((((((السكة شمال ٢))))))
#لولو_محمد
الحلقه ١١
مازن / لا لا انا ... انا بحلم صح
مرام / انت بجد مش عاوزنى ؟؟؟امشى ؟؟؟
مازن / لا انا بحلم انتى مش حقيقه انتى مش حقيقه انا بحلم صح انتى مش مرام
مرام / مالك يا مازن
مازن / انتى مستحيل تكونى مرام
مازن يحاول يقوم يلاقى نفسه متسلسل و مرام تتحول للبنى
لبنى / و هى ست زفته دى احسن منى فى ايه ان شاء الله
مازن يقوم و يتفزع على صوت المنبه
..........................
مازن / اعوذ بالله من الشيطان الرجيم هو فى كدا
مازن يقوم يفتح الباب يلاقى شريف فوشه يتخض
شريف / مالك يا عم شوفت عفريت
مازن / حلمت بكابوس معلش انا مش مظبوط اصلا
مازن يسيب شريف و يدخل الحمام يحط راسه تحت الحنفيه و الاوضه مفتوحه شريف يشد الباب يقفله و يروح وراه
شريف / انت كويس
مازن / اه اه كويس كنت جاى اصحيك
شريف / اه مانا ظابط المنبه هنزل اروح البيت اجيب حاجتى و اقابلك فى المطار تمام
مازن / تمام تمام
شريف / انت كويس انزل و لا ايه
مازن / كويس يا شريف مالى يعنى كويس اهو
شريف / طيب انا ماشى
شريف يمشى و مازن يروح يقعد فى الليفينج و يبص فى السقف و بعدين يقوم يجيب موبايله و يتصل بحد
مازن / صباح الخير يا محمود اسف انى بصحيك
محمود / مفيش مشكله خير فى جديد و لا ايه
مازن / بقولك ايه مرام عامله ايه
محمود / هتكون عامله ايه يعنى قافله على نفسها الاوضه
مازن / محمود انا مسافر كمان شويه
محمود / يا سيدى متقلقش الرجاله فى الشقه اللى جنبنا و لو فى اى حاجه اكيد هيدخلوا يعنى
مازن / تمام لو احتجت اى حاجه
محمود / مش هحتاج متقلقش و بعدين هو انت هتطول
مازن / لا لا هرجع بكره علاطول باذن الله
محمود / طيب دا يوم يعنى ان شاء الله مفيش مشكله
مازن / تمام يا حوده هكلمك تانى قبل مطلع الطياره
محمود / تمام تروح و تيجى بالسلامه
مازن يقفل و يحط الموبايل قدامه و يقوم يجيب شنطه و يحط فيها حاجته
...................................
فى البيت القديم
مرام صاحيه و قاعده عينها عالباب تقوم تفتح الدولاب و تطلع منديل ملفوف فيه الغويشتين و الحلق و تقلع حلقها و تحطه فى المنديل و تقلع دبلتها و تحطها معاهم و بعدين تشيلها و تلبسها تانى و بعدين تقلعها و تبصلها بحزن و ترجع تلبسها تانى و تطلع هدوم و تلبس سميحه تصحى
سميحه / رايحه فين يا مرام بدرى كدا
مرام / هروح الصاغه ابيع الحاجه
سميحه / الله مش كنا قولنا محمود هيبيعهم
مرام / مهو مرضاش و قال هديكى اللى انتى عيزاه و انا مش عاوزه من فلوس مازن حاجه
سميحه / بس دا عرق محمود و شقاه مش فلوس مازن
مرام / تيته ابوس ايدك انا تعبانه و متلخبطه خلقه لو عاوزه دهبك
سميحه / اخص عليكى يا مرام والله لولا انى مقدره وجعك كان هيبقى ليا كلام تانى معاكى
مديحه تصحى
مديحه / فى ايه
مرام / مفيش يا عمتى كملى نوم
مرام تحط الطرحه على راسها و تطلع بره تقابل محمود خارج مالحمام
محمود / على فين بدرى كدا
مرام / مشوار كدا و راجعه
محمود / طب استنى انا هلبس و اجى اوصلك
مروه تفتح باب الاوضه
مرام / معلش متاخره عن اذنك
مرام تمشى و محمود يجى يجرى وراها مروه تمنعه
مروه / هو فى ايه يا محمود هى رايحه فين بدرى كدا هاه
محمود / معرفش معرفش
محمود يطلع وراها ميلاقيش حد يبص يمين و شمال مفيش حد مروه تطلع وراه
مروه / انت رايح فين بالبجامه يا محمود فى الجو ده ادخل لتعييا
محمود / انا مش فاهم البت دى ناويه على ايه
مروه / انت مالك شاغل بالك بيها اوى كدا ليه هى يعنى صغيره ما يمكن هترجع لجوزها
محمود يبصلها و يسيبها و يمشى تمشى وراه
مروه / ايه ادايقت اوى لما عرفت انها هترجع لجوزها
محمود / قصدك ايه
مروه / مقصديش يا محمود انا بس مستغرباك
محمود / مرام لو هترجع لمازن هبقى اطمنت عليها لكن انها تمشى فى الشوارع فى الجو ده منغير فلوس و لا موبايل لازم اقلق طبعا
اسعد يصحى و يطلع
اسعد / فى ايه
مروه / مفيش يابا
مروه تدخل جوه
محمود / مرام خرجت لوحدها
اسعد / على فين بدرى كدا
محمود / مش عارف و دا اللى قالقنى
اسعد / طب متشوف الجماعه اللى فى الشقه يمكن حد لمحها و لا حاجه و مشى وراها
محمود / حاضر
محمود يروح يخبط على شقه فى البيت اللى قدامهم دور ارضى واحد بدى بيلدينج يفتح
الراجل / محمود باشا اؤمر
محمود / مرام خرجت حد فيكوا شافها
الراجل / لا والله محسيناش بحاجه حضرتك متعرفش راحت فين
محمود / و انا لو اعرف كنت جيتلك ليه ... انا اسف انا بس
الراجل / و لا يهمك حضرتك
محمود / عن اذنكوا
محمود يرجع للمعلم اسعد
محمود / و دى لا معاها لا موبايل و لا بطاقه و لا فلوس و لا نيله دى حاجه تقرف والله
محمود يدخل و اسعد يدخل وراه يلاقى مديحه و مروه قاعدين
اسعد / انا رايح البلد اجيب عجول للزريبه هاجى عالعشا هتعوزوا حاجه
مديحه / تسلم يا حج
اسعد / طب بالاذن انا بقى
محمود يدخل يقعد و هو بينفخ و اسعد يمشى
مديحه / راحت الصاغه تبيع الدهب
محمود يبصلها
مديحه / بتقول مش عاوزه من فلوس مازن اللى معاك حاجه
مروه / هو ايه اللى فلوس مازن و هو سى مازن بتاعها ده كان بيصرف على محمود و لا بيصرف على محمود
محمود / اهدى يا حجه مش نقصاكى
مروه / طبعا كلمتى بقت بتقف فى الزور مش كدا حقك عن اذنكوا
مروه تسيبهم و تدخل جوه
محمود / مالها البت دى
مديحه / فكك منها دلوقت امها تصحى و تعقلها احنا ناقصينها هى و جنانها عالصبح انا داخله اكمل نوم داحنا نايمين الفجر يا عالم
محمود يبصلها مديحه تدخل و هو قاعد ياكل فى ضوافره مالتوتر و بعدين يقوم يغير و ينزل
...........................
فى الصاغه
مرام بتعد فلوس
مرام / شكرا ... بقولك معلش هو حضرتك متعرفش محامى شاطر قريب من هنا
راجل / اه فى واحد على ناصيه الشارع مالنحيادى
مرام / شاطر ؟؟؟
الراجل / عقر
مرام تبتسم و تهز راسها و تمشى فى الاتجاه اللى الراجل شاورلها عليه لحد متلاقى يافطه مكتوب عليها شكرى فاضل المحامى تدخل البيت
........................
فى البيت القديم
مروه / كنتى عوزانى اعمل ايه يعنى
الست / خايبه من يومك انا امبارح قولتلك ملكيش دعوه و سبينى انا اتعامل جريتى و اتسحبتى من لسانك و قولتلك اسكتى برده كملتى
مروه / يعنى انا اللى غلطانه فى الاخر مش هى
الست / انا اتكلمت مع ابوكى ابوكى زى اللى مسحورله هو كمان مش طايق عليها كلمه و قال ايه احنا عندنا ولايا و البت غلبانه و يتيمه و نقف جنبها عشان ربنا يستر على بناتنا
مروه / و احنا مالنا هو احنا اللى عملنا فيها كدا
الست / اهمدى بقى لحسن حد يسمع تبقى مشكله ابوكى على اخره و كمان متنسيش ان الجدع ده اللى اسمه مازن دخل فى شغل كبير اوى مع ابوكى امال انتى فاكره البهايم اللى هو رايح يشتريها دى بتاعه ايه دا كمان ادى للمعلم عباس فلوس يجدد القهوه و تعويض عن الايام اللى مقفوله فيها دى
مروه / انا مش فاهمه الراجل ده والله يعنى هو عاوز ايه بالظبط
الست / على كلام ابوكى عاوز يشيل مرام من عالارض شيل لكن اهله هما اللى عملين المشاكل دى كلها
مروه / يا سلام يعنى بعد كل ده هو اللى بيجرى وراها و هى اللى مش عاجبها دا ايه البنات دى
الست / نقول ايه بس
مروه / والله يا ماما اللى زى مرام دى ما وش نعمه
الست / ابخات يلا ملناش دعوه
.........................
فى شقه شريف
شريف بيلم حاجته باب الاوضه يتفتح بالراحه و شيماء تدخل
شيماء / هو انت رايح فين
شريف / مسافر دبى عشان فرح مونى و راجع بكره هتعوزى حاجه اجيبهالك
شيماء / انا اسفه على فكره
شريف / مفيش مشكله
شيماء / على فكره انا بعت الصفحه لكل صحباتى و كلهم عملوا لايك و بعتها لدكتور عمر و شرحتله و نشرناها على كل الجروبات اللى احنا فيها
شريف / على الله تيجى بفايده
شيماء / هى مرام عامله ايه
شريف / كويسه
شيماء / هو انت لازم تكمل مع مازن ده دا انسان مش كويس و بيجرك معاه
شريف يحط اللى فى ايده في الشنطه و يروح ناحيه شيماء و يقعدها و يقعد جنبها
شريف / تعرفي ايه عن مازن يا شوشو
شيماء / انه حيوان و ابن كلب على فكره بقي مازن ده منغيرك و لا حاجه
شريف / و انا منغير مازن اقل من الولا حاجه يا شيماء
شريف يتنهد و يبص لشيماء
شريف / انا مديون لمازن باكتر من حياتي يا شيماء انا اعرفه اكتر من اى حد هو مش وحش خصوصا دلوقت مازن اه كان بتاع بنات بس كان متخصص شمال بس
شيماء / تفرق فعلا
شريف / متفرقش و كان وحش و اتغير و تاب مازن اكتر انسان انا قابلته في حياتي
شيماء / اكتر انسان ايه
شريف / انسان
شيماء / ايوه انسان ايه يعني
شريف / انسان انسان يا شوشو مش ناقص غباء دلوقت
شريف يشد شيماء من قفاها تدحك
شريف / مازن عمره متاخر عن حد محتاجله عمره مفضح حد حتى لو يستاهل عمره مفترى على حد عمره مدمر مستقبل حد مع انه يقدر بس عمره ما عمل كدا حتى نوعيه البنات اللى كان بيلعب بيهم كانوا شمال و بمزاجهم على
فكره و حتى ندم و اتغير
شيماء / انا زعلانه منه اوى
شريف / و انا و هو على فكره حزين جدا مازن بيحب مرام لدرجه العشق و يمكن عدى دى كمان مازن لو قولتيله تموت و مرام تسامحك هيموت يا شوشو متبقيش انتى و الزمن عليه
شيماء / انت بتحبه اوى كدا ليه دا ما يستاهلش
شريف / لا يستاهل
شيماء / عشان بيديك مرتب كبير يعني مهو
شريف / مرتب ايه با شيماء انا حتى لو مباخدش جنيه حتى لو انا اللى بدفعله عمرى مهتخلى عنه لو اطول اضحى بحياتي عشانه هضحي ارتاحتى
شيماء / ليه يعنى ليه
شريف / كدا
شيماء / مفيش حاجه اسمها كدا
شريف / انتى عاوزه ايه يا شيماء عاوزه ايه
شريف يقوم يطلع شنطه صغيره يفتحها يتاكد ان فيها الباسبور و ورق و يحطها في الشنطه و يقفل الشنطه و يحط الشنطه في الارض
شيماء / انت بتعمل ايه انا بكلمك
شريف / اللهم طولك يا روح
شيماء / مهو انا مش هسكت الا لما تديني مبرر لو مش عشان الفلوس مديونله بايه و تضحي بحياتك عشانه بمناسبه ايه فهمنى
شريف / لما ارجع من دبى نبقي نكمل كلامنا عشان متاخرش عالطياره
شريف يشيل الشنطه و يمشي تجري وراه
شيماء / انا ولا هو
شريف يرمى الشنطه في الارض
شيماء / احنا و لا هو يا ابيه
شريف / مش هتسكتى يعني مش هتبطلى مش كدا
شيماء / اختار بنا لو روحتله متجيش تدور عليا
شريف / لما ابوكى مات مرتبه قل للربع فى المعاش و انتى و اخواتك مصاريفكوا و الدروس و الفواتير كل ده كان على دماغى انا
شيماء/ مهو من شغلك هو يعني كان بيمن عليك
شريف / عمرك مسالتي نفسك مين بيشغل واحد فى الكليه بمرتب زى ده مش كدا عمرك مفكرتى اخوكى الراجل اللى قدامك ده كان شغال ايه
شيماء / سكرتير
شريف / ابقي اسالي صافى قوليلها اول مره شوفتى شريف كانت فين بيعمل ايه و ساعتها نبقي نكمل كلامنا
شريف ياخد شنطته و يمشي و شيماء واقفه تبص عليه
....................
فى مكتب المحامى
شكرى يقوم من عالمكتب و يقعد على كرسي قدام مرام و يولع سجاره
شكرى / اطمنى خالص يا مدام انا قضيتك دى اخلصهالك في جلسه واحده
مرام / ايوه بس زى مشرحت لحضرتك مازن ده عنده بدل المحامى ميه و الف
شكرى / انتى مستقليه بيا و لا ايه يا مدام انتى الحق في صفك دانا مش بس هطلقك منو دانا هجيبلك منه حقك تالت و متلت دانا هخرب بيته
مرام / انا مش عاوزه منه حاجه عوزاه يطلقنى و يبعد عنى و بس
شكرى يقوم يجيب بونبونيره و يعزم على مرام
شكرى / ازاى بس يا مدام دا حقك ...اتفضلى شيكولاته
مرام / شكرا مش عاوزه
شكرى / لا والله ازعل
مرام تمد ايدها و تاخد واحده شكرى يرجع البونبونيره مكانها
شكرى / حضرتك بس سبيلى صوره البطاقه و انا هتخذ كافه الاجراءات معاه
مرام / انا بطاقتى هناك معاه
شكرى / مش مشكله خالص مش عاوزك تقلقي طول مانتى معايا انا هريحك عالاخر
شكرى يحط ايده على رجل مرام تقوم تتنفض و تحاول تمشي يمسكها
شكرى / رايحه فين بس احنا لسه مخلصناش كلامنا
مرام تلطشه قلم على وشه يردهولها فى ساعتها
شكرى / جرا ايه يا بنت الكلب انتى هتنسي نفسك و لا ايه دانا انسفك وقتى
مرام تتف عليه و تطلع تجرى يطلع وراها يلاقي ناس قاعدين فى المكتب
شكرى / مبقاش الا بتوع الاداب اللى زيك اللى يجولى اترافع عنهم قله ادب
شكرى يعدل هدومه و يدخل مكتبه
.......................
فى المطار
شريف / انت مش هتتصل بمحمود تطمن على مرام
مازن / كلمته قبل منزل في البيت مفيش جديد
شريف / مفيش اخبار ارحم من ان الاخبار تكون وحشه
مازن / هو فى اوحش ماللى عدى يعني
شريف / على رايك يلا
مازن و شريف يحطوا شنطهم عالسير و المفاتيح و الموبايل في علبه و يعدوا من جهاز كشف المعادن و ياخدوا حاجتهم تاني
………………………..
فى مسجد
مرام بتصلي و ساجده عماله تعيط ست تيجي تحط ايدها على كتفها مرام تقوم و تسلم و تبص للست و تمسح دموعها
الست / انتى كويسه
مرام تهز راسها ايوه
الست / ما تيجي تسمعى معانا الدرس
مرام تبص تلاقي مجموعه ستات و بنات عاملين دايره حوالين واحده مرام تروح تقعد وسطهم و تسمع
الشيخه / ستنا مريم قالت ايه ياليتني مت قبل هذا و كنت ناسيا منسيا بتدعى على نفسها بالموت ليه موقف صعب هتقول للناس ايه محدش هيصدقها هيقول عنها استغفر الله العظيم زانيه هتدافع عن شرفها ازاى هتقف قدام الناس الزاى ابتلاء كبير ابتلاء محدش يتحمله فسمعتها فشرفها حتى لو كانت ناسكه متعبده محدش كبير عن الابتلاء بس دا مش اى ابتلاء دا موقف صعب ربنا ما يكتبه على بناتنا بس ربنا كبير ربنا فوق الكل الابتلاء ده مكنش بلاء دا كان تكريم من ربنا سبحانه و تعالى ليها ربنا اختارها دون عن النساء كلهم و قالها الا تحزنى دا امر متزعليش متجزعيش متخافيش كلى و اشربي و قامت ووجهت الناس الناس مكنوش مصدقين انها صايمه عن الكلام تشاورلهم على البيبي اللى معاها يقولولها انتى بتهرجى نكلم بيبي ربنا نطقه و برئها زيها برده حادثه الافك السيده عائشه زوجه رسول الله صلي الله عليه وسلم قعدت شهر كامل الناس تتكلم باتكلموا فى عرض مين يا منافقين دى زوجه رسول الله صلى الله عليه و سلم دى بنت ابي بكر هى دى اى حد ربنا برئها بوحى من عنده و نزل فيها قران الموضوع كبير قذف محصنات نرجع لموضوعنا ازاى اواجه الابتلاء بالصبر دلوقت عرفنا ان مفيش حد كبير عالابتلاء و ان محدش سلم منه لا نبى و لا ام نبي و لا زوجه نبي كلنا سوء ممكن نتعرض لابتلاء و ان اهم طرق رفع البلاء الصبر و الاحتساب الصبر و ايه يا بنات
البنات / الاحتساب
الشيخه / ربنا سبحانه و تعالي قال فى كتابه العزيز ايه لا يكلف الله نفسا الا وسعها يعني ايه الكلام ده يا بنات ان كل واحد يعمل اللى يقدر عليه و يقول خلاص مش قادر لا دا معناه ان ربنا مامرناش بحاجه فوق طاقتنا ربنا ادى لكل واحد على قد طاقته يعني لو ربنا كتبلك تشتغل شغلانه معينه اكيد اكيد انت تقدر تشتغلها لو محتاجه قوه بدنيه و عضلات هتلاقي نفسك بفضل ربنا جل و علا قادر لو محتاجه ذكاء هتلاقي نفسك قادر طب فى البلاء ربنا هيديك حاجه او هيحطك فى مشكله و هو سبحانه و تعالى عارف انك مش هتقدر تشيل اكيد لا فانت هتقدر تشيل بس خلى ايمانك قوى اصبر و احتسب
الامام يقيم الصلاه
الشيخه / يلا يا بنات الصلاه و نكمل باذن الله الدرس بعد الصلاه يلا استوا يلا
البنات تقوم تقف و تترص و يصلوا
..............
فى فندق
مازن واقف قدام باب الاوضه و رقم الاوضه ظاهر و بياخد سيلفى و يشير الصوره عالفيس و يعمل شيك ان و يدخل الاوضه يلاقى شريف بياكل
شريف / انت من امتى بتعمل التصرفات الهبله دى ايه اول مره تيجى دبى يعنى
مازن / انت بتعمل ايه فى اوضتى
شريف / زى مانت شايف باكل جعان
مازن / الف هنا
مازن يسيبه و يدخل الحمام
شريف / انت رايح فين
مازن / انت عاوز اخو العروسه يحضر مبهدل هدخل اخد دوش و احلق دقنى و اروش نفسى عشان اكون فريش بالليل
شريف / انت سخن
مازن / هههههههههههههههههه كل كل
مازن يسيب شريف و يدخل الحمام
....................
فى المسجد
البنات بتمشي و مرام لسه قاعده الشيخه تبصلها و تبتسم مرام تقرب
الست / انتى اول مره تحضرى معانا الدرس صح
مرام / ايوه انا اصلي مش من المنطقه
الست / اهلا و سهلا اهلا و سهلا و ايه رايك بقي ناويه تيجي معانا علاطول احنا كل يوم بنتجمع فى نفس الوقت كدا
مرام / ما شاء الله حاجه حلوه اوى بس انا ساكنه بعيد اوى عن هنا بس ان شاء الله هبقي احاول اجى
الست / ان شاء الله
مرام / هو انا ممكن اسال حضرتك سؤال
الست / طبعا
مرام / هو انا لو عندى ابتلاء اعرف منين ان كان ده ذنب انا عملته فكان سبب في البلاء ده او ده حب من ربنا ليا
الست / ههههههههههه فى جميع الاحوال هو حب من ربنا بصي يا بنتي ربنا لما بيحب حد مش بيتليه كدا منغير سبب دا عشان يخليه يكفر عن ذنوبه و يقابله بصحيفه اعمال نضيفه مفيهاش ذنوب او انه عاوزه يقرب منه اكتر اشتاق لمناجاه عبده ليه عاوزك تلجائيله و تطلبي منه فبيفكرك بيه او بيعليكي في الرتبه فبيديكى حسنات منغير اى مجهود غير انك صبرتى عالابتلاء بس و ممكن يكون الابتلاء الصغير ده نجاه كبيره من ابتلاء عظيم انتى مكنتيش شيفاه فاهمه يا بنتي
مرام / انا اتجوزت من شاب كان يعني... بس هو اتغير حفظ قران و اللتزم فى الصلاه و بيعمل خير كتير انا كنت بعمل كل ده منغير حاجه بس هو بطل الحاجات الوحشه و بقي كويس المهم هو له ناس وحشين الناس دول اذونى اوى و اذوه هو كمان و احنا فى ابتلاء شديد و انا مش فاهمه ده ذنب اللى هو عمله ربنا بيطهره زى محضرتك قولتى و لا هو لسه وحش و البلاء ده عشان ربنا ينجيني من انى اكمل حياتي مع واحد وحش
الست / بصي انا اكيد معرفش ظروفك و كمان مش هدخل فى اراده ربنا و اعرف الغيب بس هقولك حاجه الانسان لما بيحب يعمل خير و الشيطان مبيقدرش يمنعه بيبعتله شياطين الانس هما اقوى لان الشيطان اصلا ضعيف اعوذ بالله من الشيطان الرجيم تحرقه حاجه كدا هبله انتى فاهمه ممكن يا بنتي يكون اصحابه حطوه فى البلاء ده عشان يمنعوه يتغير و يكونوا عون للشيطان عليه و ممكن يكون ابتلاء من ربنا ليه عشان يطهره و يكفر عن الحاجات الوحشه دى
مرام / طب و انا ذنبي ايه
الست / انتى مش كنتى سبب في هدايته ربنا بيختبر صبرك و ايمانك و بيعليكي عنده
مرام / يعني مش بينجيني من ابتلاء كبير
الست / يعني هو الشاب لما ربنا يهديه و يحفظ القران و يلتزم فى الصلاه كدا بقي ابتلاء كبير دا البلاء لما تتجوزى راجل دايوث يعريكي
مرام / طب ليه ربنا مبيعاقبش الناس الوحشين دول
الست / و خلق الانسان عجولا يا بنتي متستعجليش دا ربنا قال يا قلبي انتى قال و يمدهم في طغيانهم يعمهون يعني بيزودهم و يخليهم يزيدو في الكفر و الفساد و الطغيان و يعمى عنيهم عن الحق ليه بقي عشان زى مقال انما يؤخرهم ليوم تشخص فيه الابصار وقتها بقي ياخدوا حسابهم تالت و متلت ربنا قال ايه لا ايه لا يغرنك تقلب الذين كفروا فى البلاد متاع قليل ثم ماواهم جهنم و بئس المهاد يعنى ايه يعنى ربنا سايبهم يلموا في ذنوب عشان لما يقابلوه ميلاقوش حسنه واحده فيدخلوا جهنم و بئس المهاد فهمتى حاجه يا بنتى
مرام تهز راسها الست تطبط على كتفها
الست / ربنا يهديلك العاصي يا بنتى و يصلحلك الاحوال
مرام تبتسم و تقوم تمشي فى الشارع و هى بتفكر فى كلام الست
...........
فى القاعه
زياد بيكلم اتنين بوديجارد على الباب
زياد / انا كلامى واضح مازن منتصر ميدخلش القاعه مهما كان التمن انت فاهم و لا لا
راجل / تحت امرك يا فندم
زياد يمشى يقابل احمد
احمد / انت مش قولت مش هيحضر
زياد / خفت و لا ايه
احمد / و هخاف من ايه يعنى انا بتكلم بس عن فتحه صدرك ان مازن مش هيقدر يسيب مرام و يجى و الكلام ده
زياد / عرفت مرام مستخبيه فين
احمد / مش هتصدق
زياد / قول
احمد / فى شقه مازن
زياد / انت بتهزر صح
احمد / لسه مكالمينى دلوقت حالا من مصر مرام دخلت شقه مازن
زياد / يمكن بتلم حاجتها
احمد / و يمكن قررت ترجع بعد الترضيه اللى مازن قدمهالها
زياد / مفتكرش مش مرام مرام مناخيرها فى السما و شايفه نفسها
احمد / مناخير ايه بقى الله يرحمها البت اتسحلت و حالها بقى يصعب عالكافر
زياد / متسبش حاجه للظروف
احمد / تمام سلام انا بقى
.........................
فى الجناح بتاع مازن
مازن خارج مالحمام بينشف دقنه بالفوطه شريف قاعد مربع عالسرير و مبتسم
مازن / مالك اتهبلت و لا ايه
شريف / عندى لك خبر بمليون جنيه
مازن / قول
شريف / هات المليون جنيه الاول
مازن / يا سيدى خد اللى انت عاوزه بس انطق
شريف / مرام ... موجوده دلوقت فى .... شقتك
مازن / عرفت منين
شريف / خليفه اتصل عليك جت و سالت عليك و لما عرفت انك سافرت كانت هتمشى قالها انه معاه المفتاح خدته منه و طلعت
مازن / انت بتتكلم جد مرام روحت
شريف / اه
رساله توصل موبايل مازن يجرى عالموبايل
مازن / دى هناك فعلا فتحت موبايلها فتحت موبايلها فتحت موبايلها
شريف / طب متكلمها مستنى ايه
مازن / استنى استنى لو كلمتها هتخاف و تكابر و تمشى هتقول انى شمتان او حاجه انت ايه رايك اكلمها صح
شريف يهز راسه مازن يتصل بمرام متردش يبص لشريف يشاورله تانى تانى يتصل تانى ترد
مازن / وحشتينى وحشتينى اوى اوى اوى
.................................
