السكة شمال ٢ ( كامله ) بقلم / لولو_محمد

الحلقه ٨٩

((((((السكه شمال ٢))))))
#لولو_محمد
الحلقه ٨٩
مرام / طب انا ممكن اخد تاكس عادى
شريف / و تاكس ليه انا ممكن اوصلك بنفسى و بعدين احصله
مرام / تمام فكره حلوه اوى
شريف / و الحمد لله انتى لابسه اهو يلا بقى عشان ما نتاخرش اكتر من كدا
مازن / مرام
مرام / انا لابسه اهو هنزل معاكوا اهو و شريف يوصلنى ما فيهاش حاجه روح انت اللحق شغلك و ما تقلقش لو احتجت لاى حاجه اكيد هكلمك
مازن / تمام يلا بينا
مرام و مازن و شريف يروحوا ناحيه باب الشقه مازن يبص على الازاز
مرام / هنبقى نخلى بسمه تطلع تنضفه يلا يلا عشان متتاخرش
مازن و مرام و شريف ينزلوا و مازن يقفل الباب وراه
...........................
فى النادى
ميار تدخل تسلم على فريده و يقعدوا سوا
ميار / وحشانى جدا جدا جدا يا قلبى اخبارك ايه و اخبار مونى ايه
فريده / الحمد لله يا حبيبتى ميرسى اوى انك جيتى
ميار / و انا اقدر اتاخر عنك خير خير يا قلبى
فريده / انا حال لبنى مش عاجبنى خالص يا ميار
ميار / و لا انا والله غلبت معاها معرفش البنت فيها ايه اتغيرت خالص بقت هاديه و قافله على نفسها طول الوقت انا حاسه انها داخله على اكتئاب و اتكلمت فى الموضوع ده مع زياد على فكره قولتله يعرضها على حد او يتكلم معاها قالى انه هياخدها و يسافروا روسيا يجددوا الهانيمون بتاعهم و يغيروا جو رجعوا بعد يومين و حالتها كانت سيئه جدا
فريده / ازاى بس و ليه
ميار / هى مش راضيه تتكلم و لا تقول اى حاجه و كل ما اكلمها تصرخ فيا و تقول انتى ما تعرفيش حاجه سبينى فى حالى سبينى فى حالى حتى امبارح لما جت كانت منهاره من العياط و لما جيت اكلمها مسكت سكينه و هددتنى هتموت نفسها
فريده / لا كدا الموضوع ما يتسكتش عليه
ميار / انا تعبت معاها جدا دى بنتى الوحيده يا فريده انا مش عارفه اعمل ايه و حتى لما كلمت زياد قالى ما تضغطيش عليها انا هعرف اراضيها ازاى
فريده /انا كمان لما كلمته طلب منى ما ادخلش على فكره بس انا فعلا قلقانه عليهم دول اول اتنين حياتهم تبوظ بالشكل ده بعد الجواز دول كانوا ما بيفترقوش
ميار / نفس اللى قولته لزياد قولتله انتوا اتحسدتوا طبعا دحك و قال على كلامى تخاريف بس الحسد مذكور فى القران و انتى عارفه
فريده / هى فى البيت دلوقت
ميار / ايوه قافله على نفسها الباب لا اكل و لا شرب
فريده / خلاص قومى نروح نتكلم معاها انا متاكده انها هتعملى حساب
ميار / ياريت يا فريده ياريت قومى يا حبيبتى قومى
....................
فى عربيه شريف
شريف / و انتى رديتى عليه قولتيله ايه
مرام / اقوله ايه يعنى اتعصبت و اتجننت و حدفت كبايه العصير و فضل يهزا فيا و انا اصرخ فيه لحد ما فجاه لقيت مازن دخل ساعتها حسيت انى اتشليت مش عارفه اعمل ايه اقوله و لا ما اقولوش و لا اعمل ايه
شريف / كويس انك ما قولتيلوش
مرام / و اخرتها يا شريف و اخرتها
شريف / يتفلقوا يا مرام انتى و جوزك بابكوا مقفول عليكوا غير كدا يولعوا
مرام / بس دا ابوه
شريف / هو نفسه مش معترف بيه على فكره بقى الراجل ده جه امبارح الشركه و اتكلم مع مازن
مرام / عشان كدا كنتوا مدايقين
شريف / ايوه انا طبعا ما اعرفش قال لمازن ايه بس اللى قالهولى لوحده كان كفايا حطيه عليه اللى قاله لمازن على اللى قالهولك حسبى الله و نعم الوكيل فيه و فى اللى زيه
مرام / انت تعرف معمل تحاليل كويس
شريف / انتى اتهبلتى صح اوعى يا مرام تكونى بجد ناويه تطاوعيه
مرام / هو قالى انى لما اديله نتيجه التحليل هياخد حفيدته فى حضنه هو قالى مدام انتى ما عملتيش حاجه غلط تخافى من ايه
شريف / يا مرام الموضوع مش محتاج اثبات انتى مش محتاجه تجيبى اثبات على شرفك
مرام / ما عنديش اللى اخاف منه
شريف / و لو انتى هتجننينى ازاى تقبلى على نفسك اهانه زى دى و بعدين انتى فاكره انك لما هتديله التحليل بجد هيفتحلك حضنه و يقولك اهلا بمرات ابنى دا هيشهر بيكى فكل حته و يقول عملته عشان مهياش عارفه مين ابو الولد الحقيقى و بدل ما يبقى دليل اثبات يبقى دليل نفى انا مش مصدق انك فكرتى فى حاجه زى دى انا بجد مش مصدقك يا مرام انتى بقالك شهور مطلعه عينا و روحنا بسبب كرامتك و جايه دلوقت ترميها فى صفيحه الزباله ازاى ترضى لنفسك حاجه زى دى ازاى
شريف يبص لمرام يلاقيها باصه فى الارض و بتعيط
شريف / انا اسف لو كنت
مرام / انا تعبت انا من يوم ما عرفت انى حامل و انا فى كابوس كابوس انهم يجبرونى اسقطه و كابوس ان مازن يحرمنى من ملك و كابوس انى اتزل و ارجع لمازن و ده الحمد لله اتحقق و انهم يحاولوا يسقطونى كمان اتحقق
شريف / رجوعك لمازن مش زل رجوعك لمازن هو الحاجه اللى كان المفروض تحصل من زمان و مازن عمره ما هيحرمك من ملك انا نفسى شاهد على التنازل اللى عملهولك و مازن مش هيسمح لحد ياذى بنته او يحرمها منك او يحرمك منها فخوفك ده مش مبرر و بعدين انتى متجوزه راجل حاولى تتعاملى على الاساس ده و تسبيه هو يقلق على الموضوع ده مش انتى
مرام / يعنى انت رايك اقوله
شريف / مش عارف انا لو اضمن رد فعله اقولك اه تقوليله بس للاسف مضمنش رد فعله ابدا بس لو عاوزه نصيحتى انسى اللى حصل خالص و لا كانه حصل و حسنى علاقتك بمازن الواد بيحبك اقسم بالله بيحبك
مرام تبصله
شريف / انتى وثقتى فيا و كلمتينى ارجوكى ثقى فيا فى الموضوع دا كمان ارجوكى
مرام تبصله شريف يركن العربيه
شريف / وصلنا .... ماما مستنياكى فوق للاسف البنات مش فوق بس انا متاكد ان ماما هتكون صحبه حلوه ليكى لحد ما نرجع
مرام / شكرا يا شريف
شريف / تحبى اوصلك
مرام / ما فيش داعى شكرا
مرام تنزل و تدخل العماره و تطلع و شريف متابعها لحد ما تختفى خالص يمشى
.......................
فى شقه ميار
فريده و لبنى قاعدين فى اوضه لوحدهم
فريده / مهو دى مش تصرفات ناس طبيعيه يا لبنى التغير ده اكيد له سبب
لبنى / انا برده هقول لحضرتك تسالى زياد
فريده / مهو لازم تحكيلى عشان اعرف اجيبلك حقك منه انا امه و امك انا عمرى ما فرقت بينك و بين مونى ليه بتحطى بينا حواجز
لبنى / انا بس مش عاوزه اكبر المشكله مش اكتر
فريده / طب احكيلى و سبينى انا احكم على المشكله
لبنى / يا ماما بس
فريده / احكى يا لبنى انا مش هتحايل عليكى احكى يا ماما انا جيالك لحد عندك قولى فى ايه
لبنى / زياد خانى فى روسيا
فريده / مستحيل طبعا
لبنى / انا ما عدتش كفايا عليه من يوم ما اتجوزنا و تصرفاته اتغيرت واجهته اكتر من مره و منهم مره دخلت عليه المكتب لقيت السكرتيره قاعده على حجره
فريده / انتى اكيد بتهزرى
لبنى / و لما سافرنا روسيا كان بيتحجج بالشغل و الصفقه اللى بيعملها و ما رضاش ياخدنى معاه و الناس شافوه و هو بيرقص مع بنتين شقر فى ديسكوا و خدهم و طلع بيهم اوضه فى الفندق و مش بس كدا دا جايلى تانى يوم و لا كانه عمل اى حاجه قولتله نرجع مصر و حاولت اعمل كل البدع اللى حضرتك او ماما هتقولولى عليها اكسبيه و الكلام العقيم ده بس مش قادره اسامحه
فريده / ما يمكن
لبنى / انا اتاكدت بنفسى زياد خانى و لما واجهته امبارح ما عرفش يرد
فريده / انا مش عارفه اقولك ايه
لبنى / احنا ملحقناش يا ماما ملحقناش يعنى لا انا اهملت فى نفسى و لا السن بان عليا و لا الحمل بهدلنى و لا اى حاجه غير انه ملكنى و اطمن تخيلى بقى بعد كام سنه هيعمل فيا ايه
فريده / انا متاكده ان زياد له مبرر قوى للى حصل ده مستحيل زياد يعمل كدا دا روحه فيكى دا عمره ما بص لغيرك
لبنى / الكلام ده عشان كان خايف انى اروح من ايده لكن دلوقت خلاص يخاف ليه
فريده / لا يا لبنى لا زياد ما يعملش كدا ابدا على العموم قومى روحى معايا و انا ليا كلام تانى معاه و اوعدك ان الموضوع ده مش هيتكرر ابدا
لبنى / يا ماما
فريده / قومى يا لبنى مش كل حاجه مناهده كدا انا فيا اللى مكفينى قومى يلا هستناكى بره تلبسى عشان نروح سوا يلا يلا
فريده تسيب لبنى و تقوم تطلع بره و تقفل الباب وراها
........................
فى الشركه
مازن و شريف قاعدين فى المكتب مازن قاعد على المكتب و شريف قاعد بيراجع عقود قدامه
شريف / مبروك يا وحش الف مبروك كدا اقدر ابصملك بالعشره انك ملك السوق دا كله
مازن / انا مش فرحان اننا مضينا العقد على قد ما انا فرحان اننا خلصنا كل الحاجات المهمه قبل فرحك
شريف / كويس انك بتعترف انك من غيرى تحتاس هههههههههههههههههه
مازن / و لا اقدر انكر طبعا ... بما اننا خلصنا اما اتصل اطمن على مرام بقى
مازن يطلع موبايله
مازن / سلامتها ام حسن دا فصل امتى ده
شريف / الشاحن عندك فى الدرج
مازن يفتح الدرج و يطلع الشاحن و يحطه فى الفيشه و يحط الموبايل فيه
مازن / هات موبايلك اما اكلمهم اطمن عليها على ما ده يشحن
شريف يطلع موبايله و يديهوله و يكمل مراجعه للعقود
شريف / المحامى اللى حط البند العاشر ده برنس اقسم بالله احنا كدا حزمنا الالمان
مازن / ههههههههههههههههههه انت معجب بالماده دى اوى
مازن يحاول يتصل بمرام غير متاح
مازن / غير متاح
مازن يفتح يبعتلها رساله يلاقيه باعته لشريف الرساله ملامحه تتغير و الابتسامه تروح من على وشه و يبص لشريف و يقوم يقعد قدامه و يحط الموبايل على الترابيزه و يحركه قدام شريف
مازن / ايه ده
شريف يبص فى الموبايل و ياخد نفس و يبص لمازن
مازن / ايه ده يا شريف
شريف / كانت عاوزه تحكيلى عن اللى باباك عمله
مازن / والله
شريف / صدقنى يا مازن انت مش عاوز تعرف باباك قال لمرام ايه و لا انا و لا هى كنا هنقولك
مازن / ليه
شريف / انت بتثق فيا و لا لا
مازن / بس دا ما يديكش الحق يبقى فى بينك و بين مراتى اسرار من ورايا يا شريف
شريف يبص الناحيه التانيه
مازن / على العموم العيب مش عليك
مازن يجى يقوم شريف يقوم و يمسكه
شريف / هى ملهاش حد تمام
مازن بعصبيه / ليها انا هتحتاج مين بعدى انت يعنى هتكون اقربلها منى هتثق فيك اكتر منى
شريف / الموضوع مش كدا خالص اهدى
مازن / امال الموضوع ازاى
شريف / الموضوع انها خايفه عليك انت ما تعرفش مرام قالتلى ايه و لا تعرف ابوك قالها ايه و لا تعرف ابوك طلب منى ايه امبارح
مازن / اسمع يا شريف انا لحد دلوقت بحاول اكون هادى و اعمل حساب للعشره اللى بينا فياريت انت كمان تعمل ليها حساب و تقولى الموضوع من الالف للياء قبل ما افقد اعصابى و اعمل حاجه كلنا نندم عليها بعد كدا
شريف يبصله و يبص فى الارض و مازن ماسك نفسه بالعافيه شريف يبصله تانى
شريف / تمام هحكيلك كل حاجه بس توعدنى
مازن / احكى
شريف / حاضر
..........................
فى شقه فاطمه
فاطمه / ههههههههههههههههه طب تصدقى و تؤمنى بايه
مرام / لا اله الا الله
فاطمه / انا كنت هزعل لو مدوقتيش البقلاوه بتاعتى و كنت بفكر ابعت مع شريف ليكوا منابكوا
مرام / ربنا يخليكى لينا يا ماما بطه
فاطمه / الواحد مالوش فى الدنيا دى غير حاجتين عمله و عيلته عمله و هياخده معاه فى الاخره و عيلته هى عزوته فى الدنيا و كل ما العيله كبرت كل ما العزوه قويت و كل ما العيله كانت بتحب بعض كل ما الدنيا كانت احلى
مرام / والله معاكى حق
فاطمه / انتى و مازن ربنا وحده اللى يعلم غلاوتكوا عندى كانكوا جيتوا من بطنى بالظبط
مرام / ربنا يخليكى يا ست الكل يا احلى ماما بطه فى الدنيا
فاطمه / قوليلى بقى فطرتى و لا اعملك احلى بيض بالبسطرمه ممكن تاكليه فى حياتك
مرام / بيض ايه و بسرطمه ايه امال البتنجان المقلى اللى جوه ده
فاطمه / لا البيض ده تصبيره لحد معاد الغدى انما البتنجان بقى دا هيتعمل بيه مسقعه باللحمه المفرومه انما ايه لا دوقتى قبلها و لا بعدها
مرام / انا كنت متاكده ان حماتى بتموت فيا على فكره بقى دى اكلتى المفضله
فاطمه / ههههههههههههههههههه يبقى قومى نقعد فى المطبخ اعلمك تكات ماما فاطمه للمسقعه
مرام / قومى يلا
تليفون فاطمه يرن
فاطمه / الله دا شريف ... الو
مازن / ازيك يا ماما فاطمه
فاطمه / مازن .. ازيك يا حبيبى خير شريف
مازن / شريف جنبى اهو انا بس كنت عاوز اكلم مرام اصل تليفونها غير متاح انا تحت البيت خليها تنزل معلش
فاطمه / تنزل فين يا مازن انتوا مش هتتغدوا يا ابنى
مازن / معلش والله بجد يوم تانى النهرده تعبان مش قادر
فاطمه / ايوه بس
مازن / عشان خاطرى يا ماما فاطمه بجد مش قادر خليها تنزل
فاطمه تبص لمرام اللى قامت وقفت و عدلت الطرحه و لفتها على راسها
فاطمه / نزلالك اهو يا حبيبى
مازن / تسلميلى يا ست الكل يلا سلام
فاطمه / طب اعبيلك شويه بتنجان فى علبه
مرام / ما فيش داعى عليكى ليا عزومه مسقعه بس خليها مره تانيه
فاطمه / ماشى يا قلبى ابقى كلمينى كتير طمنينى عليكى
مرام / اكلمك ايه انا هطبلك كل شويه
فاطمه / احلى و احلى يلا لا اله الا الله
مرام / محمد رسول الله
فاطمه توصل مرام لباب الشقه و تقفل وراها
.............................
فى الشركه
زياد بيتكلم فى التليفون و هو عصبى
زياد / يعنى ايه مضى العقود النهرده ... يعنى ايه ياخد توكيل المكن الالمانى فى مصر يعنى ايه نقفلها و نروح بقى ... مصنع ايه و زفت ايه و انا مالى بالهبل ده .... و انت كنت فين يعنى ... ما انا لو مشغل معايا شويه ستات ما كانش ده بقى حالى ... يا سلام و انا اشتغل فى مكن درجه تانيه ليه و الدرجه الاولى كانت قدامى ... لا فكك الشركه الفرنسيه بق على الفاضى ... عارف اننا بقالنا سنين بنتعامل معاهم بس الوضع اختلف .... لا طبعا مش هقعد عشر سنين تحت رحمه مازن باشا و هو حاطت السوق فى جيبه و بيتحكم فيه هنافسه ازاى دلوقت ... اقفل اقفل انا قرفت منك اصلا اقفل
زياد يقفل الخط و يرزع الموبايل على المكتب يرن تانى يبص فيه فريده
زياد / ايوه يا ماما ... ليه كدا يا ماما ليه كدا بتروحيلها ليه ... هى قالتلك ... لا مش فايق اجى اتكلم معاها دلوقت خالص بصى مخنوق و هطق و لو اتعاملت مع اى حد هتغابى عليه ... بعدين يا ماما بعدين هحكيلك على كل حاجه ابوس ايدك ... اه طبعا سى زفت مازن هو فى غيره قارفنى فى عيشتى ... بلا هانت بلا زفت سبينى فى حالى بقى ... قولت بعدين يا ماما بعدين قولت يلا سلام دلوقت سلام ......
زياد يحط الموبايل على المكتب
زياد / كانت نقصاكى انتى كمان يا ست لبنى كانت نقصاكى اووووف
..............
فى عربيه مازن قدام بيت شريف
مرام تخرج من العماره
شريف / ياريت تتعامل بالراحه
مازن / على اساس انى هضربها مثلا يا شريف انزل يابنى ابوس ايدك انزل مش فايقلك خالص دلوقت
شريف / تمام يلا سلام
شريف ينزل و يعدى من جنب مرام و يبصوا لبعض و مرام تروح تركب و هى حاسه ان فى حاجه مازن ميبصلهاش و يسوق
مرام / ايه اخبار الجماعه الالمان
مازن / كويسين
مرام / مالك فى ايه
مازن / لما نروح نتكلم
مرام / فى ايه يا مازن متوترنيش
مازن / انتى عامله حاجه لو عرفتها ممكن ازعل
مرام / لا ما عملتش
مازن / يبقى ما فيش اى سبب تتوترى عشانه
مرام / مازن انا
مازن / انا كنت فاكر ان علاقتنا غير كدا بس واضح انك ما كنتيش بتكدبى لما قولتى انك ما عدتيش بتثقى فيا
مرام تبص فى الارض
مازن / انا بجد مش عارف اقولك ايه انتى ازاى تخبى عنى يا مرام ازاى تحكى لشريف و انا لا ازاى تقوليلى بمنتهى البساطه انك بتثقى فى صاحبى اكتر منى ان صاحبى اقربلك منى
مرام / لا طبعا
مازن / ملهاش معنى تانى يا مرام كان المفروض تقوليلى ان بابا طلب منك حاجه زى دى كان المفروض تقوليلى
مرام / كنت هتعمل ايه هتروح تتخانق معاه
مازن / اكيد لا بس كنت كلمته كنت قولتله انى مش محتاج لتحليل دى ان ايه عشان اعرف اللى فى بطن مراتى منى و لا لا لان ما فيش اى احتمال تانى و ان مراتى انا اضمنها برقبتى و انى مش هسمح لحد انه يغلط فى شرفى او يشكك فيه كنت حطيت كل واحد عند حده
مرام / و هو ده بالظبط اللى باباك عاوزه انى ابان الشريره اللى بتوقع بينه و بين ولاده
مازن / اللى بينى و بين بابا انتى مالكيش اى دخل بيه يا مرام
مرام / ازاى يا مازن ازاى
مازن / و انتى بقى لما روحتى قولتى لشريف حليتوا المشكله دى حسنتوا علاقتى بابويا
مرام / انا كنت عوزاه يساعدنى
مازن / كنتى عوزاه يساعدك فى مصيبه تانيه اكبر من المصيبه الاولانيه
مرام / يعنى انا اللى بقيت غلطانه دلوقت انا اللى وحشه و كلكوا حلوين غلطت عشان فكرت فيك و فى مشاعرك غلطانه لما حاولت اوفق بينك و بين والدك
مازن / ايوه غلطانه ما فيش حاجه فى الدنيا هتصلح اللى اتكسر بينى و بين بابا خصوصا ده
مرام / تمام انا اسفه
مرام تبص الناحيه التانيه و الدموع تنزل من عنيها
مازن / انتى متخيله شعورى و انا بشوف رسالتك بالصدفه على موبايل صاحبى عوزاه فى حاجه من ورايا الشيطان كانت بتلعب كوره فى دماغى
مرام تبصله و ترجع تبص قدامها
مرام / هيكون فى ايه يعنى بينى و بينه
مازن / اسالى نفسك
مرام / تمام انا اسفه مش هعمل كدا تانى
مازن / دا شئ مفروغ منه
مرام تبصله و ترجع تبص قدامها و تنفخ و هو باصص قدامه و سايق
..............................
فى شقه فاطمه
فاطمه / طبعا غلطان و ستين غلطان كمان
شريف / يا ماما كنت اعمل ايه
فاطمه / يا ابنى مهو الشيطان بيدخل من الحاجات دى
شريف / شيطان ايه يا ماما اعوذ بالله انتى بتقولى ايه
فاطمه / يا شريف هو الرسول صلى الله عليه و سلم بيغلط
شريف / لا طبعا استغفر الله
فاطمه / طب لما قال الحمو الموت كان يقصد ايه يا ابنى انا عارفه انها يتيمه و ملهاش حد تلجاله و كل ده بس ما انا قدامها اهو و كمان مازن معاه حق ازاى يكون ليها حد اقرب من جوزها
شريف / يعنى انا ما كنتش عاوز اقوله اللى ابوه طلبه عشان ما ادخلش الشيطان جواه و عشان ما اقوموش على ابوه دخلت الشيطان من ناحيتى انا
فاطمه / لا طبعا اولا مرام فوق الشبهات و علاقتك بمازن اقوى بكتير من ان موقف تافه زى ده ياثر فيها بس هو زعل و معاه حق و انت سالتنى و انا قولت رايي انت لو صافى حطتك فى الموقف ده و اتحطت فى مشكله و راحت لمازن بدل ما تجيلك مش هتزعل
شريف يبصلها و يبص فى الارض و يسكت
فاطمه / مش هتغير
شريف / طب و العمل دلوقت
فاطمه / العمل عمل ربنا اهدى كدا و سيب مازن يهدى و اتكلم معاه و اعتزرله و اشرحله بالراحه و ان قالك كلمه كدا و لا كدا استحمله
شريف / يا ماما ما انا اتكلمت معاه فعلا و اعتزرتله و كل ده بس هو لسه مدايق هو انا يعنى مش عارفه
فاطمه / خلاص يبقى تسيبه يهدى خالص و هو لوحده هيصفالك اديله وقته يا ابنى
شريف يتنهد تليفونه يرن يطلعه يشوفه يلاقيه صافى
فاطمه / قوم قوم روق و رد على عروستك و ان شاء الله ربنا يعمل اللى فيه الخير
شريف يهز راسه و يقوم يدخل الاوضه
فاطمه / ربنا يصلحلكوا الحال يا ولادى و يبعد عنكوا الشيطان وولاد الحرام قادر يا كريم
.........................
فى العربيه قدام بيت مازن
مازن يركن العربيه و يفضل باصص قدامه
مرام / هو انت مش طالع
مازن / هروح اجيب غدى و ارجع اطلعى انتى
مرام / طب ما جبتش الغدى و انا معاك ليه
مازن / مرام محتاج اكون لوحدى شويه
مرام / و مدام محتاج تكون لوحدك جيت خدتنى من بيت ماما فاطمه ليه ما كنت فضلت لوحدك بقى
مازن يوطى على مرام و يفتحلها الباب مرام تبصله
مرام / بقى كدا يا مازن
مازن / لو سمحتى يا مرام انزلى
مرام / نازله يا مازن نازله
مرام تنزل و ترزع الباب و تدخل العماره و ما تعبرش خليفه اللى قام وقف لما شافها مازن ينزل و يروح لخليفه
خليفه / مالها الست مرام يا مازن بيه
مازن / متاخدش فى بالك بقولك انا رايح مشوار مهم هطلب لها دليفرى بيتزا لما يوصل حاسبه و طلعهولها تتغدى
خليفه / تحت امرك يا مازن بيه
مازن يديله فلوس
خليفه / معايا يا بيه
مازن / مش مشكله خلى معاك بزياده يلا سلام
مازن يروح يركب العربيه و يمشى
..........................
فى الفيلا
لبنى / شوفتى البيه اللى هيموت عليا لما عرف انى روحت مع حضرتك عمل ايه ما هانش عليه حتى يجي ما خلاص انا روحت يتعب نفسه ليه
فريده / هو انتى ما سمعتيهوش يا لبنى يا عالم سى مازن عمل فيه ايه انا على اعصابى من الصبح من ساعه ما كلمته يا لبنى
لبنى / والله اى كان اللى هيعمله فيه هو يستاهله و زياده
فريده / انتى بتقولى ايه يا لبنى افتكرى ان زياد دا جوزك
لبنى / ياريت هو اللى يفتكر انه متجوز بس
فريده / لا كدا كتير اوى انا فى حياتى ما شوفتش كدا
ابراهيم يدخل و هو سعيد جدا
ابراهيم / ايه مالكوا فى حاجه
فريده / ابدا يا حبيبى خير طمنى شكلك مبسوط
ابراهيم / جدا النهرده و انا فى الشركه عرفت ان مازن مضى عقد احتكار لمكن التعبئه الالمانى لمده عشر سنين و هيبقى الوكيل الوحيد و الحصرى للمكن فى مصر لواحده من اكبر الشركات المصدره فى العالم
فريده / بجد
ابراهيم / و مش بس كدا دا هيفتح اكبر سلسله مصانع لتعبئه المواد الغذائيه فى مصر
فريده / و مازن يفهم ايه فى المشروع ده
ابراهيم / انتى ناسيه اننا عندنا واحده من اكبر شركات التعبئه
فريده / بالظبط هيستفيد ايه هو لما ينافسك خصوصا لو البيزنس ده مش شغله انت فرحان ان ابنك بيحاربك فى السوق انا مش فهماك بصراحه يا ابراهيم
ابراهيم / طبعا فرحان يا فريده فرحان جدا كمان مازن اللى كنت بقول عنه فاشل اخيرا تفوق عليا و بقى بينافسنى كمان تعرفى المجموعه دى فى خلال سنه واحده و بالعقد ده مش بس هيفتح المصنع دا هيتحكم فى سعر مكن التعبئه فى مصر و هيرفع اسهم المجموعه بتاعته للسما
فريده / مبروك على مرام و على بنتها
ابراهيم يبصلها
فريده / ايه مهو كلو فى الاول و الاخر ليهم دا مش بعيد نصحى بكره و لا بعده نلاقيه كتب المصنع باسمها حلاوه الولاده ما انت عارفه طول عمره كريم اوى
ابراهيم/ اموت و اعرف عرق النكد اللى فيكوا ده جايبينه منين ما تشوفوش الواحد مبسوط ابدا الا لما تنكدوا عليه اقولك انا الغلطان انى روحت انا طالع انام بدل ما اتجلط
فريده / الله و انا مالى انت كل حاجه تتعصب عليا انا هو انا الحيطه المايله بتاعتك كل ما سى مازن يعمل حاجه تزعلك تيجى تزعقلى انا شايفه يا لبنى انا مستحمله ايه مش انتى اللى كل شويه تروحى تغضبى عند ماما
ابراهيم / ايه ده هو لبنى و زياد متخانقين و لا ايه
فريده / ما انت لو مهتم بزياد زي ما انت مهتم بمازن اكيد كنت عرفت على العموم الحمد لله الموضوع اتحل خلاص و لبنى روحت مش كدا يا لبنى
لبنى بتحاول تدارى سعادتها
لبنى / طبعا طبعا عن اذنكوا اطلع ارتاح فى اوضتى شويه
ابراهيم / اتفضلى يا بنتى اتفضلى
لبنى تطلع فوق و هى سعيده جدا ابراهيم يبص لفريده و ينفخ و يطلع اوضته و هو مدايق و فريده و لا على بالها
..............................
فى شقه مازن
جرس الباب يضرب مرام تروح تفتح تلاقى خليفه جايبلها بيتزتين
خليفه / مازن بيه طلب لحضرتك الاكل ده ووصانى اول ما يوصل اطلعهولك على طول
مرام / شكرا
مرام تاخد منه العلب خليفه ينزل مرام تقفل الباب مرام تحط العلب على السفره و تجرى تجيب الموبايل و تتصل بيه
مازن / الو
مرام / انت فين يا مازن انت هتعمل حكايه و تكبر الموضوع ما قولتلك اسفه ايه هاكل لوحدى
مازن / اه كلى لوحدك و هتاخر و انا راجع لو احتاجتى حاجه رقم شريف عندك
مرام / هى بقت كدا يا مازن ماشى
مازن / سلام يا مرام
مرام تقفل السكه و هى بتغلى
مرام / اما خليتك انت اللى تجرى ورايا يا مازن ميبقاش اسمى مرام و هتشوف
مرام تاخد علب البيتزا و تدخل جوه
.............................