((((((((((السكة شمال٢)))))))))
#لولو_محمد
الحلقه ٩
على / انتى مش بتقولى جوزها بيحبها يبقي مش هيسيبها نورا انا مقدر زعلك اوى بس فنفس الوقت احنا مفيش فى ايدنا حاجه نعملهالها و كمان مينفعش نضيع المكالمه اليتيمه اللى بنا فى الكلام عن مازن و مشاكله
نورا تسكت و تبص بحزن
على / انا اسف مقصدش انا عارف انك
نورا / انا اللى اسفه يا على بجد اسفه اوى
على / على ايه انك انسانه و لسه عندك مشاعر و بتهتمى بغيرك لا يا ستى متعتزريش انا اللى لازم اعتزر مش قصدي
نورا / طمنى انت عليك عامل ايه
على / عايش
نورا تبتسم بكسره
على / حاسس بوحده رهيبه من غيرك مكالمه الفيديو دى مش كفايا عاوز اكتر
.............................
نورا تبتسم
على / ساعات بضرب نفسي بالجزمه انى نزلتك مصر مش كنت اتجوزتك احسن مش كان زمانك مدفيانى دلوقت
نورا / هههههههههههههههههه طب ماحنا فيها
على / للاسف مش هقدر اخد اجازه و انزل على الاقل مش قبل شهر لما اللعبه اللى انا شغال عليها تخلص و تنزل السوق
نورا / و يا ترى ليا شخصيه فى اللعبه دى
على / لا للاسف دى لعبه عن الحيوانات
نورا / ربنا يوفقك
على / هونى على نفسك يا نونو كل حاجه هتتصلح ان شاء الله
نورا تبتسم
...........
فى الحاره فى بيت تانى
ست / حسبى الله و نعم الوكيل فيها هى و ابنها
شريف / طب و انتوا سكتوا ليه يا حجه عالكلام ده
الست / والله يابنى قومنالها بدل المحامى اتنين و تلاته بس الوليه فايزه دى حسبى الله و نعم الوكيل فيها قالت ان هى اللى قتلت و كمان بصماتها كانت عالفلوس و على اكره الباب و ملقيوش المطوه اللى انضرب بيها
شريف / طب و العيال
الست / من يوم ما مجدى اتقتل و اميره دخلت السجن و هى منعانا عنهم و دى ست قويه و مفتريه و محدش بيقدر عليها و احنا فى الاول و الاخر غلابه
شريف / لا مؤاخذه يعنى يا حجه متزعليش منى و انتى يعنى مكنتيش تعرفى ان مجدى الحو بلطجى
الست / و هو مين كان يقدر يقولهم لا ياخدها فى الحلال احسن ميعمل فيها حاجه و بعدين الشهاده لله المرحوم كان حنين عليها اوى و كان بيتقى ربنا فيها و فى عياله و مكنش حارمها من حاجه مكانش بس الا توفيق اللى منغص عليها عيشتها هو و امه كانت بتمنعها تقول لجوزها و تهددها فكانت بتسكت و تيجى تعيطلى و انا زى مقولتلك غلابه مش قدهم فبطيب خاطرها بكلمتين و برجعها بيت جوزها و بدعيلها هعمل ايه يعنى احنا ولايا ملناش الا ربنا
شريف / طب دلوقت ام توفيق دخلت السجن هتقدرى تربى العيال دول يا حجه
الست / ام توفيق فى السجن بس تيفا بره يابنى و زى مقولت انا ست كبيره و مليش فى البهدله هيجى و ياخد العيال و مش هقدر اقوله تلت التلاته كام انت لما قولتلى ان العيال فى بيت ناس محترمين انا قلبى ارتاح والله لو عليا اشيلهم فى نن عينى من جوه بس بعدهم عنى و هما فى امان ارحم مليون مره من وجودهم مع البلطجى الشمام ابن الكلب ده
شريف / تمام يا حجه على العموم فى اى وقت تحبى تشوفى فيه العيال انا هوصلك بيهم
الست / يسترك يابنى و يرزقك من وسع انت و الباشا بتاعك لامؤاخذه مضايفتكش اصل زى مانت شايف يابنى المايه و الكهربا قاطعين مالصبح
شريف / و مش هيرجعوا يا حجه لو ليكى حد بره المنطقه تروحى تقعدى عنده كام يوم روحى
الست تبصله باستغراب
شريف / عن اذنك
شريف يمشى
................................
فى البيت القديم
مرام / مبيردش
سميحه / يمكن نايم مش كان مطبق طول الليل قدام باب الاوضه فى المستشفي
مرام / لا نومه خفيف كان سمع الموبايل و بعدين افرضي كان حصلى حاجه و بستنجد بيه يعني
سميحه / لا اله الا الله طب بس وطى صوتك هتصحي عمتك
مرام تبص تلاقي مديحه نايمه عالسرير تنفخ
مرام / تلاقيه بيخونى تلاقيه هايص مع واحده مالزباله بتوعه و انا هنا قاهره نفسي عليه
سميحه / هههههههههههههههههه والله انتى فظيعه بجد يخربيت شيطانك هو فى كده يمكن فعلا نايم و ناسيه صامت يمكن الموبايل في اوضه تانيه يمكن ناسيه فى اى حته يمكن حاجات كتير اوى
مرام / طب اعمل ايه يعني
سميحه / هو لما ربنا يسهله هيشوف الرنه و يكلمك اهدى انتى بس
مرام / تفتكرى محمود يزعل لو قعدت لعبت عالفايس شويه اسلي نفسي
سميحه / لا مش هيزعل بس متلعبيش فى حاجته
مرام / ماشي
مرام تعمل ساين اوت من اكونت محمود و تعمل ساين ان فى اكونتها
مرام / يخربيت كدا ايه النوتيفيكاشن و الرسايل دى كلها
.................
فى شقه مازن
مازن يطلع مالحمام بينشف شعره بفوطه يدخل المطبخ و يعمل لنفسه قهوه و بعدين يدخل الكرار و يشغل اللاب موبايله يرن فى الاوضه التانية يسيب القهوه جنب اللاب و يقوم يدخل اوضه النوم يجيب الموبايل
مازن / ايوه يا شريف ازيك ارجوك قولي انكوا لقيتوها
شريف / للاسف اه بس هى بره مصر فى دبى لو كانوا وصلوا عشر دقايق بس عشر دقايق
مازن / نصيبها كدا
شريف / عملت ايه مع مرام
مازن / مفيش جديد عملت انت ايه مع اهلك
شريف / واضح ان مفيش هروب من المواجهه يا مازن تقريبا الكل بيتجنبنى مش عارف بقى دا جوايا انا
مازن ينفخ
شريف / بقولك ايه انا مخنوق و هنام لو جد جديد هبقى اكلمك
مازن / ماشى يلا تصبح على خير
مازن يقفل يلاقى ميسد كول
مازن / محمود !!!! خير
................
فى شقه سميحه
مرام ماسكه الموبايل و عماله تقرا فى الكومنتات و مش مصدقه وواقفه متعصبه بتصرخ و سميحه بتحاول تهديها
مرام / مين دول مين كل دول
سميحه / انا متاكده ان فى حاجه غلط
مديحه تصحى
مديحه / فى ايه يا جماعه فى ايه يا مرام
مرام / يعنى ايه فى حاجه غلط مين الناس دى كلها و يعرفونى منين مين دول
سميحه / طب بس اهدى و ان شاء الله
مرام / متقوليش هتتحل الموضوع مبقاش فى الحاره و هيتلم دا مصر كلها عرفت الدفعه كلها عملالى منشن الدفعه كلها شافته الدفعه كلها شافته ... انا بنام مع الدكاتره انا بنجح بالمياصه و قله الادب انا كل يوم مع واحد شكل ...انا شمال و سمعتى زى الزفت؟؟؟ هما بيتكلموا عن مين عنى بيتكلموا عنى انا تيته ردى عليا هما بيتكلموا كدا عنى
الباب يخبط و محمود يدخل براسه مرام ترفعله الموبايل و هى منهاره مالعياط محمود يبص فى الارض و يدخل ياخد منها الموبايل و هى بتتكلم بصوت مكسور
مرام / مين دول ؟؟؟ معقول مفيش حتى واحد بس دافع عنى
محمود / لا يا مرام اللى دافعوا كتير بس الادمنز بتوع الصفح دى بيعملوا بلوك لاى حد بيتكلم حتى انا و مازن و شريف و كل اللى حاولوا يتكلموا اتحظروا بس مازن مش ساكت راح عمل محاضر و الصفح دى هتتقفل و اصحابها هيتجابوا بتهمه التشهير صدقينى الموضوع منتهاش على كدا هيتجابوا و يتربوا
مرام تصرخ / هما بيعملوا معايا كدا ليه انا معملتلهمش حاجه انا معملتش اى حاجه من اللى بيقولوها دى انت عارف يا محمود انت عارف انى معملتش حاجه طب هما اشتروا الادمنز عشان يشوهوا سمعتى اشتروا كل الناس اللى معلقه دى كمان اشتروا كل الناس اللى مشيره دى كل الناس دى
مرام تتهبد فى الارض و بتتنفس بصعوبه محمود ينزل على ركبه قدامها و الكل يصحى و يدخل الاوضه
محمود / قالولنا ان دى برامج هكر بتعمل اوتوكومنت عشان تكتر الكومنتات و الشير بقى انتى عارفه الشعب المصرى بيموت فى الفضايح
مرام تبصله و الدموع بتنزل من عينيها و صوتها مكسور يادوب طالع
مرام / يعنى انا خلاص كدا انتهيت خلاص بقيت شمال رسمى حتى لو بالظلم خلاص كدا
محمود / لا يا مرام والله احنا مش ساكتين و حقك هيجى و كل اللى اشترك فى الجريمه دى هيتجاب والله هما اكدولنا كدا فى المباحث
مرام تبص على كل اللى واقفين و تبص فى الارض
مرام / بعد كل ده بعد كل ده
سميحه تقعد جنبها مرام تبصلها و هى بتعيط
مرام / انا معملتش حاجه يا تيته قوليلهم انى شريفه يا تيته قوليلهم ان كل ده كدب دافعى عنى يا تيته مفيش حد بيدافع عنى يا تيته
تليفون محمود يرن مازن
محمود / دا مازن
مرام تتسند عالحيطه و هى بتصرخ
مرام / متردش بقولك متردش
محمود / يمكن فى حاجه خطيره او عرفوا حاجه خلينى ارد
مرام / هو السبب فكل ده هو السبب فكل ده متردش عليه بقولك متردش متردش
مرام تقع فى الارض قاطعه النفس و سميحه تصرخ و الموبايل يقع من ايد محمود و هو لسه بيرن
................................
في المستشفي
مرام فى اوضه في العنايه نايمه و متوصلها محاليل اللوضه فيها حيطه نصها ازاز و سميحه واقفه بتعيط بره و مديحه بتطبطب عليها مازن يدخل يجري
مازن/ مالها مرام يا تيته ايه اللى حصل فى ايه
سميحه / والله لو بنتى جرالها حاجه عمرى مهسامحك والله حتى لو مظلوم مهسامحك عشان انا اديتهالك سليمه انا اديتهتلك بايدى كانت تتقطع قبل مديهالك كانت تتقطع ايدي قبل مديك بنتى
مازن باصص و ساكت و يبص على مرام نايمه و يرجع يبص لسميحه باستعطاف
مازن / مش هيجرالها حاجه يا تيته مش هيجرالها ان شاء الله هتقوم و هتبقي كويسه ان شاء الله يا تيته هتبقي كويسه متخافيش
سميحه تمسح دموعها
سميحه / مرام اغمى عليها لما الدكتوره فوقتها قالتلها فى واحده عاقله تعمل كدا مرام فضلت تصرخ انا اشرف منكوا كلكوا انا معملتش حاجه فضلت تصرخ لحد مدوها مهدئي
مديحه / الدكتوره حلفت انها كانت بتتكلم عن انها تاخد حبايتين مضاد حيوى واحد جرام منغير اكل و انها متعرفش اى حاجه عن الفيديو و انها نبطشيه من امبارح و لا فتحت فايس و لا زفت
مازن / هى مرام شافت الفيديو
سميحه / امال انت كنت فاكر ان الموضوع هيدارى لحد امتى هاه كنت فاكر ايه على العموم ارتاحوا خلاص فضحتوا البت و دمرتوها يلا حسبي الله و نعم الوكيل فيكوا
مازن بحزن / ليه يا تيته كدا هو انا عملت ايه لكل ده هو انتى فاكره ان الموضوع سهل عليا على فكره اللى اتفضحت دى تبقي مراتى يعني انا كمان زيي زيها يا تيته انا مليش دعوه باللى حصل يا تيته حسي بيه انا بحارب كل دول لوحدى انا عاجز قدامهم
سميحه تبصله تلاقيه بيعيط تعيط هى كمان
سميحه / لما انت عاجز دى تبقي ايه
مازن / تيته ممكن اسالك سؤال
سميحه تبصله بطرف عينها
مازن / لو انا رقدت جوه مكان مرام هتزعلى عليا
سميحه تبصله بحزن
مازن / تيته انا مليش فى الدنيا غيركوا بلاش تقسوا عليا انا اتغدر بيا من اقرب الناس ليا كسروا فرحتى و فضحونى تيته لو فكرالى موقف واحد حلو
سميحه / اعمل ايه عاوزنى اعمل ايه اه يا مازن هزعل عليك و اه مصدقه انك مظلوم بس اعمل ايه قولى اعمل ايه و انا اعمله
مازن / مش عاوز اكتر من كدا
مازن يبص على مرام بحزن دكتوره تطلع من جوه
الدكتوره / انتوا لسه هنا انا مش قولتلك يا حجه روحى هى كدا كدا مش هتفوق الا عالصبح
مازن / هى عامله ايه
الدكتوره / مين حضرتك
مازن / انا جوزها
الدكتوره / اهلا مازن بيه هى كويسه كل مؤشراتها كويسه احنا حطينها بس تحت الرعايه عشان نطمن عليها مش اكتر و لما تفوق هننقلها اوضه عاديه
مازن / ممكن ادخلها ... ارجوكى ارجوكى
الدكتوره / ممكن بس ياريت
مازن / مش هتحسوا بوجودى اوعدك
الدكتوره / تمام .. و انتى يا حجه ارجوكى روحى ارتاحى اللى بتعمليه ده غلط عشانك
سميحه / انا مش هتحرك من هنا
الدكتوره / براحتك يا حجه عن اذنكوا
مازن / انا هدخلها
سميحه تهز راسها مازن يفتح الباب و يدخل و سميحه تروح تقعد عالبنج قدام الازاز و مديحه جنبها
سميحه / روحى يا مديحه روحى ارتاحى ياختى
مديحه / اسيبك ازاى يا حجه فى الظروف دى خلينى رجلى على رجلك
سميحه تهز راسها ماشى
..........................
فى شقه نورا
نورا قاعده عالسرير اسراء تتقلب تصحى
اسراء / انتى لسه صاحيه يا نونو
نورا / مش عارفه انام
اسراء / الله انتى لسه بتفكرى فى الموضوع ده
نورا / ايوه
اسراء / هو ابيه قالك ايه
نورا / هيقول ايه يعنى عملتى اللى عليكى خلاص
اسراء / مهو بصراحه معاه حق انتى رديتى و خدتى بلوك و اكونتى اخد بلوك و اكونت ابيه كريم اخد بلوك نعمل ايه يعنى
نورا / انا عارفه ان النت مش الحل انا بس كنت عاوزه اساعدها
اسراء / هو مش جوزها ده طلع و قال الحقيقه و احنا شيرناها كلنا هنعمل ايه اكتر من كدا
نورا / معرفش يا اسراء يوووه بقى معرفش
نورا تقوم تطلع بره فى البلكونه تلاقى كريم جوه تيجى تدخل
كريم / نورا
نورا / نعم
كريم / كنتى عاوزه حاجه
نورا / لا شكرا
كريم / مفيش جديد فى حوار صحبتك
نورا / لا مفيش
كريم / نورا لو تحبى اخدك اوديكى ليها انا لسه عند كلمتى اعرفى بس هى فين و انا اوديكى
نورا / على فكره انت جدع اوى يا كريم زى على بالظبط
كريم / بصراحه البنت صعبانه عليا اوى انا كمان و اتاكدت من برائتها لما اتعملى بلوك و جربت من اكونت كذا واحد من صحابى و برده اتعملهم بلوك من ساعتها و انا مدايق اوى
نورا / مدايق و انت متعرفهاش امال لو عرفتها دى بنت طيبه جدا و جدعه جدا و متفوقه جدا مرام دى بنت زى العسل مستحيل تعمل كدا
كريم / طب نقدر نساعد ازاى يا نورا اكيد فى حاجه نقدر نعملها نرد بيها على اللى حصل ده
نورا / معرفش صدقنى انا مستعده اعمل اى حاجه
كريم / انا عندى فكره بس مفتكرش هتجيب نتيجه زى الناس دول بس يعنى نجرب
..................................
فى شقه فى حاره
توفيق قاعد مع تلاته بلطجيه بيحاول يكلم حد فى الموبايل
توفيق / خارج نطاق الخدمه بنت الكلب
الاول / يا تيفا انا قولتلك متحشرش نفسك مع الكبار انت مش قدهم
توفيق / قدهم و نص
التانى / ياعم اهدى قدهم بس المصالح بتتصالح يا زميلى يعنى البشوات دول ان كانوا النهرده متخانقين بكره يتصافوا
الاول / و ساعتها هيشقطوك لبعض
توفيق / دا بعينهم ديته ايه طلقه تجيب اجله
التالت / بقولك ايه اهدى على نفسك كدا الموضوع سخن خلقه
توفيق / يعنى اسيبه يرمى امى فى الحبس و يخطف عيال اخويا و اسكتله
الاول / عليك نور عيال اخوك اول هام نشوف طريقه نجيب بيها عيال اخوك دول منه و بعد كدا يحلها الف حلال
توفيق / بالظبط اخد منه العيال و قسما عظما لخلى اللى ما يشترى يتفرج عليه هو و ست العرايس بتاعته دى
...............................
فى المستشفى
مازن لابس مشمع ازرق و بونيه ابيض و كمامه و اكياس فى رجله يدخل يحط الكرسى جنب مرام و يشيل الكمامه من على بقه و يمسك ايد مرام و يبتسم بحزن
مازن / ازيك يا قلبى عامله ايه ... ياريتنى كنت مكانك ... بس انا عارف انك قويه و هتقومى منها و هتقفى على رجلك تانى ... انا عارف انه مش وقته بس مش كان زمانا بنجهز شنطتنا دلوقت عشان نسافر دبى سوا كان زمانا مولعينها والله
مازن يبتسم و يروح يجيب كرسى و يقعد جنب مرام و يمسك ايدها تانى
مازن / انسب وقت لكل ده فعلا انسب وقت ...مونى زعلانه منى اوى يا مرام خايف اروح ابوظ فرحها بس مش هقدر مروحش مش هقدر مشوفش اختى الصغيره و هى عروسه فرحتها هتكون ناقصه هى خايفه و محتاجانى جنبها بس برده مش قادر اسيبك... انا خايف اسيبك سبتك مره رجعت لقتهم مبهدلينك بس والله ما سبتك الا عشان اجيب حقك والله لو عليا مكنت سبتك ابدا سامحينى
مازن يتنهد و يفضل يبص يمين و شمال يلاقى سميحه بتبص عليه مالازاز يبصلها بحزن تسيبه و تروح تقعد تانى يرجع يبص لمرام
مازن / انا مش عارف اعمل ايه يا مرام انا تعبت تعبت اوى و محتاجلك ... محتاجلك اوى ... محتاجلك تقوليلى اعمل ايه محتاجك تسندينى و تقوينى زى مكنتى علاطول بتعملى من يوم معرفتك .... لعبوها صح ولاد الكلب و وقعوا بنى و بين اكتر اتنين بحبهم فى حياتى انتى و مونى بس هى مصدقانى او مش عارف هو يمكن انا عندى رصيد كبير عندها يشفعلى ما انا برده اخوها بس انا برده جوزك يا مرام و المفروض تثقى فيا اكتر من كدا بس انا عازرك على فكره عازرك و مقدر وجعك بس زى مقولت انتى اقوى من كدا و هتقومى تقفى على رجلك و تبقى اقوى مالاول بس ابوس ايدك لما دا يحصل بلاش تيجى عالغلبان اللى زيي و تستقوى هههههههه
مازن يدحك بكسره و يمسح دموعه
مازن / مش انا طلعت غلبان يا مرام طلعت غلبان اوى و اهبل اهبل اوى تصورى كنت واخد الدنيا بالدراع و فاتحلها صدرى اوى كدا و مش خايف من حاجه و يا روح ما بعدك روح بس الحمد لله خدت على دماغى لما قولت يا بس خدت لما بانلى صاحب .. صاحب ... ازاى فضلت طول السنين دى مخدوع فيه ازاى قدر يدحك عليا بالشكل ده دانا كنت مستعد اموت بداله
مازن يبص يمين و شمال و باين عليه الغضب و القهره
مازن / هو انا مستغرب ليه اذا كان ابويا اللى من دمى و لحمى مشارك معاه و بيفضله عليا و بيحميه منى هستنى مالغرب ايه ... طب ما شريف جدع اهو و محمود على فكره طلع جدع اوى كان معاكى حق فيه على فكره ...
مازن يمسك ايد مرام بايديه الاتنان باستعطاف
مازن / مرام ... قومى ردى عليا يا مرام انا محتاجك اوى ... طب اعمل ايه عشان اصالحك ... قوليلى اعمل ايه والله هعمله والله يا مرام هعمله بس اعرف .... يارب بقى انا تعبت
...........................
فى شقه شريف
شريف يفتح الباب و يدخل و هو ميت من التعب تليفونه يرن
شريف / الو
نورا / صحيتك
شريف / ابدا صاحى خير فى حاجه
نورا / هو ايه اللى بيحصل ده يا شريف
شريف / والله يا نورا مش عارف اقولك ايه
شريف يروح يقعد عالكنبه و يفك الجرافاته بتاعته
نورا / انا شوفت الفيديو و شوفت كمان اللايف بتاع مازن
شريف / و مين فى مصر مشافهومش
نورا / هو ازاى ده حصل
شريف / زياد خبى نسخه من مفتاح الشقه بعد مغيره و مازن مخدش باله مكنش مدى خوانه و معدش النسخ لحد ملقاهم طابيين عليه يوم الصبحيه و قالوا لمرام على موضوع الرهان القديم بس طبعا حطوا بهاراتهم و ظبطوا ريكورد متفبرك ان مازن كل ده بيدحك عليها عشان سورى يعنى ينام معاها مش اكتر لعبوها صح بصراحه مرام مستحملتش راحت الحاره و هناك بقى عينك ما تشوف الا النور
نورا / ياربى شريف على فكره انا ممكن اروح لمرام و اقولها عالحقيقه اقولها ان الرهان مكنش كدا
شريف / بصراحه منصحكيش مرام مبتسمعش لحد عملنا البدع بالعكس هتعتبرك شريكته و تيجى تشرفى جنبى انتى كمان فى البلاك ليست
نورا / طب بص يا شريف انا عندى فكره هى مش فكرتى بصراحه بس يعنى هى حل لو تقدر تساعد فيه انا متاكده انه هيفرق مع مرام اوى
شريف / اللحقينى بيه اى حاجه بدل الهم ده
نورا / تمام اسمع بقى الفكره ايه رايك لو ....
.................................
فى دبى
مونى / مش عارفه اعمل ايه يا كامل حقيقى مش عارفه
كامل / والله انا حاسس بيكى بس للاسف الموضوع بقى صعب اوى كل اهلى جم من بره مينفعش اقول لعمى اللى جه من استراليا معلش ارجع تانى عشان اخو خطيبتى عنده مشاكل مع مراته
مونى / انا مقدره والله بس انا كان نفسى اوى مازن يحضر انا وهو بنحلم باليوم ده من زمان اوى طول الوقت بيقولى محدش هيصورك غيرى محدش هيزفك غيرى مش قادره اتخيل انه ميجيش
كامل / ان شاء الله يظبط اموره و يحضر ان شالله حتى يجى عالفرح علاطول
مونى / ياريت يا كامل يا ريت
زياد يدخل
زياد / مساء الخير
مونى تبص الناحيه التانيه
زياد / انا عارف انك زعلانه منى و عارف انك شيفانى وحش بس زى مسامحتى مازن لازم انا كمان تسامحينى
مونى / انت ازاى تعمل فى مازن كدا ازاى
زياد / غصب عنى يا مونى والله غصب عنى
مونى / قول الحقيقه مره واحده فى حياتك انت عملت ده عشان لبنى بتكره مرام
زياد / لانا و لا لبنى نقدر نعمل كل ده لوحدينا ماشى و حطى تحتها مليون خط اولا مازن راهن فعلا على مرام انا مجبتش حاجه من دماغى
مونى / بس اتجوزها الموضوع انتهى و اتجوزها
زياد / و اعمل ايه مع بابا يا مونى اعمل معاه ايه
مونى / يعنى ايه يعنى ... يعنى لو بابا قالك اتهجم على مونى و اكسر قلبها و وقع بينها و بين كامل هتعمل كدا
زياد يبص فى الارض
مونى / انت غدرت باخوك يا زياد باخوك
زياد / هو مش ملاك ميستهبلش تفرق ايه هى عن اى بنت تانيه لعب بيها انتى عارفه مازن كويس
مونى / تفرق انها مراته يا زياد
زياد / بابا مش معترف بيها كدا بابا راح اكتر من مره و طلب منها تبعد عن مازن مازن نفسه سابها و قالها انه هيطلقها جريت وراه و اترمت تحت رجليه لحد محن و رجعلها اعمل ايه مكنش قدامى حل تانى غير الطريقه دى
مونى / انك تجرحه
زياد / انى انجيه منها مرام متفرقش اى حاجه عن اى بنت شمال و كلنا شوفنا الخناقه و الوسط اللى هى كانت عايشه فيه كويس
مونى / كدب كدب و لو شوفت بعينى حتى برده مش هصدق عنها حاجه و مهما حاولتوا تشوهوا صورتها مش هصدق
زياد / هتفضلى هبله لحد امتى
كامل / انا بحاول امنع نفسى انى ادخل بس الشمال بيبانوا يا زياد و بيبانوا اوى كمان بس كل واحد بيشوف اللى على مزاجه و يغمض عن اللى على مزاجه برضه
زياد / انت شايف كدا
كامل / انت شايف غير كدا
زياد / بصى يا مونى انتى خلاص فرحك بعد بكره استحملى اخوكى المجرم الغدار لحد مسلمك لجوزك و بعد كدا بقى انتى حره
مونى / و بعد كدا اقعد اتفرج على اخواتى و هما بيقطعوا فى بعض و اقعد استنى مين فيهم هيقتل التانى الاول
زياد / مين يقتل التانى ايه دانا مرفعتش ايدى حتى احوش عن نفسى و لولا انك انقذتينى كان زمانه مموتنى بس لعلمك انا مش زعلان منه بالعكس انا مقدر موقفه بس والله كان غصب عنى انا مقدرش اكسر لبابا كلمه
مونى تبص فى الارض
زياد / مونى اهدى ياما بيحصل بين الاخوات و متقلقيش انا و مازن بكره نتصالح و ننسى اللى حصل ده اكيد مش بنت اللى هتفرقنا يعنى
مونى / احلم براحتك انا طالعه انام عن اذنكوا
مونى تسيبهم و تطلع فوق
زياد / عقلها يا كامل قولها كلمتين بدل دور امينه رزق اللى هى عايشه فيه ده
كامل / ربنا يهدى عن اذنك
كامل يمشى
زياد / امين يا كيمو يا حبيبى امين يا بابا
..............................
فى المستشفى
مرام تفوق تبص حواليها مفيش حد تلاقى مازن قاعد عالكرسى و مربع ايده عالسرير و دافس راسه فيها و نايم تحاول تعدل نفسها تقعد يصحى يدعك فى عنيه و يقوم بسرعه عشان يساعدها
مرام / انا بعرف اقعد لوحدى ... شكرا
مازن يبتسم و يقعد عالسرير جنبها
مازن / عامله ايه احسن
مرام / انت بتعمل ايه هنا
مازن / هكون بعمل ايه يعنى يا مرام
مرام تبص حواليها
مرام / هى تيته فين
مازن يقوم يروح ناحيه الازاز يلاقيها نايمه هى و مديحه و هما قاعدين و ساندين روسهم على كتف بعض
مازن / نامت الله يعينها مرضيتش تروح الا لما تطمن عليكى
مرام / على العموم انا بقيت كويسه تقدر تمشى
مازن يروح يقعد جنبها مرام تبص الناحيه التانيه و ترجع تبصله بحزن
مرام / شوفت الفيديو
مازن / و رديت عليه
مرام / شوفت الناس كاتبين ايه شوفت بيقولوا عنى ايه
مازن / والله رديت عليه و فى جيش محاميين بره هيجيبوا كل دول و يعلموهم الادب والله العظيم احنا مش ساكتين
مرام / رديت فين انا عاوزه افهم رديت فين
مازن / رديت على صفحتى و على كل الصفح دى بس هما عملولى بلوك و عملوا لكل الناس اللى تبعى كلنا اتعملنا بلوك عشان منعرفش نرد و اى حد بيدخل يكتب اى كومنت غير اللى على مزاجهم بيتحظر على فكره
مرام / طب هما بيعملوا معايا كدا ليه هيستفيدوا ايه لما يسوءوا سمعتى
مازن / اكيد قابضين طبعا اصلا والله هيتجابوا والله العظيم هيتجابوا
مرام / كل ده عشان عيون ست لبنى هانم صح عشان ابوس رجلها مش كدا قولها ان الموت عندى اهون
مازن / الموت عندى انا اهون
مرام / قولها ان دى كانت غلطه عمرها انا كدا معدش عندى اللى اخسره اصلى للاسف خلاص خسرت كل حاجه
مازن / كل حاجه هتتصلح
مرام / كفايا كدب بقى مفيش حاجه بتتصلح مفيش
مازن / لا فى طول ماحنا مع بعض كل حاجه هتتصلح قومى معايا خفى و قومى معايا تعالى نسافر تعالى نورى الدنيا كلها ان كلامهم ده فجزمتنا تعالى معايا
مرام / فين اجى فين
مازن / تعالى نتخيل ان كل ده محصلش انا عارف انها صعبه بس ايه عدى فحياتنا كان سهل تعالى نسافر نقضي شهر العسل بتاعنا نحضر فرح مونى و نفرح و نكيد كل الكلاب اللى مستنينا نقع خلينا نوريهم انهم مش هيكسرونا لاننا سوا
مرام / اجى معاك..هناك ..وسطهم ..لوحدى
.............................
