(((((((السكة شمال ٢))))))
#لولو_محمد
الحلقه ١٣١
صافى تقعد على اقرب كرسي و تبوز شريف يحط الشنطه في الارض و يروح يقعد جنبها
شريف / مش رايح
صافى / المره اللى فاتت قولتوا متفقين حالا المرادى متفقين من بليل ما قولتليش ليه لنفرض انى ما كنتش قلقت كنت هتنزل و انا ما اعرفش انت فين
شريف / و هو المفروض اديكي خط سيرى يعني دا انا ما عملتهاش عمرى مع امى
صافى / انا مش مامتك يا شريف بيك انا مراتك و مش هقولك اشمعن انت بتعرف ادق تفاصيلي و انت مش بتعرفني بس هقولك على الاقل تحترم وجودى فى بيتك انا ما سبتش حياتى و جيت اعيش معاك وقت فراغك او وقت ما تحب تفضيلي نفسك
شريف / انتى اصلا بتبقي نايمه فى الوقت ده و ده اللى شجعنى
صافى / و انا مش ممانعه انك تلعب كوره مع صحابك انا ممانعه سياسه الامر الواقع مش هتخسر حاجه لو عرفت انا خط سيرك مش هينقص منك و لا من رجولتك على فكره لو قولتلى برنامجك على الاقل اكون مطمنه عليك ما اقلقش و كمان احس باهميتى فى حياتك
شريف / انتى مش شايفه انك اوفر شويه
………………….
صافى تبصله شريف يمسك ايدها
شريف / بصي بقي يا ست الكل اولا انك تسيبى حياتك و تيجي تعيشي معايا دى فوق فوق فوق راسي اما بقي انك تعيشي معايا وقت ما احب او وقت فراغى فدى اقسم بالله شيطان قولى اعوذ بالله من الشيطان الرجيم كدا
صافى تبصله
شريف / قولى مش هتخسري حاجه جربي
صافى / اعوذ بالله من الشيطان الرجيم
شريف / ها لسه
صافى / شريف انا مش بهزر
شريف / لا دا في حفله شياطين بقي استعيذى تاني كدا
صافى / اعوذ بالله من الشيطان الرجيم
شريف / كمان مره عشان لو في واحد مستخبى هنا و لا هنا نحرقه
صافى تبتسم
صافى / اعوذ بالله من الشيطان الرجيم
شريف / بصي يا ست الكل انا مش معترض انى اديكي خط سيرى و لا حتى انى اديكي ابديت بمكانى كل ربع ساعه بس للاسف انا مش واخد على كدا فهل ممكن تصبرى عليا لحد ما السيستم يتعمله ابديت
صافى / برده بتهزر
شريف / انا وافقت لانم بتنامى فى الوقت ده و ربنا شاهد كنت مروح ناوى اقولك و نسيت و مرضيتش اصحيكي لما صحيت و لا اقلق نومك
تليفون شريف يرن
شريف / و عشان اثبتلك انك عندى اهم من الكل انا هعتزرلهم
صافى / لا روح لو هتنبسط روح
شريف / هنبسط معاكى اكتر
صافى / تمام خلص و تعال هستناك
شريف / لا انا اخاف اسيبك لوحدك ارجع الاقيكي زعلانه و لا مقموصه مينفعش اسيبك للشياطين يستفردوا بيكي
تليفون شريف يرن تانى
صافى / روحلهم يا شريف و انت جاى هاتلى حاجه حلوه صالحني بيها
شريف / طب ما تقولى من الاول انك عاوزه حاجه حلوه لازم اللفه دى كلها و زعلانه و بتاع عشان اصالحك بحاجه حلوه
صافى/ لا يا شيخ طبق تصدق بقى
شريف / لا ابوس ايدك و لا تصدق و لا متصدقش انا بقالى زمن ما لعبتش كوره و هموت و اللعب
صافى / لا تموت ايه بعد الشر انزل يا سيدى
شريف يقوم يبوس راسها
شريف / مش هتاخر و هجيبلك حاجه حلوه و انا راجع يلا سلام
صافى تعمله باى بايدها يمشى و يقفل الباب وراه
.......................
فى شقه مرام
جرس الباب يضرب تطلع من المطبخ تفتح تلاقى لبنى تتفاجئ
لبنى / سورى لو كنت جيت فى وقت مش مناسب
مرام / مازن مش هنا
لبنى / عارفه انا اتعمدت اجى و هو مش موجود هو انتى مش هتعزمى عليا ادخل
مرام / اه سورى لا طبعا اتفضلى انا بس اتفاجئت لما شوفتك انتى عارفه مجيتك ليا ما كانتش دايما بيبقى وراها خير
لبنى تبصلها و تبتسم و تدخل تقعد على الكنبه
مرام / تحبى تشربى ايه
لبنى / انا جايبه هديه صغيره لملك لو تقبلى هى نايمه ؟
مرام / اه نايمه
لبنى / يا خساره انا كنت عاوزه اشوفها و اللعب معاها شويه
مرام تبصلها باستغراب
لبنى / بصراحه حقك بس انا عوزاكى تعرفى ان مجيتى ليكى النهرده هتسببلى انا مشاكل اكتر من اللى ممكن تسببهالك الحقيقه مجيتى ليكى مش هتسببلك اى مشاكل ان شاء الله
مرام / امال جيتى ليه
لبنى / مازن باباه مش هيرجعله فلوسه تانى الا لو طلقك او انتى سبتيه و مازن مش هيطلقك و لا انتى هتسيبيه و زياد و مامته مش هيسمحوا ان مازن ياخد الفلوس حتى على سبيل الورث
مرام / مازن ما بيفكرش فى الموضوع ده خالص انا متاكده ان حزنه على والده مش هيتوصف و انا شخصيا موضوع الفلوس ده ما يفرقش معايا
لبنى / عارفه بس دا حقه زياد لو اخد الفلوس دى ما فيش قوه فى الكون هتمنعه من اذيه مازن هتتبهدلوا لازم يبقى فى طريقه تمنعوا بيها زياد انه ياخد الفلوس دى باى شكل
مرام / و عشان كدا انتى جايه تقنعينى اسيبه عشان ياخد الفلوس تانى و يمنع زياد اللى هو جوزك انه ياخدها مش كدا و لا انتى عندك اقتراحات تانيه مثلا اطلق .. على الاقل لحد ما باباه يرجعله فلوسه و بعد كدا بقى يردنى ما يردنيش مش هتفرق المهم زياد ما يخدش الفلوس
لبنى / على فكره لو فكرتى فيها بعقلك هتلاقى ان مصلحتى ان الفلوس تروح لزياد و انتى تشبعى بمازن
مرام / كلام منطقى
لبنى / بس ساعتها زى ما قولت ما فيش قوه هتقف فى وش زياد و لما يخلص من مازن هيفضالك و بعد كدا يفضالى
مرام / كنت فكراه مستعد يعمل اى حاجه عشانك دا ضرب مونى بالقلم عشان اتكلمت عنك بطريقه وحشه
لبنى / و ضربنى عشان حاولت امنعه ياذيكى و دلوقت بعد ما وقعوا بين مازن و باباه بيوقوا بين اونكل ابراهيم و مونى انا ما اقدرش اعمل حاجه بس انا متاكده انك هتلاقى طريقه انتى و مازن ترجعوا بيها الفلوس دى قبل ما توصل لزياد
مرام / و هو زياد هيقدر يقنع ابراهيم بيه انه يحرم مونى و مازن من الورث و يكتب كل حاجه لزياد
لبنى / ما اعرفش بس هياخدوا الفلوس هياخدوها زياد قدر يسحب ملايين بالهبل هو و مامته من ابراهيم بيه فى الفتره الاخيره بحركات خايبه جدا ما اعرفش دخلت على ابراهيم بيه ازاى كانوا بيدخلوه فى صفقات هبله او خسرانه مقابل كوميشنز من الناحيتين دا غير السحب بقى بسبب و من غير و لو استمروا على الوضع ده مش هياخدوا وقت طويل لحد ما يفلسوه دا لو ما قدروش يقنعوه فعلا يحرمهم من الميراث
مرام / هو انا المفروض اوصل كلامك لمازن يعنى انا مش فاهماكى بصراحه انا المفروض اعمل ايه بالكلام ده
لبنى / ما اعرفش بصى فى جميع الاحوال سواء قولتى لمازن او ما قولتيش سواء لقتوا حل او قررتوا تطنشوا انا جايه اقولك لو احتاجتى اى حاجه انا هساعدك على قد ما اقدر و من غير ما مازن و لا زياد و لا اى مخلوق يعرف
مرام / ما افتكرش انى هحتاج ان شاء الله و ما افتكرش انى حتى لو احتجت هجيلك انا لو هموت مش هبوس رجلك يا لبنى
لبنى / انتى لسه فاكره قلبك اسود اوى
مرام / امال هتساعدينى ليه
لبنى / عشان ده حق مازن و فلوسه انا للاسف ما فيش فى ايدى حاجه اعملها كل اللى اقدر عليه انى اسرقله جزء من حقه و اديهوله فى الخباثه اكتر من كدا مش هقدر و زى ما قولت لو مازن وقع زياد مش هيلاقى اللى يلمه و لا يوقفه عند حده
مرام / على العموم احنا مش عاوزين نسببلك اى مشكله مع جوزك الفلوس دى هتروح لصاحب نصيبها و ربنا ما بينساش حد و الحمد لله احنا مش معدمين بالعكس احنا عايشين فى نفس المستوى تقريبا و يمكن احسن
لبنى / الحمد لله
صمت
مرام / هو انتى بجد عاوزه تقنعينى انك اتغيرتى و بقيتى انسانه كويسه
لبنى / لا انا لا اتغيرت و لا بقيت انسانه كويسه بس انا مش شيطانه برده
مرام / اكيد
لبنى / هو انا ممكن اشوف ملك قبل ما امشى
مرام / تعالى
مرام و لبنى يقوموا يدخلوا الاوضه جوه لبنى تقعد على السرير و تبص على ملك و تبتسم و تطلع علبه قطيفه صغيره من شنطتها و تحطها جنبها
لبنى / لو تقبليها منى يعنى دا حلق اطفال يارب يعجبك
مرام / شكرا
لبنى تبتسم و تقوم و تمشى
مرام / انتى ما شربتيش حاجه
لبنى / مره تانيه عن اذنك
لبنى تمشى و مرام واقفه مستغربه
..............................
فى الملعب
محمود يجرى ناحيه المدرج و هو بينهج يطلع ميه و يشرب بق مازن يتمشى بطيئ و شريف متسند عليه مازن يزقه
مازن / يا عم انا لاقى ركبى اما اسندك
شريف / يا عم عيب على بنشاتك حتى
مازن / بقالى كتير اوى ما جريتش كدا
محمود / بقالك كتير ما جريتش و لا الجواز جاب اجلك
مازن / مش هرد عليك
محمود / قولتلك خد الشريط هههههههههههههههههههههههه
مازن / خليهولك و اسكت بقى
سعد و عمر يدخلوا يرموا نفسهم على البنج
عمر / ايه يا عم الفرقه اللى انت جايبنا نلاعبهم دول احنا لو بنلاعب منتخب البرازيل مش هيجرالنا كدا
محمود / ياعم راعى فرق السن كلهم شباب انما احنا معانا اتنين من دفعه عرابى
مازن / والله لو كنت قادر اقوم كنت وريتك عرابى و هو بيخليك تقول يا خرابى
محمود / ما عشان كدا واخد راحتى فى الكلام
شريف / الواد ابو تيشيرت احمر ده اسمه ايه
محمود / عبد العزيز
شريف / اه الواد ده سريع اوى مش نافع امسكه خالص و انت ياسطى رايح واقف قدام عند الجون و عملى نفسك راس حربه و ما جبتش و لا جون لحد دلوقت شكلنا بقى وحش قدام العيال دول
مازن / اسم الله على الكور اللى بتجينى اوى و انت يا بتاع انت بتشوط فين انت بتصطاد عصافير و لا ايه
عمر / ما كانتش كوره قلشت هتمسكوهالى
محمود / هههههههههههههههههه احنا هنكمل شوط تانى ازاى بالمنظر ده
سعد / لا يا جدعان اجمدوا ما تشمتوش فينا الحريم اللى فى البيت يقولوا علينا ايه دا انا مفهمها انى النسخه المصريه من كريستيانو
شاب صغير يدخل
الشاب / ايه يا جماعه يلا و لا ايه
مازن / جايين يا حبيبى ثوانى بس
الشاب / تمام عاوزين بس نلحق نخلص قبل الصلاه
شريف / تمام جايين والله هنروح فين ناخد نفسنا حاضر
الشاب / ههههههههههههههههه طب يلا بسرعه
الشاب يمشى
سعد / يا شماته ابله ظاظا فيا انا ايه اللى جابنى معاكوا
شريف / بصوا يا رجاله احنا هنغير الخطه انا هرجع ورا فى الدفاع و انت يا حوده بما انك صغير كدا و فى عز شبابك يا حبيبى هتمسك انت عبد العزيز لو فلت منك هنفخك و انت يا عمر هترجع جون و سعد هتبقى مع محمود و اى هجمه نديها لمازن لعل و عسى نروح بيتنا بجون واحد حتى نستر بيه نفسنا بدل الخيبه دى
محمود / و انت يا سى مازن ما تجرى عدل اللى يشوفك بتجرى دلوقت ما يشوفكش و انت بتجرى و تنط من فوق البيوت عشان مرام نجيبها نقعدهالك جوه الجون عشان تتعدل
شريف / سيب مازن فى حاله دلوقت تلاقي مرام مزعطاه محشى و لا فته من بتوعها
مازن / لا و انتوا الصادقين دا قركوا اللى جابنى الارض يلا يلا ما دحكوش الاشبال علينا
شريف / بحاول والله مش لاقى رجلى
مازن / يلا
الخمسه يقوموا و هما مش قادرين
محمود / احنا كدا مش محتاجين نغير الخطه احنا محتاجين نغير الفريق ههههههههههههههههههههههه
........................
فى الفيلا عند زياد
لبني تدخل و تطلع السلم زياد ينادى عليها من الهول
زياد / لبني
لبني تقف مكانها ثوانى و تروحله تلاقيه قاعد حاطت رجل على رجل و باصصلها
زياد / كنتى فين
لبني / كنت بقرا الفاتحه على ماما
زياد / و بعديها روحتى فين
لبني تبصله يقوم يقف قدامها
زياد / بعد ما طلعتى من الترب روحتى فين
لبني / روحت لمرام الحاره
زياد / لمرام !!!
لبني / اه كنت بحاول اعرف منها الحوار بين مازن و كامل وصل لفين
زياد / و قالتلك
لبني / قالتلى قالتلى ان كامل هيشارك مازن فى مشروع اكبر من المنطقه الصناعيه بكتير و انها عارضه مجوهراتها للبيع عشان توفرله سيوله كفايا للمشروع ده
زياد / كامل ما اتكلمش فى الموضوع ده نهائي هناك
لبنى / حاجه من اتنين يا بتكدب و تتنطت عليا يا هو متفق مع مازن ميقولش
زياد / مرام غشيمه ما تعرفش تكدب ما قالتلكيش مشروع ايه ده
لبنى / لا بس واضح ان مجوهراتها كتير اوى
زياد / ورتهملك
لبنى / لا طبعا هما هبل يشيلوهم فى البيت حطاهم فى البنك
زياد / لو معاهم فلوس كتير اوى كدا ايه اللى يرجعهم الحاره
لبنى / عشان فى البيت القديم بسمه بنت خليفه البواب كانت بتساعدها فى ملك هنا عمتها تساعدها ... يا ابنى انا سالتها فى كل ده و نقيت وقت ما يكون مازن هناك
زياد / طب و اخرتها مش عنخلص من الهم دا بقي
لبنى / ابراهيم بيه لما هيشوف مازن واقف على رجليه هيصالحه و يرجعله كل فلوسه و كامل مش هيهدى الا لما مازن يقف على رجليه و احمد اتخلى عنك فاضلك ايه يا زياد انا لو منك اخلع و انط من المركب دى قبل ما تغرق
زياد يبص للبنى تقعد و تدعى البرود و عينها عليه و هو بيفرك
......................
فى شقه مديحه
مرام و مديحه بيغرفوا
محمود / انا ما بصدقش حرف واحد بيخرج من بق البت دى
مازن / بس معاها حق انا اصلا عارف و متاكد ان الفلوس دى مش هترجع تانى و بابا مش من النوع اللى بيتعاند هيركب دماغه لمجرد العند
مديحه / حتى بعد ما يموت
مازن/ و هعمل ايه بالفلوس يا عمتى و ابويا ميت غضبان عليا و مقاطعني
صمت مرام تغرف لمازن فى طبقه يبتسملها و يكمل اكل في صمت
محمود / طب احنا اعتمادنا الاول انك تقف على رجلك في خلال السنتين و انه يشوفك غنى تانى و مرام جنبك و بتساعدك فيعرف انه غلطان
مديحه/ ايه اللى هيحصل لو مات قبل السنتين دول
محمود /السؤال ازاى هيمنعوا مازن من الورث الا انه يقسم فلوسه فى حياته بين مونى و فريده و زياد و هيقسمها ليه و هو سليم هو ابوك كان عنده حاجه عيان يعني
مازن / ما اعرفش المره اللى كلمونى و قالولى عيان و سافرتله دبي كان محجوز فى العنايه و مانعين عنه الزياره و برده ما فيش اى معلومه و لا اى دكتور رضي يريحنى
مرام / كان مقلب ما كانش عيان باعتلى رساله من العنايه يعني ما انا حكيتلك اللى حصل
مديحه / ايه اللى حصل
مازن / ملخص الكلام احنا هنخلينا مشيين في سكتنا لحد ما نوصل و الباقي على ربنا
مديحه / بقولك يا مازن ما ينفعش تسيبوا الدهب بتاع مرام جوه البيت مليان ستات طالعه و ستات نازله و انتوا مطمع و كل الناس بتتكلم عليكوا دا انت مصور الهدايا اللى كنت بتجيبهالها
مازن / معاكى حق يوم الحد هاخدهم احطهم فى البنك
مرام / دى فكره حلوه جدا
مديحه / ما بتاكلش فراخ ليه يا مازن اديله ورك يا مرام
مرام تشيل ورك و تحطه قدام مازن و واحد تانى قدام محمود يرزع المعلقه في طبقه
محمود / بس انا برده مش مرتاح للبت دى
مازن / شيلها من دماغك
محمود يبصله مازن يهز راسه اه محمود يسكت و يكمل اكل
....................
فى شقه فاطمه
عمر و سعد و شريف و صافى و رؤى و شيماء و تقى و فاطمه ملموميين حوالين سفره
شريف / عيال تمنتاشر عشرين سنه كبيرهم و كلهم ما شاء الله فراوده قطعونا حاجه تشرف الحقيقه
رؤى / عادى يا ابيه ما تزعلش نفسك الكوره مكسب و خساره
سعد / احنا اصلا المطش ده كنا بنسخن ان شاء الله المطش الجاى هنقطعهم
عمر / او يقطعونا يعنى مش عاوزين نقاطع ما فيش حاجه بعيد عن ربنا
فاطمه / هههههههههههههههههههه مش مهم النتيجه المهم انبسطتوا
سعد / احنا دحكنا دحك ما دحكناهوش فى حياتنا
فاطمه / هتسافر امتى يا سعد
سعد / الساعه تمانيه بالليل ان شاء الله
فاطمه / توصل بالسلامه يا حبيبى ابقى طمنا
شريف / عملت ايه فى العفش يا عمر صحيح
عمر / عملت زى ما قولتلى خليتهم يلموه كله فى اوضتين لحد ما يخلصوا باقى الشقه
رؤى / الا ايه اخبار مروه يا دكتور عمر شوفت بقى ان الحوار مش حوار فستان
شريف / رؤى
رؤى تقلد مروه بسخريه / انقى ايه ما خلاص شيماء خدت كل الحاجات الحلوه البركه فيكي بقى يا رؤى ... والله هى الخسرانه انا اخدت حاجات تحف
شيماء / احنا اتفقنا الحاجات دى امانه عندك لحد ما اخلص فرش يمكن احتاج منها حاجه
رؤى / يا ستى خديها كلها ما تغلاش عليكى بس ابقى حسبى سعد بقى
سعد / ما تغلاش عليكى يا دكتوره سيبك منها انتى عرفاها
رؤى / مالى بقى ان شاء الله
سعد / ست البنات كلها حاجه كدا تشيز كيك استروبرى
رؤى / اه بحسب
فاطمه / ههههههههههههههههههههه ربنا يبارك فيكوا يا ولاد و ما يحرمنيش منكوا ابدا .. مالك يا صافى ساكته ليه يا حبيبتى
صافى / ما فيش يا ماما بسمعكوا
شيماء / ايه رايك فى الرقاق يا ابيه على فكره دا تمانين فى الميه صافى عشرين فى الميه ماما
شريف / اتاريه مسكر
فاطمه / انا يادوب قولتلها الطريقه ووقفت على ايدها و هى بتعمله غير كدا عملت كل حاجه لوحدها من اول تعصيجه اللحمه لحد السوى
عمر / لا تسلم ايدك والله فعلا حلو جدا
رؤى / البت دى اصلا بتعرف تطبخ بس مدكنه
صافى / عن اذنكوا ثوانى
صافى تقوم تدخل الحمام و الكل يبص لبعضه
شريف / عن اذنكوا
شريف يقوم وراها
رؤى / هو فى ايه هو احنا قولنا حاجه غلط
شيماء / كلى و انتى ساكته
فاطمه / ربنا يستر
......................
فى شقه مرام
مازن نايم على السرير بيلعب فى الموبايل مرام تدخل لابسه البرنص و لافه شعرها تروح تقعد قدام التسريحه و تفك الفوطه و تسرح شعرها تبص فى المرايه على مازن عينه عليها تبتسمله
مرام / بتعمل ايه
مازن / بنزل بروموا فيديو صغير كدا من شغلى و شويه صور
مرام تلف و تبصله
مرام/ كنت بفكر فى الموضوع ده على فكره
مازن يتعدل و يقعد
مرام / كنت لسه قريب بتقول ان التصوير وحشك و بفكر قد ايه كلنا و انا اولهم كنت معترضه ان دى تبقى شغلتك انا ما كنتش معترضه ان دى تبقى شغلتك بس كنت عوزاك تمسك حاجتك
مازن / فاهم قصدك
مرام / سبحان الله
مازن / لحد ثانوى كدا كان نفسى اللعب كوره و كان عندى احلام كبيره انى ابقى لاعب مشهور و كدا زى الخطيب مثلا او حسن شحاته و كنت بلعب حلو و فى النادى بس كانت مشكلتى اللى كرهت الكابتن فيا الالتزام عمرى ما عرفت اللتزم بحاجه كان دايما يقولى انت بتضيع نفسك و بتضيع موهبتك خلى البنات اللى فى المدرج ينفعوك بصيتله من فوق لتحت كدا بمنتهى القرف اللى هو انت ازاى تكلمنى كدا يا عم اولع و سبت الفريق و الكوره خالص و بقيت بلعبها بس هوايه مش اكتر و روحت لعبه تانيه و كل اللعب كان ليها نفس المصير الا التصوير ما كنتش بقدر اسيبه بالعكس كنت باخد كورسات و اشترى احدث الكاميرات و اتمرن و اتعلمت برامج كتير و كت بقعد بالساعات احاول و احاول عمرى ما ياست و لا فكرت فى نقد الناس و لا رايهم و لا اى حاجه زيك بالظبط
مرام / زيي
مازن / اه زيك ما قدرتش ابطلك و ما اهتمتش بنقد الناس بالعكس اتمسكت بيكي اكتر لحد ما وصلتلك اهو
مرام تبتسم
مازن يفرد ضهره على السرير تانى
مازن / بس تعرفى النهرده بس ندمت انى سبت الكوره و ما احترفتش عشان يجي عيل تمنتاشر سنه يشخرمنى كدا
مرام / هههههههههههههههههههههههه
مازن / الجزمه منزل صورتنا على الفيس و عاملى منشن
مرام / فين دى ورينى
مازن يفتح الصوره و مرام تقعد جنبه على السرير تبص
مرام / مازن راح زمانه و عبده خد مكانه هههههههههههههههه ايه ده
مازن / لا و عاملى منشن بس الحق يتقال الواد سريع طلقه و بيرقص و يشوط انا وعدته انى اكلمله حد فى اى نادى يكتشفه
مرام / المهم انبسطتوا
مازن / جدا بغض النظر عن الهزيمه المخزيه اللى شلناها بس احنا ما كناش عارفين نحدد احنا مش قادرين ناخد نفسنا من التعب و لا من كتر الضحك
مرام / هههههههههههههههههههههههه
مازن / لا بس انا لازم انزل الجيم تانى اول مره اتعب كدا
مرام / لو تحب تجيبلك مشايه نحطها فى جنب هنا و لا فى الصاله
مازن / لا مش فكره كويسه هتديق المكان على الفاضى
مرام / اوك ما فيش مشكله روح الجيم
مازن / احلى حاجه فيكى انك علاطول موافقه
مرام / انت عبيط هعترض على ايه انك تاخد بالك من صحتك مهو كلو ليا و لملك بس حسك عينك عينك تزوغ كدا و لا كدا انا غشيمه و انت عارف
مازن / هو انا عارف اه بس ما تشغليش بالك بالموضوع ده انا مش هرجع للحرام تانى انا مصدقت ربنا كرمنى و هنانى بالحلال
مرام / و طلع حلو ؟
مرام تبصله بدلع يحضنها
مازن / ادوق تانى
مرام تزوقه و تقوم
مرام / جرا ايه يا عم ما تتقى الله بقى الله
مازن / لا اله الا الله فى ايه يا مرام انتى هتفضحينا ههههههههههههههههههههههه
مرام / انا تعبت اقولك انا الغلطانه انا سيباهالك خالص
مازن / رايحه فين يا بت
مرام تطلع بره
صوت مرام / المطبخ هعمل قهوه
مازن / و ماله و هو فى احلى من زنقه المطبخ
مازن يقوم وراها
............................
فى شقه فاطمه
شريف و صافى واقفين قدام باب الحمام و صافى عنيها كلها دموع
شريف / و الموضوع ده يخليكي تعيطى كدا
صافى / كان عندى امل كبير اوى
شريف / و مستعجله على ايه احنا لسه عرسان عادى يعنى دا فى ناس بتخلف بعد عشر سنين جواز و اكتر مش حوار تكتئبى عشانه يعنى .. عشان كدا بقى كنتى اوفر اوى الصبح
صافى تبص الناحيه التانيه بحزن
شريف / طب خلاص يا ستى و لا تزعلى نفسك لو تحبى نروح لدكتوره نروح مع انها والله هتدحك علينا هتقول مستعجلين على ايه
صافى تبصله
شريف / يا بنتى ما يمكن حكمه من ربنا التاخير ده يعنى اقصد تكون حياتنا استقرت اكتر و طبعنا على الجواز و انتى اتعلمتيلك كام صنف و انا ظبط الشغل اكتر و كدا يمكن فى حكمه احنا مش واخدين بالنا منها و بعدين تاخير ايه اصلا دا احنا متجوزين امبارح
صافى تبتسم ابتسامه بسيطه
شريف / والله لو حد عرف اللى انتى بتعمليه ده ليدحك عليكى عادى والله كل الناس زيك كدا القلق بيجي بعد اول سنه على الاقل
صافى / طب ما مرام حملت علاطول
شريف / دى حاله خاصه كدا سبحان الله عشان هى و مازن يرجعوا سوا ما حدش عارف لو ما كانتش حامل كان ايه اللى ممكن يحصل كان ممكن تقبل باى عريس من اللى بيتقدمولها او ما تلاقيش حاجه تربطها بمازن الله اعلم بظروفهم لكن مش معنى انها حصلت مع مرام تبقى كل الستات تحمل بالسرعه دى يعنى
صافى / برده اروح لدكتوره و اطمن
شريف / حاضر نروح
صافى / طب افرض
شريف / ما افرضش ما اقدرش انا البلا قبل وقوعه و حتى لو لاقدر الله فى حاجه الطب اتقدم دلوقت و فى مليون مركز و حتى لو ما فيش امل خالص و مشينا فى كل السكك و عملنا كل اللى علينا هيبقى نصيب من ربنا اللهم لا اعتراض اكيد شايلنا حاجه احسن
صافى / يعنى مش هتتجوز عليا
شريف / ههههههههههههههههه والله انتى هبله انا قادر عليكى لما اروح اجيب واحده تانيه ... طب بلاش لنفرض ان لاقدر الله انا فيا حاجه هتسبينى لا دا انا اروح اكشف و اطمن على نفسى بقى انتى قلقتينى
صافى تمسك ايده
شريف / بطلى هبل بقى اعقلى شويه و لا ما تعقليش انا اصلا بحب جنانك و عسلك و قسما بالله لو كنا فى شقتنا لكنت فقعتك واحده
رؤى تدخل شريف يتعدل
رؤى / احنا قاعدين متزنبين على السفره كلنا ايدينا مش نضيفه و سايبينكوا ترغوا لحد ما كنت خلاص هعملها على روحى ما تدخلوا اى اوضه و تتكلموا حبكت الكلام قدام باب الحمام
شريف / طول عمرك خازوق طول عمرك الحمام اهو ياختى اشبعى بيه يلا يا بنتى نطلع بره نشوف الناس اللى بره دول
رؤى تدخل الحمام و تقفل الباب و شريف يمسح لصافى دموعها
شريف / انا عمرى ما هشوف غيرك مهما كانت الظروف شيلى كل الهبل ده من دماغك و برده هاخدك و نروح نطمن عشان ما اسيبش الشيطان يلعب بيكى تمام
صافى تهز راسها شريف يجي يبوس راسها تقى تدخل يتعدل و ينفخ و صافى تدحك
تقى /هى لسه فى الحمام
................................
