(((((((((السكة شمال ٢))))))))
#لولو_محمد
الحلقه ٣٣
سحر / انا تعبت و عينى وجعتنى
مرام / خلاص قربنا نخلص اهو
سحر / على فكره انا اتفرجت على الحاجات اللى انتى عرضاها عالصفحه فى شال اسود حلو اوى كنت بفكر تعمليهولى اديه لماما فى عيد الام تعرفى تعمليهولى بجد
مرام / اه اعملهولك مفيش مشكله
مصطفى يدخل مبتسم
مصطفى / مساء الخير ايتها الاخوات الفاضلات
سحر / متاخر يا باشا نخصملك اليوم و لا ايه
مصطفى يشوف مرام وسطهم يتقفل
............................
مصطفى / كنت فى الاجتماع بتاع الجمعيه
سحر تاخد ورقه طويله
سحر / دا كشف بالادويه و صلاحيه كل دوا و الكميه بتاعته دى فكره مرام عشان بدل ما كل شهر نقعد ننزل كل الادويه و نفرزها هيسهل علينا كتير
مصطفى / كويس انا رايح المخزن فى ملابس عاوزه تتفرز هتعوزوا حاجه هنا
سحر / لا احنا قربنا نخلص هنا و هنحصلك
مصطفى / تمام هسبقكوا انا سلام بقى
مصطفى يمشى من قبل حتى ما يردوا عليه
بنت 1/ دا ماله ده
سحر / انتى يعنى مش عرفاه تلاقيه افتكر حاجه ... على فكره مستر مصطفى ده لاسع بس شخصيه جدعه اوى تقريبا هو روح الجمعيه هنا
بنت 2/ بس نفسى اعرف بيوفق ازاى دانا يادوب عالكليه و محتاسه و ماما كل يوم تعملى فيلم انما هو بيشتغل و يدرس و كمان الجمعيه بيجيب وقت منين نفسى افهم تصدقى مره بهزر معاه و بساله بيقولى مهما عذبتونى مش هعترف لاسع هههههههههههههههههههههههه
سحر / انا اللى عمرى مهنساه لما روحنا نزور مستشفى الاورام و قعد اتكلم مع طفل و قعد يحكيله فى قصص و يلعب معاه و بعدين جينا نروح الزياره اللى بعده و سال عنه لقاه اتوفى ياربى
بنت 3 / فاكره اليوم ده مشى و هو بيعيط و مكملش و قعد يجى يومين مبيجيش الجمعيه و لما جه مكنش بيتكلم مع حد خالص
سحر / كان يوم صعب اوى
مرام / بيتهيالى كدا خلصنا صح و لا لسه فى كراتين تانى جوه
بنت 2/ اشهد ان لا اله الا الله مش مصدقه نفسى اخيرا ياربى
سحر / متفرحيش اوى كدا لسه هنروح المخزن
بنت 3/ لا هتروحوا المخزن انا عندى حساسيه و مش هقدر خالص
سحر / سيس
بنت 2 / و انا كمان كفايا عليا اوى كدا النهرده عشان والله ورايا مزاكره كتير اوى
سحر / تمام و انتى يا مرام
مرام / لا انا هاجى معاكى
سحر / كنت عارفه ان انتى اللى فيهم يلا يا بنتى يلا
سحر و مرام يسلموا على باقى البنات و يمشوا
مرام / هنركب
سحر / لا دا المخزن هناك على اول الشارع خطوتين
مرام / انتى فى الجمعيه دى من زمان
سحر / بقالى سنه يوميها نزلنا البلد نزور عمتى و كدا قابلناهم كانوا عاملين معرض ملابس كبير اوى عمتى نزلت جابت من عندهم هدوم كتير جيبه جينز بخمسين جنيه جديده بالتيكت و بجامه بيت بعشره جنيه و جزمه لابنها بخمستاشر جنيه مع العلم ان عمتى مش محتاجه بس اهو ... المهم لما روحنا سالت عنهم و اتطوعت
مرام / تعرفى لما قابلتك فى المسجد يوميها كان تقريبا اسوء يوم فى حياتى عارفه الفتره اللى فاتت كلها كانت صعبه بس اليوم ده بالتحديد كان صعب اوى تحسى انك وحيده ملكيش حد اقرب الناس ليكى بيدوكى ضهرهم ناس ربوكى و عارفينك بس بيتخلوا عنك و ناس ميعرفوكيش بيتهموكى بحاجات مش فيكى و انتى عمله زى الفرخه الدايخه من هنا لهنا بتتخبطى
مرام تمنع دموعها تنزل سحر تقف مرام تبصلها
سحر / المخزن اهو وصلنا
مرام تهز راسها و تاخد نفس و تدخل مع سحر تلاقى تهانى مع مصطفى
مصطفى / ههههههههههههههههههه طب والله حصل
مصطفى يشوف مرام يبص الناحيه التانيه
سحر / السلام عليكم مش تقولى ان استاذه تهانى بذات نفسها هنا
تهانى / جرا ايه يا بكاشه انتى هتعمليهم عليا و لا ايه اهلا ازيك يا مرام عامله ايه
مرام / كويسه الحمد لله
تهانى / كويس انى شوفتك سحر قالتلى انك عندك جروب و بتبيعى فيه الحاجات اللى جبتيها للجمعيه امبارح
مرام / اه حاجه زى كدا
تهانى / طب انا بنت اختى خطوبتها الاسبوع الجاى حاجه كدا عالديق فى البيت و انا اتكلمت معاها عنك و شكرتلها فى حاجتك اوى
مرام / مش عارفه اقول لحضرتك ايه شكرا
تهانى / لا تقولى ايه مش بالكلام يا حبيبتى انا عوزاكى ترفعى راسى و تشرفيني
مرام / باذن الله
تهانى / مضيتى استماره عضويه
مرام / ايوه
تهانى / حلو اوى انا لازم امشى اشوفكوا بعدين يا بنات
مصطفى / انا كنت ماشى لو معكيش عربيه ممكن اوصلك
تهانى / لا معييش و حتى لو كانت عزومه مركبيه لازم هتوصلنى
سحر / ههههههههههههههههههههه
مصطفى / بس كدا تؤمرى اتفضلى
مصطفى و تهانى يمشوا و مرام و سحر واقفين متابعينهم
..................................
فى مكان مهجور زى مخزن قديم
توفيق يدخل ووراه رجاله كتير ميلاقيش اى حد توفيق يشاورلهم ينتشروا فى المكان و فجاه صوت عربيات تقف و تفرمل توفيق يجرى يقف ورا الباب و يبص يلاقى مازن بينزل من عربيته و يروح يسند عالكابوت
مازن / توفيق اطلع عايزك
توفيق يستغرب و يبص حواليه الرجاله جاهزين بالسلاح يبص تانى يلاقى جيش بوديجاردات بينزل من العربيات و بيقفوا حوالين مازن واحد منهم يدى لمازن ميكروفون مازن يطلع موبايله و يحطه فى الميكروفون
صوت احمد / و فى الاخر منافسينا فى السوق هما اللى هيطلعوا كسبانين و كلنا هنخسر فى الاخر
صوت مازن / عليك نور
صوت احمد / يبقى نقرى الفاتحه
صوت مازن / على روح مين
صوت زياد / انت مش لسه قايل ان الحرب دى هنطلع منها خسرانين و ان الاحسن نتصالح
صوت مازن / انا عاوز تيفا اعتبروه كبش فدا و انا هعتبره تعويض عن الاضرار اللى عملتوها او مثلا بادره سلام
صوت احمد / موافق
صوت مازن / قشطه يبقي نقرى الفاتحه على روح توفيق
صوت احمد / نقرا الفاتحه
مازن يمسك المايك
مازن / حلفائك خانوك يا ريتشارد اصل هى اللعبه كدا يا تيفا المصالح بتتصالح و فى الاخر العيال اللى زيك هما اللى بيروحوا فى الرجلين على فكره انا مش جاى ائذيك مع انى اقدر انا جاى اتكلم بس
توفيق يزعق من جوه
توفيق / و حق امى اللى فى الحبس فين
مازن / و حق مرام فين يا توفيق
توفيق / انت مش طلقتها
مازن / ميخصكش و تعال كلمنى هنا زى الرجاله بدل مابعتهم يجيبوك
توفيق / متقدرش اللى هيقرب منكوا هشرحوا
مازن / لا خوفت اساسا اللى عندى قولته خليك انت بقى براحتك
مازن يشاور للرجاله يركبوا العربيات و يمشوا و توفيق يطلع يقف بره يجى شاب يقف جنبه
الشاب / ايه النظام يا رياسه الحوار كدا بهوء مننا
تليفون توفيق يرن يرد
توفيق / وحياه امك ... يعنى ايه شمعوا المحل دانا هخرب بيتكوا ... اقفل اقفل انا جايلك
توفيق يقفل السكه
توفيق / ماشى يا ولاد الكلب اما وريتكوا مبقاش انا تيفا الحو .... يلا يا رجاله
...........................
فى عربيه مصطفى
تهانى / لا مهو انا مش لسه هعرفك امبارح يا مصطفى انت لسه داخل و بتقول بسم الله الرحمن الرحيم فجاه بتسيب المكان و تمشى دا غير امبارح فى ايه قولى
مصطفى / مفيش حاجه عادى يعنى قولت اسيبهم براحتهم
تهانى / دا على اساس ايه لا انتوا لوحدكوا و لا المكان مقفول عليكوا و لا دى حتى اول مره تشتغل و معاك بنات فى المخزن
مصطفى / حضرتك مكبره الموضوع اوى مفيش حاجه صدقينى
تهانى / على خالته ياله
مصطفى / ههههههههههههههههههههههه ايوه التحقيق بصوره رسميه مجابش نتيجه نستغل بقى الوسايط و النفوذ و مش بعيد اروح النهرده الاقي حضرتك اتصلتى بماما عشان تكمل التحقيق معايا فى البيت مش كدا
تهانى / الله مدام عارف انى مش هسكت متريح نفسك و تريحنى و تعترف
مصطفى / عباس الضو بيقول لا ... وصلنا
تهانى / فلت المرادى بس تعمل حسابك المره الجايه
مصطفى / هسلملك على ماما حاضر
تهانى / شوفوا الولد
مصطفى / هههههههههههههههههههههه
تهانى / ماشى ماشى انا نازله يلا سلام
مصطفى / سلام يا طنط
تهانى / خالتو يا ولد
مصطفى / سلام يا خالتو اسف
تهانى تنزل و تشاور لمصطفى يمشى
.............................
فى المخزن
مصطفى يدخل يلاقى سحر شغاله هى و بنت و شاب يدخل يساعد
مصطفى / الله ينور يا رجاله ... هى صحبتك مشيت صح
سحر / اه روحت عندها شغل فى البيت
مصطفى يهز راسه اه
مصطفى / صحيح انا فاكر فى اجتماع مره قولتى انك بتعانى انك تقنعى البنات انهم يجوا معاكى
سحر / فعلا اصلا فى بنات كتير اهاليهم بيمنعوهم خصوصا بعد الثوره و الحاجات دى بيخافوا من نشاط الجمعيه لتكون كدا و لا كدا اصلا الملتزمين بقوا كلهم تحت الشبهه اساسا
مصطفى / غريبه امال اقنعتيها ازاى
سحر / ماقنعتهاش انا اول ما قولتلها على الجمعيه هى اتحمست جدا و جت
مصطفى / معاكى فى الكليه هى
سحر / لا اتعرفت عليها اول امبارح فى مسجد لما رجعنا من القافله
مصطفى / ايه ده دانا كنت فاكركوا صحاب من زمان
سحر / لا
مصطفى / غريبه دى
سحر / ليه يعنى ماحنا اهو جينا من غير ما حد يتحايل علينا
مصطفى / لا مقصدش انا اقصد ان اللى يشوفكوا يقول قريبين اوى من بعض مش سهل انك تاخدى على حد بالسرعه دى و بالشكل ده
البنت / لا بس هى عسوله و تتحب فعلا و دمها خفيف
الشاب / لا بس مخبيه حاجه
البنت / يادى كورسات التنبيه البشريه و البدى لانجويج اللى انت واخدها و هتقعد تقرفنا بيها كل شويه
الشاب / يا بت هتغابى عليكى
مصطفى / انتوا اخوات فى البيت يا حبيبى هنا تظبط
البنت / يخليك للغلابه يا مستر مصطفى
الشاب / لا بس هى فعلا رد فعلها كان اوفر اوى و خصوصا لما اتكلمنا عن الدبله اللى فى ايدها
البنت / هى حره تتكلم زى ما هى عاوزه انت اللى فضلت تسال كانك بتحقق معاها لحد ما ما طفشتها و ابقى قابلنى لو جت تانى
الشاب / تبقى اوفر و لا مش اوفر ايه اللى يدايق لما اسالها عن جوزها و ان كان راضى انها تيجى و لا لا و تبقى تجيبه معاها و كدا
سحر / عشان هى مطلقه مش متجوزه و بعدين بصراحه ليها حق تدايق البنات فى الصيدليه برده علقوا عليها و طبعا كانوا رخمه جدا و فضلوا يعصروها اساله و مهما حاولت تتهرب من الاجابه مكنوش بيسكتوا لحد ما تجاوب
الشاب / ايوه ايه العيب انها تكون مطلقه عشان تنكسف و تدايق يعنى
سحر / هى ادايقت عشان مش عاوزه تتكلم عنه مش عشان هى مطلقه بصوا اللى فهمته فى الصيدليه انهم اتجوزوا بعد قصه حب جامده و اهله ما كانوش عاوزينها فانتهت بالطلاق فى الاخر والله صعبت عليا اوى لما استاذنت و دخلت الحمام حسيت انها بتعيط .. قفلت على نفسها وقت طويل لدرجه انى قومت خبطت عليها عشان اطمن طلعت و دحكت و كملت عادى فسكت و مرضتش اتكلم
البنت / ادى اخره اللى بيدخل فى خصوصيات الناس كل واحد فيه اللى مكفيه ليه كل واحد ميبقاش فى حاله والله ادايقت عشانها
سحر / بس هى بنت كويسه و حافظه القران و بتصلى و بتعرف ربنا انا متاكده انها بنت كويسه جدا
مصطفى / طب ممكن نبطل كلام بقي و نخلص و لا مش ناويين تروحوا
الكل يدحك و يكملوا شغل
.............................
فى شقه سميحه
سميحه / لا له حق يقلق طبعا الله مش اخوكى
مرام / تلاقيه كان بيسال اصلا عشان يقول لمازن
سميحه / مرام
مرام / فى ايه يا تيته
سميحه/ هو ايه اللى فى ايه يا تيته هو مش محمود ده اللى كان رافض الجوازه مالاول
مرام / و الحمد لله مازن عرف يزغلل عينيه كويس
سميحه / بلاش سوء النيه ده دا هو الوحيد اللى وقف جنبك طول حياتك و بعدين انتى و مازن اطلقتوا هو ماله يسيب الشغل ليه
مرام / عشان مازن مش مشغله لسواد عنيه
سميحه / ليه يعنى هو محمود خايب مثلا مهو شاطر و بيطلع مالاوائل و بكره يبقى حاجه كبيره اوى
مرام / مقولتش حاجه والله انا اساس والله بتمناله كل خير بس
سميحه / هو انتى بتعملى حاجه خايفه مازن يعرفها
مرام / يعرف و لا ميعرفش هو بره حياتى اصلا
سميحه / امال بقى
مرام / مهو انا مش عوزاه يلاقى سكه يدخل بيها حياتى تانى
سميحه / مرام فى كل الاحوال محمود اخوكى و عشره عمر و مش صغير و عارف الصح مالغلط و لا انتى صغيره فلو سمحتى لو فى حاجه جواكى او خايفه من حاجه اقعدى مع محمود و اتكلموا زى الكبار بلاش اسلوب العيال ده لو سمحتى
مرام / ماشى
سميحه / احكيلى بقى انبسطتى فى الجمعيه
مرام / جدا النهرده كان فى جرد للصيدليه و فرز ملابس بجد انبسطت جدا و اتعرفت على شباب زى الورد بجد فرقوا معايا اوى تعرفى يا تيته انا كنت خلاص فقدت الامل ان فى فى الدنيا دى ناس كويسين بس لما شوفتهم بجد فرحت اوى طول الوقت بيزكروا ربنا و كل شويه يقعدوا يسبحوا و هما بيشتغلوا و حتى غير كدا بيقعدوا يهزروا و ينشدوا و يحكوا مواقف جميله اوى و فى الصيدليه كان فى بنت صوتها حلو جدا حافظها القران كانت بتقول سوره الرحمن بمنتهى الجمال بجد ربنا يباركلها يارب
تليفون مرام يرن
مرام / دا الراجل صاحب المحل اللى بوديله التارتات .... الو
الراجل / استاذه مرام
مرام / ايوه مع حضرتك ازيك يا استاذ جمال ايه اخبار التارتات
الراجل / مش عاوز اقولك قد ايه ممتازه و مفيش حد جربها الا لما اخد تانى كنت عاوز خمسين واحده بكره لو ينفع
مرام / ينفع طبعا هقوم اعملهم حالا و كمان هجيب معايا بكره رز بلبن و حاجات تانيه حضرتك تدوقها
الراجل / ممتاز هستناكى بكره
مرام / باذن الله حاضر مع السلامه
مرام تقفل
مرام / انا هدخل اعمل التارتات ادعيلى سوقهم يمشي و الحال يتصلح
سميحه / تحبى اساعدك
مرام / لا خلصي اللى فى ايدك عشان تبدئى فى شال سحر
سميحه / حاضر
مرام تقوم تدخل المطبخ
.......................
فى الشركه عند مازن
شريف / و ايه المشكله خليها تسلى نفسها
مازن / ايوه بس احنا منعرفش حاجه عن الجمعيه دى و لا طبيعتها ما يمكن عاملينها كوفر لحاجه تانيه
شريف / نسال و نتاكد
مازن / ازاى بقي اذا كان الباشا مش عارف اسمها
محمود / مهو عشان كدا بالظبط معدتش عارف عنهم حاجه مرام بتتعامل معايا على انى جاسوس اسرائيلى و هاجى اقولك كل حاجه عنها
مازن ينفخ
شريف / كانت فايته عنى فين دى
شريف يطلع الموبايل و يتصل بحد
شريف / ايوه يابنى ابعتلى نمره الراجل اللى بيتابع مرام
محمود يبص لمازن
شريف / انا عارف ان محصلش مشاكل عاوز اساله عن حاجه تانيه ....عاوز اعرف اسم الجمعيه اللى بتروحها ...والله طب اعرفلى و هاتلى كل التفاصيل بتاعه الجمعيه دى......شكرا سلام
شريف يقفل
شريف / كدا كدا معاه ملف فيه كل تحركاتها هيفتحه و يشوف اسم الجمعيه و يسال عنها
مازن / انت عبقري يا شيكو
محمود / انتوا ممشين حد ورا مرام
مازن / امال هنحميها فى البيت بس فى عربيه بتمشي وراها من بعيد عشان لو لا قدر الله حصل اى حاجه
محمود / مرام لو عرفت هتنفخكوا
شريف / مش هتعرف الا لو قولتلها انت
مازن / و ساعتها انا هنفخك
محمود / مستهونين بمرام انتوا صح
شريف/ الناس دى عارفه شغلها كويس
محمود / ربنا يستر
..............
فى شقه مصطفى
مصطفى فاتح اللاب فى اوضته و فاتح الفيس على صفحه كلنا مرام نور الدين و قاعد يقرا الكومنتات شاب يفتح الباب فجاه مصطفى يتخض
الشاب / هههههه ايه يا عم مالك
مصطفى / مش تخبط يا فادى خضيتنى
فادى يبص فى اللاب
فادى / لو مكنتش عارفك كنت قولت بتتفرج على سيكو سيكو .. ايه دى اااااه مرام نور الدين
مصطفى / ايه يا عم بتقول كانك عارفها
فادى / و مين فى مصر ميعرفهاش
مصطفى / و تعرف ايه عنها بقي يا مستر فاديهولمز انت
فادى / اتريق اتريق يا عم مقصه حياتها من الالف للياء عالفيس
مصطفى / ايوه بس فى مليون قصه واحده انها بنت شمال جدا و التانيه انها بنت يمين جدا هى انهى واحده فيهم
فادى / والله معرفش بس جوزها طلع لايف و قال انها شريف و كل ده كدب حتى قفل كل الصفح اللى كانت بتهاجمها و قبضوا عالادمنز بتوعهم و عمل الصفحه اللى انت شايفها دى بيتهيالى المفروض يكون الجدل فى القضيه دى اتحسم انها بنت كويسه و مظلومه و اهل جوزها هما اللى بيحاربوها اصل بعد كلام جوزها هنحتاج ايه تانى
مصطفى / طب مفى كومنتات كتير اوى عالصفحه دى بتشتم فيها و الادمن بيحذفوها اول باول و بيحظروا اللى بيعمل كدا دا ما يخليكش تشك فى حاجه اساسا الصفحه دى مموله
فادى / اصلا من امتى و انت بتتبع عورات الناس يعنى مش طبعك
مصطفى / والله ابدا انا بس بحاول افهم
فادى / تفهم ايه اصلا يا مصطفى و ليه يفرق معاك فى ايه بص يا سيدى اولا كدا الفيديوهات اللى اتنشرت من فتره دى كانت برده مموله و اللى كان بيدافع عن البنت او حتى بيقول كلمه لله زى اتقوا الله مثلا و عيب و من ستر مسلما انا نفسى لما قولتلهم يا جماعه احنا عندنا ولايا و بلاش الكلام ده اتحظرت و دا اللى خلانى اقول انها كويسه و زى ما قولت بعد جوزها مفيش كلام تانى خلصت لو هى وحشه اكيد مش هيطلع يتكلم يعنى
مصطفى / البنت دى عندنا فى الجمعيه و بتقرب من البنات بسرعه
فادى / لنفرض يا مصطفى انها كانت وحشه زى ما بيقولوا و تابت نقفل احنا فوشها باب التوبه و نقولها
مصطفى / لا بس منسبهاش تشد البنات لسكتها او تشوه سمعتهم و سمعه الجمعيه انت عارف كويس الجمعيات دى موقفها حساس قد ايه
فادى / و ناوى تعمل ايه
مصطفى / و لا اى حاجه و لا عارف اعمل اى حاجه لان كل الكلام اللى انت قولته فى دماغى يعنى لو البنت مظلومه و كويسه و ضحيه ناس ميعرفوش ربنا و لو حتى غلطت او كانت وحشه و قررت تتوب مثلا مقدرش امنعها و لا انا اقدر انى اقف فى طريقها و كمان فى نفس الوقت مينفعش ابقى عارف انها هتجيب مشاكل للجمعيه و للبنات و اقف ساكت
فادى / خلاص روح افضحها قول للكل البنت دى عليها كلام كذا كذا و خلى الكل يخاف يتعامل معاها و خليها متجيش الجمعيه تانى و ياعالم ساعتها يمكن تنتحر و تريحنا او يعنى تقرر بقى تبقى شمال بجد مدام كدا كدا اليمين مش نافع
مصطفى / عمرك ما دفعت عن حد كدا اشمعن البنت دى اللى بتدافع عنها اوى كدا
فادى / عشان انا مش مقتنع انها وحشه اصل فيديوهات الفضايح بتنتشر زى النار فى الهشيم منغير اى مجهود فلما كمان تبقى مموله و يعملوا بلوك لاى حد يتكلم و يستخدموا الاوتوكومنت عشان يزودوا الكومنتات اللى بتشتم يبقى فى حاجه غلط و كمان كل حاجه حصلت بعدها اللايف بتاع جوزها و طلوعه فى التليفزيون و الحرايق اللى حصلت فى شركته و شركه واحد قريبه و اخرهم ان البنت تيجى جمعيه خيريه هى لو بتصطاد بنات هتصطادهم من المسجد و الجمعيات الخيريه يا مصطفى متشغل مخك شويه تصدق و تؤمن بايه
مصطفى / لا اله الا الله
فادى / البنت دى صعبانه عليا جدا يعنى بحاول اتخيل احساسها مش عارف
مصطفى / تشوفها تحس انها عاديه خالص بتدحك و تهزر و لا كانها من اقل من شهر كانت مفضوحه فضيحه زى دى و دا اللى خلانى اشك فيها
فادى / معاك حق فى العاده لو بنت مرت بالموقف ده غالبا يا بتنتحر يا بتدفن نفسها بالحياه لكن اللى بتقرر تحارب و تكمل حياتها وسط ناس لا بتنسى و لا بترحم سبحان اللى اداها القوه دى
مصطفى / يعنى اعمل ايه
فادى / و لا حاجه زيها زى اى متطوعه تانيه ملكش دعوه بيها
مصطفى / انت شايف كدا
فادى / انت شايف غير كدا ؟؟ اوعى يا مصطفى تكون
مصطفى / لا لا لا والله ما قولت حاجه و لا حتى فتحت بقى بحرف لحد
فادى / حتى لو غلطت و دى اشك فيها زى ما قولتلك استر عليها يمكن ربنا يردهالنا فعيالنا بما اننا معندناش اخوات بنات يعنى المهم شوفت نستنى انا كنت جايلك ليه
مصطفى / خير
فادى / عاوز الجرافاته البنفسجى بتاعتك
مصطفى / فى الدولاب خدها
فادى يروح يفتح الدولاب و يشد جرافاته و يطلع موبايله و يبص فيه على صوره
فادى / دى نفس لون الفستان صح
مصطفى / هههههههههههههههههههه اه تقريبا نفس الدرجه
فادى / طب الحمد لله متلبس و تيجى معانا الفرح
مصطفى / اه طبعا اجى عشان امك و حماتك يستلمونى نقى عروسه نقى عروسه و فى الاخر اقف مكانك كدا بطقم الجرافات مع لون الفستان عشان البنات فى الفرح يهايحوا علينا قد ايه احنا بنحب بعض قال يعنى انت لو لبست جرافات لون تانى هتبقى مش بتحبها مثلا
فادى / هو ده عيبه بقى اش فهمك انت اصلا يابنى فى الحب اساسا
مصطفى /سبتهولك يا خويا فكك منى بقى و اتفضل خد الباب فى ايدك
فادى / كنت ماشى اصلا
فادى يبتسم لمصطفى مصطفى يشاورله باى فادى يطلع و يقفل الباب وراه و مصطفى يبص فى اللاب على صور لمرام
....................................
تانى يوم فى شقه مرام
مرام تفتح الباب تلاقى محمود فوشها
محمود / صباح الخير
مرام / صباح النور
محمود / تسمحيلى اوصلك و لا لسه مقموصه
مرام / مقموصه !!!
محمود / اسف يا ستى مخصمانى
مرام / انا لا مقموصه و لا مخصماك عادى على فكره
محمود / مرام
مرام / نعم
محمود / انا فصفك على فكره
مرام / انا بس خايفه عليك ليقلشوك تانى اللى زى دول ملهمش امان و خساره فيهم تعبك
محمود / محدش قلشنى انا اللى سبت الشغل تمام
مرام / ماشى اللى تشوفه
محمود / ممكن بقى اوصلك
مرام / ممكن يلا
محمود / اتفضلى
محمود و مرام ينزلوا السلم
محمود / انتى كنتى متفقه مع سليمان يوصلك
مرام / لا سليمان هيعدى كمان شويه ياخد من تيته تارتات يوصلها عشان للاسف و انا بتفق مع الراجل من حماسى نسيت خالص ان فى محاضره تانيه
محمود / كتر خيره سليمان بس على فكره انا ممكن ابقى اوصلها عادى
مرام / لا لو عاوز تساعدنى ممكن تعمل حاجه احلى ممكن تشتريلى حاجات عشان عاوزه اعمل كميه تانيه كبيره و هو ميعرفش الحاجات اللى بستخدمها اخاف يجبلى حاجات اى كلام
محمود / بسيطه ادينى لسته الطلبات و انا اجبهالك
مرام / شكرا على فكره بقى ينطلب منى شغل كتير اوى النهرده انطلب منى خمسين تارت و فى اخر الاسبوع خطوبه و هعمل اوردر كبير خالص
محمود / الله اكبر ما يحسد المال الا صحابه
مرام / دى مديره الجمعيه لما داقت التارتات فى الحفله بتاعه الايتام قالت لاختها و لما الست كلمتنى اديتها اوفر جامد هعملها ميه علبه كل علبه فيها وحدتين مينى بيتزا و وحدتين ساليزون و وواحدتين مينى كرواسون و معاهم مينى تارت و قطعه جاتوه و شوكه بلاستيك و منديل حسبتلها العلبه بخمسه و عشرين جنيه
محمود / والله ما يجى تعبك فيهم
مرام / اعتبرنى بكسب زبون بس كسبانه برده
محمود / كام يعنى متين تلتميه جنيه
مرام / مانا خسرت كل زباينى يا محمود اعمل ايه لازم احرق شويه لحد ما اتعرف و بعدين فى ميه فرد هيدوقوا شغلى و بكره يعرفوه عاوزه بقى اطبع كروت و لا حاجه و احطها فى العلب دى
محمود / فكره حلوه اوى خلاص يا ستى سيبى الموضوع ده عليا انا هظبطهولك كلو شوفى محتاجه انتى ايه بس و انا اجيبهولك
مرام / تبقى عملت فيا جميل العمر اركب اركب
محمود يفتح العربيه و مرام تركب و يسوق و يمشى
.......................
قدام فندق احمد
احمد يخرج من الفندق يجيبوله عربيه يركب و يسوق و يمشى و لما يطلع على طريق فاضى توفيق يطلع و يحط المطوه على رقبته
توفيق / صباح الخير يا سيد البهوات
احمد / توفيق !!!!
................
