((((((السكة شمال ٢)))))))
#لولو_محمد
الحلقه ٤١
ظابط و اتنين عساكر يدخلوا مرام تتخض و تبص لمازن عينه عليها يبتسم تبص للظابط تانى راح يتكلم مع الدكتور و المدرج كلو ودودوه
الدكتور / اريج عادل علام
اريج تقوم تقف و الظابط يلبسها الكلابش
الظابط / اتفضلى معانا
اريج / انا معملتش حاجه انا معملتش حاجه والله ما عملت حاجه
العسكرى/ يلا انجرى قدامى
اريج / انا معملتش حاجه معملتش حاجه والله
العسكرى يشد اريج بره المدرج و مرام عينها عليها و بعدين تبص لمازن و تبص لمحمود بيبصولها
الدكتور / نكمل يا جماعه لو سمحتوا كلوا يركز معايا
المدرج يسكت و مرام تقعد منكمشه فى مكانها و مرتبكه و مش مركزه
................................
فى الصيدليه
شيماء تدخل عمر يطلع من ورا المكتب شيماء تعدى الكونتر و تدخل
شيماء/صباح الخير
عمر / صباح النور عاش من شافك
شيماء تبتسم و تبص في الارض بحزن
عمر / ظبطتى مواعيد الكليه
شيماء تهز راسها
عمر / انا معلق على ميه في الكاتل جوه تشربي حاجه
شيماء / لا شكرا
شيماء تروح تحط حاجتها تحت المكتب و تقعد
عمر / عامله ايه احسن
شيماء/ كويسه الحمد لله
عمر / على فكره خسيتى ... انا مش قصدى و الله حاجه بس
شيماء / عارفه ماما برضه مدايقه من الموضوع ده
عمر / موضوع ايه انتى صدقتى انا كنت بقول كدا مجامله يعنى عشان حاسك زعلانه و انا عارف ان الجمله دى بتفرح البنات و كدا
شيماء تبتسم و تبصله يبتسم
عمر / ايه يا بنتي جو الكأبه ده مش واخد عليكي كدا امال فين شيمو اللى بتدحك و تهزر طول الوقت ... احم سوري يعني فين الدكتوره شيماء اللى بتدحك و تهزر طول الوقت
شيماء / تعرف امبارح لما روحت من الكليه ببص في دفتر المحاضرات لقيتني مكتبتش حاجه خليت صاحبتي تصورلى المحاضره و تبعتها واتس حتى لما حاولت اقراها كانى محضرتش اصلا مش فاهمه اى حاجه
عمر / طب انا ممكن اساعدك لو تحبي
شيماء / مش دى المشكله انا بصيت على باقي المحاضرات و السكاشن من اول الترم انا محضرتش خالص مش فاهمه اى حاجه النهرده حاولت اركز انا ليه كدا اكتشفت انى طول المحاضره عينى على باب المدرج حتى لما المحاضره خلصت البنات قالوا نفطر فى الكافتريا لحد معاد السيكشن خفت اروح معاهم و برده خفت اقعد لوحدى حتى و انا مروحه راكبه التاكس مرعوبه و قاعده متنشنه و ماسكه اكره الباب بايدى ماشيه وسط الناس و انا عماله ابصلهم كان فجاه فى اى لحظه حد هيهجم عليا حتى بالليل مش عارفه انام اقرا قران اروح في حضن ماما جرس الباب لما بيضرب بتنفض تليفونى لما بيرن حتى لو ماسج او نوتيفيكاشن حتى لو مش موبايلى طب انا هخاف من الموت ليه مدام كدا كدا مش عايشه
شيماء تبص قى الارض بحزن عمر يفتح الدرج و يطلع شيكولاتايه و يعزم على شيماء تبصله
عمر / انا عاينهالك هنا من اخر مره كنتى فيها فى الصيدليه
شيماء تاخدها و تبتسم
عمر / اديني حته بقي عشان انا عيني فيها و كل يوم اقرر اكلها و بعدين اقول استني يمكن تنزل
شيماء ترجعهاله تانى يدحك
عمر / بهزر معاكي هصب شاى اصبلك
شيماء تهز راسها لا يقوم يدخل جوه و شيماء تبص على الباب
...............
فى الكليه
مازن خارج من المدرج و مرام لسه جوه و في زحمه
مرام / مازن
مازن يقف في جنب و يستناها تطلع و تروحله
مرام / انت اللى عملت كدا
مازن / عملت ايه
مرام / متصعش
مازن / تستاهل اكتر بس للاسف اخلاقي متسمحش
مرام / يعني لو كلب عضنى اعضه مش كدا
مازن / لا هقرصه من ودنه بس متصعبش عليكي اوى كدا ساعتين تلاته كمان و هطلعها و بعدين انتى غريبه اوى صعبانه عليكي دى سلمتك لانس تسليم اهالى ... اه نسيت انتى مقتنعه ان محمود اللى بعتها و ان دى كلها تمثيليه من تاليفى و اخراجى
مازن يبص الناحيه التانيه
مرام / هيضربوها ؟؟
مازن يبصلها
مازن / لا هتتحجز كام ساعه بس و هتطلع ماجرتلهاش بلطجيه مع انها تستاهل والله ... هتروحى الجمعيه بعد الكليه
مرام / و انت مالك
مازن يبتسم
مازن / عشان انا رايح قولت اخدك في طريقي
مرام / متشوفلك لعبه تانيه غير دى
مازن / ليه
مرام / مش لايقه عليك
مازن / مدايقه من وجودى ليه بتعملي حاجه غلط
مرام / و انا لو بعمل حاجه غلط هخاف منك يعني
مازن / مانا قولت برده مستحيل يعني تكونى لسه بتحبينى اوى للدرجادى و مش قادره نكون سوا فى مكان واحد و انتى بعيده
مرام / ربنا يشفيك
مرام تسيبه و تمشي و هو واقف مبسوط اوى
....................
فى شقه والده اميره
شريف / هاخدلك شقه في الصعيد و ننقل الولاد مدارس هناك قولتى ايه
الست / مفيش ابعد من كدا
شريف / ابعد من الصعيد يبقي بره مصر بقي و على العموم كدا كدا هيبقي في حراسه اربعه و عشرين ساعه ليكي و للاولاد و عربيه توديهم المدرسه و تجبهم وفى مبلغ هيوصلك كل اول شهر قولتى ايه العيال لازم تكمل تعليمها مش هنخبيهم العمر كله
الست / والله يابني انا لو عليا اخدهم امبارح انت متعرفش العيال قاطعين بيا قد ايه بس خايفه من تيفا ابن الحرام
شريف / يا حجه لو عاوزه تفضلي هنا فى بيتك مع العيال و نحميكى من توفيق و اللى اتخن منه قولى
الست / لا اسافر بيهم الصعيد
شريف / خلاص على بركه الله جهزى حاجتك و بكره و لا بعده هبعتلك عربيه تاخدك محطه القطر و هناك هتقابلي العيال
الست / ربنا يباركلك يابني ربنا يكرمك
شريف يبتسم
شريف / هستاذن انا يا حجه
الست / لا مؤاخذه يابني طب و باقي عيالي
شريف / مالهم يا حجه
الست / مش هشوفهم تاني خالص
شريف / اؤمريني يا حجه
الست / لو ادتني فرصه كام يوم اتكلم معاهم يمكن يرضوا يجوا معايا
شريف يطلع كارت و يديهولها
شريف / بصى يا حجه ده الكارت بتاعى فكرى براحتك و شوفي ايه اللى يريحك و انا هعملهولك تمام
الست / تسلم و تعيش يابني
شريف يبتسم و يمشي
...................
فى القسم
مازن قاعد قدام الظابط عسكري يجيب اريج من الحجز و هى مفلوقه عياط
العسكرى / المتهمه اريج يا باشا
الظابط يشاورله يمشي
اريج / انا مسرقتش حاجه يا مازن و الله ما سرقت
مازن / ما انا عارف
مازن يبص للظابط الظابط يطلع بره مازن يبص لاريج و يبتسم و يشاورلها تقعد
اريج / ساعدنى اخرج من هنا يا مازن انا مش عارفه اعمل ايه
مازن / كان المفروض تفكري في الموضوع ده قبل متتفقى مع انس
اريج عنيها توسع
مازن / انتى عارفه ان انس قابض عشره مليون جنيه في العمله دى يا ترى اداكى منهم كام
اريج / اقسم بالله ما اخدت جنيه والله العظيم ما اخدت حاجه
مازن / للدرجادى بتكرهيها لدرجه انك تاذيها بالشكل ده و منغير مقابل كمان
اريج / ياذيها ايه بس انا كل اللى اعرفه انهم هيحفلوا عليها شويه لما يشوفوها خارجه من خن الحبيبه
مازن / كنتى عاوزه تبوظى سمعتها عاوزه الناس تتكلم عليها طب ليه دى كانت صاحبتك بتزاكرلك و تروح و تيجي معاكي و تديكي ملخصاتها و تعبها ايه قله الاصل دى على العموم انتى اهو قدام الدفعه كلها حرميه و البوليس قبض عليكي و ابوكى و امك بيعيطوا بره مش عشان اكتشفوا ان بنتهم حراميه لا عشان معهمش الميه الف جنيه اللى سرقتيهم منى
اريج / انا مسرقتش منك حاجه
مازن / عارف و لا مرام كمان بنت مش كويسه
اريج تعيط
مازن / ما تجربي كدا تكلمي انس اللى قبض عشره مليون جنيه فى الحركه دى شوفي كدا مستعد يديكى منهم جنيه
اريج تبص لمازن يقوم يمشي يروح لحد الباب تقوم تجري وراه و تمسك فيه
اريج / انت رايح فين
مازن / هروح هقعد اعمل ايه
مازن يفتح الباب الظابط يدخل
الظابط / خد المتهمه رجعها الحبس
اريج / حرام عليك يا مازن انا مسرقتش حاجه ارجوك يا مازن والله ما هعمل كدا تاني
العسكرى يشد اريج على الحجز و هى بتعيط
مازن / ابقي اسمحولها تتكلم في التليفون يمكن تعرف تخرج من اللى هى فيه
الظابط يبتسم و يسلم على مازن مازن يمشي
..................
فى المخزن
مرام تدخل تلاقي سحر و البنات شغالين كوى و تطبيق و الشباب و منهم مصطفي شغالين فرش
مرام / السلام عليكم
الكل / و عليكم السلام
مرام تروح ناحيه سحر و مصطفي عينه على الباب مرام تدى الكيسه لسحر
مرام / تراااااااا
سحر / لا خلصتيه مستحيل
مرام / روحت امبارح لقيت تيته مخلصاه و انا فنشته بالليل
بنت ٢ / الله دا حلو اوى بكام ده
سحر / ٣٥٠
مرام تبص لسحر باستغراب
بنت ١/ حلو اوى خد منك وقت قد ايه
مرام / يعني مش شرط على حسب بس اسبوع غالبا
بنت ١/ اعمليلى واحد انا كمان اديه لماما
مرام / حاضر من عنيا
بنت ١ تقوم و مرام تطبق جنب سحر بتكوى
مرام / انتى ليه قولتيلها السعر غالى اوى كدا
سحر / ههههههههههه بصي مها عندها عقده كدا اللى هو الغالي تمنه فيه لو قولتلها ده بميه و خمسين هتسترخصها ايه ده انا اشترى هديه ب ١٥٠ لا مش مقامى
مرام / هههههههههههههههههه
سحر / والله زى مبقولك مره كانت عجباها بلوزه من محل بربعميه جنيه قولتلها تعالى هجبلك اختها بميه جنيه بس و جت معايا فعلا و مكنتش مصدقه تخيلى راحت اشترتها من ام ربعمين و تخيلى جت تاني يوم لبساها و جايبه حاجات في كيس المحل
مرام / هههههههههههههههههه
مها / ايوه صوت الدحك ده يبقي اكيد بتدحكوا عليا صح
مرام / صح على فكره هو ب ١٥٠ بس
مها / بتهزرى يبقي اكيد الخيط مصري
مرام / اه مصري بس حلو والله و قدامك اهو
ماجد / متحاوليش يا مرام دى عقده الخواجه اكلت على قفاها لما شبعت
مها / براحتى
مصطفي / يعني رجعتى فى البيعه و لا ايه وضعك البنت متتعبش على الفاضى
مها / و من امتى رجعت في كلامى يا مستر يعني
مرام / خلاص هعملهولك الاسبوع الجاى
مصطفي / و انا كمان اعمليلى واحد قصدى لماما يعني
شاب / و انا واحد بس اعمليه كحلى لو ينفع ماما بتكره اللون الاسود
مرام / حاضر
الشاب / هو مازن مش جاى
الكل يبص للشاب يرتبك
ماجد / ايه ده الشاى مين قال هيلقم
الشاب / انا هصبه حالا اهو
الشاب يجرى ناحيه الكاتل سحر تطلع الفلوس و تديها لمرام
سحر / تسلم ايدك يا قمر
مرام / خلى و مش عزومه مركبيه
سحر / لا خديهم عشان عجبتني كوفيه ديجراديه كدا تحفه عوزاكى تعمليلى زيها لو تعرفي
مرام / اعرف
مصطفي/ بقولك يا مرام
مصطفي يروح يقف قدام مرام و يطبق معاها
مصطفي / انا جتلى فكره حلوه اوى هديكي مبلغ تجيبى خيوط و كدا و اعملى كوفيات و شيلان على قد ما تقدرى ناخدها معانا القافله الجايه
سحر / الشتا خلص يا مستر
مصطفي / بس عيد الام مخلصش و للاسف عيد الام مهم حتى فى الفلاحين عشان الحموات
ماجد / دى حقيقه و ام الزوج بس ام الزوجه لا متفهمش بس اهو ناس عقولها مريحاها على كدا ربنا يهدى
سحر / اصلا مستحيل تلحق تعمل حاجه متنسوش الحاجات اللى انتوا طالبينها
مرام / تعرفوا انا عندى فكره احلى بس سبونى اظبطها في دماغى و نشوف
ماجد/ صحيح يا مرام انتى هتيجي الخميس
مرام / اشمعن
مصطفي / افطار كلنا هنصوم و كل واحد هيجيب من بيته حاجه و نفطر كلنا
مها / بيبقي يوم لذيذ اوى هتنبسطى اوى بنقعد نشتغل و احنا بنقرا قران و نصلي و نسبح لحد الاذان و بعدين نفطر سوا
سحر / حاولى تيجي بجد هتنبسطي اوى
مرام تبصلهم و تبتسم
................
فى الجمعيه
تهانى / انا هشوف هقدر اعمل ايه و ابقي اكلمك
مازن / تمام
تهانى / استاذ مازن
مازن يبصلها
تهانى / انت بتعمل ايه هنا بالظبط
مازن / هنا فى المكتب مع حضرتك و لا في الجمعيه بشكل عام
تهانى / فى الجمعيه اصل متاخذنيش انا دخلت صفحتك و سالت عنك الجو ده مش جوك خالص
مازن / فعلا مش هنكر انا متعودتش على النوعيه دى من التبرعات يعني انا عاده كنت بتبرع بفلوس بس لكن لما لقيت فرصه انى اتبرع بوقتى ومجهودى و كمان اكون جنب مراتي
تهانى تبتسم
مازن / ليه لا
تهانى / يعني بتعترف انك هنا عشان مرام
مازن / لا عيب و لا حرام عشان انكسف و اخبي مرام لسه في عدتى يعني مراتي لو انا مت تورثني و انا مطلقها غصب عنى عشان متبهدلش نفسها في المحاكم و اللى حصل بنا انا مليش اى ذنب فيه
تهانى / بس البنت مش عيزاك
مازن / دخلتى في قلبها عرفتي فيه ايه انا و مرام عمرنا ما هنكون غير لبعض مرام بتحبني و ان ما كنتيش مصدقانى روحى دلوقت و قوليلها مازن اتعور في صباع رجله الصغير و شوفي هتيجي جرى ازاى تطمن عليا
تهانى / دا ايه الغرور ده
مازن / انا عارف مراتى كويس و عارف انا بالنسبالها ايه و بكره الايام تثبتلك على كل انا هريح حضرتك خالص حضرتك اعتبريني جاى متطوع و متبرع و باى صفه حضرتك عوزاها و نيتي بقي و ثوابي عند ربنا ايه رايك
تهانى تهز راسها
مازن / على فكره حضرتك متعرفيش عني حاجه تقدرى تسالي مرام عنى هتديكي فكره احسن بكتير من صفحه الفايس هستاذنك عشان اروح المخزن ياريت حضرتك متتاخريش عليا في حوار العيال دول
تهانى / باذن الله
مازن يبتسم و يقوم
...................
فى القسم
العسكرى بيودى اريج مكتب الظابط و هى خلاص جابت اخرها من العياط تدخل تلاقي شريف جوه تتصدم
الظابط / احمدى ربنا الاستاذ شريف اقنع مازن بيه يتنازل و الا كان زمانك مشرفه معانا
اريج تمسح دموعها و تبص في الارض
شريف / انا هستاذن انا بقي يا حسام باشا
حسام / اتفضل يا شريف بيه
شريف يقوم يقف جنب اريج
شريف / على فكره انتى خرجتى عشان مرام ادايقت لما عرفت انك اتقبض عليكي
اريج تبصله شريف يسيبها و يمشي اريج تبص لحسام
حسام / تعالى امضيلي هنا
اريج / هروح
حسام / هتروحى الا بقي لو كنتى مطلوبه على زمه اواضي تانيه
اريج / لا مش مطلوبه
حسام / هنشوف
.................
فى المخزن
سحر / ههههههههههههههه دانتى مشكله لازم تفضحينا يعني قدام البت
مها / مش احسن ما اسيبها تتصدم ادينى باهلها نفسيا للفضايح اللى هتشوفها يوم الخميس
ماجد / بس احنا هنطلع اجدع منك و مش هنقولها انتى بتعملى ايه يوميها
مرام / هههههههههههه والله قعدتكوا ما يتشبع منها بس انا اتاخرت و لازم امشي
سحر / خليكي شويه يا بنتي و هبقي اخلى بابا يوصلك
مرام / دا عرض مغري جدا بس انا هضطر ارفضه عشان فعلا حقيقى اتاخرت
بنت / طب هتيجي بكره
مرام / هشوف و احاول يلا سلام
مرام تسلم علي البنات و تشاور للشباب و تروح ناحيه الباب و لسه هتطلع مازن يدخل ترجع خطوه لورا
الشاب / ميزووووو
مازن يشاورله و يبص في الساعه و يبص لمرام
مازن / اوصلك ؟؟
مرام تبتسم بسخافه و تسيبه و تمشي يمشي وراها تقف و تبصله فجاه
مرام / انت ماشي ورايا ليه
مازن / اللى يسمع يفتكر بعاكسك
مرام / انت جاى الجمعيه تشتغل صح
مازن / هوصلك و ارجعلهم
مرام / انا كبيره كفايه و اعرف اروح لوحدى شكرا
مازن / طيب تمام هقف لحد ما تركبي
مرام تبصله بغضب يروح يقف بعيد شويه و هو مبتسم مرام تبص قدامها و تستني تاكس و تنفخ و تبص على باب المخزن تلاقي مصطفي واقف و بيبص عليهم تاكس يعدى تشاورله و تركب و التاكس يمشي مازن يرجع الجمعيه تانى و يعدى من جنب مصطفى بكل برود
مازن / مساء الخير يا شباب الله ينور
ماجد / ناولنى شيكاره من هناك بقي و انت واقف
مازن يقلع الجاكت و يحطه على كرسي و يروح يجيب الشيكاره و يفضيها و يروح يجيب واحده تانيه مصطفي يعدى يزق الجاكت يوقعه على الارض و يروح يكمل كوى و ماجد شايفه يبتسم مازن يجيب الشكاره و يفضيها
ماجد / كفايا شكرا
مازن يقف يفرز
الشاب / اتاخرت ليه يا عم النهرده
مصطفي / سيبه براحته يمكن تعب امبارح
مازن / انا كنت فى الجمعيه بتكلم مع الاستاذه تهانى
ماجد / صحيح يا مازن انت بتشتغل ايه
مصطفي / طالب
مازن / فوتوجرافر
سحر تبصله و ترجع تكمل شغل
مصطفي / اليومين دول اى واحده تشترى علبه مكياج تسمى نفسها مايك اب ارتيست اى واحد يشترى كاميره يسمى نفسه فوتوجرافر
مازن / هههههههههههههه ماشي
الشاب / متورينا حاجه من شغلك طيب
مازن يدور في جيوبه على الموبايل مش موجود يبص على الجاكت يلاقيه فى الارض يروح يجيبه و ينفضه و يطلع الموبايل منه و يحطه على الكرسي تانى و يفتح صور و يفرجهالهم
ماجد / بصراحه حلوه
مها / ممكن اتفرج
مازن يناولها الموبايل تقلب في الصور
ماجد / و بتاخد كام بقي في الفرح
مازن / مباخدش بعملها كادو
الشاب / و دا يبقي اسمه شغل
مصطفي / اهو على ما يعمل لنفسه اسم
مازن/ انا مش محتاج فلوس يعني ههههههههههههه تصدقوا ان ده نفس الحوار تقريبا مع كل شخص بيعرف لاول مره انى فوتجرافر نفس الاسئله و نفس الاجابه
ماجد / طبيعي على فكره
مها تقلب في الصور و توصل لصوره سيلفي مرام و مازن حاضنها من ضهرها و الاتنين باصين للكاميره في منتهى السعاده تزغد سحر و البنات يتلموا على الصور و يبصوا لبعض مصطفي ياخد الموبايل منهم
مصطفي / عن اذنكوا يا انسات .... خلونا منضيعش الوقت على الفاضي خلونا نخلص
مصطفي يقفل الموبايل و يديه لمازن يحطه فى جيبه و يبصوا لبعض
...............
فى شقه مصطفي
مصطفي يدخل بالليل و الكل نايم يدخل اوضه اخوه و يروح يقعد جنبه على السرير فادى يفتح
فادى / استر يارب
مصطفي / قوم عاوز اتكلم معاك في حاجه
فادى يقوم و هو بيدعك فى عنيه
مصطفى / هو انت عرفت منين انك بتحب ساره يعني اشمعن هى مانت شوفت عرايس كتير قبلها
فادى / بتسال ليه فى حاجه
مصطفي / لا لا لا مقصدش انا بسال لنفسي يعني لو فى بنت
فادى / اوباااااااا لا استني ثانيه انت بتكلمنى عن بنت
مصطفي / تصدق انا الغلطان
فادى / وربنا ما يحصل تعال هنا احكى مين دى و اتعرفت عليها ازاى انطق يلا
مصطفي / سيبك من كل ده دلوقت يعني اعرف مشاعرى ناحيتها ازاى
فادى / بص انا شوفت عرايس كتير اه بس فى منهم اللى اتقفلت و مكنتش عاوز اكمل القاعده اصلا و فى منهم اللى رفضت هى و فى منهم اللى .. مانت كنت عايش معايا كل الحاجات دى يابني هو انا اللى هحكيلك
مصطفي / لا لا بص انا بتكلم عن مشاعرك انت بتحس بايه لما تشوفها
فادى / انى فرحان جدا طبعا
مصطفي / بتفكر فيها طول الوقت عاوز تكلمها عاوز تتطمن عليها
فادى / اه طبعا علاطول
مصطفي / طب و المشاعر دى ملهاش اسم تاني غير الحب يعني
فادى / مش عارف بس ممكن انا مره قريت ان المشاعر خداعه يعني مش صريحه خصوصا ان محدش بيحس باللى جواك غيرك مين هى دى بقي ست البنات اللى شغلت عقلك
مصطفي / هو صحيح الحب الاول فى حياه البنت مبيتنسيش
فادى / بيقولوا بس فى حكايات كتير الحب التانى بينسي الحب الاول او التجربه الاولى و بيكون تعويض من ربنا
مصطفى / طب انت بتعرف منين ان ساره بتحبك و كدا
فادى / تصرفاتها نظرتها ليا بتبتسم اول ما تشوفنى و تقلق عليا لو اتاخرت عليها مثلا يعنى الحاجات دى المهم مش هتحكيلى بقي
مصطفى / لا هحكيلك بس مش دلوقت
فادى / امال امتى
مصطفي / لما اتاكد من مشاعرى الاول
فادى / طيب متقوليش هى مين و احكيلى عنها
مصطفى يبتسم و يفرد ضهره جنب فادى
مصطفى / بص انا فى الاول كنت مش طايقها بعد كدا نظرتى عنها اتغيرت خالص لدرجه انى بقيت بفرح لما بشوفها و مببقاش عاوزها تمشي بدايق لما بلاقيها مدايقه كدا يعني
فادى / طب ما دا حلو جدا
مصطفي / المشكله انى مبحسش منها اى حاجه يعني كل الحاجات اللى انت قولتها دى بخ مفيش
فادى / ايوه مهو دا طبيعي انت لا جوزها و لا خطيبها عشان تاخد و تدى معاك و تهزر و كدا
مصطفي / يعني تفتكر لو اتقدمتلها الوضع ممكن يتغير
فادى / و انت كنت ناوى تمشي معاها شويه في الاول يعني
مصطفي / لا طبعا دى بنت محترمه جدا و ملهاش فى الجو ده خالص
فادى / خلاص توكل على الله و فاتح ابوك و نروح نكلم اهلها
مصطفي / مش بالبساطه دى
فادى / ليه يعني بنت عجبتك يبقي تروح تكلم اهلها ملهاش سكه تانيه
مصطفى / ابوك مش هيوافق عليها
فادى / ليه يعنى مالها
مصطفى يبص لفادى و يبص فى الارض
فادى / ايه
مصطفي / هى مطلقه
فادى يبصله باستغراب و مصطفي يبص في الارض
................
