((((((السكة شمال 2)))))))
#لولو_محمد
الحلقه 181
فى شقه مازن القديمه
احمد / عشان كدا قفلتى موبايلك
لبنى / خفت تتصل او تبعت رساله يشك
احمد / جدعه
لبنى / انت ما شوفتنيش امبارح كنت هعملها على نفسى بسببك و بسبب عندك ما كنتش قادر تستنى شويه
احمد / و انا اش عرفنى انه هيرجع هو ايه اللى رجعه
لبنى / نسى حاجه فى المكتب و رجع يجيبها و بعدين انا كمان ما كنتش اعرف هو هيروح امتى عشان اعطله كان لازم تقولى
احمد / عدى
لبنى / بيتهيالك زياد حطك تحت عينه و هيراقبك و هيلعب معاك صح
احمد / و مع كدا جيتى تقابلينى ايه مش خايفه يكون بيراقبك
.............................................
لبنى / انت عارف كويس انى مش خايفه منه
احمد / اللى انا اقدر اعمله هو يعنى ما يقدرش يعمله
لبنى / للاسف يقدر و يقدر يعمل اكتر منه كمان و انا محشوره منكوا لما اتفرمت
احمد / بمزاجك انتى اللى عاوزه ده
لبنى / انا اللى عاوزه القرف ده
احمد / اه انتى عشان عيون حبيب القلب اللى مش هيعبرك حتى
لبنى / اوعى تفتكر انى بسكتلك ضعف اوعى تفتكر انى ما اقدرش اقتلك
احمد / حاولى
لبنى / هيحصل هيجي يوم و اقتلك انت و زياد هيحصل يا احمد
احمد يمسكها جامد من ايدها
احمد / انتى لسه بتكابرى هاه لسه مش قادره تشوفى انا ممكن اعمل ايه
لبنى / لو قربت منه تانى هقتلك اوعى تستهون بيا يا احمد انا اتخليت عن امومتى فى لحظه انا اقدر اتخلى عن الدنيا كلها ... فى لحظه برده
احمد / و ده اللى بحبه فيكي انك خطر
احمد يبوسها عافيه تزقه تقع فى الارض ينزل يقرفص قدامها
احمد / انا عمرى ما استمتعت مع واحده زيك
لبنى تبصله بقرف و هو مبتسم
.................................
فى شقه مازن
مازن مثبت الكاميره و مرام واقفه جنبها مازن بيشيل ملك و يزحلقها تنزل تدحك و تجرى عليه تطلع و هو يساعدها تتزحلق و هى عماله تدحك على اخرها و مبسوطه تتزحلق تانى يروح يجيب لعبه طبله و يطبل عليها ملك ترقص و تتهز مازن يدحك تروح تحضنه مرام تقفل الكاميره
مازن / ليه الفيديو لسه فى اوله
مرام / بلاش الفكره دى يا مازن
مازن / كانت عجباكى على الفطار
مرام / اه بس لما شوفتها بتدحك و بترقص خفت عليها دى قلبى يا مازن
مازن يبوس ملك و يحطها على الارض تروح تلعب بالمكعبات و هو يقوم يروح ناحيه مرام
مازن / و قلبى انا كمان يا مرام
مرام / عنين الناس وحشه و نفوسهم مش صافيه مش عاوزه حد يحسدنا على احلى نعمه فى حياتنا لو الفلوس راحت لو الصحه راحت لو الدنيا كلها راحت من تحت رجلينا لكن لو ملك
مازن / بعد الشر عن ملك بعد الشر مليون مره هو انا يعنى هعمل حاجه تاذى بنتى ما العيال فى الاعلانات بيرقصوا و يغنوا طول الوقت
مرام / مش عارفه
مازن / عدنه اى فيديو عادى من اللى بنلعب فيه انا و هى كام فيديو لينا سوا شيرته انا هاه
مرام تتنهد
مازن / كفايا كدا النهرده نكمل تصوير فى يوم تانى تمام
مرام تبتسم
مرام / تمام
مازن / اه صحيح الكولكشن الجديد بتاع صافى بتاع النيوبورن و الاطفال كولكشن ملك هى كانت قالتلك عليه
مرام/ ماله
مازن / خلص و هصور ملك فيه
مرام تلف بعنيها و ترجع تبص لمازن مبتسم تهز راسها موافقه مازن يروح يحضنها
مازن / سبيها على ربنا ممكن
مرام /طبعا ممكن
مازن يبوس راسها ملك تسيب المكعبات و تجرى تفتحلها ايديها يشيلها
مازن / اوعى دا انتى اللى فى القلب يا ملوكه راحت عليها خلاص
ملك تدحك و مرام تفتح بقها و تقرب من ملك
مرام / اوعى تصدقيه بينيمك و يجيلى
مازن / اساسى
مرام / هههههههههههههههههههههههههههههه
......................
فى شقه مازن القديمه
لبنى نايمه فى السرير جنب احمد و هو عمال يبص فى ورق
لبنى / مش هتلاقى عليه حاجه
احمد / عارف مستحيل يدينى الورق لو كان فيه غلطه
لبنى / امال بتبص فيه ايه
احمد / زياد لو الشغل ده مشى معاه هيتنقل نقله تانيه خالص
لبنى / و انت ما تقدرش تمنع الشغل ده يمشى عشان ساعتها هتحط نفسك فى وش المدفع باختصار زياد بيقولك انا هكبر قدام عنيك و انت مش هتقدر تعملى حاجه
احمد / لو زياد نجح فى الشغل ده هيبقى ملك السوق و ما حدش هيقف قصاده زياد لما ادانى الورق ده كان بيطلعلى لسانه بيقولى اعمل اللى تعمله اى كان الخساير اللى هتسببها و لا حاجه بالنسبالى
لبنى / عمل كدا امتى
احمد / الشغل ده مش شغل يومين تلاته و لا حتى شغل شهور زياد كان شغال على الحاجات دى من ايام ما ابراهيم بيه ما كان عايش و غالبا بتوجيهاته ممكن المرض هده و ساب كل حاجه لزياد يمكن اتلخم فى مشاكل مازن بس دى مش دماغ زياد
لبنى / انت ما تعرفش دماغ زياد
احمد / و لا انتى و لا حد يعرف ايه اللى دماغ الافعى ده الا هو
لبنى / و بعدين هتلم ديلك و ترجع بلدك تانى
احمد / دى بلدى يا قلبى
لبنى / انت فاهم انا اقصد ايه
احمد / لا انا جيت و ناوى اكمل هنا و مش ناوى ارجع
لبنى تلف نفسها و تقوم
احمد / رايحه فين
لبنى / هسيبك مع نفسك تفكر و تشوف هتعمل ايه بما انك مش قادر غير عليا يبقى اقعد فى حضن الاقوى ائمنلى و لا ايه
احمد يبصلها و يبتسم
لبنى / عن اذنك
لبنى تسيب احمد و تروح الحمام و هو يقعد يبص للورق تانى
احمد / ما طار طائر و ارتفع الا كما طار وقع و اييييييييييييييه دنيا
............................
فى المصنع تانى يوم
مازن واقف فى ركن فاضى مع محمود و شريف
مازن / المكان ده حلو جدا عاوزه يبقى قلعه كبيره فيها من كل اللعب اللى المصنع بينتجها و فيه كمان ملاهى صغيره عاوزها الجنه اللى بيحلم بيها اى طفل عاوز بار حلويات بكل اشكالها الديكورات الالوان عاوز حاجه ما حصلتش
شريف / مش شايف ان المساحه صغيره شويه على احلامك دى
مازن / تؤ انا شايف انها كفايه
محمود / و انا كمان روحت ملاهى اصغر من دى بكتير و كنت بخربها فى ايه
شريف / ايوه بس الاكل و الحلويات و اللعب و الحاجات دى كلها فى مساحه زى دى هتبقى زحمه اوى
مازن / كدا كدا المكان ده مش هيكون فيه اكتر من عشره خمستاشر طفل يوميا دى مش ملاهى دى مكافئه للفانز بتوعنا الطفل اللى هيدخل هنا مش هيدخل عشان احنا عاوزينه يدخل او عشان اهله عاوزينه يدخل هيدخل عشان هو يستحق يدخل
شريف / فهمت تمام
مازن / الركن اللى هناك ده هيبقى فيه هدايا متغلفه الطفل و هو خارج هياخد هديه عشوائى هينقى هديه واحده بس هو مش عارف هى ايه و هيفتحها و هياخدها معاه
محمود / و افرض مش مناسبه ليه او ما عجبتوش
مازن / احنا عارفين ان سن الاطفال هنا من كذا لكذا هنحطلهم حاجه مناسبه يا محمود اكيد انا عاوز اللى يمسك الموضوع ده ناس تبقى دى شغلتها الاولى و الاخيره ما بيفكروش فى اى حاجه غير الكيدز براديس دى عاوزها فعلا جنه
شريف / الطفل هياخد الاكبر فى الحجم اى كانت
مازن / الموضوع ده سهل جدا الصندوق ممكن يكون ضخم و جواه توفى عادى يعنى او ممكن فل او بلى او كور مش شرط الصندوق الكبير فى الحجم يكون جواه حاجه ضخمه او مهمه الاكس بوكس بيتحط فى علبه قد ايه و علبه الموبايل قد ايه
شريف / الاطفال ما بتفهمش ده
مازن / هيتعلملوا لما يشوفوا غلطه غيرهم هيتعلموا الاطفال اذكيه جدا فوق ما تتخيل
محمود / انت مهتم بالموضوع ده اكتر من اى حاجه تانيه
مازن / عشان ده هو مستقبلنا يا محمود المصنع ده مش هيعمل اعلان واحد مش هيصرف جنيه فى دعايا لا سمعيه و لا مرئيه فلوس الدعايه كلها محطوطه فى المكان ده الدنيا كلها هتتكلم عن الكيدز براديس اللى فى مصنع ملك تويز و هيبقوا عاوزين يجيبوا اولادهم هنا مهما كان التمن
محمود / ربنا يعمل اللى فيه الخير حد يكره
مازن / و انا عندى امل كبير اوى فى ربنا
مازن يبص على المكان كانه بيحلم و مبتسم
..............................
فى شقه مروه بعد فتره
مروه نايمه فى السرير جنب محمود هو رايح فى النوم و هى ممدده جنبه بتقلب فى النت و تشرب كاكاو فجاه تتعدل و تصحى محمود
مروه / محمود محمود اللحق
محمود يقوم مفزوع
محمود / فى ايه يا مروه ايه اللى حصل
مروه / اللحق شوف الوليه دى كاتبه ايه اقرا كدا
محمود / وليه ايه يا مروه اللى تصحينى ما تفكك من النت و الفايس و القرف ده و تنامى شويه
مروه / دى ماسحه بمرام الارض و قايله كلام وحش اوى
محمود ياخد منها التاب و يتعدل و مروه تايد النور من جنبها
محمود / روى أبو هريرة عن رسول الله صلى الله عليه وسلم أنه قال: سيأتي على الناس سنوات خداعات، يُصدَّق فيها الكاذب ويُكذَّب فيها الصادق، ويُؤتمَن فيها الخائن ويُخَوَّن فيها الأمين، وينطق فيها الرويبضة. قيل: وما الرويبضة؟ قال الرجل التافه يتكلم في أمر العامة صدق رسول الله صلى الله عليه وسلم لم اجد شيئا اصدق من هذا الحديث الشريف لوصف تلك الافه التى طفت على الساحه كما يطفوا الخبث فى عمليه انتاج الحديد استيقظت ذات صباح لاجد ابنتى تشاهد احدى حلقات البرامج التليفزيونيه حيث تم استضافه فتاه شابه و التى تدعى مرام نور الدين و هى تعطى النصائح و كان كلامها معسولا يدخل القلب وجهها البشوش المالوف و ضحتكها البريئه تحدثت مع ابنتى التى احبتها بشده و تعلقت بها حتى كادت تبحث عن صور لها لتعلقها فى غرفتها كنت سعيده بان هناك مثل تلك النماذج الايجابيه الناجحه و التى لها تاثير كبير فى الشباب فى سن المراهقه و مراحل تكوين الشخصيه و مرت عده ايام كنت اجلس فيها مع احدى صديقاتى احدثها عن تلك الفتاه الخلوق لاكتشف مدى سذاجتى و صفاء نيتى فلم تكن تلك سوى حيه تبدل جلدها .. ايه قله الادب دى
مروه / كمل كمل دا التقيل جاى ورا دى غسلاها تحت
محمود / تتلون كالحرباء لتصل لمبتغاها حاولت الا اصدق و بدئت فى البحث على الانترنت و ارشيف الاخبار و حاولت التواصل مع زملائها فى فتره الجامعه حتى وضعت يدى و بالادله على الحقيقه كامله . كان من الممكن ان اكتفى باكتشاف الحقيقه و حمايه ابنتى و لكنى قررت ان احارب الفساد و افضح تلك المتلونه ولدت مرام فى حى شعبى ترتدى الباله و تعمل فى بيع الوجبات المنزليه من اجل لقمه العيش لم تكن ذات شعبيه واسعه فقد كانت مثال لدوده الكتب و التى تصل للمراتب الاولى عن طريق اقصاء المنافسين ... هو انتى لقيتى اللينك ده ازاى
مروه / معمولى منشن واحده صحبتى متابعه الست دى اصلها صحفيه مشهوره اوى شغلتها فضح الفساد و علاطول بتجيب فضايح الفنانين و الحاجات اللى زى دى
محمود / بس كل ده كدب
مروه / كمل كمل انت لسه قريت حاجه
محمود / صبرنى يارب .. تعرفت مرام على زوجها الشاب الوسيم اللعوب و تزوجته رغما عن اراده عائلته و لم تمر ايام حتى انفصلت عنه بفضيحه يعلمها الجميع ثم عادت لعصمته بعد عده اشهر اشتهرت علاقتهما بالرومانسيه الساحره فقد كان يغنى لها و يرسل لها الهدايا و يصورها و هى سعيده بها مما اثار مشاعر المراهقات و كثر متابعينهم استطاعت مرام استغلال نفوذ زوجها و شهرته و الاحداث التى اثارت تعاطف الناس معها للوصول الى الشهره و لكن هناك الكثير مما لا تعرفونه عن مرام نور الدين تلك الفتاه التى نحست زوجها و كل من حولها بدئت سلسله المصائب تتوالى على زوجها قبل زفافها بيومين حيث توفى خاله الذى رباه اثر حادث سير و بناء عليه تاجل الزفاف و عادت الى منزلها تزرف عوضا عن الدموع دما فى صباح اليوم التالى لزفافها ثم اعلن طلاقها بعدها بعده ايام و بعد ولادتها بعده اشهر خسر زوجها كل ما يملك من مال و عادوا مره اخرى الى منزل جدتها القديم ابن عمها يقضى فتره عقوبه فى السجن و عائلتها لا تعلم عنها شيئا فهى لا تساعدهم و لا تسال عنهم بالرغم من ضيق حالتهم الماديه و تيسر حالتها .... لا مش قادر انا هكلم مازن يتصرف بقى فى الهبل ده
محمود يجيب التليفون و يتصل بمازن
..........................
فى شقه مازن
مرام نايمه جنب ملك فى الاوضه و مازن قاعد يقرا فى الصاله من الموبايل
مازن / تلك الفتاه التى اشتهرت هى و زوجها بكثره الصدقه و اطعام المحتاجين ذلك الباب الذى لا يغلق فى وجه سائل نسى ان الاقربون اولى بالمعروف نسيت تلك الفتاه التى تستر خلف غطاء الدين و الحجاب و التدين ان هناك شئ يسمى بصله الرحم فما الفرق بينها و بين من يستخدمون الزيت و السكر فى الدعايه الانتخابيه او من يستتر وراء ستار الدين و يدعون الوقار لاكتساب ثقه الشعب كيف نسمح لمثل تلك الفتاه ان تكون قدوه لبناتنا كيف نسمح لها بان تسمم عقولهم فى الحقيقه انا لا اعلم ما هى خبرتها فى الحياه حتى تكون قدوه و واعظ للفتايات الصغيرات ماذا حققت فى حياتها فانجازها الوحيد كان نجاتها من حادث و زواجها من شاب ثرى مشهور ماذا قدمت مرام نور الدين لمصر و ماذا بامكانها ان تقدم سوى حله محشى و صينيه البطاطس بالفراخ اهذا ما تحتاجه مصر فى تلك الاونه نموذج سئ اخر يستتر وراء الدين انا حقا لا اعرف ... تمام يا بنت الكلب انا هعرفك
مازن يجيب اللاب و يحطه و يفتح الكاميره و ياخد نفس عميق و يحاول يهدى و يدوس على زرار و يصور
..........................
فى فيلا زياد
لبنى نايمه فى السرير و زياد قاعد حاطت الهيد فون فودانه و بيدحك و هو بيتفرج على حاجه على التاب لبنى تصحى تبص هو بيتفرج على ايه تلاقيه مازن تشد منه التاب
لبنى / فى ايه
زياد / هههههههههههههههههههههههه العبيط طالع يدافع عن مرام تانى و يقول قد ايه هو بيحبها و انه ما يتخيلش حياتها من غيرها
لبنى / ما كل الناس عارفه ده ايه اللى يخليه يتكلم بالعصبيه دى شكله مدايق من حاجه فى ايه
زياد / تسمعى عن صحفيه اسمها مريم شرشر
لبنى / لا مين دى
زياد / دى الصحفيه الهبله اللى كنا بنقول انها فاكره انها هتغير الكون الست الهبله اللى عايشه على قفا فضايح الفنانين مين اتجوزت عرفى و مين على علاقه مع مين و مين اشترت ايه و اشترته بكام الصحفيه اللى كنتى دايما بتقولى عليها ست فاضيه بتحاول تتشهر على قفا الناس
لبنى / اه افتكرتها مش دى اللى اتسببت فى طلاق سوزى مختار السنه اللى فاتت لما صورتها سكرانه فى عيد ميلاد صحبتها افتكرتها دى حيوانه و بتخترق الخصوصيات انا فاكره ان كل الناس بطلت تعزمها فى اى ايفنت ليهم انا كنت فاكره انها اعتزلت و بطلت و لا ماتت هى لسه فى القرف ده هو لسه فى جرنان بينشرلها بعد البهدله اللى شافتها
زياد / ههههههههههههههههههههههه انتى اخر مره تابعتى حاجه امتى
لبنى / و هو اللى يعيش معاكو يفوق يتابع حاجه و لا يبقى فيه دماغ لحاجه دا انى حتى اخر البوم لعمر دياب مسمعتوش اصلا
زياد / ههههههههههههههه بس كدا بكره اعملك حفله و اخليه يجي يغنيهولك بنفسه
لبنى / فيقالك انا دلوقت المهم ايه علاقه الست دى بمازن اصلا
زياد / باختصار يا ستى الست دى لما ملقتش شغل بدات ايه تنادى بالحريات و المواعظ و الهبل ده و تعمل نفسها بطله و اتظلمت عشان بتحارب الفساد و كدا و فى طبعا ناس هبله كتير بينسبطوا بالفضايح بتاعتها بس لعلمك بقى البت دى مزقوقه على مازن
لبنى / عرفت منين
زياد / اقولك كمان مين زاققها
لبنى / مين
زياد / الدهبى
لبنى / عرفت منين
زياد / هههههههههههههههههههههه سالت و عرفت و دافعلها مبلغ محترم كمان عشان تظبط مازن و تخرجه عن شعوره و يطلع يشتم و يسب و يلعن فيها و اللى خلفوها و مش هتسيبه فى حاله الا لما سمعته هو و ست الحسن و الدلال بتاعته تبقى فى الارض
لبنى / و هى الهبله دى هتقدر على مازن اصلا دا الناس بتموت فى التراب اللى بيمشى عليه
زياد يبصلها
لبنى / بسبب الخير اللى بيعمله مش بياكلهم اطعم الفوم تستحى العين
زياد / لا ما تقلقيش انا عارف الست دى كويس هتجيب تاريخه الاسود كله و ان ما لقتش هتفبرك
لبنى / و احمد بيعمل كدا ليه هيستفيد ايه يعنى اشمعن دلوقت
زياد / ما قدرش عليا قال يتشطر على مازن مهو اللى زى ده بيعيش عشان ياذى و بس
لبنى / تعرف انا عن نفسى هستنى اليوم اللى اشوف فيه النهايه السوده للجدع ده انا متاكده انه هيبكى بدل الدموع دم و يدفع تمن كل اللى عمله هيشوف ذل ما حدش شافه مش هيموت بسهوله
زياد / ههههههههههههههههههههههه حيلك حيلك دا انتى كرهاه اهو
لبنى / و دا فى حد طايقه دا هو نفسه مش طايق نفسه انسان مقرف و مريض انا عمرى ما حبيته و انت عارف فاكر يوم ما جه يعزينى فى ماما الله يرحمها
زياد / ايوه
لبنى / يوميها لولا مازن
لبنى تسكت و تبص الناحيه التانيه
زياد / لولا مازن ايه ؟ سكتى ليه ؟ ايه اللى حصل يوميها ؟
لبنى / هو السبب انى قطعت شرايينى يوميها و جالى المستشفى برده
زياد / انا مش فاهم عمل ايه يعنى ؟ قالك ايه ؟ دايقك تانى ؟ عمل ايه قولى ؟
لبنى / انسان بارد بيقولى اهو ارتاحتى من همها و سمعتها الحيوان كان بيتكلم عن امى انا
زياد / ليه ما قولتليش وقتها ليه سكتى
لبنى / كنت فى ايه و لا فى ايه
زياد / و ليه ما قولتيش لحد النهرده ليه سكتى كل ده ليه استحملتيه كل ده دا انتى لحد وقت قريب كنتى بتشجعينى اشتغل معاه
لبنى / بعد موت ماما اتلخمنا على ما قومت من المستشفى كان فى احداث كتير اوى ما كانش ينفع اشغل دماغك بموقف تافه من انسان تافه زى ده خصوصا انه كدا كدا فض شراكته معاك و كمان سافر و مرجعش و قعد هناك فتره طويله اوى و لما رجع انا كنت تعبانه و جه زارنى و نفسيتى كانت زى الزفت بسبب حوار الرحم قولت يمكن ما كانش يقصد يمكن كانت نيته خير سكت و قولت لو هيجي من وراه خير خلاص استحمله لكن ما دام حاول ياذيك بالشكل ده و اللى عمله معاك فى الشركه دا حاول يغدر بيك اشترى السكرتيره بتاعتك تفتكر كان ايه اللى هيحصل لو ما كنتش رجعت تشوف موبايلى و لا كنا عرفنا حاجه و كان زمانا لحد دلوقت فاكرينه حبيبك و كان زمانها اسمها ايه الزفته دى شغاله عندك و ما عرفتش و لا اخدت بالك
زياد / كنت هعرف انا بفرغ الكاميرات بنفسى كل يوم
لبنى / كان ممكن تهرب مهى اكيد ما عملتش كدا الا اذا كان واعدها بحاجه كبيره هو انت مش عارفه بيدفع فى الشر و الاذى و ما بيبخلش ابدا فى الحاجات دى انما يطلع جنيه لله يتشل قبل ما يعملها الحيوان
زياد / هو لحد دلوقت ما عملش حاجه فى الورق و لا حاول يدايقنى فى الشغل نهائى على العموم ما تقلقيش حقك منه هجيبهولك هجيبهولك
لبنى / امتى
زياد / لما يخلص على مازن
لبنى تكتم الغيظ جواها
زياد / هو انا يعنى اروح اضرب فى احمد دلوقت و لا استنى اما الاتنين يخلصوا على بعض و ابقى ضربت عصفورين من غير و لا حجر
لبنى / اللى تشوفه يا زياد ياريت بعد كدا لما تبقى بتتفرج على حاجه تاخد بالك ان فى كلبه نايمه جنبك
زياد / هو فى ايه
لبنى / فى انك صحيتنى و طيرت النوم من عينى على حاجه تافهه
زياد / ما احنا كنا بنتكلم فى ايه
لبنى / كنا بنتكلم طبعا و انت يهمك ايه يعنى ما انت بتنام وقت ما تحب و تصحى وقت ما تحب انما انا بقى تعبانه مطبقه عاوزه انام مش مهم راحتى مش مهم
زياد / ليه بتقولى كدا ما انا بنزل الشركه و انتى بتنامى هو فى حد يجرؤ يصحيكي
لبنى / و دا بقى يديك الحق انك تقلق نومى يعنى ما انا بنام فى غيابك يبقى اصحى و افضل فى خدمتك فى وجودك مش كدا
لبنى تسيب السرير و تقوم زياد يقوم يجرى وراها يمسكها تشد ايدها منه
لبنى / اوعى سبنى
زياد / تمام انا اسف حاضر هطفى النور و هنام
لبنى / نام لوحدك
زياد / ايه بس عصبك لكل ده
لبنى / انا قولتلك ان فى واحد كان هيتسبب فى موتى عملت ايه
زياد / قولتلك هجيبلك حقك
لبنى / دلوقت
زياد / دلوقت !!!
لبنى / حالا
زياد / دا هيبسطك يعنى
لبنى / ورينى غلاوتى عندك ... دا ان كان لسه باقيلى غلاوه
لبنى تحط ايدها فى وسطها و ترفع حاجبها زياد يهز راسه حاضر
لبنى / مش فاهمه
زياد / حاضر يا لبنى هوريكي غلاوتك عندى هربيهولك تمام
لبنى / لما تبقى تربيه ابقى اجى جنبك عن اذنك
لبنى تفتح الباب و زياد يجرى وراها
زياد / قولتلك حاضر عاوزه ايه بقى
لبنى / عاوزه تنفيذ مش عاوزه كلام
زياد / حالا يعنى
لبنى / اه حالا ايه وراك ايه يعنى اهم منى الله يرحم زمان لما كنت بكلمك فى عز نومك اقولك نفسى فى ايسكريم يا زياد تجرى تجبلى و تجيلى و لا ساعتها كنت حلوه و دلوقت بقيت وحشه ايه عجزت خلاص ما بقتش عجباك
زياد / ايه بس يا قلبى الكلام ده دا انا عينى ما بتشوفش غيرك و لا عندى اغلى منك
لبنى / ورينى
زياد / اهدى بس و تعالى و انا اوعدك ان بكره الصبح هتسمعى اخبار تبسطك
لبنى / تمام بكره الصبح هاجى انام جنبك عن اذنك بقى عشان انت لو ما سبتنيش دلوقت هسيب الفيلا كلها اقولك هسيب مصر كلها
زياد / تمام تمام نامى فى الحته اللى تريحك
لبنى تمشى بعيد تشوف يسرى بتتسنط عليهم تبصلها بطرف عينها يسرى تبص فى الارض لبنى تبص وراها زياد لسه واقف فى مكانه مش شايف يسرى لبنى تكمل مشى
.............................
فى المصنع
شريف قاعد في المكتب مضايق و ماسك الموبايل و بيشوف فيديو لمازن
مازن / روى أبو هريرة عن رسول الله صلى الله عليه وسلم أنه قال: سيأتي على الناس سنوات خداعات، يُصدَّق فيها الكاذب ويُكذَّب فيها الصادق، ويُؤتمَن فيها الخائن ويُخَوَّن فيها الأمين، وينطق فيها الرويبضة. قيل: وما الرويبضة؟ قال الرجل التافه يتكلم في أمر العامة صدق رسول الله صلى الله عليه وسلم احسن بدايه للرد علي الاستاذه شرشر و في مثل بيقول اللي بيته من ازاز ما يحدفش الناس بالطوب و لو هنتكلم عن الرويبضه فاكيد مش هنلاقي مثال احسن من الاستاذه شرشر اللي مش لاقيه جريده تشغلها و اكتفت بصفحاتها علي السوشيال ميديا بالنسبه للكلام اللي نشرتيه عن مراتي كان اولي اني اسيب الكلاب تعوي و ما اردش و اقاضيكي و دا هيحصل فعلا بس الاول اسمحيلي اعرض للناس الباله اللي مرام كانت بتلبسها
صور مرام في الكليه وسط ناس كتير و في حفل الخرجين
مازن /مرام عمرها ما لبست حاجه وحشه و عمرها ما كانت منبوذه و لا مكروهه و لا كانت بتقصي المنافسين ورق مرام و محاضراتها و ملخصاتها كانت مع الدفعه كلها انا شخصيا لما طلبت منها تشرحلي ما اتاخرتش مع ان كان في بينا وقتها خلافات مرام اتظلمت وربنا جابلها حقها و بالنسبه لجمله ان مرام نحس و لما خلفت غنا خسرت فلوسي فاحب افكرك انك طلبتي الطلاق لما اعلن منير عبد الرؤوف طليق حضرتك و ابو بنتك افلاسه بدل ما تقفي جنبه و تساعديه بفلوسك و مجوهراتك زي ما مرام عملت معايا و زي ما اي ست مصريه اصيله بتعمل حضرتك منعتي بنتك تشوف مرام و خايفه عليها منها مع ان الاولي تخافي عليها من نفسك لانك مستحيل تطلعيها زيها و السلام عليكم و رحنه الله و بركاته
شريف ينفخ الباب يتفتح و مازن يدخل
شريف /و اخرتها يعني
مازن /في ايه
شريف يهز الموبايل في ايده و يرميه علي المكتب
مازن /كان لازم ارد
شريف /طب ما انت اديتها اللي هي عوزاه دي ست فاضيه كل ما تلاقي الناس نسيتها تطلعتقول كلمتين تستفز الناس عشان يتابعوها تاني و عمرها ما كانت هتلاقي جمهور احسن من جمهورك انت و مرام يعني
مازن /ما انا كلمت المحامي و هو بدء في الاجراءات فعلا
شريف / مش هنخلص كدا
مازن /اعداء النجاح و الوصوليين ما فيش اكتر منهم
شريف /مرام شافت الهبل ده
مازن /اكيد بس ما ردتش طبعا
شريف /كويس و ياريت ما يستفزوهاش ترد و تغلط
مازن /ما تقلقش نبهت عليها كويس
شريف يهز راسه و ينفخ
............................
في فيلا زياد
لبني قاعده على حمام السباحه لابسه فستان قصير يسري تدخل تحط عصير و تيجي تمشي لبني تناديها
لبني / استني عوزاكي
يسري تقف و تبص للبني
لبني / اتفرجي علي الفيديو ده كدا و قوليلي رايك
يسري تمسك الموبايل و عينها علي لبني و تشغل الفيديو ليها و هي بتسحل فريده و تشتمها و تشدها من شعرها علي الحمام و ترشحها بالميه يسري تبص للبني و وشها الوان
لبني / تفتكري الفيديو ده لو وصل لجوزي زياد بيه ايه اقل حاجه هتحصلك
يسري / بس حضرتك اللي قولتيلي اعمل كدا
لبني / معاكي دليل علي الكلام ده
يسري / هو انا زعلت حضرتك في حاجه
لبني / لا و عشان كدا زياد بيه لسه ما وصلوش الفيديو بس شكلك هتزعليني
يسري /ليه بس يا ست لبني
لبني /كلمتي احمد بيه امبارح قولتيله ايه
يسري /ما كلمتوش يا ستي هكلمه امتي بس
لبني /مش قولتلك شكلك هتزعليني
يسري / انا بس افهم حضرتك عاوزه تعرفي ايه و انا اعرفك
لبني / امبارح لما كنتي بتتسنطي عليا انا و سيدك جريتي علي اوضتك و اتصلتي باللي مشغلك قولتيله ايه
يسري / ابدا يا ست هانم ما حصل انا صحيت علي صوت الزعيق فجيت اجري ليكون في حاجه و لما اطمنت رجعت نمت علاطول
لبني / لا يا شيخه صحيتي من اوضتك لاوضتي علي صوت الزعيق برده هههههههههههههههههه طب قولي مثلا كنتي بتنضفي حاجه في الدور او اي حاجه على العموم كلامك بقى مع زياد بيه لما يجي اتفضلى امشى
يسري لسه واققه بتبص على لبنى بتشرب العصير فى منتهى الهدوء بق التانى التالت تبص ليسرى لسه واقفه
لبني / فى حاجه يا يسرى ؟
يسرى / ابوس ايدك يا ست لبنى ما تدخليني بينكوا بكره تتصالحوا و انا اللى ابقى فى النص
لبنى / انتى بتقبضى كام يا يسرى
يسرى / تلت تلاف يا ست هانم
لبنى / كدابه عشره تلاته منى و سبعه من احمد
يسرى / و بجرى على اخين يتمه منهم بنت بتتجهز وولد ثانويه عامه و امى عيانه و بتخد كيماوى و حضرتك شايفه مصاريف العلاج بتكلف ازاى و الغلا اللى احنا فيه
لبنى / انا هخلى مرتبك بدل ما هو تلاته هيبقى عشره
يسرى / احمد بيه ايده طايله و ما بيرحمش
لبنى / مش هيعرف حاجه و لو عرف انا هحميكي منه ما لكيش انتى دعوه
يسرى / يا ست لبنى انا مش لوحدى فى البيت هنا كل اللى هنا بيقولوله كل صغيره و كبيره و لو انا كلامى ما كنش زى كلامهم رقبتى اللى هتطير
لبنى / ما لكيش دعوه انا هتعامل مع الباقين
يسرى / يا ست لبنى
لبنى / انتى بتناهدى كتير ليه الدنيا حر و انا مش قدرالك يلا خدى العصير ده و هاتيلى بداله واحد ساقع يلا ما تقرفنيش
يسرى / يا ست هانم
لبنى / انا اللى عندى قولته و زياد بيه زمانه جاى و عاوزه اللعب الرياضه بتاعتى قبل ما يجي و انتى معطلانى شوفى هتعملى ايه و خلصيني
يسرى / امرى لله حضرتك عاوزه منى ايه و انا تحت امرك
لبنى / عاوزه اعرف كل حرف سمعتيه و قولتيه لاحمد امبارح و زى ما قولتلك كل حرف الكلمه بتفرق انتى فاهمه و لا لا
.......................................
