(((((((السكة شمال ))))))
#لولو_محمد
الحلقه ٥
اتنين ستات يجيبوا مرام من طرحتها تطلع فى ايدهم و مرام بتصرخ و سميحه فى الارض بتحاول تشد مرام من بين ايديهم و يجروها لحد بره و هما بيسحلوها فى الارض محمود يفلت و يحاول يمسكوه تانى و ينيموه فى الارض
محمود / يا ولاد الكلب
اسعد / اتقوا الله يا حاره واطيه
عباس / الست لسه راجعه مالعمليات يا ولاد الكلب
الستات يزقوا مرام على ناصيه الشارع ست تانيه تيجى جرى من ورا تكب عليها جردل مايه
ست 1/ لو عتبتى الحاره تانى هنقطع خبرك يا بنت الكلب
مرام تقوم و هى غرقانه ميه و طين و محمود يسند سميحه بعيد عشان الناس ولعوا فى العفش اللى اتحدف من فوق و مرام واقفه عالناصيه بتتنفض بتتفرج على كل ده و مصدومه و بتعيط لحد ما محمود و اسعد يروحولها جرى و مديحه بتسند سميحه
اسعد / اركبوا العربيه بسرعه خلونا ناخدكوا من هنا
الكل يركب و مرام لسه واقفه مصدومه و بتبص عالحاره و بتعيط يشدوها تركب و يطيروا بالعربيه و البلطجيه لسه بيكسروا الشقه و يحرقوا العفش
......................................
فى دبى
زياد بيتكلم فى التليفون
زياد / هههههههههههههههههههه طبعا زيع
لبنى تدخل
لبنى / طمنى
زياد / حبيبتك اتظبطت عالاخر انا لو منها اشوفلى تربه تلمنى
لبنى / هستنى اتفرج عالفيديوهات
زياد / ساعه زمن و تلاقيها مولعه الفيس يا حياتى
لبنى / و الناس بتوعنا جاهزين
زياد / عيب عليكى سمعتها هتبقى فى الارض احنا فى زمن الشير
لبنى / اهم حاجه الموضوع ده يخلص قبل ما مازن يفوق فى المستشفى
زياد / لا متقلقيش كلو متظبطت و محسوب
......................
فى عربيه محمود
محمود يبص فى المرايه يلاقى مرام بشعرها و بتتنفض و مصدومه و سميحه و خداها فى حضنها يبص عالطريق و ثوانى و يركن
اسعد / فى ايه ؟
محمود / ثوانى
محمود يفتح الباب و ينزل
مديحه / على فين يابنى
محمود ميردش و يمشى
مديحه / هو احنا هنروح فين يا معلم
اسعد / هنروح شقه ابويا الله يرحمه هى مقفوله بقالها كتير لا مؤاخذه بس هتفى بالغرض لحد ما نشوف هنعمل ايه
مديحه / حسبى الله و نعم الوكيل فى اللى شحطتنا بالشكل ده كان مستخبيلنا كل ده فين بس يا ربى
اسعد / اللى حصل ده كلو كان مترتبله و قلبى بيقولى الوليه ام توفيق هى اللى وراه و انا و عهد الله ما هسكت
مديحه / متعرفش عملوا ايه فى شقتنا يا معلم
اسعد / هيبان يا ست مديحه نوصلكوا بالسلامه و ارجع اشوف الدنيا خلصت على ايه
محمود يفتح الباب و يركب و يحدف كيسه ورا مديحه تفتحها تلاقى فيها شال و طرحه تلف الطرحه على راس مرام اللى مبتتحركش غير انها تتنفض مالبرد سميحه تشد الشال من ايد مديحه و تغطى مرام محمود يكمل سواقه
سميحه / هى الروجته معاك يا محمود و لا كانت فى كيسه الدوا
محمود / معايا يا تيته متقلقيش هقف عند اول صيدليه و اجيبلك بداله
سميحه / اللهى يسترك الواحد حاسس ان الدم هيضرب من نفوخه
مديحه / لا اجمدى يا حجه ابوس ايدك
سميحه / حسبى الله و نعم الوكيل حسبى الله و نعم الوكيل
سميحه تبص على مرام بتتنفض تاخدها فى حضنها اوى
........................
فى دبى
فى اوضه مونى مونى قاعده بتعيط عالسرير الباب يخبط
مونى / قولت مش عاوزه اشوف حد فيكوا سيبونى فى حالى سيبونى فى حالى
صوت كامل / انا يا مونى افتحى
مونى تمسح دموعها و تروح تفتح
كامل / مالك يا قلبى فى ايه بتعيطى كدا ليه
مونى / انا تعبانه اوى يا كامل تعبانه و مش طايقه نفسى يلا نتجوز بسرعه عشان نمشى من هنا انا مش عاوزه العيله دى تانى
كامل / بقى ده اسمو كلام برده ادخلى اقعدى ادخلى
مونى / انا مش مصدقه اللى بيحصل والله ما قادره اصدق
كامل / طب اهدى و احكيلى اللى حصل طيب عشان افهم
كامل ياخد مونى و يقعدوا جوه
مونى / انا طول عمرى خايفه ربنا ينتقم من اخواتى فيا طول عمرى بخاف اصاحب بخاف احب بخاف ارتبط عشان اكيد ربنا هيرد لخواتى حركاتهم الزباله مع البنات فيا بس قولت خلاص ربنا هداهم طلعوا زباله اوى يا كامل طلعوا زباله اوى
كامل / طب عملوا ايه يا مونى طيب بالراحه بس عشان افهم بس فى ايه
مونى / انا مش عارفه هحكيلك ازاى انا مش مصدقه ان اهلى وحشين اوى كدا كلهم طلعوا وحشين يا كامل
كامل يبص على ترابيزه يلاقى شفشق مايه و كبايه يقوم يصب و يملا الكبايه و يرجع يديها لمونى
كامل / خدى اشربى دى و اهدى كدا و احكيلى الحكايه من الاول ايه اللى حصل
............................
فى بيت قديم فى حى شعبى
اسعد يفتح الباب و يدخلوا مكان شبه مهجور فيه عفش متغطى ببياضات و التراب و العنكبوت فى كل مكان
اسعد / لا مؤاخذه اصلها مقفوله بقالها كتير و محدش كان بيجي ينضفها
مديحه تبص بنص عين و تهز راسها
سميحه / كتر خيرك يا معلم متقلين عليك
اسعد / متقلين ايه بس متقوليش كدا ازعل عن اذنكوا ثوانى
اسعد يدخل اوضه جوه و محمود يروح يشيل البياضات من على كرسى و ينطرها بعيد و ينفض بيها الكرسى مديحه تكح
مديحه / كح كح كح بالراحه يا محمود صدرى و الحساسيه انت عارف روح فتح الشبابيك دى فتح فتح
محمود / طب تخليكوا فى العربيه و انا هناديلكوا
سميحه / لا يابنى هنساعدك
سميحه تسند مرام و تقعدها على الكرسى اللى محمود نضفه و هى لسه مصدومه و محمود يروح يفتح الشبابيك و البلكونات و الشمس تملا المكان
سميحه / اجيبلك مايه يا ضنايا
مرام مبتردش
محمود / كل حاجه هتبقى كويسه ان شاء الله متقلقيش الناس كلها عارفه ان دول بلطجيه و انا هروح اعمل محضر و اقول اللى حصل و باذن الله حقك مش هيضيع
مديحه / الا قوليلى يا حجه هو انتى كنتى سايبه فلوس او دهب فى الشقه دا زمان ولاد الكلب دول قلبوهم
سميحه / ياختى كانوا خدوهم و سبونا فى حالنا منغير كل ده .. مرام حبيبتى ردى عليا يا ضنايا .. مرام
اسعد يطلع من اوضه
اسعد / انا يعنى على قد مقدرت روقت الاوضه جوه بس يعنى اكيد هتحتاج تتكنس و تتمسح بس اهى تفى بالغرض للحجه تفرد ضهرها لحد ما ابعت حد يجى ينضف فمتتعبوش نفسكوا اوى بالاذن انا
محمود / انا جاى معاك يا معلم
مديحه / على فين
محمود / هو ايه اللى على فين هروح اشوف بتنا حصل فيه ايه هروح اعمل محضر باللى حصل هروح اجيب حقنا
مديحه / حقنا من مين من دول ؟ و لو اتكاتروا عليك يابنى و انت الحيله هعمل ايه انا ساعتها
محمود / يلا يا معلم
محمود يمشى
اسعد / بالاذن
اسعد يمشى وراه و مديحه تجرى وراهم
مديحه / طب خد بالك من نفسك يابنى
مديحه تقفل الباب و تبص وراها و تتنهد سميحه تقوم مرام و تدخلها جوه مديحه تروح تساعدها يدخلوا على السرير منغير ملايه سميحه تفرد طرحتها عالمخده و ينيموا مرام كانها جثه سميحه تاخد مرام فى حضنها و تغطيها بالشال و تنام عالسرير
مديحه / ايه التراب دا كلو دا النوم فى الشارع ارحم
سميحه / متتبتريش عالنعمه يا مديحه الحمد لله فوقينا سقف و مدارينا حيط الباقى يتنضف
مديحه / مكان فوقينا سقف و مدارينا حيط يا حجه و استكتروهم علينا
سميحه / ان شاء الله تلاقى بيتك سليم و ترجعيله بالسلامه و احنا كمان بكره نرجع بتنا
مديحه / هى هتفضل مبلمه كدا كتير
سميحه / والله معارفه انا قلقانه عليها اوى مرام يا حبيبتى ردى عليا يا ضنايا ردى عليا يا حبيبتى بالله عليكى يا مديحه تشوفيلى اى كبايه اسقيها حبه مايه البت بتتنفض
مديحه / هقوم ادورلك على الله اصلا نلاقى المايه نضيفه دا تلاقى المواسير مصديه و المايه منيله بستين نيله كان مستخبيلنا فين دا بس يا ربى
مديحه تطلع بره و هى عماله تبص يمين و شمال و قرفانه و سميحه تاخد مرام فى حضنها و تعيط و مرام مش مديه اى رياكشنات مصدومه و مبتنطقش
سميحه / كلو هيتصلح يا مرام ربك كبير ربك كبير اوى يا مرام ربك كبير يا بنتى
..........................
فى شقه شريف
الست بتحط لشريف ياكل
الست / المهم يعنى الست قامت بالسلامه والله نايمه متغلته امبارح بسبب الموضوع ده
شريف / اه روحوا انا فضلت معاهم الصبح لحد مركبوا العربيه و مشيو
الست / و مرام كانت عامله ايه
شريف / زعلانه طبعا هتكون عامله ايه يعنى مبتتكلمش بس ان شاء الله مازن اكيد هيراضيها يعنى و بكره تنسى
الست / و هو كسره نفس زى دى تتنسى برده يا شريف حسبى الله و نعم الوكيل فيك يا ابراهيم انت و زياد
تليفون شريف يرن
شريف / دا مازن ... الو انت فين يابنى انا بكلمك من الصبح مش عارف اوصلك
مازن / الموبايل وقع منى فى الفيلا و على مجابوهولى
شريف / طب عملت ايه انت فين دلوقت
مازن / طمنى على مرام و تيته روحوا هما عاملين ايه دلوقت
شريف / انا فضلت معاهم فى المستشفى لحد مركبوا عربيه محمود و مشيو
مازن / و مروحتش معاهم ليه
شريف / والله مطبق من امبارح يادوب دخلت البيت اكل لقمه و اريح ساعه و بعدين محمود قالى لو حصل حاجه هيكلمنى
مازن / ماشى تابع معايا بقى تمام
شريف / ليه انت مش نازل و لا ايه
مازن / لا للاسف مش هينفع انا على فكره بكلمك مالمستشفى
شريف يقوم يقف
شريف / مستشفى ايه اجيلك انت كويس
مازن / الحمد لله صحيح الضربه بتيجى من اخر حد انت متوقعه مونى فتحتلى دماغى بتحوش عن زياد
شريف / مستحيل
مازن / ليه مهو اخوها زيه زيي بالظبط و بعدين هما كمان حكولها عنى و اتوصوا بقت مرام فى مصر و مونى هنا
شريف / و انت عامل ايه دلوقت
مازن / انا كويس الحمد لله مفيش حاجه خطيره بقولك يا شريف انا عاوزك تفصل اى شغل بينى و بين ابويا من النهرده معدش فى اى علاقات تربطنا
شريف / ايوه بس دا فى شغل كتير و شركات كتير
مازن / وقعها
شريف / اوقعها
مازن / اه وقف اى شغل فى الشركات اللى بنا خلى اسهمها تنزل فى الارض
شريف / للدرجادى
مازن / معدليش اهل هنا يا شريف و اللى عملوه لازم يتحاسبوا عليه
شريف / والله يابنى الله يعينك على اللى انت فيه هو ايه فى كدا دول لو شياطين مش هيبقوا كدا
مازن / انا مش ملاك يعنى عشان استغرب ان اهلى شياطين بس مش مهم هانت قالولى هيغيروا عالجرح النهرده و اخرج بس تابع معايا يا شريف تمام
شريف / اكيد
شريف يقفل الخط يلاقى امه متابعه
الست / ماله مازن
شريف / انا نازل رايح الشركه لما ارجع ابقى احكيلك
الست / طب كمل اكلك طيب
شريف / هخطف اى حاجه فى السريع مع السلامه
شريف يفتح الباب عشان ينزل يلاقى شيماء طالعه تجرى
شريف / فى ايه بالراحه مالك متلهوجه كدا ليه
شيماء / كنت عاوزه اللحقك بص فى مصيبه كبيره حصلت لازم تكلم ابيه مازن بسرعه
الست / يا مصيبتى فى ايه ايه اللى حصل
شريف / ليه فى ايه
شيماء تدى لشريف الموبايل و فى فيديو للى حصل فى الحاره عالفيس يديها الموبايل و ينزل يجرى
.....................
فى المستشفى عند مازن
الباب يخبط و كامل يدخل
كامل / ازيك دلوقت
مازن يتعدله
مازن / الحمد لله انت عامل ايه
كامل / انا عن نفسى تمام بس مونى بقى موش تمام خالص
مازن / انا معملتش الحاجات اللى قالولها عليها دى انا مش واطى اوى كدا متخليهمش يوقعوا بنا يا كامل انا معدليش فى الدنيا غيرها انا زباله اه بس دى مراتى يا كامل مرام مراتى و مش ممكن اعمل فيها كدا قولها يا كامل هى بتحبك و هتسمعلك
كامل / قولتلها والله قولتلها مهو اصل انا برده مصدقتش انك تعمل حاجه زى و قولت لمونى الكلام ده بس زياد و طنط فريده و اونكل ابراهيم كلامك قدام كلامهم و كلهم بياكدوا انك عملت كدا فعلا و ان كل ده كان بعلمك و تخطيطك انت كمان
مازن / انا عاوز اتكلم معاها هى مش راضيه ترد عليا لازم تعرف انى مظلوم انا معرفش انا عملتلهم ايه عشان يدمرونى بالشكل ده
كامل / بص هى اصلا مش راضيه ترد على اى حد منهم قافله على نفسها الاوضه و مبتبطلش عياط انجى راحتلها تقعد معاها بس واضح ان الموضوع كبير خصوصا انها كانت بتحب مرام جدا و متعاطفه معاها اوى بص انسى انت الموضوع ده و متفكرش فيه و انا هكلمها تانى و اهديها اهم حاجه بس انك تقوم لنا بالسلامه عشان تشوف هتعمل ايه مع مرام هى دى المهم اى حاجه تانيه هتتصلح مع الوقت
مازن / انت متفائل اوى يا كامل مرام عمرها مهتسامحنى مرام كرامتها عندها فوق اى حاجه تانيه مبتتنازلش عنها لاى سبب
كامل / لازم تتصلح يا مازن مينفعش الوضع يستمر بالمنظر ده فى الاول و الاخر دى مراتك و لازم تدافع عنها و تحميها و صدقنى مجيك هنا اصلا مالبدايه كان غلط كان المفروض تفضل مع مرام لحد متراضيها
مازن / مكنتش قادر اصبر على زياد كنت جاى و ناوى اقتله
كامل / و اديك عرفت ان ابوك كمان مشارك معاه هتقتل ابوك كمان يا مازن الموضوع كان باين اوى انهم مش هيسكتوا على الجوازه دى بس بصراحه انا نفسى مصدوم من اونكل ابراهيم امال لو مكنش عنده بنت كان عمل ايه الله يعينها مونى صدمتها كبيره اوى
مازن / خليك جنبها يا كامل انا عارف انك انسان كويس انا عارف انك هتصونها هى ملهاش دعوه بكل اللى بيحصل ده مونى ارق بكتير من انها تستحمل صدمه زى دى
كامل / منغير متقول يا مازن انا عارف والله على العموم باذن الله كل حاجه هتتصلح
مازن يبص لكامل بحزن الممرضه تدخل
الممرضه / معاد الدوا
مازن / الدوا ده بيتعبنى انا مش عاوز اخده لو سمحتى و الدكتور اكدلى انه مبينيمش
الممرضه / ازاى بس دا مهم جدا و لازم يتاخد فى المعاد و لا انت بقى عجبتك القاعده هنا و مش عاوز تخرج
كامل / خده يا مازن
مازن / بينيمنى اوى يا كامل و يهدنى و انا محتاج افوق
الممرضه / هو بس عشان فيه مسكن قوى شويه و انت شكلك مش واخد عالمسكنات بس ان شاء الله يجيب نتيجه
مازن يهز راسه باستسلام و ياخد الدوا
كامل / انا هروح اتكلم مع مونى تانى و هبقى ارجعلك
مازن يهز راسه و كامل يطلع بره و مازن يغمض عينه و ينام الممرضه تطلع بره و تمشى فى كوريدور طويل لحد ما توصل فى جنب تطلع موبايل من جيبها و تتصل بحد
الممرضه / ايوه يا باشا انا اديتله المنوم زى محضرتك امرت ... لا مش هينفع اديهوله تانى اصل الشيفت بتاعى خلص و هبدل و مقدرش اكلم حد من الممرضات فى الموضوع ده اخاف حد يفتن عليا دانا بدسله الحبايه وسط الحبوب و لو حد هنا شم خبر يقعطوا عيشى و حضرتك عارف احنا هنا مش فى مصر و كمان اخاف الدكاتره ياخدوا بالهم انه علاطول نايم الموضوع يتكشف لازم يفضل فايق حبه فى النص ... ماشى تمام كتر خيرك سلام
الممرضه تقفل تلاقى ممرضه تانيه معديه يبتسموا لبعض و تمشى
...........................
فى الحاره
محمود يركن العربيه و ينزل منها هو و اسعد شريف يركن العربيه و ينزل منها
شريف / انت مبتردش على موبايلك ليه يا بنى ادم
محمود يبصله و يشاورله عالبيت جوه
شريف / عرفت مرام و تيته فين هما كويسين
محمود / عاوز تعرف مكانهم ليه عشان تروحوا تكملوا عليهم
شريف / انت بتتكلم جد و لا بتهزر انت بجد متخيل اننا ممكن يكون لينا ايد فى اللى حصل ده دا مازن لو عرف هيتجنن
محمود / و هو فين سى زفت هاه هو فين الباشا مش هو السبب فى كل ده قال و انا اللى عمال ادافع عنه قدام مرام
شريف / مازن فى المستشفى فى دبى
محمود / بجد والله لا سلامته الف سلامه ايه جاله دور برد و طلع يعمل شيك اب على نفسه
اسعد / اهدى يا محمود مش كدا
شريف / مش هرد عليك عشان انا مقدر الموقف اللى مريتوا بيه
محمود / و انت تعرف اللى مرينا بيه اصلا شوفته شوف الذل و القهره اللى شفناها
شريف / مصر كلها شافته يا محمود اللى حصل متصور و متزاع يا حبيبى عالفيس و معمولنا فيه منشن و كل ثانيه بتعدى بيتعمل الف كومنت و شير
شريف يطلع الموبايل لمحمود و يفرجه و محمود مصدوم
.............................
فى شقه توفيق
توفيق ماسك الموبايل و صوت مرام بتصرخ طالع منه و هو قاعد مبسوط اوى و امه قاعده جنبه
توفيق / تسلم ايدك يا ست الكل اهو ده الشغل و لا بلاش
الست / البركه فى الباشا حبيبك هو اللى خطط و صرف و صور و زاع هههههههههههههههههه
توفيق / تبقى تورينى هتعتب الحاره تانى ازاى
الست / لا بس لازم تعمل حسابك ان اللى حصل ده مش هيعدى بالساهل لا المعلم عباس و لا المعلم اسعد هيسكتوا على اللى حصل
توفيق / اعلى ما فى خيلهم يركبوه لو كانوا يقدروا يعملوا حاجه كانوا عملوها و بعدين احنا ملناش دعوه باللى حصل لا اللى عملوا كدا كانوا تبعنا و لا نعرف حد فيهم و انتى ست كبيره و قولتى رايك زيك زى باقى الناس يروحوا يتشطروا عالناس دول الاول و بعدين يجوا يكلمونا
الست / برده لازم تعمل حسابك و تامن نفسك
توفيق / يعنى انتى شايفه ايه
الست / انا بقول انزل افتح الورشه و اجيب كام واحد حيرك كدا يقف فيها منها تبقى عين فوسطيهم و منها لما يشوفوهم يكشوا و يخافوا
توفيق / فكره مش وحشه و العيال دول عندى
الست / ايوه كدا فتح مخك معايا انا هقوم اغدى العيال ولاد اخوك الله يرحمه
الست تبص لتوفيق بحزن
توفيق / مخلاص بقى ياما الله والله مكان قاصدى و انتى عارفه
الست / مهو عشان عارفه ببصلك كدا اوعى تفتكر ان النار اللى جوايا بردت و لا انى سامحتك لا انا وقفت جنبك المرادى بس عشان للاسف انت ابنى و الطلقه اللى رشقت فى رجلك دى سمعت فى قلبى غير كدا والله مكنت عبرتك
الست تقوم و اول ما تطلع توفيق يشوح بايده و يشغل الفيديو مالاول و هو مبسوط
............................
فى دبى فى فندق فخم
احمد قاعد و ماسك تابليت فى ايده زياد يدخل و وشه وارم و يحط رجل على رجل و يبصله احمد يناوله التاب
زياد / شوفته
احمد / كدا سماح
زياد / هو سماح بس برده مش هينفع تنزل مصر دلوقت خالص
احمد / انت محتاجنى جنبك انت مش هتقدر على مازن لوحدك
زياد / انت عاوز تنزل مصر ليه انت الشغل اللى بتعمله هنا بيكسبك اضعاف مضاعفه
احمد / الشغل اللى بعمله هنا او فى اى حته كوم و مصر بالنسبالى كوم تانى دى بلد الحبايب
زياد / بس حبيبك هنا
احمد / هتفضل حابسه فى المستشفى لحد امتى ما اكيد هيخرج و هينزل مصر
زياد / مش هتاخد قرار من دماغك من غير ما ترجعلى انت خسرتنى شهور قبل كدا
احمد / ماشى
زياد / تمام تقدر تنزل
زياد يقوم و يجي يمشى يقف
زياد / هو الجدع اللى فى مصر ده توفيق مش كدا
احمد / ماله
زياد / مقالكش خدوا مرام فين
احمد / هتبان هتروح فين يعنى
زياد / اول ما تعرف بلغنى احنا حسابنا لسه منتهاش
احمد / الله انت لسه فى حاجه فى دماغك
زياد / دى حبيبتى
احمد / ههههههههههههههههههههه من عنيا حاضر
زياد يمشى و احمد يفتح التاب و يتفرج
.....................................
فى البيت القديم
مديحه تدخل الاوضه تلاقى سميحه و مرام نايمين
مديحه / الا مفى كبايه و لا حتى غطا حله ... ايه ده انتوا نمتوا ... طيب
مديحه تتنهد و تخرج مالاوضه و تقفل الباب
مديحه / كان مستخبيلنا فين دا بس ياربى و انا هنضف الزريبه دى لوحدى ازاى بس اووووف
مديحه تقلب فى المطبخ تلاقى مقشه قديمه و جردل مكسور و مساحه ايدها مكسوره
مديحه تمسكهم بقرف و بعدين ترميهم فى الارض تانى و تدخل اوضه تانيه تلاقى المخدات ملفوفه بملايه تفتح الشباك و هى بتكح من التراب تلاقى جارتها بتنشر
الست / صباح الخير
مديحه / صباح النور
الست / هو انتوا اجرتوا الشقه دى اصل انا اول مره اشوف حد هنا من سنين
مديحه / لا احنا قرايب المعلم اسعد صاحب البيت
الست / ااااه اتارى الحاره نورت
مديحه / منوره باهلها ياختى انتوا عايشين هنا من زمان
الست / انا من يجى خمس ست سنين كدا لما حمايا مات و جينا نعيش هنا مع حماتى
مديحه / و الحته دى بقى حلوه كدا و ناسها حلوين و لا ايه النظام
الست / لا هنا الناس طيبين اوى بس فى كام بيت كدا استغفر الله العظيم حتى السلام بتاع ربنا ميعرفوهوش
مديحه / قول والله
الست / كل مكان فيه الحلو و الوحش يووووه يقطعنى واقفه ارغى معاكى معزمتش عليكى بكبايه شاى
مديحه / مره تانيه ان شاء الله اجى و نقعد و نحكى
الست / مره تانيه ليه انا خلاص خلصت نشير تعالى نفطر سوا
مديحه / مره تانيه اصل ورايا هنا حاجات كتير اوى
الست / ابدا والله ازعل لازم تيجى تشربى معايا الشاى و اهو يبقى بنا عيش و ملح امال
مديحه / خلاص انا جيالك اهو
الست / و انا مستنياكى يلا
مديحه تقفل الشباك و تدخل تبص على سميحه و مرام تانى نايمين تخرج و تقفل باب الشقه وراها
.............................
فى القسم
معتز قاعد عالمكتب و عباس قاعد قدامه معتز يزق ملف قدام عباس
معتز / تمام امضى يا معلم
عباس / انا ممكن ابصم لامؤاخذه
معتز / مافيش مشكله
الباب يخبط و يدخل عسكرى بكروت يديها لمعتز
معتز / خليهم يتفضلوا يا بني
شريف يدخل ووراه محمود و اسعد و اتنين محاميين معتز يقوم يسلم على شريف
معتز / اهلا اهلا شريف باشا اتفضل اتفضلوا اتفضلوا
شريف / ينفع كدا يا معاز باشا كل ده يحصل و انت فى الخدمه
معتز / والله انا وشي منك في الارض بس والله احنا اتحركنا اول ما جالنا الخبر و فعلا مسكنا ناس كتير جدا و بنحقق معاهم دلوقت
شريف / و اللى اسمها ام شروق دى
معتز / للاسف هربت بس احنا خدنا اوصافها و باذن الله هنلاقيها و بعت استدعى فايزه شحاته الشهيره بام توفيق عشان يتحقق معاها و زى مقولت للمعلم عباس من شويه لازم ناخد اقوال مدام مرام و الحجه سميحه و الحجه مديحه بصفتهم المجنى عليهم
محمود / مرام مبتنطقش و الحجه سميحه لسه خارجه مالمستشفي و صحتها تعبانه
معتز / يا سيدى احنا نروحلها لحد عندها المهم نوصل للكلاب دول
شريف / حضرتك شوفت الفيديو اللى نزل عالنت اللى حصل كلو كان متصور صوت و صوره
معتز يتعدل فى قعدته
محامى ١ / بيتهيالى الفيديو ده ممكن يفيد فى التحقيق افضل من مجرد وصف
معتز / اكيد طبعا بس انا اسف فى السؤال هو مازن باشا فين
شريف / للاسف فى المستشفى فى دبى حصلتله حادثه صغيره كدا
معتز / لا سلامته طبعا انا طبعا استغربت لما شوفته فى الحاره بس احرجت اتكلم فى الموضوع
شريف / و الله يا معتز باشا انا مش عارف اقولك ايه الموضوع بدء كمشكله عائليه كان ممكن تتحل بس مش عارف بعد اللى حصل النهرده ده ايه اللى ممكن يحصل
معتز / طب هو عرف باللى حصل النهرده ده
شريف / مفتكرش انا بحاول اتصل بيه من ساعه معرفت مش عارف اوصله خالص بس اكيد هيعرف يعنى
معتز / الله يعينه الموقف مش سهل ابدا بس انا رايي انكوا تبدئو تتحركوا فى موضوع الفيديو ده مع مباحث النت
شريف / احنا بدئنا نتحرك فعلا و في مجموعه من المحاميين هناك فعلا دلوقت
معتز / انا اسف اوى تشربوا ايه بيتهيالي لمون كويس تروقوا دمكوا شويه
محمود / والله ما هيروق دمى غير انى اشرب من دم الكلاب دول
معتز / للاسف المشروب ده لسه منزلش عندنا فى البوفيه بس متقلقش حقك مش هيضيع
محمود يبص الناحيه التانيه و ينفخ و شريف عينه عليه و يبص فى الارض
..................
فى المستشفى فى دبى
مازن يصحى و هو مصدع يقوم يعدل نفسه و يقعد و يمسك دماغه و يمسك الموبايل
مازن / ميه و خمستاشر ميسد هو فى ايه
مازن يتصل
مازن / فى ايه يا شريف
شريف / انت فين يابنى
مازن / كنت نايم الدوا الزفت ده بينيمنى خالص حتى بصحى منه متبنج و حاجه اخر قرف
شريف / افتح الفيس حالا
..........................
