((((((السكة شمال٢ ))))))
#لولو_محمد
الحلقه الثانيه
فريده / الحمد لله دانا كنت على اعصابى حاجه تحصل كدا و لا كدا
زياد / و انا موجود طب والله زعلتينى
لبنى / لا متزعلش هو النهرده يوم يتزعل فيه
فريده / على العموم انا كلمت بابا ابراهيم و حكيتله كل حاجه و شرحتله
زياد / بجد طب هدخل بقى اسلم عليه
فريده / ادخل
زياد يسيبهم و يدخل جوه
مونى / هو صحيح يا لبنى هو اللى فوش ابيه ده حصل من ايه
................................
فى المستشفى
مرام قاعده و الدموع تنزل من عينها فى صمت و مديحه وخداها فى حضنها و بتطبطب عليها و محمود واقف بيغلى و اسعد واقف عمال يبص على محمود شويه و على مرام شويه شريف يدخل
محمود / انت عاوز ايه مننا انت كمان
شريف / مازن فين فى ايه
محمود / دور عليه فى اى داهيه تاخده
شريف يبص على مرام اللى بتبصله بمنتهى الحزن تبص الناحيه التانيه و تمسح دموعها اللى مبتقفش يمشى و هو بيكلم حد فى التليفون
شريف / انت فين يابنى فى ايه ايه اللى حصل
مازن / انا فى العربيه قدام المستشفى قولى تيته عامله ايه
شريف / معرفش بس شكلها لسه مخرجتش مالعمليات هما قاعدين قدامها فهمنى مالها مرام
مازن / لما تيجى هفهمك
شريف / ثوانى و ابقى قدامك
.......................
فى دبى
ابراهيم / ها يا سيدى حلوه الهديه دى
زياد / انا اهم حاجه عندى انك ترضى عنى
ابراهيم / لا من النحيادى اطمن عالاخر انت مش متخيل انا سعيد قد ايه دانت خلصتنى من كابوس يا راجل
زياد / عقبال مخلص منه انا كمان حضرتك عارف ان مازن مش هيسكت
ابراهيم / انت قولتلى ان مستحيل ترجعله
زياد / مش هسمحلها دانا لسه هوريها ايام متتخيلهاش فى اسوء كوابيسها بس متنساش حضرتك انى فوش المدفع و مازن مش هيعديلى اللى حصل ده على خير
ابراهيم / متقلقش انت خالص و سيب مازن ده عليا انا هعرف اتعامل معاه ازاى
زياد / ربنا يخليك لينا يا بابا
ابراهيم / يا ترى الست سميحه هانم عامله ايه دلوقت قال بتعلمنى انا الادب تروح تلم بنتها
زياد / ههههههههههههههههههه انا قولت لحضرتك سبنى و انا هتعامل بطريقتى مكنتش مصدقنى
ابراهيم / من النهرده انت دراعى اليمين فكل حاجه دانت شلت من على قلبى هم ياااااه
زياد / طب بما ان حضرتك مبسوط بقى انا كنت عاوز احدد معاد فرحى على لبنى انا كمان
ابراهيم / يا سلام ربنا يكتر من افرحنا يا سيدى حد يكره
زياد / ربنا يخليك لينا يا احلى بابا فى الدنيا
.......................
فى عربيه مازن
شريف قاعد باصص من الشباك
مازن / مش هتقول حاجه مش هتهزقنى انت كمان
شريف / لو كانت فى شتيمه تكفى كنت قولتها لكن دا قاموس الالفاظ القبيحه كله واقف عاجز قدام اللى جوايا دلوقت
مازن / انا مكنتش اعرف ان معاه نسخه مالمفتاح و الزفت الريكورد ده مفبرك انت عارف ان الرهان مكنش كدا خالص
شريف / هتفرق فى ايه
مازن / تفرق لو هما مش مصدقنى على الاقل انت صدقنى
شريف / مليون مره اقولك زياد ده حيه ابن كلب قذر و انت بتدافع عنه ارتحت دلوقت مبسوط
مازن يبص لشريف و يبص الناحيه التانيه و يعيط و يرجع يبص لشريف
مازن / انت شوفتها
شريف / زى الزفت دا لو ميتلها ميت مش هتكون بالوضع الزفت اللى هى فيه ده
مازن / انا عاوز اكلمها انا متاكد انها لو سمعتنى
شريف / لو لا قدر الله تيته حصل لها حاجه
مازن / لا بعد الشر يا شريف انا مش هستحمل تموت و هى فكرانى كدا لازم تعرف الحقيقه
شريف /هى الحقيقه عدله اوى يا مازن مانت فعلا كنت مراهن على مرام
مازن / لا يا شريف مش كدا انا مراهنتش كدا انا كنت
مازن يسكت شريف يبصله و يضحك ضحكه مكسوره
شريف / سكت ليه
مازن / انا بحبها يا شريف
شريف يتنهد
شريف / انا هنزل ابص على تيته ان شاء الله تكون خرجت مالعمليات
شريف ينزل مالعربيه مازن ماينزلش يوطى يبص على مازن
شريف / انت مش جاى
مازن / لو مرام شافتنى
شريف / تمام تمام خليك هنا احسن لحد منشوف القرف ده هيخلص على ايه
شريف يقفل الباب و يمشى و مازن قاعد متوتر و متابعه
.......................
فى الصيدليه
شيماء تدخل
الشاب / ياااااه دا كان شكله فرح صباحى
شيماء / ههههههههههههه بصراحه كان وهم حاجه كدا محصلتش
الشاب / باين باين ايه مفيش صور
شيماء / متعلى التكييف دا شويه النهرده برد اوى
الشاب / فعلا الارصاد قالو موجه قارصه جايه
شيماء تطلع من شنطتها موبايل و تديها للشاب
شيماء / لو هتالس متتفرجش احسن
الشاب / لا متقلقيش اكيد مش هيكون اسوء من اخر فرح حضرته
شيماء / ههههههههههههه و ايه حصل فى اخر فرح حضرته
الشاب / عاوز اقولك ان العريس و العروسه قاموا ضربوا بعض و العريس رمى اليمين على العروسه و الجوازه باظت الحمد لله
شيماء / يا خبر انت بتتكلم جد
الشاب / اصل كان فى رقاصه
شيماء / قول بقى كدا
الشاب / الست يعنى مغلطتش حبت تجامل العريس راحت قعدت بكل ادب و احترام على رجله
شيماء / لا و الله
الشاب / العروسه قدامت جابتها من شعرها و اخواتها و اهلها وجبوا معاها الراجل يسكت
شيماء / لا طبعا
الشاب / قام يحوش عن الست
شيماء / لا حنين اوى الصراحه
الشاب / صحبتنا شافته ملهوف عالرقاصه قلعت الجزمه و فين يوجعك و فجاه اهل العريس دخلوا فى اهل العروسه و كراسى بتطير و ستات تصوت و عيال تحدف فى ازايز الحاجه الساقعه متعرفيش مين مع مين و انا قولت يا فكيك
شيماء / لا ليك حق تتعقد مالجواز يا عينى
الشاب / انا مش معقد
شيماء تبصله بطرف عينها كدا
شيماء / تمام تمام هتشوف الصور و لا ايه
الشاب / بتفرج اهو انتى اللى عماله ترغى و معطلانى
شيماء / دا انا صح
الشاب / امال انا يعنى
شيماء / هههههههههههههههههه
.......................
فى المستشفى
شريف يدخل كوريدور يلاقى محمود و اسعد واقفين بره
محمود / انت تانى
شريف / اهدى يا محمود انت فاهم الموضوع غلط
محمود / انت كمان هتدافع عنه
اسعد / اهدى يا محمود خلينا نفهم يمكن فعلا فى حاجه غلط مانت اللى حكيته بصراحه ميصدقوش عقل ابدا
محمود / يا معلم والله
شريف / متحلفش الا لما تسمع من الناحيه التانيه هو لو كان عاوز يلعب بيها كان استنى كل ده ليه و بعدين لا مؤاخذه يعنى انت متخيل ان مازن طول الفتره دى مكنش قدامه فرص احسن من دى ينتقم فيها من مرام و بعدين ينتقم منها بمناسبه ايه اصلا دا بيحبها
محمود / و ايه كمان يا شريف باشا
شريف / فكر يا محمود بالعقل هتلاقى مازن مظلوم و زياد هو اللى ابن كلب
محمود / جاب مفتاح الشقه منين
شريف / زياد هو اللى مغير الكالون سهل جدا يكون احتفظ بنسخه
محمود / ياخى بقى بلاش كلام فارغ داحنا نزلنا فى عز الليل مخصوص عشان يفتحله يدخل
شريف / هى مرام قالتلك عالملف اللى سابهولها هناك
محمود / ملف ايه
شريف / زياد عمل التمثيليه دى كلها عشان مرام تعرف ان ابراهيم بيه عاوز مازن يتنازله عن كل فلوسه مقابل انه يسيبه يعيش مع مرام و مازن رفض و قطع علاقته بابوه
محمود / فابوه قرر ينتقم منه بالطريقه دى صلاه النبى احسن راكنين احنا الفيل الهندى بره عشان نصدق الفيلم ده
شريف / جرى وراها ليه لحد البيت
محمود / متحاولش
شريف / قاعد بره مستنى اى حد يطمنه عليهم ليه
اسعد / اهدى بس يا استاذ شريف
شريف / مازن ملوش فى الدنيا غير مرام مستحيل يعمل فيها كدا انا عارف كويس هو بيحبها قد ايه
محمود / انت عندك اخوات بنات يا شريف متقفش مع الكلب ده عشان الدنيا دواره عن اذنك
محمود يسيب شريف و يدخل جوه
شريف / يا معلم والله العظيم الموضوع مش زى ما هما فاهمين خالص
اسعد / والله يا شريف يابنى انا معارف اقول ايه دى حكايه تمخول النفوخ انا عمرى معدى عليا حاجه زى دى
شريف / بوظوله فرحه قبل كدا و قتلوا خاله و لما ملقيوش منه رجا قرروا يقتلوه هو نفس المرادى
اسعد / ربك يسهلها بس انت قول يارب
شريف / يارب
........................
فى الحاره
عالقهوه توفيق مسخسخ مالدحك
الشاب / للدرجادى
توفيق / طب قسما بالله لو كنت اعرف كنت استقبلتها باحلى زفه
الشاب / ياخى ارحم نفسك بقى
توفيق / ارحم نفسى مانا هرحم نفسى فعلا بس قسما بالله مهرحم امها بنت ال هههههههههههههههه و جايين يعيطوا هما الاتنين ااااااه يا جدع صحيح اللى يجى على تيفا يا بركه دعاكى ياما
المعلم / جرا ايه يا توفيق يا اخى متلم نفسك بقى انا ساكتلك مالصبح عيب كدا
توفيق / ايه يا معلم هو انا قولت حاجه لا سمح الله
المعلم / المره اللى فاتت وقعتنا بلسانك ده فى مشاكل مع مازن باشا و الراجل من يومها و هو واخد على خاطره متكبرش الموضوع بقى و استنى لما يرجعوا مالمستشفى و نفهم فى ايه
سلامه / يا معلم هى عرفت ان ستها تعبانه رجعت تجرى
راجل / متكبر بقى ياض يا سلامه دا ستها تعبت لما شافتها داخله عليها يوم الصبحيه
توفيق يقوم يقف
توفيق / صباحيييييه صباحيه مباركه يا ست العرايس الهانم راجعه تعيط يوم صبحيتها يا ترى ليه يا حاااااره
ست بياعه الخضار / متسكت بقى يا توفيق دى اعراض ناس
توفيق / اعراض هى خلت فيها اعراض دا الموضوع كبيييير اوى اوى يا خالتى
المعلم / طب اسكت يا تيفا لما نبقى نشوف المعلم اسعد هيقول الحوار رسى على ايه
توفيق / يا جدعان هو انتوا مصممين عالخيبه مالحوار واضح وضوح الشمس فعز الصيف احنا بس اللى ملناش عين نبص عشان عارفين ان شكلنا هيبقى وحش لما نعرف
المعلم / احترم نفسك يا توفيق و خلى ودانك تسمع اللى خارج من بقك و لا انت مصطبح و لا ايه نظامك
توفيق / اقولك انا سيبهالك خالص بالاذن
توفيق يقوم يمشى
راجل / هو عيل صايع و ابن كلب بس بصراحه الموضوع كبير و ميتسكتش عليه
اتنين ستات واقفين فى البلكونه فوق متابعين اللى بيحصل
ست 1/ هى الحاره دى معدلهاش غير سيره مرام اللى ترغى فيها
ست 2/ مهى اللى مش مظبوطه و كل يوم بحوار شكل
ست 1/ ياختى عاشت وسطينا سنين مسمعناش عنها حاجه وحشه
ست 2/ ياختى انتى هتفضلى طول عمرك طيبه اوى كدا مكانت عيله محدش هيبصلها بس افتكرى كدا حتى من قبل خطوبتها العربيات اللى كانت بتوصلها و تعدى تاخدها و النضافه اللى نزلت عليها مره واحده هو الرجاله لاقيه شغل و هما متخرجين عشان هى تلاقى و كمان فى الاجازه
ست 1/ لا بس الجدع ده شكله واصل اوى و ابن ناس
ست 2/ الا ما شوفناله اهل و لا نيله حتى فى الفرح بيقولوا المعازيم كلهم بيشتغلوا عنده
ست 1/ ما يمكن ياختى
ست 1 توشوش ست 2
ست 2/ ههههههههههههههه لا ياختى مستحيل
ست 1/ و انتى عرفتى منين يعنى
ست 2/ سمعته كل الناس عارفه انه كان نسوانجى و بتاع بنات يبقى ازاى بقى
ست 1/ الصيط و لا الغنى ياختى
ست 2/ برده تبقى مش بنت اصول كان الاولى تقف جنب جوزها فزنقته يمكن عنده مشاكل و لا حاجه مش تفضحه و تفضح روحها بالمنظر ده
ست 1/ والله فدى معاكى حق ياختى يلا ربنا يستر على ولايانا
ست 2/ امين ياختى امين
.....................
فى المستشفى
سميحه فايقه بتبص على مرام اللى مبتسمه بابتسامه مكسوره و عنيها حمره دم
سميحه / عامله ايه دلوقت يا ضنايا
مرام تحط راسها فى حضنها
مرام / بقيت كويسه لما اطمنت عليكى
مديحه / حقك عليا يا حجه اوعى تكونى زعلتى منى انا والله صوت لانى اتخضيت يعنى لما شوفت مرام حقك عليا ياختى
سميحه / حقك انتى عليا مكنش قصدى امد ايدى عليكى والله
مديحه / و لا تمدى خدى خدى التانى اهو كان مستخبيلنا كل ده فين بس ياربى
سميحه / محمود
محمود / ايوه يا تيته اؤمرى
سميحه / شوفلى محامى شاطر يابنى لو تعرف و مش مهم الفلوس خالص خلينا نخلع روحنا مالقرف ده
مديحه / يا حجه استهدى بالله ما يمكن الواد معاه حق
محمود / ماما
مديحه / اسكت يا وله انت مش عارف حاجه الناس يا حجه الناس مش هتسكت و لا هترحمنا هتقول ايه اطلقت يوم صبحيتها يا مصيبتى يا حجه دا انتى تقتليها بايدك اهون
سميحه تغمض عنيها و تسكت
مديحه / اسمعيله يا مرام الواد كان بيعيط و على اخره لو كان زى ما بيقولوا كان احتفل معاهم و سابك تروحى لوحدك جرى وراكى لحد هنا ليه
مرام تبص لمديحه
مديحه / حتى الجدع شريف صاحبكوا ده جه و كلامه بصراحه مقنع بصى طب اجلى حوار الطلاق ده شهر و لا اتنين و ارجعى معاه و نقول انه اتغابى معاكى و خفتى و لا اى حاجه و بعدين نبقى نطلقكوا
مرام تسيب المكان و تقوم تطلع بره
مديحه / روح وراها يا محمود انا والله عامله على مصلحتها مش قصدى حاجه اجرى وراها
محمود يطلع يلاقى شريف و اسعد قاعدين بره
شريف / مشيت كدا هو فى حاجه و لا ايه
محمود يجرى ورا مرام
.........................
فى اوضه فريده
مونى / بس انا مش مقتنعه خالص بحوار الخناقه على الركنه ده يعنى هو فى ايه
فريده / متنسيش ان الفرح كان تلتربعه حوارجيه و ناس بيئه الحمد لله انك مروحتيش
مونى / دا لو ابيه عرف
فريده / على ميوصل ان شاء الله هيكون الموضوع هدى و بعدين لعلمك بقى ابيه مش فاضى لا لزياد و لا لغيره
مونى / ربنا يسعدهم
فريده / سيبك انتى بقى مالرغى ده و ياريت عروستى الحلوه تجهز عشان نروح البيوتى سنتر مش كل يوم نروح متاخر
مونى / حالا هلبس
فريده / يا حبيبتى
......................................
قدام المستشفى
مرام تطلع بره و محمود يحصلها و مازن يتعدل فى العربيه لما يشوفها
محمود / انتى رايحه فين يا بنتى جريتينى وراكى
مرام / اتخنقت يا محمود بجد حاسه انى بموت جوه
محمود / هى مكنتش تقصد هى بس خايفه عليكى
مرام / انت فاكرنى مش فاهمه انا شوفت مليون اتهام فى عيون الناس و انا داخله الحاره هو ده اللى هما كانوا عاوزينه استنى كل ده عشان يحطنى فى الموقف ده دلوقت اروح اقوله ارجوك خبينى عندك شهر و لا اتنين عشان سمعتى
محمود / محدش يقبل حاجه زى دى اصلا
مرام / انا معملتش حاجه غلط يا محمود اصلا عشان استخبى هو اللى المفروض يدارى مش انا
محمود / طب بس اهدى
مرام تحضن نفسها من البرد
محمود / البتاعه دى خفيفه اوى خشى جوه بدل ما تعيي
مرام تبص تلمح عربيه مازن و هو جواها و عينها تيجى فى عينه ينزل من العربيه و يبص عليها تسيبهم و تدخل جوه و محمود بيبص على مازن يدخل وراها مازن يتنهد شريف يطلع ماسك كبايه ورق فى ايده مازن يتعدل فى وقفته شريف يروح يركب مازن واقف مش فاهم يركب بسرعه و يقفل الباب
مازن / فى ايه طمنى
شريف / مصممين عالطلاق و تيته طلبت من محمود يشوف محامى شاطر
مازن / و انا مش هطلق بالبساطه دى لازم تسمعنى انت فاهم لازم تسمعنى الاول
شريف / هى مش سامعه لاى حد جوه الحجه مديحه و المعلم اسعد استخدموا معاها كل الطرق من اول انك مظلوم لحد حافظى على سمعتك و لا اى حاجه مش سامعه لحد
مازن / يعنى ايه
شريف / معرفش يا مازن انا معرفش
مازن / انا مش هقعد هنا و اسيب الشياطين تلعب فى دماغها انا نازلهم
مازن يجى ينزل شريف يمسكه
شريف / استنى هنا رايح فين انت عاوز تجيب اجل الست اللى راقده جوه دى دى بتسمع اسمك بس ضغطها بيعلا امال لو شافتك هيجرالها ايه
مازن / امال اقعد هنا لحد ما لاقيها راحت منى
شريف / لا طبعا هنحاول مره و اتنين و تلاته و مليون حتى بس مش دلوقت اهدى بقولك ايه خد اشرب ده يدفيك
مازن / دا وقته يا شريف اشرب ايه و انيل ايه بس
مازن يرزع باب العربيه و يقعد ينفخ
....................
فى الصيدليه
الشاب / مين دى
شيماء تخطف منه الموبايل
الشاب / لا بجد مين دى
شيماء / خالتى بطل استظراف بقى
الشاب / اهو ده سبب تانى مخلينى مش عاوز اتجوز الغش التجارى اللى بتعملوه
شيماء / غش تجارى مره واحده
الشاب / انا مش شايف ليها اسم تانى بصراحه
شيماء / ماشى يا دكتور عمر خلينى معاك للاخر اولا كدا حضرتك عشان اغشك لازم اخبى عنك الحقيقه تمام يعنى حضرتك هتروح تخطب واحده بتحط مكياج و تفضل رايح جاى عليها زيارات خروجات فسح كل ده منغير متشوف وشها ولا مره و فجاه تيجى بعد الفرح تتصدم مش كدا
عمر / بيحصل
شيماء / هو ايه اللى بيحصل دا فى عالم موازى فى خيالكوا انتوا و بعدين بتنقى واحده بتحط ميك اب ليه اصلا متنقى واحده طبيعيه
عمر / مانا برده لازم انقى واحده حلوه الله
شيماء / لا اله الا الله يا دكتور عمر هو يعنى البنات اللى مبيحطوش مكياج دول كلهم مفيهمش واحده حلوه ملت عين حضرتك و اللى بتحط مكياج بس اللى عجبتك طب تصدق و تؤمن بايه
عمر / لا اله الا الله
شيماء / انت تستاهل انت و اللى زيك انكوا يتعمل فيكوا المقلب ده شوفت بقى
عمر / هههههههههههههههههههه طب بالراحه طيب
شيماء / مهو حضرتك اللى مستفز اوى بصراحه
عمر / حضرتك و مستفز مش ماشيين مع بعض فى نفس الجمله خالص
شيماء / سورى
عمر / ههههههههههههههههه سوريهك معاكى ياختى
شيماء تبصله و تبتسم
.....................................
فى الحاره
المعلم اسعد يدخل معلم القهوه يلمحه يوقفه
المعلم / يا معلم اسعد يا معلم
اسعد / خير يا معلم
المعلم / مالك كدا معدى لا سلام و لا كلام تعال اقعد اعزمك على كبايه شاى و اللاعبك دورين طاوله اقطعك فيهم
اسعد / معلش سماح النوبه يا معلم اصلى تعبان شويه و يادوب اطلع ارتاح
المعمل / لا سلامتك يا خويا مالك فى ايه
اسعد / مفيش شويه صداع كدا من قله النوم
المعلم / الله يعينك بس لامؤاخذه طمنى عالحجه عامله ايه
اسعد / الحمد لله كويسه هى دلوقت تحت المتابعه و بكره هيروحوها
المعلم / بالسلامه يارب هو ايه الحوار يا معلم الناس مبتبطلش كلام و كل واحد بكلمه
اسعد / والله معارف اقولك ايه الموضوع شكله كبير
المعلم / اوعى يكون
اسعد / لا لا لا اوعى تفكر فيها حتى مرام دى ست الكل دا حتى جوزها سايق طوب الارض عشان يراضيها الموضوع شكله اكبر من كدا
المعلم / و هو فى اكبر من كدا يا معلم
اسعد / والله مش عارف ينفع اقولك و لا ما ينفعش دى اسرار بيوت و اخاف مازن بيه يزعل منى بس هو الموضوع مشاكل مع اهله انت عارف انهم رافضين الجوازه مستقليين بالبت
المعلم / انت بتقول ايه يا معلم
اسعد / والله هو ده اللى حصل زى مبقولك كدا
المعلم / لا اله الا الله هى الدنيا جرا فيها ايه و بعدين مخلاص يعنى اتجوزوا و الموضوع اتقفل جايين يخربوا عالبت يوم فرحها هو فى كدا فى الدنيا
اسعد / نعمل ايه بس يا معلم عن اذنك
المعلم / لا اله الا الله ربنا يهدى النفوس ربنا يهدى
المعلم يدخل يقعد راجل يقعد جنبه
الراجل / فى ايه يا معلم احكيلى
المعلم / احكيلك ايه بس و اقولك ايه الواحد من كلمتين بس دمه اتحرق
شاب كان قاعد بيسمع يقوم
الراجل / يعنى زى مالناس بتقول كدا
المعلم / لا لا لا ربنا يستر على وليانا و مرام احنا عارفينها و عارفين اخلاقها كويس الموضوع حاجه تانيه خالص انا هحكيلك اتنين قهوه هنا ياض يا سلامه
سلامه / من عنيا يا سيد المعلمين
................................
فى شقه مروه
الست / انت بتتكلم بجد يا معلم
اسعد / والله زى مبقولك كدا الواد كان بيبكى بدل الدموع دم اسمعينى سامحينى حقك عليا و البت تصرخ غور من وشى طلقنى لحد موقعت من طولها بقينا مش عارفين نبص عليها و لا على ستها بس الحمد لله فاقت علاطول و من ساعتها اختفى و بعت شريف
الست / لا اله الا الله هو الناس جرالها ايه
اسعد / بقولك ايه يا وليه احنا ملناش دعوه بالحوار ده احنا عندنا بنات
الست / و انا مالى ياخويا
اسعد / انا بقولك اهو لا تمسكى التليفون ترغى مع دى و لا تسمعى لدى خلينا فحالنا كفايا الكلام اللى اتقالنا من تحت راسك المره اللى فاتت
الست / من تحت راسى انا ماشى يا معلم عن اذنك
..........................
فى شقه تانيه فى الحاره
ست بتغرف للشاب اللى كان عالقهوه
الشاب / والله يا ماما زى مبقولك كدا دا المعلم عباس كان هيتجنن ماشى فى الشارع يقول لا اله الا الله لا اله الا الله
الست / لا اله الا الله شوف البت و عمايلها
الشاب / انا مقدرتش استحمل كلامهم عالقهوه دى برده اعراض ناس
الست / اتارى الواد توفيق كام معاه حق و احنا كلنا مش واخدين بالنا
الشاب / انا خوفى كله دلوقت من مازن بيه هيعمل فينا ايه انا و كل اللى شغلهم من اهل الحاره
الست / يا مصيبتى تصدق يا وله ازاى فاتنى الموضوع ده و بعدين و احنا مالنا
الشاب / و احنا مالنا ازاى هو مش كان مشغلنا علشان خاطرها دلوقت انا خايف لينتقم منها فينا
الست / لا متقولش احنا ملناش دعوه بيها تعرف انا هتصل بالست ام على و نشوف هنعمل ايه فى الموضوع ده مهو ابنها ملطوط معاك فنفس البلوه دى كان مستخبيلنا فينا دا بس يا ربى
الشاب يبص لامه و ياكل و هو مدايق
........................
فى العربيه
شريف بيتكلم فى التليفون
شريف / ماشى شكرا مع السلامه
شريف يقفل و يبص لمازن
شريف / زياد و لبنى سافروا دبى و الباقيين نص ساعه و يكونوا فى المخزن بس انت ناوى تعمل فيهم ايه
مازن / مش عارف والله الموت بالنسبالى دلوقت شايفه مش كفايا
شريف / سيبك منهم متسبش الحمار و تتشطر عالبردعه
مازن / قصدك ايه
شريف/ هتعمل ايه مع زياد هتسيبه كدا
...........................
