(((((السكة شمال ٢))))))
#لولو_محمد
الحلقه ٧٢
شريف / بس للاسف هما مطلقين دلوقت
الدحكه تروح من على وش هيثم
شريف / والله هو نفسه يردها بس فى مشاكل كتير بينها و بين اهله فالموضوع معقد شويه
هيثم / طب انا اقدر اعمل ايه عشان اصلح الموضوع ده
شريف / للاسف الحجه سميحه جده مرام اتوفت و مرام مبقاش ليها حد و هى حامل و ووضعها صعب جدا و محتاجه راحه تامه و هى مش عاوزه تقعد غير فى بيتها و لوحدها و مش عارفين نعمل ايه
هيثم / تعد لوحدها و بيت عمها موجود انت عاوز تلبسنا العيبه و لا ايه يا باشا ميصحش طبعا دا ان ما شالتهاش الارض نشيلها فوق عنينا انت بتقول ايه يا باشا ادينى عنوانها و انا اروح اجيب ابويا و نروح نجيبها وقتى
شريف / دا العشم يا هيثم على العموم متقلقش مرام بتاخد نفقه عشرين الف جنيه شهريا
هيثم عنيه توسع
شريف / انا هديهملك تصرف منهم عليها يعنى وجود مرام فى البيت عندكوا مش هيكلفكوا جنيه و لو احتجت فلوس فى اى وقت اديك عرفت العنوان
...............................
هيثم / لا يا باشا حضرتك كدا بتشتمنى ايه هو احنا هناخد فلوس عشان ناخد بالنا من بنت عمى و لا ايه لا ميصحش
شريف / اصيل يا هيثم بس دول ممكن تعتبرهم مقابل خدمه زى ما قولت مرام تلزمها الراحه التامه يعنى هتحتاج حد يخدمها اربعه و عشرين ساعه غير الكشف و العلاج و مصاريف الولاده و الاكل الصحى اللى يناسب واحده حامل
هيثم / و لو يا باشا
شريف / على العموم انا هديك الفلوس و انت يا سيدى حوشها ان احتجتها اهى معاك محتاجتهاش ابقى اديها لمرام بس ليا عندك طلب صغير
هيثم / تحت امرك يا باشا اؤمر
...........................
فى المستشفي
مازن / انتى عنديه كدا ليه
مرام / و انت زنان كدا ليه انا عاوزه اروح انا بتخنق من المستشفيات عايزه اروح
مازن / يا قلبي افهمى انتى لما هتخشي البيت مش هترتاحى اكيد هتتعبي هناك طب تعالى نروح الفيلا بتاعه خالو اقعدى فى الجناح اللى يعجبك
مرام / يارب عالزن مازن صدعتنى من ساعه ما صحيت و انت مسكتش مش شريف بعت حد ينضف
مازن / اه نضفت بس كل حاجه مكسره و بايظه هتحتاج اكتر من يوم عشان تتصلح
مرام / هصلحها انا
مازن / انتى تعبانه
مرام / يوووووه فين شريف ... اووووف هات موبايلك اكلم عمتى
مازن يديها الموبايل
مازن / اتفضلي بس متطوليش عشان الرصيد ان كان حبيبك عسل يعني
مرام تبص لمازن مبتسم تنفخ و تطلب النمره محدش يرد تطلب محمود ميردش تنفخ و تديله الموبايل تانى
مرام / انت اكيد مقولتلهمش انى خارجه النهرده انت عملت كدا قاصد صح
مازن يبصلها و ساكت مرام تتنهد
مرام / خلاص هتوصلنى و لا اخد تاكس
مازن / هوصلك اتفضلي
مرام تمشي و مازن يجى يسندها
مرام / انا بعرف امشي لوحدى
مازن / ماشي
مازن يبعد شويه مرام تمشي تتسند على الحيطه ينفخ و يروح يسندها تمشي معاها يبتسم
..................
فى شقه فى منطقه متوسطه
ست / انت رايح تدخلنا فى حوارات
هيثم / دول عشرين الف جنيه يا ماما
الراجل / هيدهملك شهر و يدوخك بعدين و نكون احنا ادبسنا في البت
هيثم / يا سلام و ايه يعني تكون قامت بالسلامه و نبعتها شقتها بقي
الست / متروح شقتها دى و بالعشرين الف دول يجيبلها اللى تخدمها اوفرله دى نصبايه يا وله
هيثم / لا يا ستى لو عليه ياخدها عنده فى البيت لو عليه يفرشلها الارض ورد و يشيلها فى عنيه بس هى بقي اللى عايشه فى حوار الكرامه و المثاليات
الراجل / اوووووف زى ستها قطعت و قطعت سيرتها وله تغور بمثالياتها دى
هيثم / يا ابا بدل ما اختى تتجوز مع حماتها و اخويا يتجوز فى الاوضه جوه نستفيد بالفلوس دى و ناجرله شقه بره و عيشتنا ترتاح دول عشرين الف و احنا و شطارتنا بقي نسحب منه على قد ما نقدر اشى الشقه محتاجه توضيب اشي مرام محتاجه لبس محتاجه علاج و هكذا هو انا اللى هفهمك يا بابا
الست / والله كلام معقول بس يكون فى علمك انا مبخدمش حد انا صحتى على قدى اه
هيثم / هخدمها انا يا ستى و بعدين جرا ايه يا نونه ما كله بحسابه المهم تيجي معايا دلوقت نروح نجيبها و انتى يا ماما تفهمى هادى و هدير الحوار عشان ميبوظوش الليله
الراجل / هو ايه اللى يلا يلا مش نفكر الاول
هيثم / على العموم دول عشر تلاف عربون لما اخد مرام هيدينى العشره التانين انا هروح ارجعهمله و انت فكر براحتك بقي
الست / ترجع ايه هات دول جايين فوقتهم اختك ناقصها حاجات كتير فى الجهاز
هيثم / حاجات ايه دى ... يلا انا مالى .. هتيجي يا بابا و لا ايه
الراجل / جاى جاى اما نشوف اخرتها معاك
هيثم / اخرتها عز ان شاء الله
...................
على ناصيه الحاره
مازن يركن و ينزل يجرى يساعد مرام تنزل و يسندها
مرام / شكرا انا هكمل لوحدى
مازن / معلش استحمليني هوصلك لحد باب العماره بس و همشي مش هطلع معاكى
مرام / ماشي يلا
متزن يسند مرام و يدخلوا الحاره الست بتاعه الخضار تشوفها و مازن مسندها
الست / حمد الله على السلامه يا مرام لولولولولولولولى يوه متاخذينيش يا اختى البقاء لله
مرام تبتسم و تكمل مشي سلامه يطله من القهوه
سلامه / الف حمد الله على السلامه الحاره نورت الحاره نورت اجيب كرسي ترتاحى شويه
مرام / شكرا هكمل للبيت
ست من البلكونه تطلع على صوت الزغاريط
الست / ايه ده مرام .. حمد الله عالسلامه هنعدى عليكي بالليل ان شاء الله نعزيكي
مرام تبصلها و تبتسم و تمشي مازن يوشوشها
مازن / انتى متاكده انك عاوزه تقعدى هنا
مرام / لو فيهم العبر احسن من غيرهم
مازن / و غيرهم دى اكيد عايده عليا مش محتاجه ذكاء يعني
مرام / لا ازاى استغفر الله متقولش على نفسك كدا انت جميل
مازن / بتحبيني يا هدى
مرام و مازن يوصلوا للبوابه مازن يفتحها
مرام / يااااه بوابه بيتنا كنت بدات افقد الامل انى اشوفك تانى هاين عليا اصلي ركعتين شكر اننا وصلنا
مازن / هههههههههههههههههه
مرام / شكرا يا مازن تعبتك
مازن / هههههههه مجتش على دى ما انتى بقالك كتير مطلعه عيني
مرام / و ادى اخره اللى تحاول تكون زوق عن اذنك
مازن / هههههههههههههههههه هبقي اعدى اطمن عليكي
مرام تهز راسها و تطلع السلم و هو واقف باصص في الارض و حزين و يبص جوه على مرام بتطلع السلم و يرجع يبص على محل الجزاره مقفول و يبص فى الارض و يتنهد
...................
فى تاكس
هيثم / فهمت يا بابا هتقول ايه
الراجل / يا عم هو حوار خلاص عرفت
هيثم / و بلاش تفتح فى حوار الحجه سميحه البت روحها فيها و احنا عاوزين نكسبها
الراجل/ انت هتسكت و لا اوقف التاكس و انزل
هيثم / و الله شكلك هتعك و هتضيع علينا المصلحه
الراجل / والله انت اللى شكلك هتدبسنا فى مصيبه و لا تلبسنا في الحيط
هيثم / والله لو كان ينفع كنت اجرت شقه و خدت البت و خدمتها بعنيا و ضربت الفلوس في جيبي عشان تعرفوا ان الله حق بس نقول ايه ليكوا رزق
الراجل / كتر خيرك يا خويا نقطنا بسكاتك بقي
هيثم يبص لابوه و يسكت
................
على السلم فى بيت مرام
مرام تطلع بتنهج و تعبانه و تسند على الحيطه و تضرب الجرس شقه مديحه ثوانى و مروه تروح تفتح
مروه / انتى
مرام / البقاء لله يا مروه عمتى هنا
مروه / انتى ليكي عين تيجي لحد هنا انتى ايه مبتتهديش مش هتسكتى الا لما تدفنينا كلنا ما ترحمينا بقي
مرام / مروه عيب كدا
مروه / انتى لسه شوفتى عيب دا انتى لو ما مشيتيش من وشي ...
مديحه تدخل
مديحه / خشي جوه يا مروه انا هتكلم معاها
مروه تبص لمرام من فوق لتحت و تدخل مديحه تروح تقف قدام مرام و عينها في الارض
مرام / انا مقدره موقفها والله بس انا مليش ذنب فى كل ده ما انا كمان جدتى ماتت
مديحه / ايه اللى جابك يا مرام
مرام تتصدم و تبص لمديحه
مرام / هروح فين يا عمتى يعني انا حاولت كتير اكلمك و اكلم محمود محدش جه خدنى جيت
مديحه / روحى لمازن يا مرام هو اولى من اللى فى بطنك مننا
مرام / انتى بتقولى ايه يا عمتى ... هى مروه طلبت منك كدا انا هصالحها
مديحه / مروه ملهاش دعوه احنا ناس غلابه على قد حالنا ما لناش فى الهم ده روحى لمازن يحميكي
مرام / مازن اللى قالك تعملى معايا كدا ضاغط عليكي و على محمود والله امس
مديحه / انا محلتيش غير ابن واحد و من يومها و انا بتخيل كان هيحصله ايه لو كان موجود ربنا نجالى ابني و مش هسمحلك تضيعيه منى بعندك متاخذينيش يا بنتي بس العمر مش بعزقه ملكيش مكان هنا
مديحه تقفل الباب و مرام واقفه تعيط تبص حواليها مفيش حد تخبط تانى و تمسح دموعها مديحه تفتح
مديحه / قولتلك امشي يا مرام قولتلك
مرام / كنت عاوزه اسال معاكى مفتاح شقتى
مديحه تدخل جوه تجيبه و مرام واقفه على الباب تعيط مروه تطلع من المطبخ تبص عليها مرام تمسح دموعها و تديها ضهرها مديحه تطلع و معاها المفتاح
مديحه / دا اللى عندى معرفش بقي شريف غير الكالون و لا ايه
مرام / شكرا
مديحه تقفل الباب مرام تبص عليهم بحزن و تعيط و تتسند على الحيطه و تروح تفتح بابها و تدخل تلاقي الدنيا مكسره بس نضيفه و مفيش اثر للدم و لا اى حاجه تروح تقعد على الكنبه متقطعه و التنجيد خارج منها مرام تبص حواليها فى الشقه و تحط ايدها على بطنها
مرام / متخافيش يا ملك على راي تيته الله يرحمها مدام في جدران و سقف يبقي عندنا بيت هنصلحه سوا انا و انتى
مرام تبص فى الارض تسمع حركه على السلم تقوم عشان تقفل الباب تلاقي مازن
مرام / انت ايه اللى رجعك
مازن / مقدرتش امشي الا لما اطمن عليكي
مرام / كتر خيرك انا بس كنت بلم حاجتى عشان اشوف ايه اللى ناقصنى
مازن / اساعدك
مرام / لا شكرا انا هريح بس شويه من السلم و بعدين هبقي اشوف
مازن / هتريحي فين ؟؟ هنا!!!
الباب يخبط مازن يبص وراه يلاقي هيثم و ابوه على الباب
الراجل / السلام عليكم شقه الحجه سميحه الله يرحمها
مازن / ايوه مين حضرتك
الراجل / بكرى نور الدين اخو المرحوم سلامه نور الدين ... انتى مرام
مرام تهز راسها الراجل يدخل ياخدها بالحضن
الراجل / حبيبتي يا بنتي حبيبتي اه يا مرام والله من ساعه ما سمعت ان الحجه سميحه ماتت و انا قلبي بيتقطع و دوخت عليكي السبع دخات و سالنا في مستشفيات بالهبل الحمد لله انى لقيتك
مرام كاشه منه و تبصله و تبص لمازن الراجل يطلع بطاقته و يوريهالها
الراجل / ليكي حق متفتكرينيش الله يرحمها الحجه سميحه كانت خناقه صغيره قلبت بقطيعه و الدنيا شغلت كل واحد فى دومته و كل ما اقول اجى اطمن عليكي اتكسف و اقول اروح اقولها ايه و لا هعملها ايه بس كنت متابع اخبارك من بعيد لبعيد
الراجل يبص لمازن و يمد ايده
الراجل / بكرى نور الدين تاجر منظفات
مازن / اهلا وسهلا مازن منتصر
بكرى / معروف يا باشا معروف و غنى عن التعريف بس متاخذنيش ان كنت استغربت لما شوفك انا اصلى فاكركوا متطلقين … بالمناسبه دا هيثم ابنى الوسطانى متفتكريهوش انتى يا مرام
مرام تبص لهيثم و تبص لبكرى و تبص لمازن بكرى يبص لمازن
بكرى / بس انا واخد على خاطرى منك يعنى متحننش قلب البت دى على عمها و تقولها تعزمه حتى فى فرحكوا على فكره انا كنت هاجى بس خفت تحصل مشاكل مع الحجه الله يرحمها و الاسوء لتفتكروا انى بوصل الود عشان اتخطبتى لباشا كبير و كدا بس والله كنت متابع اخبارك من بعيد
مرام تبصله و ساكته
هيثم / هو انتى قاعده هنا لوحدك
مرام تبص لمازن باصص لهيثم
بكرى / اسمعى يا مرام لمى حاجتك و تعالى اقعدى معانا لامؤاخذه احنا مش هينفع نسيبك لوحدك هتقعدى مع اختك هدير و لا انتى كنتى ناويه على ايه
مرام / عن اذنكوا ثوانى
مرام تسيبهم و تدخل الاوضه و تقعد على السرير المرتبه مقطعه و القطن خارج منها و درف الدولاب مخلعه و مسنوده على الدولاب و الشباك مكسور و الهدوم فى ارضيه الدولاب تفضل تبص حواليها و الحزن مالى عنيها و ساكته مازن يدخل
مازن / انتى هتروحى معاهم بجد
مرام تبصله
مازن / مرام لو مش عاوزه تفضلى هنا انا ممكن اجيبلك بدل المكان عشره
مرام تبص فى الارض يقعد جنبها
مازن / مرام انتى قولتى انى مش جوزك بس انا ابو ملك انتى قولتى كدا صح مش عوزانى اساعدك و احميكى ماشى بس اسمحيلى اساعد ملك و احميها
مرام / انا هروح مع عمى
مرام تبص فى الارض
مازن / متاكده انتى حتى متعرفيهمش
مرام / مش هتفرق كتير كدا كدا معدليش حد اعرفه
مازن يسند دقن مرام بايده و يرفع راسها و يخلى عنيها تيحى فى عنيه عنيها كلها دموع تبعد وشها عن ايده و تقوم تبص فوق الدولاب
مرام / بس لو عاوز تساعدنى ممكن تناولنى الشنطه دى الم هدومى فيها
مازن / طب ممكن ابقى اجى ازورك هناك اطمن عليكى و على ملك
مرام / انت و عمى بقى اصطفوا مع بعض فى الاول و الاخر دا بيته
مازن / عمك مقدور عليه بس لو جيت هتقابلينى يعنى
مرام / ان شاء الله
مازن ينزل الشنطه من الدولاب و يجيب الهدوم المبعتره فى ارض الدولاب و يحطها على السرير و مرام تبدا تنقى و تطبق و تحط فى الشنطه
...............................
فى الشركه
محمود قاعد فى مكتبه و حاطت ايده على خده الباب يتفتح و شريف يدخل محمود يبصله و الحزن مالى وشه
شريف / مرام راحت بيت عمها مازن وصلها و طلع معاها و شاف البيت هتنام مع بنت عمها فى الاوضه
محمود يهز راسه
شريف / بيقولى شكلهم ناس كويسين الشقه تلت اوض و صاله كبيره اوضه لهادى و هيثم و اوضه لبكرى و مراته و اوضه لهدير و مرام بيقولى الناس استقبلوا مرام كويس و مشى من عندهم مطمن و وعدته لو احتاجت اى حاجه هتكلمه اهدى بقى
محمود / ما انا هادى اهو انت شايفنى بشد فى شعرى
شريف / انا عارف انت حاسس بايه
محمود يبتسم بحزن و يبص فى الارض
محمود / ما افتكرش ان انت بالذات يا شريف ممكن تحس بيا
محمود يتنهد تنهيده جامده
شريف / لا يكلف الله نفسا الا وسعها و بعدين الحمد لله اتحلت
محمود / اتحلت اه اشترينا ناس واطين بايعين مرام من سنين و مسالوش عنها و لو مره واحده الناس اللى ربوها باعوها لناس زباله ووقفوا يتفرجوا عليها و هى بتمشى زى ما وقفوا يتفرجوا عليها و هى بتموت
محمود عنيه تتملى دموع و يمسحها بسرعه
محمود / مش سهل انك تنام و تقوم تكتشف انك عيل عره متسواش تلاته ابيض بعد ما كنت واخد قلم فى نفسك
شريف / ههههههههههههههههههههههههه انت بجد فاكر ان كل واحد فينا معندهوش فتره فى حياته محسش فيها باحساسك ان كنت انا و لا مازن كلنا عدينا بالمرحله دى
محمود يبصله
شريف / فتره فى حياتك مستعد تدفع نص عمرك و تتنسي بتفتكرها فى عيون كل اللى حضروها و الجرئ منهم بيعايرك بيها كلنا عندنا الفتره دى بس اللى اتعلمته انا بقي ان يا اما اوقف حياتى عند الفتره دى يا اعديها و انساها و اثبت لنفسي قبل اى حد انى مش كدا
محمود ينهار و يعيط
محمود / انت فاكر ان شكلى فى عينى و لا فى عين الناس يهمنى انا خسرت مرام هبص فى عينها ازاى دلوقت لما كنا بنزاكر ايام الامتحانات و كانت تدايق منى كانت تقولى مش هخلى ملك تقولك يا خالو محمود بكره ملك تكبر و تشوفنى و مرام تقولها محمود الواطى اللى باعنا اهو تفرق فى ايه سنين وقفت فيها جنبها ووقت ضعفها بعتها و اديتها ضهرى اديتها ضهرى فى اكتر وقت هى ضعيفه فيه وحيده فيه تعبانه فيه قولى ازاى ممكن اعدى فتره زى دى قولى ازاى ممكن اكفر عن جريمه زى دى
شريف يبصله و يبص فى الارض
شريف / احنا مدينالهاش ضهرنا اوى يعنى حتى لو هى ما تعرفش احنا برده لسه فى ضهرها
محمود / اننا نوديها لعمها الواطى اللى عمره ما سال عنها و لا حتى بكيلو برتقان
شريف / لو كان واطى كان جه لما اتخطبت لمازن يحاول يطلع باى مصلحه
محمود / انت طيب لدرجه الهبل هو يعنى خطوبه مرام و مازن اتقالت فى الجرايد و التليفزيون هيعرف منين و هو مبيسالش عنها اصلا تلاقيه كان بيضرب نفسه بالجزمه لما خبر طلاقهم اتقال فى التليفزيون انه ضيع على نفسه الفرصه
شريف / حتى لو احنا هنتابعها و فى اى وقت هنحس ان الناس دى وحشه هنسحبها من هناك
محمود / هتوديها فين بقى
شريف / ساعتها يحلها الف حلال و ان ما شالتهاش الارض يا محمود بيتنا مفتوح
محمود يبص لشريف و يقوم يسيب المكان و يمشى
............................
فى شقه بكرى
مرام قاعده على سرير فى اوضه مليانه كراتين و الست و بنت بيفضوا شنطه مرام فى الدولاب
هدير / طب احنا قولالاه الاصل انتى متساليش
مرام / انا ما كنتش اعرفلكوا عنوان اصلا
هدير / على العموم انتى جيتى فى الوقت المناسب طول عمرى نفسى يبقى عندى اخت تمسكلى الطرحه و هجبلك البتاعه اللى مكتوب عليها اخت العروسه دى
مرام تبتسم
الست / تصدقى احنا عاوزين نحسب معاد الولاده عشان نشوف الفستان هيبقى ببطن و لا من غير هههههههههههههههههه
هدير / اصل صحباتى كلهم اتفقوا يفصلوا نفس الفستان
الست / بصى متشيليش هم هنعمله واسع انتى كدا كدا مش هتطلعى من الولاده يعنى منيكان بيبقى فى فتره كدا لحد ما ترجعى لطبيعتك
مرام تبتسم
هدير / على فكره انا كمان مفصله نفس الفستان بس عشان احضر بيه فرح اخويا هادى بعديا بشهر
مرام / الف مبروك ربنا يكتر افراحكوا
الست / و لسه فرحتنا الكبيره بالنونه هى بنوته صح
مرام / اه ملك
هدير / الله انا بحب البنات اوى دا انا هلعب بيها للصبح
الست / احنا خلصنا هروح احضر العشا و انتى اجازه النهرده يا دودو عشان متسبيش مرام لوحدها تزهق اقعدى فرجيها على جهازك هى اكيد فاهمه فى الحاجات دى تقولك رايها و ايه الناقص
مرام / والله يا طنط انا مفهمش اوى انا مجهزتش مازن كان جاهز و انا يادوب تيته الله يرحمها كانت شريالى كام طقم و خلاص
هدير / اهى دى العرسان مش انا اللى حتى حته شقه طالع عينا عشان نلاقيها
مرام / ربنا يجعل بختك احسن من بختى
الست / بس سمعت انه شاريكى و بصراحه شكله طيب و ابن حلال دا جابك لحد هنا و مرضيش يمشى الا لما اطمن عليكى دا انا اعرف مطلقين بيجيبوا بعض من شعورهم
مرام / شهاده لله هو كويس بس اهله مش موافقين عليا خاله الله يرحمه هو اللى جه طلبنى بس لما مات ابوه قوم عليا الدنيا مستحملتش و تعبت
هدير / هما اللى حاولوا يسقطوكى
الست / دا الواحد قايم نايم يحلم يشيل احفاده مش ده اللى يروح ياجر بلطجيه يموتوا مرات ابنه عشان يقتلوا حفيدته
هدير / بس مازن كمان شكله خرع معاهم شكله ابن امه احسن انك خلعتى من الورطه دى بلا هم
مرام باصه فى الارض و بتحاولى تدارى دموعها الست تروح تحضنها
الست / متزعليش نفسك غلط على اللى فى بطنك بكره تروق و تحلى و لسه لما البت دى تنكشح من هنا الاوضه دى هتفضالك على فكره الاوضه واسعه بس جهاز البت دى اللى زانقها ساعتها نجيب سرير بيبى و نحطه هنا و تبقى الاوضه دى بتاعتك انتى و ملوكه ايه رايك بقى
مرام تبتسم
هدير / و نعملها سبوع و حالاقاتك برجالاتك و نقعد نلف حوالين السفره لحد ما ندوخ و نقع كلنا ههههههههههه الله انا بحب الحاجات دى اوى و تعرفى احلى حاجه ايه انها هتقولى يا خالتوا يااااه اخيرا عقده حياتى اتفكت
الست / هههههههههههههههه دى كانت مسوده عيشتى مليش اخت بنت ليه مليش اخت بنت ليه محدش هيقولى يا خالتوا عمتوا ايه اللى زيى زى اى واحده غريبه انا مليش اخت اللعب معاها مليش اخت اشيل عيالها
مرام تبصلهم و هى مبسوطه اوى
............................
على القهوه
بكرى و هادى و هيثم قاعدين على القهوه
بكرى / يا هادى افهم فتره و تعدى
هادى / هو ايه اللى اهدى يا ابا احنا مش كنا خلاص خلصنا
هيثم / هتفرق فى ايه يا ابنى دا بدل ما تشكرنا كنت هتتجوز فى بيت ابوك فى حته اوضه دلوقت هيبقالك شقه بابك مقفول عليك فيها
هادى / ما اللى عالبر عوام يا حبيبى انا كنت هتجوز فى اوضه هدير اخرى اخد الاوضه اديها وش نضافه و تلميع و انجد المرتبه و حماتى هتجيب ستاره جديده للاوضه و طبق نور و كام طقم على كام فوطه و جبرت على كدا انما شقه يعنى عفش و ايجار و ميه و نور و كهربا و طفح هو انا لاقى اكل ما اللى جى على قد اللى رايح يا فرحتى واحد معدم اتجوز واحده معدمه
هيثم / يا عم بسيطه البت عندها شقه اوضه و صاله صغيره و مفروشه بس على قدها شويه نجار شاطر يظبطلك الدنيا و الكام الف اللى خدناهم نكمل النواقص و يتقفل عليك باب زى الفل
هادى / طب و الفواتير يا حبيبى انا مرتبى على مرتبها اخره يكفينا اكل و شرب
هيثم / يعنى عاوز ايه دلوقت
هادى / يعنى مش عشان هتجوز هخرج من المولد بلا حمص باصيلى الفين تلت الاف كل شهر
بكرى / ليه هو الباشا هيرعاها معانا و لا حاجه انت تحمد ربنا اننا هنجهزك من الفلوس دى لكن الباقى ملكش فيه
هادى / طب و اتفاقنا مع ام شيرين هنعمل فيه ايه هنقولها جهزى بقى يا حجه هتقولك منين و ناجل الجوازه سنتين تلاته كمان لحد ما تفرج دا ان فرجت
هيثم / يا عم ما قولنالك هنوضبلك الدنيا عاوز ايه
هادى / و ان صحيت فى يوم قالت هرجع شقتى
بكرى / ليه و احنا داقين عصافير مفيش جنيه هيتحط فى الشقه الا لما تمضى عقد ايجار خمس سنين و لو جدعه بقى تبقى تطلعك
هيثم / متتنفخش اوى كدا يا ابا عشان مرام دى لو زعلت الجدع طليقها ده هيبعتنا كلنا رحله درجه اولى ورا الشمس ندفى
بكرى / و عشان كدا يا موكوس منك ليه انا لاممكوا على القهوه دى احنا عاوزين نشوف طريقه نسرسب بيها البت دى من غير ما تحس و كمان نعرف ايه اللى وراها و ايه اللى قدامها مش هنشيلها كدا غميضى لازم نفهم احنا داخلين على ايه عشان منقعدش بعد كدا نقول يا ريت اللى جرا ما كان و لا ايه
هيثم / تمام قولنا انت بقى ايه اللى فى دماغك
بكرى / هقولك
.............................
فى الشركه
شريف / انت مش وصلتها بنفسك و اطمنت عليها
مازن / ايوه بس برده مرام قاعده فى شقه فيها اتنين رجاله الموضوع خانقنى
شريف / مرام بمليون راجل ميتخافش عليها
مازن / يعنى مرام بمليون راجل اقفل عليها باب واحد مع اتنين و اقولها ما انتى ما يتخافش عليكى انت عاوز تعصبنى يا شريف
شريف / والله انت مش محتاجنى عشان تبقى عصبى بس اقولك ايه طيب النهرده يوم المواساه العالم اخلص من محمود اخش فيك انت
مازن / على قد ما انا مش طايقهم على قد ما هم صعبانين عليا
شريف / طبعا يصعبوا عليك الست عايشه على مهدئات و الواد مسكين بين امه و مراته
مازن / بكره تروحلهم تخلص موضوع التعويضات ده لو سمحت
شريف / تمام حاضر من عنيا مش فاضل غيرهم اصلا
مازن / و انت
شريف / وله اتعدل هاخد مكافاه انى جريت ورا اخويا و لا انى جيت على اختى ياريتنى حتى كنت عرفت اعمل حاجه زى ما دخلت زى ما خرجت
مازن / لا بس كان نفسى اشوفك و انت بتنط
شريف / نعيدهالك يا حبيبى انت تؤمر يا خبر
مازن / هههههههههههههههههههههه
...............................
فى شقه مديحه
مروه / هتعمل ايه
محمود / هعمل ايه يعنى يا مروه حق ربنا مفيش اختلاف عليه
مروه / ايوه بس دا حقنا احنا
محمود / حقك هتاخديه يا مروه انا كدا كدا كلمت المحامى و قالى هيجى يقعد معانا و نخلص كل حاجه و نفضها سيره و هحاول على قد ما اقدر اخلى كل نصيبكوا فى البيت هنا
مروه / و لما ياخدوا الارض و الزريبه و البهايم ناكل منين انت ناسى ان المحل مقفول
محمود / نفتحه يا مروه و لا ناجره و بعدين انتى ناقصك ايه هو انا قصرت فى حاجه
مروه / ربنا يخليك لينا يا محمود بس يصعب عليا اشوف تعب ابويا و شقاه بيروح لناس تانيه
محمود / شرع ربنا ملناش نتكلم فيه و بعدين فى حوار كدا ما كنتش عاوز اتكلم فيه
مروه / خير
محمود / فيكى من يكتم السر و لا
مروه / فى بير قول قول بقى متشوقنيش
محمود / ههههههههههههه مازن عامل تعويض لكل اسره خسرت حد فى الخناقه مليون جنيه و ان شاء الله بس الجو يهدى شويه هتلاقيهم جايبينلكوا الفلوس
مروه / و انا المفروض افرح يعنى
محمود / اهى نوايه تسند الزير و كمان عمامك ملهمش فى المليون جنيه حاجه و بيتهيالى ده مبلغ كفايا لجهاز اخواتك و علامهم و انكوا تعيشوا مرتاحين لاخر العمر دا لو امك حطتهم فى البنك يطلعلكوا منهم مبلغ محترم كل شهر يعيشكوا ملوك
مروه / و الفلوس دى هترجعنى امان ابويا يا محمود هترجعلى شخطته اللى كانت بترج حيطان البيت
مروه تعيط محمود ياخدها فى حضنه تزقه
مروه / اوعى كدا ايه قله الادب دى
محمود / قله ادب فى عينك انتى مراتى و مكتوب كتابنا
مروه / يا سلام
محمود / و حياه عبد السلام نعدى بس الفتره دى على خير و نعمل الفرح مش هستنى لما تتخرجى
مروه / انت بتتكلم جد يا محمود
محمود / انا محتاجك اوى يا مروه الفتره دى محتاج ارمى نفسى فى حضنك اوى كل حاجه حواليا بتضغط عليا كل حاجه تعبانى محتاج ارتاح محتاج افصل عن الدنيا و اللى فيها
مروه / طب و دراستى
محمود / هتفرق فى ايه يا مروه بدل ما انتى رايحه جايه بين الشقتين هتباتى بس فى حضنى كتير عليا يعنى
مروه تتكسف و تبص فى الارض و تقوم تجرى محمود يبتسم
..........................
