدرس
محمود / يعنى اعتزر للناس و لا اقولهم ايه
مروه / لا انا بس بوريك هات يا محمود فلوسك اشغلهالك خد يا شريف اركن انت و مراتك بقى على جنب
محمود / ما حدش قالى حاجه و ما حدش طلب منى جنيه انا اللى قولت عاوز ادخل معاكوا فى المشروع الاكل البيتى مش جايب همه يا بنتى دا غير ان ما حدش بيتابع زى زمان الموضوع بقى عادى
مروه / طبعا مهى ست مرام بتعمل اللى ما حدش بيعرف يعمله
محمود / بصراحه اه مرام لما بتحط حاجه فى دماغها بتحط فيها كل طاقتها مش بتطلع كل ساعتين تلاته تتمريس على الناس
مروه / دى انا يعنى
محمود / انتى مش ليكى محل البلاستيكات بتاعكوا بتقفى فيه يا مروه
مروه / و اقف امتى و طلبات مامتك اللى ما بتخلصش يا محمود
محمود / يعنى انتى عاوزه ايه دلوقت
مروه / عاوزه اشتغل فيها انا كمان هدخل شريك يبقى امسك فى الاداره
محمود / هتمسكى امتى يا بنتى بس
مروه / زى رؤى بالظبط هى يعنى رؤى خلقه عنى ما زى ما قولت ان كنت انا بدرس فهى بتدرس برده
محمود / هقولهم يا مروه عارفه ليه عشان اريحك و بكره انتى اللى تقوليلى مش رايحه تانى
مروه / الحق عليا انى عاوزه احافظلك على فلوسك
محمود / كتر خيرك يا ستى تشكرى عن اذنك بقى عشان انا نازل
مروه / رايح فين
محمود / نازل اقعد على القهوه شويه
مروه / مع مازن و شريف و عمر
محمود / لا مع عمر بس مازن عنده فرح و شريف ما عدش بيخرج بيقعد جنب صافى
مروه / انا مش فاهمه والله صافى حامل الدنيا تتقلب ما كل الستات بتحمل و تولد عادى يعنى
محمود / عقبالك يا ستى اعمليها انتى بس و هتشوفى انا هعمل عشانك ايه
مروه تبصله بطرف عينها و تبص الناحيه التانيه
محمود / انا نازل عن اذنك
محمود يقوم و يمشى و مروه بتنفخ تقوم تدخل لمديحه الاوضه تلاقيها بتطبق الغسيل تقعد تطبق معاها
مروه / عاجبك كدا
مديحه / انا بقول و لا تشاركيهم و لا نيله انتى لو الموضوع ده فى دماغك اوى اعمليه هنا فى المنطقه
مروه / هنا فين دى حاره معفنه و المناطق اللى حواليها اعفن و هى ست مرام هتسيب بتاعه حبيبتها رؤى و تجيب بنتها عندى
مديحه / بصى لو عاوزه رايي الواد شريف ناصح و بيعرف يجيب القرش من بق السبع عشان كدا انا مصممه محمود يشاركه خليهم هما فى الاداره و خلينا احنا نعد الكاشات اهو لو لا قدر الله حصلت مشكله هما اللى يبقوا فى الوش يتصرفوا احنا مش وش بهدله
مروه تبصلها و تفكر و تكمل تطبيق
.........................
بعد فتره فى شقه مازن
مرام فى المطبخ و ملك بتلعب فى المواعين تحت رجليها الباب يخبط طبله
مرام / شكل ابوكى جيه يا ملوكه
ملك تقوم تجرى ناحيه الباب مرام تروح وراها على ما تطلع بره تلاقى الباب اتفتح و مازن يدخل شايل بوكس هدايه مستطيل
مازن / هو ما حدش عاوزنى فى البيت دا و لا ايه
مرام / كنت فى المطبخ حمد الله على السلامه
مازن يشيل ملك و يدى لمرام البوكس
مازن / كل سنه و انتى طيبه يا احلى مرام فى تاريخ البشريه
مرام تاخد البوكس و هى مبسوطه و متفاجئه
مرام / ايه ده و انت طيب
مازن / ها عملتيلنا تورتايه بقى بمناسبه عيد ميلاد احلى مرام و لا هنبعت نجيب جاهز
مرام / مش النهرده اصلا دا لسه بكره
مازن / عارف بس بصراحه اول ما استلمت الهديه ما قدرتش استنى لبكره افتحيها يلا
مرام تقعد و تفتح البوكس تلاقى جواه كتاب فخم مكتوب عليه وصفات الشيف الصغنن و صوره حمامه على محشى مرام تبص لمازن و تبتسم اوى و هى مش مصدقه
مازن / الكتاب من بكره هيملا كل رفوف المكتبات فى مصر و هعملك اكبر حفل توقيع فى تاريخ حفلات التوقيع كلها
مرام تقلب فى الكتاب الوصفات بتاعتها بالصور
مرام / انت اللى عملت كل ده
مازن / جمعت كل البوستات بتاعتك و الفيديوهات و رتبتها و ظبطتها بصراحه اه انا اخد منى شغل جامد اوى كل سنه و انتى طيبه
مرام مش مصدقه و بتقلب فيه
مرام / انا مش عارفه اقول ايه انا حتى مش عارفه اقوم ابوسك حاسه انى مصدومه
مازن يقوم يبوسها و هى بصاله و مبتسمه جدا
مازن / كل سنه و انتى طيبه يا احلى مرام فى الدنيا
..........................
