((((((السكة شمال ٢)))))))
#لولو_محمد
الحلقه ١٠١
فريده / و طبعا الست هانم التانيه فرحانه بالهيصه ما هى مش تعبانه فى حاجه البنت دى هتضيع فلوس ابنك
ابراهيم ما فيش اى رد فعل
فريده / و ايه ملك دا كمان اللى رايحيم يسوه دا اتلغى من ايام مسلس ملك روحى بتاع يسرى طبعا تلاقيها هى اللى مختاره الاسم هنستنى منها ايه يعنى الفلاحه بنت السباك دى .. مالك يا ابراهيم .. ابراهيم ابراهيم
ابراهيم يبصلها و يبتسم
فريده /بتكلم من الصبح مالك
ابراهيم / انا كويس الحمد لله بقولك ما تعرفيش مونى هتولد امتى
فريده / ادينا مستنيين بس المفروض لو مرام ولدت النهرده يبقى مونى مش قبل اسبوع اسبوعين انت عارف ان دى دخلتها قبل دى صحيح مازن عمل ايه معاك لما كلمته لفت نظره ان مرام كانت بتبات فى الشقه مع اللى اسمه محمود ده
ابراهيم يبصلها
....................................
فريده / مالك يا ابراهيم
ابراهيم / البنت ...مازن ...
ابراهيم يبتسم
فريده/ ايه ؟؟
ابراهيم / البنت شبه اميره البنت
فريده / ايه الهبل ده مين اقنعك بالكلام ده الاطفال فى السن ده كلهم شبه بعض اصلا و ملامحهم بتتغير
ابراهيم / خطفت قلبي يا فريده كنت عاوز اشيلها و اخدها فى حضنى البنت زى القمر
فريده / كنت عارفه انك هتتعلق بالبيبي دى هى كمان كانت عارفه ده و عشان كدا خططت لكل ده
ابراهيم / البنت
فريده/ سيبك من البنت امرها محلول خلينا فى امها
ابراهيم / مازن بيحبها
فريده / يعني وافقت ان البنت دى تبقي مرات ابنك خلاص
ابراهيم يسكت و يفكر
فريده / اوعى تفتكر انها هتنسي اللى انت عملته فيها هتفضل تتمسكن و تدحلب لحد ما تقلب مازن ضدك و حتى البيبي اللى انت فرحان بيها دى هتقلبها عليك هيبقي نفسك تشوفها و تذلك انت محتاج عزوه تسندك لما تكبر يا ابراهيم و مرام دى مش هتسكت الا لما تنتقم منك
ابراهيم / بس انا ما عملتش حاجه
فريده / اكيد سمعت الريكورد
ابراهيم / لا لا انا روحلتها البيت و استقبلتنى و ضايفتني
فريده/ و حدفت الكاسه على اخر دراعها
ابراهيم / تخيلى يا فريده انا كنت عاوز القمر ده يموت
فريده / انت مش عاوز غير مصلحه ولادك ده حق مشروع لاى اب و بعدين لو على الاحفاد خلاص هانت و بكره مونى تولد
ابراهيم / بكره!!!
فريده / اقصد قريب يعنى هانت
ابراهيم يحبط
فريده / بص يا ابراهيم انا هسكت عشان ما تفتكرش انى باومك على ابنك و حفيدتك بس عوزاك تروح تجرب كدا تقوله شيلنى ملك جرب تحضنها و صدقنى هتشوف حقيقه مرام و كرهها ليك بعنيك
ابراهيم يبصلها
..................
فى شقه مرام تانى يوم
شريف يفتح الباب و شايل شنطه البيبي على كتفه و مازن مسند مرام ووراهم فاطمه شايله ملك يدخلوا يلاقوا الشقه كلها بلالين و زينه و يافطه ويلكم ملوكه و شيماء و رؤي و صافى و تقى و بسمه جوه مرام تبتسم
مرام / انتوا اللى عملتوا كل ده
صافى / اقل استقبال بالمزه
مرام / حبيبتي تعبتى نفسك اوى و انتى عروسه
مازن / تقعدى هنا شويه
مرام / لا مش قادره اقعد عاوزه افرد ضهرى
مازن بيسند مرام للاوضه تنام على السرير و يحط مخدات تحت ضهرها فاطمه تدخل تحط ملك جنب مرام و رؤى تحط الشنطه و صافى تقعد الناحيه التانيه تبص على ملك
بسمه / انا سلقتلك فرخه بلدى و عملت رز معمر زى ما الست فاطمه قالتلى اجبلك تاكلى
مرام / ما
فاطمه / اه هاتيلها ... تعملى حسابك يا مرام انك نفسه و لازم تتغذى كويس عشان تعرفي تقفي على رجلك كويس يا حبيبتي
بسمه تمشي
مرام / حاضر والله بس
مازن / بطلى دلع بقي انشفي كدا
فاطمه / جبتو الحلبه و العسل زى ما قولتلكوا
شيماء / ثوانى و احلى كبايه حلبه تكون عندك
شيماء تمشي
فاطمه / الحلبه بتزود اللبن و الحلاوه الطحينيه و المغات انا هعملك المغات بايدي العيال دى خايبه ما حدش فيهم هيعرف يظبطها
مرام / تسلم ايدك يا ماما فاطمه والله ما عارفه من غيرك كنت عملت ايه
شريف / ناقصكوا اى حاجه اجيبها
مازن / اه ناقصنا تاخد عروستك اللى محتليه مكانى دى و تروحوا
صافى/ ايه
بسمه تدخل شايله صينيه عليها طبق رز و فرخه و طبق شوربه مازن ياخدهم و يحطها على الكومدينو
مرام / مين هياكل كل ده
رؤي / انتى ما سمعتش كريمه مختار و هى بتقول العيل ينزل من هنا الفرخه تتحط مكانه من هنا
مرام / دا انا اخرى اخد المسكن و انام
مازن / ما فيش دوا من غير اكل اوعى انا هاكلك بايدي
مازن يمسك طبق الشوربه
صافى / حاسب لتغرقها
مازن / ما تلم مراتك يا عم
شريف / بص التليفون هيبقي جنبي
مازن / مش ناقصني حاجه و لو احتاجت حاجه خليفه و بسمه هنا اهو كتر الف خيرك
رؤي / انا حاسه اننا بننطرد
مرام / انتى بتنطردى يا ماما
رؤي / طب الحمد لله كنت خايفه يكون مجرد احساس
شريف / هههههههههههههههههه يلا يلا
فاطمه / لو احتاجتى اى حاجه
مرام تمسك ايد فاطمه
مرام / ما اتحرمش منك ابدا
فاطمه و البنات يمشوا شيماء تدخل بكبايه حلبه
شيماء / احلى كبايه حلبه لاحلى ام ملك في الدنيا
مازن / تسلم ايدك
شيماء / سلام انا يا قلبي
شيماء تبوس مرام و تبص على ملك و تمشي
بسمه / هتعوز منى حاجه تانى يا مازن بيه
مازن / تسلم ايدك يا بسمه خدى الباب في ايدك و انتى نازله
بسمه / الف حمد الله على السلامه يا ست مرام
مرام / تسلمي
بسمه تمشي و ثوانى و صوت باب الشقه بيتقفل مازن يسقى مرام الشوربه
مرام / هاخد على الدلع ده
مازن / خدى من النهرده انتى و ملوكه رقم واحد فى حياتى اعمل اى حاجه عشانكوا ربنا ما يحرمنى منكوا و لا يوريني فيكوا اى حاجه وحشه
مرام / و لا يحرمنا منك و لا من حنيتك علينا
مازن ياكل مرام
مرام / والله ما قادره يا مازن كفايا
مازن / مش وقت استهبال هتسمعى الكلام بالزوق و الا اوريكى الوش التانى
مرام / هههههههههههههههههه ااااه لا مش حمل زغزغه انا هاكل هاكل
جرس الباب يضرب مازن يديها البوله
مازن / هشوف مين اجى الاقيها خلصانه تمام
مرام / تمام
مازن يطلع بره يفتح يلاقي محمود
محمود / ايه الدوخه دى يا عم
مازن / ششششش ملك نايمه
محمود يتكلم بصوت واطى
محمود / ايه الدوخه دى يا عم خمسين مكالمه تعال ضرورى تعال ضرورى و اروحلك المستشفي الاقيكوا مشيتو
مازن/ الممرضات كل شويه يدخلوا يباركولها و الكل عاوز يصور النونه
محمود / دا من ايه بقي ان شاء الله
مازن / زى ما بقولك كدا خلناهم يكتبولها خروج و روحنا
محمود / المهم ايه بقي الحوار الخطير الفظيع اللى انت عاوزنى فيه
مازن / شقه شريف و العربيه يتكتبوا باسمه
محمود / طب العربيه و ملك الشركه لكن الشقه
مازن / اذكى اخواتك صحيح يا حبيبي تاخد بعضك و تروح لصاحب الشقه و تقوله تاخد كام هيقولك كذا قوله قشطه امضى العقد اقبض سجل شكرا صعبه دى
محمود / افرض ما رضيش
مازن / يارب صبرني يا سيدى اللى يعوزه اديهوله
محمود / طب ما انت بالفلوس دى تشتريله شقه
مازن / هو عاوز يبقي جنب امه
محمود / اللى تشوفه بس ما تاخذنيش يعني ليه
مازن / نقطته
محمود / و الهانيمون
مازن / نقطه مرام
محمود / ماشي حاجه تانى
مازن / كتر الف خيرك
محمود / تمام هستاذن انا بقي
مازن / تليفونات بقي
محمود يهز راسه و يمشي و مازن يدخل الاوضه يلاقي مرام نايمه و الاكل جنبها زى ما هو يتنهد و يطلع بجامه و يغير هدومه
....................
فى المستشفي
ابراهيم شايل بوكيه ورد و رايح ناحيه اوضه مرام يلاقى الباب مفتوح و فى عامله بتنضف
ابراهيم / هى مش دى اوضه مرام نور الدين
العامله / مشت
ابراهيم / مشيت راحت فين
العامله / روحت يا استاذ لقت نفسها كويسه كتبولها خروج و روحت
ابراهيم / اه شكرا
ابراهيم يمشي ويروح يركب العربيه و يمشي
.................
فى شقه شريف
صافى قاعده على السرير مربعه و شريف بيعلق هدومه
صافى / لو الواحد بيبقي فرحان اوى كدا لغيره هيبقي عامل ازاى لما يبقي البيبي بتاعنا
شريف يروح ينام على السرير تنام فى حضنه
شريف / هيبقي زيهم كدا بالظبط
صافى / هو انت هتنزل النهرده انا امبارح ما شوفتاكش خالص و واحشني اوى
شريف / لا مش هنزل مصطفى و محمود و الرجاله هيكملوا لوحدهم بس على الله ما تحصلش مشاكل
صافى / عقيقه غريبه اوى تفتكر هيعملو سبوع و حلقاته برجالاته و كدا
شريف / ما عنديش فكره بس ما افتكرش يعنى كدا حلو اوى
صافى / عمتوا مديحه بتقول لازم يعملوا سبوع عشان يلموا النقطه
شريف / عمتوا مديحه دى عايشه فى دنيا تانيه نقطه ايه اللى مازن هيعمل سبوع عشان يلمها يا بنتى اللى جامل بورد و اللى جامل بيافطه و اللى جامل بهديه لكن فلوس هيدولها نقطه كام يعنى متين جنيه خمسميه جنيه دا صارف لحد دلوقت فوق السبعه مليون جنيه
صافى / اكنه فرح سفن ستارز مثلا
شريف / لا هو مازن حسبها صح هو الصراحه ما بيحسبهاش مازن الفتره اللى فاتت كان بيعمل حاجات كتير جدا لله و بصراحه نفعته و اهى مرام رجعتله و كمان ربنا قومهاله بالسلامه و ملك جت كويسه ما فيهاش حاجه و روحوا بيتهم يعنى الحمد لله
صافى / عقبالنا
شريف / ايوه انتى كدا حطيتى ايدك على مربط الفرس احنا الفتره الجايه لازم نكثف جهودنا و نركز عشان ايه بقى ؟؟
صافى/ عشان ايه ؟؟
شريف / بصى هما دايما يقولك ايه التطبيق العملى احسن من الشرح النظرى
صافى / ههههههههههههههههههههههههه
شريف / يا ابن المحظوظه يا شيكو
.............................
فى شقه مرام
مازن نايم جنب مرام و ملك فى الكاريكوت فى النص جرس الباب يضرب مازن يتفزع و يبص على مرام و ملك نايمين و يقوم يجرى يفتح يلاقى ابوه شايل ورد
ابراهيم / صحيتك
مازن / اتفضل اتفضل
ابراهيم / روحتلكوا المستشفى لقيتكوا روحتوا
مازن / اه .. تحب تشرب حاجه
ابراهيم / هى ملك فين
مازن / جوه نايمه ... اجيبهالك
ابراهيم / هينفع
مازن / اه
ابراهيم يبتسم و مازن يدخل جوه يجى يشيل ملك مرام تصحى
مرام / فى ايه
مازن / بابا بره عاوز يشوف ملك
مرام تمسك الكاريكوت
مازن / فى ايه يا مرام هيشوفها مهو جدها برده
مرام / جدها اللى حاول يقتلها و عاوزلها ام غيرى
مازن / بعدين نتكلم
مازن يشيل الكاريكوت مرام تقوم بالعافيه
مازن / مرام
مرام / رجلى على رجل بنتى
مازن يبص الناحيه التانيه و ينفخ و بعدين يهز راسه حاضر باستسلام و يروح يسند مرام بايده التانيه
مرام / انا هعرف امشى لوحدى ما تقلقش ركز انت فى ملك
مازن / تمام
مازن يسبق مرام و هى بتمشى بالعافيه وراه مازن يطلع بره ابراهيم يقف و يمد ايده يشيل من مازن الكاريكوت و يقعد بيها يشوف مرام جايه مازن يرجع يسندها لحد ما تقعد و عينها فى عين ابراهيم مازن تشرب حاجه يا بابا
ابراهيم / اى حاجه ساقعه او عصير
مازن / ثوانى
مازن يدخل جوه
ابراهيم / الحمد لله على سلامتك
مرام / الله يسلمك
ابراهيم يبص على ملك و مرام قاعده مش على بعضها ابراهيم يبص لمرام مرام تتعدل فى قعدتها قدامه
ابراهيم / لو تعبانه ادخلى ارتاحى
مرام / انا كويسه
ابراهيم / بالنسبه للى حصل فى المستشفى
مازن يطلع شايل صينيه عليها كنزات و كاسات فاضيه فيها تلج
ابراهيم / اسبرايت
مازن يفتح كانز الاسبرايت و يفضى لباباه فى الكاسه و يحطها قدامه و يحط باقى الكانز جنبها
مرام / عنك ملك لحد ما تشرب
ابراهيم / مش اول مره اشيل بيبى ما تقلقيش
مرام تهز راسها مازن يقعد جنب مرام
ابراهيم / من امبارح ما نمتش .. بفكر يعنى .. فى ملك كنت بقول لو نجيبلها مربيه بروفيشنال
مازن / مربيه ايه يا بابا دى لسه بترضع
ابراهيم / و ماله اكيد محتاجه رعايه اهتمام حد متخصص فى التعامل مع الاطفال افرض سخنت تعبت حصلها اى حاجه مش لازم نهتم بيها
مرام / انا ههتم بيها انا اصلا ما ورايش حاجه غيرها
ابراهيم / و انتى ايه خبرتك فى التعامل مع الاطفال
مرام / خبرتى ما تقلش عن خبره اى ام مع البيبى الاول بتاعها بالعكس انا احتكيت باطفال كتير عندنا فى المنطقه و الفتره اللى فاتت من ساعه ما عرفت انى حامل و انا بتفرج على فيديوهات كتير و بقرا كتب كتير
ابراهيم / بس التانيه دى معاها شهادات و رخصه و دا شغلها مش لمتلها كام معلومه من على النت
مرام / انا امها
ابراهيم / و انا جدها
ملك تعيط
مازن / هعملها ببرونه
مرام / لا انا هاخدها جوه ارضعها
مازن يروح ياخد ملك من حضن ابراهيم و ابراهيم عينه عليه و يسند مرام و يدخلوا جوه
مازن / هنتكلم فى اللى حصل ده لما يمشى
مرام / ماشى
مرام تقعد على السرير و مازن يديها ملك فى حجرها و يطلع بره ابراهيم قاعد مدايق مازن يقعد قدامه و يتكلموا بصوت واطى
ابراهيم / شايف بتكلمنى ازاى
مازن / مرام سمعت حوارنا امبارح مرام عارفه ان حضرتك عاوز تجيب لملك ام غيرها و تديها قرشين و تسكتها
ابراهيم / و تاخد قرشين ليه ما دام معاها البنك كله
مازن / بابا لو سمحت اى واحده مكانها هتعمل اكتر من كدا
ابراهيم / انت علاطول بتدافع عنها
مازن / بدافع عنها !!! هو ليه حضرتك بتتكلم كانها ما شافتش كتير و بعدين ما كل الامهات بتربى عيالهم
ابراهيم / ملك مش اى حد ملك حفيدتى انا
مازن / بابا ملك بنتى انا و هى قبل اى حاجه انا و هى اللى حاربنا عشان وجودها هنا
ابراهيم / رجعنا تانى لنفس الموضوع السخيف اللى عمرنا ما ها نخلص منه ابدا
مازن / بالعكس بالعكس احنا لو واقفين عند نفس الموضوع ما كنتش حضرتك هتبقى قاعد قدامى ما كنتش جبتلك ملك تشوفها
ابراهيم / على اساس انكوا امنتونى عليها ما الست هانم
مازن / امها و من حقها تكون معاها مكان ما تكون و بعدين مرام خرجت تسلم على حضرتك لو ما كانتش طلعت كنت هتقول مستكبره تقابلنى و تعمل حوار جديد
ابراهيم / انا عاوز حفيدتى تتربى فى حضنى
مازن / للاسف مستحيل و دا مش قرار مرام دا قرارى انا حضرتك ابويا و على عينى وراسى بس انا مش هودى بنتى الوحيده جحر التعابيين اللى حضرتك عايش فيه بايديا اسف
ابراهيم / بره هتتعامل معامله راقيه هتدخل مدارس اوروبيه و هتتعامل مع ناس نضيفه
مازن / فى هنا مدارس انترناشونال كويسه جدا و دوليه بكل المعايير الاوروبيه و من هنا لمعاد دخول ملك المدرسه هتفتح مدارس اكتر اوعد حضرتك انى ههتم بالموضوع ده بشكل شخصى
ابراهيم / مرام دى ما تنفعش هتعر بنتك صدقنى
مازن / مرام تبقى امها تبقى مراتى و تشرف اى حد و مهما حاولنا نغير الحقيقه ما فيش حاجه فى الدنيا ممكن تغير حقيقه ان مرام هى ام ملك مصر كلها شهدت على ولاده ملك و ان مرام امها يا بابا زى بالظبط ما مفيش حاجه فى الدنيا ممكن تغير حقيقه ان حضرتك ابويا
ابراهيم / قصدك ايه
مازن / قصدى انك مهما عملت فيا لازم احترمك و اقدرك و احبك
ابراهيم / كل اللى عملته عملته لمصلحتك
مازن / كل اللى مرام هتعمله هتعمله لمصلحه ملك
ابراهيم / ماشى يا مازن ماشى يا شيخ مازن خلينى اكلمك باللغه اللى انت بتفهمها ايه هى حقوق الطفل على ابوه فى الاسلام يا شيخنا
مازن يبتسم
مازن / انه يحسن اختيار امه و يحسن اختيار اسمه و انه يعلمه القران و انا الحمد لله نقتلها انسانه محترمه و متدينه و ذكيه و جميله و نقتلها اسم ملك و ان شاء الله لما تكبر هحفظها القران كله بنفسى عشان اضمن انى اخد الثواب فى كل مره تقراه او تسمعه ربنا بس يدينى العمر
ابراهيم / يا ابنى هو مش فى حديث بيقول تنكح المراه لاربع مالها و جمالها و حسبها و دينها مرام دى لا مال و لا جمال و لا حسب و لا اى حاجه خالص
مازن / هههههههههههههههههههه
ابراهيم / بقول نكته انا
مازن / عشان الحديث بيقول تنكح المراه لاربع مالها و حسبها و جمالها و دينها فاظفر بذات الدين تربت يداك يعنى الناس بتختار العروسه لسبب او اكتر من الاربعه دا مش معناه انهم كلهم مهمين دا معناه ان دى الحاجات اللى بيدور عليها الناس بس الاحسن انك تختار الزوجه المتدينه تفوز بيها فاظفر بذات الدين
ابراهيم / يعنى لو جبتلك واحده متدينه و محجبه و فيها كل الصفات دى و جميله و من عيله و غنيه مش تبقى احسن من مرام دى
مازن / ههههههههههههههههههههه يا بابا ابوس ايدك اللى انت هتجيبها دى هتحب ملك زى امها طب انا هحبها زى ما بحب مرام طب هى هتحبنى زى ما مرام بتحبنى
ابراهيم / ما بتحبكش والله ما بتحبك
مازن / ما تحلفش بالله بس
ابراهيم / لا اله الا الله تعبت قلبى
مازن / والله حضرتك اللى تاعب قلبك مش انا حضرتك اللى مصمم تخرب بيتى و تتعسنى و تشرد بنتى
ابراهيم / انا
مازن / امال حضرتك بتقنعنى بايه
ابراهيم / قوم شوفها خلصت رضاعه البنت خلينى ابوسها قبل ما امشى
مازن / حاضر ثوانى
مازن يقوم يلاقى مرام بتكرع ملك
مازن / خلصتى
مرام / بكرعها
مازن / بابا عاوز يبوسها
مرام / احنا قايلين ممنوع البوس
مازن / هخليه يبوسها من خدها
مرام / لا
مازن / مرام مش وقته
مرام / امال امتى مش انت شوفت الفيديو بنفسك مش احنا منعنا كل الناس اللى بتحبنا فى المستشفى انهم يبوسوها انا و انت نفسنا ما بوسناهاش اشمعن هو
مازن / نتكلم لما يمشى هاتى البنت
مرام / لا
مازن / مرام
مرام / قولت لا ما تخلينيش اطلع اقوله بنفسى ممنوع البوس
مازن / طب هخليه يبص عليها و يشيلها و يحضنها هقوله بلاش بوس هاتى البنت
مرام تبصله
مازن / هاتى البنت يا مرام لو سمحتى
مرام تبصله
مازن / مرام
مرام تديهاله يشيلها و يطلع بيها تطلع وراه و هى مش قادره ابراهيم يقوم مازن يديهاله يبوسها
مرام / برده برده
ابراهيم / هو انتى هتمنعينى ابوس حفيدتى و لا ايه
مازن / خشى جوه يا مرام
مرام / هات البنت يا مازن
ابراهيم / انتى بتتكلمى كدا ليه يا بنت
مازن / خشى جوه يا مرام قولت
مرام / هات البنت و انا ادخل
ابراهيم / هى دى الزوجه المتدينه بترد على جوزها و على ابوه هى دى المحترمه المتربيه اللى هتربيلك بنتك
مرام / انا مش هرد عليك
ابراهيم / لا كمان ردى
مازن يزعق / خشى جوه قولت
ملك تعيط فى ايد مازن مازن ياخدها و يروح ياخد مرام و يدخلوا جوه مازن يسمع صوت باب شقه بيتقفل
مرام / انا عمرى ما هسامحك على اللى انت عاملته ده
مازن / ما تسامحينيش
مرام تبص لمازن مازن يحط ملك على السرير و يحطلها السكيته تسكت و يمشى يجرى ورا ابوه مرام تقعد على السرير تعيط
..............................
فى الشركه عند زياد
زياد قاعد مع انس
انس / طب ايه
زياد / انا بقالى شهور شهور يا انس بجرى و احفر فى الصخر عشان يجى هو فى ثانيه ياخد كل حاجه
انس / هو ما فيش اخبار عن لبنى
زياد / اخبار ايه يعنى
انس / انتوا متجوزين بقالكوا فتره برده
زياد / يا ابنى لسه بدرى و بعدين هى بتاخد الحبوب بانتظام يعنى كان حصل من فتره كدا كانت حامل و سقطت انت ناسى
انس / مش واخد بالى بس تمام يعنى فتره علاج قصدك و كدا
زياد / اه مش عاوزين نجازف ببيبى تانى و لا بلبنى
انس / معاك حق بس اكيد يعنى لو فى طفل فى البيت هيفرق مع الجدع ده حد كدا ياكل الجو طول الليل و النهار فى حجره يعنى انت فاهم
زياد / و هو ابنى هيجى ايه جنب بنت مازن باشا انت عارف انه كان ناوى يبيع لمازن قريه سياحيه كامله و بفلوسها يدخل شريك فى المدينه الصناعيه اللى هيكتب نسبه منها لملك
انس / هههههههههههههههههههههه طب ما يكتب القريه باسم ملك و يريح نفسه بدل اللفه دى
زياد / تخيل
انس / و انت هتسكت على اللى بيحصل ده
زياد / اعمل ايه يا انس اعمل ايه حتى ماما طول الليل ماسكه ودانه و نازله تسخين راح اشترى بوكيه ورد و لبس الحته اللى عالحبل و راحلها المستشفى
انس / هى اختك هتولد امتى
زياد / اختى !! اختى اللى قررت تسمى ابنها باسم مازن بيه عشان يطلع كيوت لخاله لكن زياد ده ابن الغساله ما يسواش يعنى
انس / هههههههههههههههه طول عمرها بتحبه اكتر
زياد / محلسنجى بتاع حريم من يومه حته بت هبله زى دى هتعصى عليه
انس / بس انا اللى محيرنى هو مازن بيجيب سيوله لكل اللى بيعمله ده منين دا داخل فى مشاريع بالهبل و عنده عماله زايده لو تفتكر ابوك كان عاوز يمشى نصهم و بيديهم علاج و اكل ببلاش و عمال يوزع هدايا يمين و شمال
زياد / يقولك خد من التل يختل انما هو ايه ما شاء الله الاسهم كل يوم بتعلى و بتتعمله دعايا ببلاش و بقى فتى الشاشه الاول كل الناس بتتصور معاه و ينزلوا الصور على الفيس شوفت المهزله اللى حصله النهرده دى
انس / هههههههههههههههههه شوفت طول عمره بيحب الشهره بس المرادى الشهره اللى بتجرى وراه
زياد / اياكش يولع مطرح ما هو قاعد
..........................
