((((((السكة شمال ٢)))))))
#لولو_محمد
الحلقه ٧٣
مروه / و الفلوس دى هترجعنى امان ابويا يا محمود هترجعلى شخطته اللى كانت بترج حيطان البيت
مروه تعيط محمود ياخدها فى حضنه تزقه
مروه / اوعى كدا ايه قله الادب دى
محمود / قله ادب فى عينك انتى مراتى و مكتوب كتابنا
مروه / يا سلام
محمود / و حياه عبد السلام نعدى بس الفتره دى على خير و نعمل الفرح مش هستنى لما تتخرجى
مروه / انت بتتكلم جد يا محمود
محمود / انا محتاجك اوى يا مروه الفتره دى محتاج ارمى نفسى فى حضنك اوى كل حاجه حواليا بتضغط عليا كل حاجه تعبانى محتاج ارتاح محتاج افصل عن الدنيا و اللى فيها
مروه / طب و دراستى
محمود / هتفرق فى ايه يا مروه بدل ما انتى رايحه جايه بين الشقتين هتباتى بس فى حضنى كتير عليا يعنى
مروه تتكسف و تبص فى الارض و تقوم تجرى محمود يبتسم
..........................
بعد كام يوم فى شقه بكرى
مرام بترص السفره مع هدير الست تطلع من المطبخ و شايله صينيه مكرونه بشاميل
الست / ايوه كدا قومى و اتحركى دا الرقده وحشه
مرام / انا كمان زهقت اوى من النوم على السرير
الست / اهم حاجه متجهديش نفسك خالص
مرام / و انتوا مخليني اعمل حاجه
جرس الباب يضرب مرام تحط الطرحه و تروح تفتح الباب تلاقى هادى قالب وشه و باصص فى الارض
الست / حماتك بتموت فيك عملين مكرونه بشاميل من اللى قلبك بيحبها مرام طلعت استاذه فى المطبخ على الله الست هدير هانم تلحق تتعلملها كام حاجه قبل ما نبلى بيها ولا الناس
هدير / هى الحفله عليا النهرده و لا ايه
هادى يدخل و هو بيبرطم و يجرى على اوضته
هادى / ملعون حماتى عاليوم اللى فكرت اخد فيه بنتها
مرام / هو ماله
الست / و الله ما اعرف انا هدخله اشوف ماله الواد ده
الست تدخل الاوضه
الست / مالك يا وله
هادى / زفته الطين غراب البين بتقولى احنا متفقناش على كدا متربطش البت جنبك مدام ما انتش قد الجواز
الست / الله دا ايه الوليه الواطيه دى والله لاروحلها اعرفها مقامها
هادى / هتقوليلها ايه يعنى يا ماما ما معاها حق و هما ملهمش ذنب فى اللى احنا فيه ده
الست / يا سيدى ما تحملش هم احنا بس نخلص من جوازه اختك و نلم النقطه و نشوفلك بيها شقه ايجار يكون سعرها حنين
هادى/ يا سلام و هى الشقه دى مش هتحتاج تامين و توضيب و ايجار و فرش هنجيب منين كل ده ان شاء الله انا اساسا اتخنقت بلا جواز بلا قرف الواحد بيطلع عينه طول الليل و النهار عشان كام ملطوش مياكلوهوش عيش حاف و قولت اهو مرتبى على مرتبها يكفونا دلوقت هنجيب منين و بعدين جواز ايه اللى انا رايح ادبس نفسى فيه اصلا يعنى لو ربنا كرمنى بحته عيل اقولها استنى متولديش لحد ما ربنا يفرجها و لا اخدها اولدها فى مستشفى معفنه يموتوها هى و لا اللى فى بطنها الجواز ده ما اتعملش للى زينا
مرام تخبط على الباب
مرام / الغدى اتحط
هادى / انا مش جعان شكرا سيبونى انام ساعه و لا حاجه قبل ما انزل تانى
الست / ربنا يصلحلك الحال يا ابنى تعالى يا مرام يا بنتى تعالى معايا ناكل
.......................
فى الشركه
مازن قاعد بيشتغل على اللاب توب محمود يدخل
محمود / طلبتنى
مازن / اه يا حوده تعال اقعد عاوزك
محمود يروح يقعد
محمود / خير فى اخبار عن مرام
مازن / مفيش جديد بس انا كلمتها على تليفون هيثم كذا مره مبسوطه و مبتشتكيش و بتقول شيلينها من على الارض شيل بس اصلا مش ده اللى كنت عاوزك عشانه انا عاوزك عشان اسالك انت روحت حطيت الفلوس اللى اخدتها فى حساب مرام فى البنك الميه الف اقصد
محمود / انت متابع حساب مرام و لا ايه
مازن / والله يا محمود انا اى صغيره و كبيره تخص مرام بحاول على قد مقدر اتابعها
محمود / اه حطيتهم انا اصلا مكنش المفروض اخد الفلوس دى احنا معملناش حاجه بالعكس احنا زودنا الطينه بله لا احنا غرقناها خالص عكيناها عالاخر
مازن / اللى حصل ده محدش يقدر يلومكوا عليه يا محمود الواحد فى المواقف اللى زى دى ميقدرش يضمن رده فعله
محمود / على العموم انا قولت هى اولى بيهم منى ينفعوها لو احتاجت حاجه فى يوم من الايام
مازن / بص يا محمود انا عاوزك تنسى اى حاجه وحشه مرت بينا انا معدليش فى الدنيا غيركوا انت و شريف و سعد الاسره الجميله اللى كوناها سوا دى و بكره مرام ترجع و صافى ترجع و نبقى احلى عيله انا على فكره اخ حلو اوى و اسال مونى
محمود / من غير ما اسال شوفتك مع زياد
مازن يبص الناحيه التانيه و ينفخ
محمود / لو مش هتعوز منى حاجه تانيه انا ورايا شغل بالهبل و عاوز اروح بدرى شويه
مازن / لا يا حوده ما اتحرمش المهم كنت عاوز اقولك لو احتاجت اى حاجه
محمود / قشطه يا ميزو عن اذنك انا بقى
مازن يشاور لمحمود يمشى
...........................
فى شقه بكرى
مرام و هدير قاعدين فى اوضه هدير
هدير / هما اساسا كانوا مرتبطين من و هما فى الكليه قصه حب من اللى هى زى بتاعه الافلام دى و اتحدى العالم كله و انا وياك دى عرفاها
مرام تبتسم بحزن و تهز راسها
هدير / المهم وقفت لامها و هتجوزه يعنى هتجوزه و قروا الفاتحه و هما فى الكليه على اساس ان هيشوف شقه و كدا بس تصبر عليه لما يتخرج المهم خلص الكليه و زى باقى الشباب لا شغله و لا مشغله و الست تنفخ البت لقت شغل و هو لا الست جابت اخرها ابويا عشان ينقذ الموقف قالها انه اشتغل معاه فى المحل عمله مرتب صغير و بقى يوقفه معاه منظر عشان الست متبوظش الجوازه فين الشقه يا ابنى فين الشقه يا هادى نلف نلف مفيش حاجه نقدر عليها اديكى شايفه العيشه اللى جاى على قد اللى رايح لحد ما ربنا كرمنى و اتخطبت راحوا لامها و قالولها ايه رايك نجوزهم فى اوضتى الست فى الاول اعترضت و قالت ازاى و اخوه موجود فى البيت المهم بعد محايله ووسطنا ناس و البت قطعت اكل و شرب لما وقعت من طولها وافقت دلوقت بقى لما عرفت انك هنا الست حلفت لتفشكل الجوازه
مرام / انا ما كنتش اعرف ان وجودى هنا
هدير / يا بنتى دى مجرد حجه هى الست اصلا موافقه عشان البت متموتش روحها لكن من اول يوم و احنا فى مشاكل و قرف دى حلفت ما هى دافعه جنيه فى الجهاز و البت هى اللى بتجهز نفسها من مهيتها
مرام / ما يمكن الست ظروفها صعبه برده
هدير / معدمين دا لولا معاش ابوها و الكام ملطوش اللى بتاخده كان زمانهم بيشحتوا
مرام / طب و بعدين
هدير / والله سمعت بابا بيقول هيروحوا بكره يكلموها بابا ينام جنب هيثم و انتى تنامى جنب ماما و هما يتجوزوا فى اوضتى دى زى ما كنا متفقين بس انا متاكده انها هتطلع اى مصيبه تانيه تفشكل بيها الجوازه عادى برده
مرام / والله صعب عليا اوى و هو بيتكلم النهرده
هدير / اصلك متعرفيش هادى اخويا دا غلبان قد ايه و لا حتى بيحب البت شيرين دى قد ايه و لا لسه لما تشوفى شيرين دى هتحبيها اوى بت زى العسل متتخيرش عنك بت غلبانه و عاوزه تتستر فاى خن هو فى واحده ترضى تعيش مع حماتها فى شقه واحده بالوضع ده الا لو كانت شاريه
مرام / والله حال الشبب بقى صعب اوى فعلا يا ريت الواحد كان فى ايده حاجه يقدر يساعد بيها
مرام قاعده تفكر و هدير قاعده تتكلم و بصالها
هدير / ياريت والله بس نعمل ايه العين بصيره و الايد قصيره الواحد بيقول يعنى لو كان يعرف حد يشوفله شغلانه كويسه و لا يعرف شقه تكون محندقه و مش محتاجه فرش و توضيب قد كدا ناجرها و يكون ايجارها حنين و من غير خلو و لا تامين الله دى تبقى فرجت اوى بس هنجيب منين حاجه زى دى و احنا لا نعرف حد و لا معانا فلوس والله الواحد فرح لمجرد انه حلم و رجع زعل لما فاق الله يعينك يا اخويا
مرام / عن اذنك ثوانى
هدير / على فين
مرام تقوم و تطلع بره الاوضه و تخبط على اوضه هادى هيثم يفتح الباب و هدير واقفه على باب اوضتها
هيثم / عاوزه حاجه يا مرام
مرام / هو هادى صاحى
هادى يقوم و هيثم يوسع من قدام الباب
هادى / خير يا مرام
مرام / بص هى مش كبيره و محتاجه شويه شغل بس اهى شقه
هدير تبص لهيثم و تدحك
هادى / مش فاهم تقصدى ايه
مرام / شقتى اللى فى الحاره بتاعه تيته الله يرحمها الشقه اوضه و صاله و حمام و مطبخ محتاجه بس نجار شاطر يصلحها مش هتكلف كتير يعنى ممكن تتجوزوا فيها بدل قفلتها مدام انا قاعده هنا مكانك
هادى / ايوه يا مرام بس
مرام / مفيهاش حاجه اوضه مكان اوضه
هيثم / والله يا مرام انتى بت حلال مصفى
هادى / انت بتقول ايه يا هيثم
هيثم / يا عم احنا من الصبح عمالين نضرب اخماس فى اسداس و جت البت السكر دى حلتهالنا فى ثانيه
الست تطلع من الاوضه التانيه
الست / فى ايه يا ولاد واقفين كدا ليه
هادى / مرام يا ست الكل بتقولى اتجوز فى شقتها
الست / لا يا مرام ميصحش يا حبيبتى الناس يقولوا عننا ايه خدنا البت و حطينا ايدنا على شقتها لا لا مفيش الكلام ده
هيثم / هناجره منها
مرام / و انا موافقه و الايجار وضبوا بيه
الست / اما لو بكرى سمع هيقطم رقبتك انت ايه يا عديم الربايه انت ما صدقت سمعت الكلمه و شبطت دا اخوك معملهاش
هيثم / يا ست الكل مهى الكسبانه اهو تستفيد بالايجار بدل قفلتها و الشقه انا شفتها حلوه والله يا هادى و كمان مش هتحتاج تشترى و تفرش من الصفر هتصلح بس يعنى الليله هتتلم
هادى / ايوه بس برده
هدير / ايه يا جماعه انتوا مفيش دم خالص كدا البت حامل و الدكتور قايل ترتاح و انتوا موقفينها فى الطرقه بقالها ساعه دا ايه قله الزوق دى بقولكوا ايه احنا داخلين ننام ابقوا فكروا مع نفسكوا و شوفوا هتعملوا ايه يلا يا مرام
مرام / تصبحوا على خير
هدير تسحب مرام على الاوضه جوه و تقفل الباب وراها و هى بتبص لامها مبتسمين هيثم و هادى و امهم يتودودوا
هيثم / مبروك عليك الشقه يا معلم
الست / طب لو الجدع اللى اسمه مازن ده اتكلم هنعمل ايه
هيثم / يبقى يتكلم و انا اخليها هى بذات نفسها تقوله الحقيقه هو احنا ضربناها على ايدها ما على يدك اهى هى اللى اتحايلت
الست / اما نشوف بكره تجهز العقد و خليه خمس سنين مش بعد ما نوضبلها الشقه تقول اروح اه مش تيجى تصيده يصيدك نفتح
هيثم / عيب عليكى يا ست الكل انا عمرى قصرت رقبتك برده
الست / اما نشوف انا داخله انام تصبحوا على خير
هادى / و انتى من اهله يا ست الكل
..........................
فى شقه شريف بعد كام يوم
سعد قاعد على كرسى فى الصالون و رؤى قاعده فى الكرسى اللى جنبه و بيلبسها الشبكه و مازن بيصورهم و محمود و شريف واقفين فى جنب و اهل سعد قاعدين فى جنب و تقى شايله صينيه الشبكه وواقفه و فاطمه و عمر و شيماء واقفين فى جنب فاطمه تزرغط رؤى تبصلها
سعد / اخيرا لقد هرمنا والله هرمنا
ست / الف مبروك يا حبيبتى عقبال الليله الكبيره
محمود / مبروك يا سعوده
سعد / ربنا يخليك يا حبيبى
شيماء و تقى يدخلوا المطبخ يجيبوا الجاتوه و الساقع و يوزغوهم شريف يروح يقف جنب مازن بيلعب فى الكاميره و حزين
شريف / مالك
مازن / ماجتش
شريف / طلوع السلم و نزوله مش سهل عليها برده مش عاوزين نتعبها و بعدين انت هتفضل تطمن عليها بالتليفون لحد امتى ما تروح تزورها
مازن / مش عارف احدد معاد كل ما اكلمه يقولى حجه شكل انا مش عارف هى كمان على نفس الوضع اصلهم مشغولين فى الجهاز معلش اصل عندنا اهل عريس بنت عمها دى اهل عروسه ابن عمها كل يوم حجه
شريف / والله مش عارف يا مازن بس انت مينفعش الوضع يستمر على كدا
محمود يروح يقف معاهم
محمود / التجمع ده شكله عن مرام صح
مازن يبص الناحيه التانيه
محمود / النهرده ابن عمها اللى اسمه هادى ده جه الشقه و معاه نجار طبعا مروه فى الاول اتفزعت قالها هو مين و هداها و بيقول هيصلحوا الشقه و ياجروها بدل ركنتها ووراها عقد ايجار بخمس سنين باسمه من مرام
مازن يبص لشريف
مازن / ليه هيثم ما قاليش حاجه زى دى امبارح و انا بكلمه فى التليفون
محمود / الواد هادى ده ما ريحينيش خالص اصلا لولا ان مروه كانت هتلم عليه الحاره ما كانش رد عليها بتقولى كلمها بمنتهى قله الزوق و انتى مالك و كل واحد يخليه فى حاله
شريف / انا بقول تكلم هيثم تانى و تفهم منه
تقى تدخل و تعزم باطباق جاتوه
مازن / تسلم ايدك يا توته عقبالك
تقى / امين يارب بقى
الكل يدحك
.............................
فى شقه مرام بعد كام يوم
مرام بتفرش السفره و ترص الاطباق و هادى عمال بيجرى وراها و يكلمها
هادى / المهم النجار قالى انه بالكتير اسبوعين تلاته و يظبط كل الحاجات دى و الحمد لله المطبخ مش محتاج غير شويه اطباق على كبايات الحاجات اللى بتتكسر الحلل و البوتجاز و التلاجه كلهم سلام
مرام / الحمد لله
هادى / و اتفقت مع شيرين هنشوف حد يعملنا الستاير بالقسط و هتدبر
مرام / ان شاء الله هتفرج ما تقلقش انت بس و لو عصلجت انا شايله قيرشين فى البنك هما مش كتير عشان انت عارف انى كنت بوضب مطعم و بصرف يلا منهم لله اللى حرقوه بقى المهم هبقى اروح اسحبهملك و اهى نوايه تسند الزير
هادى / لا يا مرام انتى كدا بتحرجينى و بعدين اكيد هتحتاجيهم فى الولاده و البيبى اللى هتيجى دى اكيد هتبقى محتاجه مصاريف كتيره اوى و اللى فهمته يعنى انك مش ناويه تاخدى فلوس خالص من طليقك
مرام / يا سيدى هو انا هروح اسحبهم بكره لما تبقى تتزنق و ان شاء الله مش هتتزنق و بعدين يا سيدى متقلقش انا اه مبخدش فلوس من مازن بس دى بنته و ملزمه منه
هادى / يعنى انتى بجد ممكن تاخدى فلوس من مازن عشان ملك
مرام / لو احتجت حاجه هطلب طبعا امال اسيب بنتى محتاجه و ابوها مليونير و بعدين متقلقش مازن اصلا مش هيستنى اما اطلب
هادى / انا تهت منك هو مازن ده حلو و لا وحش منين مش طايقه ترجعيله و منين مش هيستنى اما تطلبى و بعدين اللى فهمته من هيثم انه بيتصل كل شويه يطمن عليكى دول حتى عملولى تحقيق عشان حوار الشقه
مرام / تحقيق ليه
هادى / يعنى ليه و مش ليه و ايه الحكايه و فين على مصدقوا ان انتى اللى عرضتى و انى ماجرها مش سارقها و شافوا العقد و هديوا
مرام / انا معرفش بصراحه بس لو تحب انا ممكن اكلمهم
هادى / لا لا لا اوعى و لا كانى قولتلك حاجه اصل هيقولوا راح اشتكالها و نعمل مشاكل عالفاضى هما خلاص موقف و عدى اصلا
مرام / خلاص تمام
الست تطلع من جوه
الست / الله على ريحه المحشى و جمالها انا خلاص ادمنت اكلك يا مرام بتثبتيلى انى عيشت العمر كله مطبختش
مرام / ههههههههههههههههه الف هنا
هادى / ايوه يا ماما بس ان كان حبيبك عسل يعنى متنسوش ان مرام حامل و تعبانه و كدا لتكونى بتقلى عليها من غير ما تاخدى بالك و لا حاجه
الست / حقه يا مرام اوعى ازعل منك اوى
مرام / لا والله بالعكس انا بحب اطبخ جدا و بعدين انا بعمل الاكل فى الارض فى المطبخ مش ببقى واقفه و لا حاجه يعنى و ربنا يباركلها طنط و هدير بيساعدونى كتير يعنى و بعدين كفايا عليهم شغل التنضيف و الحاجات التقيله
باب الشقه يتفتح و هدير تدخل
هدير / الله على الريحه انا شماها من المدخل
هادى / اتعلمى يا اختى
هدير / انا بقول ناجل الفرح لما مرام تشد حيلها عشان تعملى صينيه العشا بتاعتى
مرام / يا ستى انتى تؤمرى اتجوزى انتى بس و ملكيش دعوه
هدير / بجد يا مرام
مرام / عيب عليكى
هدير / احلى مرام فى الدنيا طب ايه مش هناكل و لا ايه
الست / هتصل بابوكى اقوله الاكل جاهز يجى هو و هيثم
هدير / قشطه على ما اغير هدومى انا كمان يلا عن اذنكوا
..............................
فى الفيلا عند زياد بعد كام يوم
لبنى / و ابراهيم بيه عامل ايه
زياد / قام و بقى زى القرد
لبنى / و مونى لسه زعلانه منه
زياد / والله ماما راحتلها اما نشوف الوضع ده هيرسى على ايه
لبنى / انت ليه عملت كدا ليه بعت التسجيل لمونى كمان طب مازن و فهمتها عشان مازن يتلخم فى ابوه عنكوا لكن مونى ليه
زياد / بقولك ايه يا لبنى انا لو منك ابطل اشغل عقلى بحاجات مش هتفيدنى انتى مالك انتى بوجع القلب ده ما تخليكى زى البنات اللذيذه اللى عايشه للشوبينج و الدلع و بس على فكره انتى بتليقى فى الدلع اوى
لبنى / معدتش بتثق فيا صح معدتش بتقولى حاجه كنت زمان بتقولى كل حاجه
زياد / كنتى زمان بتفكرى معايا ازاى نكبر سوا كنا متفقين ان كل ده حقى و بنحارب سوا عشان نوصله لكن دلوقت انتى كل حاجه بتتعب اعصابك كل حاجه بتوترك و انا بحاول على قد ما اقدر افصلك عن كل ده و بعدين مالك يا قلبى هو حد يلاقى دلع و ما يدلعش بقولك روحى البيوتى سينتر روحى الجيم روحى الاسبا اعملى شوبينج فى واحده عاقله فى الدنيا ترفض الحاجات دى
لبنى / انا معنديش صحاب يا زياد انس سافر و البنات علاقتى بيهم ادمرت و بيخافوا يكلمونى من ساعه ما مازن سجلهم و بهدلهم بعد الفرح فاكر و انت طول الوقت مشغول و قافل على نفسك
زياد / و هو انا منعتك تكونى صداقات جديده ما تخرجى يا بيبى و تتعرفى على ناس تانين انتى مليون من يتمنى يبقى جنبك
لبنى / و انت كنت اولهم بس من ساعه ما اتجوزنا و انا اللى بشحتك لما بتبقى فاضى بتقولى ادور على ناس غيرك عشان انزل من على ودانك زى ما اكون لعبه كنت شبطان فيها و اول ما ملكتها لعبت بيها شويه و ركنتها
زياد / مش قولتلك بطلى تتفرجى على افلام عربى قديمه عشان هتبوظ مخك اهو ادى اخره اللى متسمعش الكلام هنعمل ايه دلوقت
لبنى / انا مبهزرش يا زياد
زياد / انتى مكبره الموضوع ليه هو انا بشتغل عشان مين مش عشانك هو مش كل اللى بتحتاجيه بتلاقيه و بعدين انتى بجد مصدقه اللى انتى بتقوليه ماشى يا لبنى انا مش خارج النهرده تعالى نطلع اوضتنا و نبل جسمنا بشويه مايه دافيين و نسهر طول الليل انا و انتى سوا ايه رايك
لبنى / يعنى مفيش خروج مفيش فسح هو ده بس الجواز بالنسبالك
زياد / هو يعنى انتى بتعبرى جوزك كدا و لا كدا حججك مبتخلصش و لما ما بتلاقيش بتقلبيها نكد و خلاص على العموم يا لبنى انا بقى هخلينى معاكى للاخر عاوزه تخرجى يا بيبى اطلعى اللبسى هاخدك افسحك فسحه العمر كله اطلعى اللبسى
لبنى / يا سلام بعد ايه بقى بعد ما شحتها منك
زياد / هههههههههههههههههههههههه و ايه كمان
لبنى / تصدق انا استاهل ضرب الجزمه انى بتكلم معاك عن اذنك
لبنى تيجى تطلع فوق يمسكها من ايدها جامد و يشدها عليه
لبنى / اه ايدى
زياد / لو فى حد فى الدنيا دى فاهمك هيبقى انا بصى انا عندى ميتينج هسيبك و هرجع بالليل فكرى من هنا لساعتها انتى عاوزه ايه بالظبط و اى كان اللى هتقرريه انا هنفذه من غير نقاش سلام يا بيبى
زياد يمشى و لبنى واقفه تبص حواليها و تنفخ
..............................
فى مطعم
مرام و الست و هدير و هيثم قاعدين بياكلوا اكل كتير
هيثم / انا عاوزكوا تخلصوا الاكل دا كله
هدير / بابا و هادى لو شافوا الاكل ده هيقيموا عليك الحد يا ابنى والله
الست / هناخدلهم معانا مش كدا يا هيثومى
هيثم / و انا اقدر اقول لا يلا ان شالله ما عن حد حوش
هدير / النهرده بنحتفل باول مره نسمع فيها صوت ملوكتى الحلوه حبيبه خالتو الله بجد انا فرحانه اوى عقبالى يارب عقبالى
مرام / ههههههههههههههههههه امين يارب
هيثم / الحفله النهرده فعلا على شرف سمو الكونتيسه مرام بس مش عشان ملك عشان مرام من يوم ما دخلت البيت و احنا بجد حياتنا اتغيرت
هدير / والله معاك حق دا حتى عبد الله بقى بيغير منها اوى ههههههههههههههههه
مرام / هههههههههههههههه مش للدرجادى يعنى
الست / ربنا يباركلنا فيكى يا بنتى اللى عملتيه عشان هادى الاخوات مبيعملوهوش لبعض
مرام / و انا عملت ايه بس انا خدت الاوضه اللى كان هيتجوز فيها و اديته اوضه بدالها عادى يعنى
هدير / لا عملتى كتير يا مرام انتى انقذتى الجوازه
هيثم / كفايا ان بقاله باب شقه هيتقفل عليهم
مرام / ربنا يتملهم على خير
الست / انتوا هتقعدوا ترغوا لحد ما الاكل يبرد كلو كلو
هدير / انا هنسف الاكل دا كلو كلو مش هسيب فيه حاجه
هيثم / ايوه انا دافع دم قلبى فى العزومه دى
هدير / اهو لسه مكلناش و هيبدا يزلنا واطى من يومك
هيثم / شاهده يا مرام
مرام / انتوا اخوات متدخلونيش بينكوا انا عن نفسى ملك بترفس جوه بتنادى عالاكل و انا مش هقدر اسيبها مستنيه اكتر من كدا متاخذونيش بقى
الست / الف هنا هههههههههههههههههههههههه
الناحيه التانيه مازن قاعد متابع اللى بيحصل و شايفها و مبتسم و بيصورها بالموبايل و هى بتدحك وسطيهم
..........................
فى الفيلا عند زياد
ميار / انتى مش هتبطلى الهبل ده بقى و تعقلى
لبنى / بموت يا ماما بموت بكرهه بكرهه بكرهه انتى ايه مش قادره تحسى
ميار / اخرسى وطى صوتك حد يسمعك بقى بعد ما بقى العز دا كلو فى ايدك هترميه كدا بالساهل بقولك ايه فوقى لو فاكره انه هيبكى عليكى تبقى غلطانه كان بيجرى وراكى زمان قبل الجواز بس دلوقت يرميكى زى عقب السجاره و يدوس عليكى برجله زى المعلقه لا منه خلاكى فى حضنه و صرف عليكى و لا منه سابك تشوفى حالك مع راجل غيره و دوخى بقى يا لبنى فى المحاكم
لبنى / فى الشغل طول الوقت و لما بيشوفنى بيعاملنى وحش معدش بيهتم بيا معدش بيحسسنى زى ما كان بيحسسنى زمان زياد اتغير زياد افترى و مفتراش غير عليا انا يا ماما انا تعبت
ميار / ما انتى كمان غلطانه بقى حته عيل برياله زى زياد مش عارفه تكسبيه و تجرجريه وراكى زى زمان
لبنى / بقولك اتغير اتفرعن
ميار / لميه يا عين مامتك قال يا فرعون ايه فرعنك قال ملقتش حد يلمنى لميه يا لبنى خديه تحت باطك كدا و احتويه دلعيه الرجاله تموت فى الدلع خليه مدهول على عينه كدا مش عارف لا يبص يمين و لا شمال ايه انا لسه هعلمك كل السنين دى ملقطتيش حاجه من امك
لبنى تنفخ
ميار / و بلاش الوش ده معاه النفخ و التزهيق الراجل بيتخنق اطلعى كدا استحمى و اعملى شعرك و اتمكيجى و اللبسى حاجه حلوه وولعيلك كام شمعه و خليه يحب البيت و قعده البيت قال على راى المثل الست المفرفشه جوزها يروح من العشا
لبنى تبص لمامتها باستغراب
ميار / استهدى بالله يا حبيبتى و اغزى الشيطان دا زياد بيحبك و بيموت فيكى و ان كان يعنى على الزعل اللى بينكوا بايدك ترجعى كل حاجه زى ما كانت و احسن استهدى بالله يا حبيبتى و حاولى و ان مجابش نتيجه انا هتكلم معاه بنفسى خلاص
لبنى تهز راسها و تطلع فوق
ميار / انا همشى انا بقى عشان عندى معاد يا حبيبتى ابقى طمنينى عليكى بالتليفون ماشى
لبنى تشاور لمامتها من غير ما تبصلها ميار تمشى و هى بتطلع الموبايل من شنطتها
ميار / حبيبى يا زيزو ازيك ... لا يا قلبى و لا تزعل روحك انا اتكلمت معاها و ظبطتهالك عالاخر و طلعت تاخد شاور و هتيجى تلاقيها عروسه ... هههههههههههه بتدلع عليك يا حبيبى ربنا يخليك ليها و تدلعها هو انت يعنى مش عارف لبنى بتحب تحس انك بتجرى وراها علاطول .... بجد دى هتفرح بيها اوى اول ما تروح بقى اديهالها على كام حلوه كدا هو انا اللى هقولك يا زياد ههههههههههههههههههه .... يا ابنى البنات بيجوا بالملاطفه مش بالخناق و الزعل ما تكبرش المواضيع .... ما تخليش الشيطان ينغص عليكوا حياتكوا يا حبيبى و بعدين يا سيدى ان زعلتك تانى كلمنى و انا هاجى اظبطهالك على الاخر ..... هههههههههههههه ماشى يا حبيبى ماشى ..... بقولك يا زيزو بخصوص الفلوس اللى كنت قولتلك عليها .... بجد طب تمام هستناك بكره تكلمنى تقولى عملت ايه .... ما تنسانيش بس يا قلبى عشان انت عارف الظروف .... تمام يا حبيبى سلام سلام
ميار تقفل السكه و تحط الموبايل فى الشنطه و تمشى
.....................
فى الشركه بعد يومين
مازن بيبص فى صوره سونار و هو مبسوط
هيثم / لا هى اللى مديهانى و قالتلى اديهالك الدكتوره طمنتهم خالص هى بس طلبت شويه تحاليل و كدا عشان تطمن خصوصا ان حضرتك عارف ان مرام خسرت دم كتير يعنى فى الحادثه فهى مقلقه من حوار الانيميا دا كمان يعنى اصل الدكتوره دى مش هى اللى مرام كانت متابعه معاها فهى متعرفش حاله مرام اوى فا احنا باذن الله اول ما مرام تشد حيلها شويه هننزل نعمل التحاليل دى
مازن / ليه هى مالها
هيثم / يا مازن باشا مرام فى السرير طول الوقت ما حضرتك عارف تعليمات الدكاتره و السلم و الطلوع و النزول بياثروا عليها و احنا مش عاوزين نجهدها بس
مازن / فى معمل كويس اوى انا عارفه هبعته البيت ياخد منها العينات من غير ما تنزل
هيثم يطلع ورقه مدبس فيها فواتير و يديها لمازن
هيثم / دى قايمه المصاريف اللى صرفنا فيهم الفلوس و هتلاقى حاجات بالفواتير كمان عشان حضرتك تعرف بس الفلوس بتتصرف فين
مازن / خلينى بس اشوف مرام بتدحك الدحكه اللى كانت فى المطعم دى علاطول و خد اللى انت عاوزه يا هيثم انا مش عاوز منك اكتر من كدا تمام
هيثم / والله يا باشا انت لو تشوفها مبتبطلش دحك و هزار طول الوقت و خصوصا البت هدير اختى حبوا بعض اوى و احنا والله ما كوناش ناويين نصرف حاجه من الفلوس دى بس حضرتك عارف الظروف و كمان جوازه اخويا و اختى الاتنين فى وقت واحد مقشطانا على الاخر و حضرتك برده عارف مصاريف العلاج اللى مرام بتاخده و كشف الدكتوره
مازن / هتعدى على الحسابات هتلاقى الفلوس جاهزه و بزياده
هيثم / لا والله ما بقول عشان كدا انا بقول عشان محرج منك باخد منك فلوس قصاد رعايه بنت عمى والله الواحد وشه منك فى الارض بس عندى ليك خبر هيفرحك برده
مازن / قول يا هيثم
هيثم / امبارح اتفقوا مع خياطه و خدوا مقاسات مرام و هيفصلولها فستان عشان تحضر بيه الفرح اصل كل البنات منقيين نفس الفستان انت ادرى منى بالموضه بقى
مازن / طب و ان شاء الله انا هتعزم على الفرح ده صح
هيثم / يا خبر يا باشا دا انت تنورنا
بنت تدخل
البنت / الميتينج جاهز يا فندم
مازن / ثوانى و هاجى ... على العموم يا هيثم ما تنساش تعدى على الحسابات و انت خارج انا هكلمهم دلوقت هيدوك الفلوس
هيثم / ربنا يخليك يا باشا ربنا يخليك عن اذنك و اسف ان كنت عطلتك
...........................
فى الشركه عند زياد
زياد بيمضى ورق و قدامه سكرتيره مايصه كل شويه توطى عليه تمضيه
البنت / و هنا كمان ... و هنا ... و هنا .... بس خلاص خلصنا حضرتك متؤمرنيش باى حاجه تانيه
زياد / شكرا تقدرى تتفضلى
البنت / اه سورى كنت هنسى بالنسبه لمشروع شيل ريزورت مدير المشروع عاوز يقابل حضرتك عشان يعدلوا البادجيت
زياد / دى رابع مره يطلب تعديل البادجيت هو فى ايه
البنت / حضرتك تحب اقوله ايه
زياد / قوليله هقابله انا اللى هقوله بنفسى و يا ريت فنجان قهوه مظبوط عشان صدعت فجاه
البنت / لا يكون ضغط و القهوه تضرك تحب اعملك ليمون و اجبلك اسبرين احسن
زياد / ما فيش مشكله تمام
البنت تيجى تمشى الكعب يتنى و تقع فى حجر زياد و لبنى بتفتح الباب تشوف البنت و هى قاعده فى حضن زياد ترفع حاجبها البنت تقوم فجاه هى و زياد
............................
