(((((السكة شمال ٢)))))))
#لولو_محمد
الحلقه ٥٧
فارس / متدخلش ربنا بالموضوع اللى احنا بنتكلم فيه حاجه ملهاش دعوه
مازن / مفيش حاجه اسمها كدا ربنا قال الا بذكر الله تطمئن القلوب
فارس / ماشى بس مش دلوقت يعنى بكره ربنا يهدينى
مازن / برده بتتكلم كانك ضامن عمرك
فارس / و انت يعنى لو مت دلوقت ضامن انك تخش الجنه يابنى احنا هندخل الجنه برحمه ربنا مش بعملنا هو احنا يعنى انبيا و لا صحابه مكلنا بنغلط و كلنا بنعمل ذنوب احنا احسن من غيرنا يابنى
مازن / ايه اللى انت بتقوله ده
فارس / ايه يا عم مش انت اللى كنت بتقول انا مبعملش حاجه غلط و مبغصبش واحده على حاجه و انهم بيعملوا ده بمزاجهم يبقى هما اللى غلطانين و انت فى السايف سايد انت اللى قولت الكلام ده و لا مش انت
................................
مازن / كنت غلطان
فارس / و البنت دى بقى هى اللى خلتك تفوق للحقيقه دى
مازن / مش لوحدها كميه الحاجات اللى مريت بيها الفتره اللى فاتت ما عندك خالو الله يرحمه خد ايه معاه من كل ده قماشه متر فى مترين اتلف بيها هى دى اخرتنا يا فارس
فارس / فتره و هتفوق من كل ده صدقنى و هترجع اسوء مما كنت دا لو اقتنعنا انك فعلا كنت وحش عارف ليه عشان مفيش تغير بيجى بالشكل ده و بالسرعه دى
مازن / انا من يوم ما مرام دخلت حياتى و انا كدا يعنى تقريبا من سنه
فارس / سنه كامله مع بنت واحده ؟
مازن / مش محتاج لغيرها اصلا
فارس / و لسه عاوز تكمل ؟
مازن / ادفع عمرى كله و ترجعلى و لو يوم واحد
فارس / اقسم بالله انا لو حد غيرك حكالى ده عنك ما هصدق انا اساسا مش مصدقك انت بتشتغلنى يا مازن
مازن / لما تجرب هتفهم
فارس / فال الله و لا فالك يا عم طب و الزن و النكد و الروتين و الملل و كل القرف بتاع اللونج تايم ريلايشنشيب
مازن / على قلبى زى العسل مش محتاجه تزن هى بس تشاور مكنش فى روتين و لا ملل اصلا القرف الوحيد كان زن ابويا و مقالب العيال الزباله اللى كنت مصاحبهم زياد و قرفه
فارس / زياد ؟؟ اخوك ؟؟ زياد اللى كنت ممكن تموت اى حد بيدايقه بس دلوقت بقى زياد وقرفه
مازن / مشوفتش اعبط منى
فارس / لا مشوفتش و لا هشوف دانت حالتك صعبه
مازن / انا جعان تعال نروح نتعشى فى اى مكان هادى صدعت من الطبل و الرزع
فارس / بتغير عليها
مازن / جدا
فارس / لسه بتغير
مازن / جدا
فارس / يبقى مش هقولك على الفضول اللى جوايا انى اشوف الانسانه الخزعبليه اللى بهدلتك كدا
مازن / هههههههههههههههههههه قوم قوم
مازن و فارس يقوموا
فارس / طب حلوه ؟؟
مازن يزقه قدامه يلحق نفسه قبل ما يقع و يبص لمازن و يمشى و هو بيضرب كف على كف
.......................................
فى شقه سميحه
سميحه / والله فرحتلهم اوى شكله جدع طيب و ابن حلال
مرام / على الله يكمل كدا للاخر متنسيش ان خطيبها الاولانى خلع
سميحه / هى الكسبانه احنا بناتنا يتاقلوا بالدهب اللى يبيعنا هو الخسران
مرام / انا تعبانه موت بيتهيالى انى هحط راسى على المخده مش هصحى الا بكره بعد الصلاه
سميحه / ههههههههههههههه يا ستى نامى و ارتاحى ما انتى شقيانه طول الاسبوع حتى اليوم اللى خدتيه اجازه مرتاحتيش فيه
مرام / انتى عارفه يا تيته حكايه اللى يتلسع من الشوربه ينفخ فى الزبادى
سميحه / مالها
مرام / انا الاول كنت بقول ان الناس كلها وحشه الا يعنى ناس اللهم عافينا و كدا دلوقت بقول العكس الدنيا كلها وحشه الا من رحم ربى بقيت خايفه من بكره يا ترى مخبى ايه الراجل ده بيبصلى كدا ليه البنت دى بتكلمنى كدا ليه الموضوع ده كان ممكن يبقى عادى بس انا حتى اهلى و اصحابى و جيرانى كل الناس اى واحده حامل مكانى بتبقى نفسها تقول للدنيا كلها انا حامل افرحولى لكن انا مقدرش مخبياه كانى عامله عامله
مرام تدمع
سميحه / انتى اللى قولتى ندارى عشان خفتى ياذوكى يا بنتى و انا عالاساس ده مقولتش
مرام / بس دا ميمنعش انى مدايقه تيته انتى فاهمه انا حاسه بايه انا ليه مش زى كل البنات
سميحه / محدش بيسال انا ليه احسن من كل البنات يا مرام احمدى ربنا انتى فى نعمه كبيره اوى
مرام تبص لسميحه سميحه تطبطب عليها
سميحه / ادايقتى لما شوفتيه صح
مرام / ما انا بشوفه كل يوم ايه اللى اتغير يعنى
سميحه / معرفش يمكن قالك حاجه عمل حاجه هو انا يعنى مش عرفاه
مرام تتنهد
مرام / نامى نامى ممنوش فايده الكلام
سميحه / براحتك بس لازم تعرفى انى عايشه عشان اسمعك حتى لو مفيش فى ايدى حاجه اعملهالك بس هسمعك
مرام / ربنا يخليكى ليا يا تيته و مايحرمنيش منك ابدا
.................................
فى الكليه
مرام قاعده فى المكتبه مازن يدخل يدور عليها و ماسك فلاشه فى ايده و يقف يفكر ثوانى و ياخد نفس و يروح يسحب كرسى و يقعد مرام تتخض و تبص يمين و شمال و تبصله بغضب يحط الفلاشه على الترابيزه
مرام / صبرنى يا رب
مازن / نسخه من خطوبه شيماء فيها صور كتير حلوه ليكى انتى و تيته و البنات و كدا
مرام / شكرا بس انا معنديش كومبيوتر اصلا
مازن / شيلى البلوك و انا ابعتهالك عالموبايل
مرام / شكرا معنديش مساحه
مازن / فى فى الكليه هنا سايبر تعالى افرجك على الفلاشه هناك لحد ما ... محمود ... يجيب لاب
مرام تبصله بغل
مرام / مش هخلص منك انا ابدا صح مش هرتاح انا صح
مازن / والله لو اقدر ابعد كنت بعدت من زمان مكنتش قربت اصلا بس مش قادر
مرام تنفخ
مرام / ياريتك مقربت ياريتك حياتى كلها كانت هتتغير ميه و تمانين درجه مشروعى اللى باظ كان زمانه لسه شغال كان زمانى بشتغل من بيتنى وقت ما احب و زى ما احب و الصفحه تكبر كان زمان تيته معملتش عمليتين فى القلب فى سنه واحده بسببك و حط تحت بسببك دى عشرين لا مليون خط احمر كان زمانى عايشه حياه طبيعيه زى كل الناس و يمكن كنت ابقى متجوزه او على الاقل مخطوبه مش مهم بيشتغل ايه و لا حتى شكله ايه المهم انه يكون راجل بجد كل ده و لسه عاوز تاذينى كمان لسه برده مصمم تقتحم حياتى و تخنقنى امتى هخلص منك هاه قولى هفضل مستحمله غلاستك و تناحتك دى لحد امتى كل يوم بحجه جديده عشان تيجى ترخم عليا امتى هخلص من القرف ده
مازن / محدش عارف بس اكيد هيجى اليوم ده
مرام / امتى بقى
مازن / بكره بعده السنه الجايه كمان خمسين سنه و انا هعرف اجلى منين
مازن يقوم و يمشى و هو مدايق مرام عينها عليه بغضب ممزوج بحزن و تقعد تكمل شغل تبص تلاقى الفلاشه قدامها تبص يمين و شمال و تاخدها بالراحه و تبص فيها و تحطها فى شنطتها و تبص يمين و شمال تانى مفيش حد تتنهد و تقعد تكمل مزاكره
...............................
فى الشركه
مازن بيكلم شاب
مازن / اعمل اللى تعمله نزل اعلان فى التليفزيون فى الجرايد على النت .... اوووووف كل حاجه فى الشركه دى لازم اقولكوا تعملوها ازاى خلاص شكرا انا هتصرف تقدر تمشى
الشاب يطلع و شريف يدخل
شريف / ايه يابنى لسه مش لاقى الموظف اللى يحققلك احلامك
مازن / تعبت يا شريف والله هو خالو كان بيمشى الشركه دى ازاى
شريف / كان بيدى وقت مبينامش يحلم يصحى تانى يوم يقول هو الحلم متحققش ليه
مازن / و المطلوب
شريف / انا هظبطلك الموضوع ده
مازن / تؤتؤ انا هخلصه انت عارف انا ليا صحاب كتير فى البيزنس ده و هنزل اعلان عالصفحه عندى و الناس تبعت ريكوردات و انا هشوف استوديو نسجل فيه
شريف / يعنى انت اللى هتفرز الاصوات و تقيمها يعنى
مازن / لا طبعا هو انا فاضى هنشوف تلاته اربعه مقرئين يقيموا الاصوات دى و يبقوا لجنه تحكيم
شريف / ايه رايك نعمله ايفنت كبير مثلا نعمل زى احتفاليه فى كل محافظه تلت مقرئين مشهورين و اللى يحب يجى يقرا و يسمع و يبقى فى تصفيات و الفايزين على مستوى المحافظات يتاهلوا للدور التانى اللى هو الفايز على مستوى الجمهوريه و الفايز هو اللى ننتجله
مازن / والله لو كل الناس زيك يا شريف الشركه دى هتبقى رقم واحد عبقرى بص احنا كمان هنعمل تغطيه اعلاميه للموضوع سواء فى التليفزيون او السوشيال ميديا احنا هنبقى اسبونسرز و اه جتلى فكره بص كل المشتركين هيبقى ليهم هدايا رمزيه تشجيع يعنى انهم حافظين القران و كدا الجايزه دى من اول ميه جنيه مثلا لحد مثلا عشر تلاف لكل فايز على كل محافظه مثلا و الفايز الاول هننتجله الشريط و كمان ممكن ياخد خمسين الف ايه رايك شويه و لا حلوين
شريف / مناسب مش وحش
مازن / تمام ورينى بقى هنعرف ننظم حاجه زى دى ازاى و امتى
شريف / عاوز اقولك حاجه بس خايف ادايقك و انت شكلك مدايق خلقه
مازن / ضربوا الاعور على عينه قول
شريف / انا متاكد ان صفوت بيه الله يرحمه كان هيبقى فخور بيك اوى يا مازن بيه
شريف يغمز لمازن و يقوم يعدل هدومه و يمشى و مازن قاعد مدايق و حزين يتنهد و يضغط على زرار المسطره فى اللاب اللى جنبه الشاشه تنور بصوره مرام بتضحك يبصلها و يبتسم
..................................
فى شقه ايمان
الست نايمه مرام تقوم من جنبها تاخد الشفشق و تدخل المطبخ تملاه تلاقى اطباق فى الحوض تملا الشفشق و تبص على الاطباق و تيجى تمشى و بعدين تبص لفوق و تحط الشفشق عالرخامه و تشمر كمها و تغسلهم
مرام / مش هيحصل حاجه خلصت اللى ورايا كتر خيرها ادتنى نص المرتب من قبل حتى ما اشتغل مش نشكله
مرام تخلص و تاخد الشفشق و تيجى ترجع الاوضه تلاقي اوضه ايمان مفتوحه و اللاب محطوط على المكتب تمشى و بعدين ترجعله و تطله الفلاشه من جيبها و تقف ثوانى
مرام / هبص بصه
مرام تدخل الاوضه و تفتح اللاب و تشغله يفتح على فيلم اجنبى تصغر الشاشه و هى بتعانى فى انها تتعامل معاه و بعدين تحط الفلاشه و تفتحها تلاقي صور كتير و فيديوهات تقلب فى الصور الكل سعيد كل صورها من الجنب او هى مش واخده بالها صور كتير ليها و فجاه صور فى الكليه صور كتير و هى مش واخده بالها و صور فى الجمعيه و صور فى البلكونه صور كلها جميله
مرام / اللى فيه داء مبيبطلوش يعنى
مرام تشغل اول فيديو اغنيه سورى جاستن بيبر مكتوب على البدايه انا عارف انك مش شاطره فى الانجليزى اوى ( اسمايل بيطلع لسانه ) فترجمتهالك مرام تبتسم و تبدا صورتهم فى الفرح فى جنينه الفيلا بيدحكوا على اخرهم مكتوب هل يجب ان تذهبى و تغضبى فى كل مره بسبب صدقى
مرام / صدق ايه يابو صدق هو اول القصيده كفر متخلينيش اكسر اللاب ده على دماغك عيل مستفز
الصوره اللى بعدها شايله فى الفرح بيلف بيها مكتوب عليها تعرفيين اننى احاول لكنى لا اجيد الاعتزار كثيرا
اتمنى الا ينتهى وقتى
مرام / كان فى وخلص
الصوره اللى بعدها مرام بتحدف البوكيه مكتوب عليها هل ينادى احدكم حم لانى فقط احتاج فرصه واحده اخرى للمسامحه صوره مازن و مرام فى العربيه
مرام / خدت مليون فرصه اوووف و ادى ام الفيديو انت مصدق نفسك ياله انت مصدق نفسك و المفروض انا بقى اشوف الصور دى اتهبل بقى و اجيلك ... تبقى بتحلم يا شاطر تبقى بتحلم يا حبيبى فوق اتعلمت خلاص دخلت عليا الحركات دى مره ... فوق
مرام تشغل فيديو تانى اغنيه جاستن بيبر وات دو يو مين مكتوب انا عارف انك مش شاطره فى الانجليزى اوى ( اسمايل بيطلع لسانه ) فترجمتهالك مرام تطلع لسانها باشمئزاز و تبدا بصوره مرام سرحانه و وراها صور كتير كانها تايهه تقصدى ايه لما بتهزى راسك ايوه و انتى تقصدى اه تقصدى ايه لما ماتبقيش عوزانى امشى و تقوليلى امشى تقصدى ايه تقصدى ايه صوره لمرام من الجنب باصه لفوق و هى مغمضه عنيها
مرام / دا خيالك انت ده اقولك العيب مش عليك العيب عليا انى بتفرج على الهبل ده انت واحد فاضى
صوت جرس مرام تشد الفلاشه بسرعه و تقفل اللاب و تروح تجرى
مرام / صحيتى اجبلك تشربى اسخنلك شويه شوربه
الست تضرب الجرس
مرام / حالا
مرام تجرى على المطبخ
............................
فى الشركه
سعد يخبط على باب مكتب ايمان
ايمان / تعال يا سعد
سعد / اخبار مرام معاكى ايه
ايمان / بصراحه بنت زى العسل فى العاده لو البنت مريحتش ماما اول ما بدخل بتضرب الجرس تلت مرات يعنى امشيها واضح ان لحد دلوقت ماما مبسوطه منها اوى
سعد / الحمد لله بصى انا جاى و طالب منك خدمه
ايمان / اؤمر يا سعد
سعد / بصراحه مرام زى ما قولتلك بنت حتتى و يتيمه و ملهاش حد جدتها ست مريضه و علاجها مكلف عشان كدا بتشتغل مع الكليه غير كدا مرام الاولى على الدفعه بنت شاطره و ذكيه
ايمان / فعلا انا حسيت بده و امينه كمان
سعد / ايوه و كرامتها عندها بالدنيا احنا فى المنطقه عارفين ان مرام حالتها على قدها بس هى مبتقبلش مساعدات من حد تاكل زلط و لا انها تمد ايدها عشان كدا احنا فى المنطقه كل واحد حط مبلغ بينه و بين ربنا يدفعهولها كل شهر بس طبعا هى مبتاخدش مننا حاجه فا انا كنت جايلك يعنى لو تسمحى تاخدى الفلوس دى و تديها لمرام على انها زياده فى المرتب
ايمان / ايوه بس احنا كنا متفقين هفسرلها الموضوع ازاى
سعد / ارجوكى دوا جدتها لوحده بيكلف مبلغ غير المواصلات و الاكل و الشرب هى اشتغلت عشان هى محتاجه لكل جنيه بس انا عارف ان المرتب مش هيكفيها حتى لو هى قالت غير كدا ارجوكى اديها الفلوس دى
ايمان / كام دول
سعد / اربع تلاف جنيه
ايمان / اربع تلاف جنيه فى الشهر على انها تقعد بوالدتى انت بتهزر يا سعد طب ما تخليها تيجى تشتغل مكانى و انا اروح اقعد بوالدتى يا سعد هههههههههههههههه
سعد / انا اسف بس المفروض خمسه حضرتك هتديها الالف المرتب و لا ايه
ايمان / انا مرتبى على بعضه تلت الاف جنيه ازاى هفسرلها انى بديها خمس تلاف كل شهر يا سعد
سعد / هى تعرف منين حضرتك بتقبضى كام و بعدين حضرتك ليه مدايقه كدا دى فلوس متجمعه و المطلوب توصليها بس
شريف يدخل
شريف / فى ايه يا جماعه صوتكوا عالى
ايمان / مفيش حاجه يا مستر شريف
شريف / ممكن تسبنا شويه يا سعد
ايمان تبلع ريقها و سعد يمشى
شريف / انا مكنش قصدى اتصنت بس زى ما قولت صوتكوا كان عالى بصى من النهرده مرتبك بقى عشر تلاف جنيه
ايمان تبصله باستغراب
شريف / مينفعش تحسى ان اللى بتشتغل عندك بتقبض اعلى منك حتى لو كانت الفلوس دى ملمومالها من اهل حتتها
ايمان / الموضوع والله
شريف / انا هنبه على الحسابات ان مرتبك زاد و هقول لسعد انك وافقتى توصلى الامانه
ايمان تهز راسها و هى باصه فى الارض
شريف / عن اذنك
شريف يمشى و ايمان تقعد محتاره
ايمان / انا مش فاهمه اى حاجه دا لو الدنيا بتمشى بالطريقه دى مكنش حد غلب ... هو انا زعلانه ليه دا انا المفروض اعمل فرح صحيح رزق الهبل عالمجانين
......................
فى شقه سميحه
سميحه / بتهزرى
مرام / والله يا تيته زى ما بقولك لقيته بيدينى الاربعتلاف و نص و تقولى رزقك و نسبتي في الارباح و كدا
سميحه / لا يا مرام ليكون يا بنتي بيجر رجلك لحاجه كدا و لا كدا
مرام / متخافيش يا تيته انا اصلا مرضيتش فى الاول لحد ما محمود اكدلى
سميحه / محمود !!! الله هو مش مصطفى اللى جايبلك الشغلانه دى ماله محمود بالموضوع ده
مرام / اه ...اه بس محمود جاب قرارهم برده
سميحه / الله يباركله محمود و الله ... شوفتي عمتك النهرده كلت ودانى
مرام / خير
سميحه / مازن مازن مازن مازن
مرام تنفخ و تبص الناحيه التانيه
سميحه / بيقولوا قالب الشركه جه من فتره و قرر يعمل تامين على كل اللى شغالين
مرام / اه اه عرفت الموضوع ده
سميحه / لا دا التقيله جايه بيقولوا هيعمل مسابقه حفظ قران على مستوى الجمهوريه وكل اللى هيشتركوا هياخدوا جوايز فلوس رمزيه كل ما كنت حافظ اكتر و احسن جايزتك تكبر و هيخلى التليفزيون يغطى المسابقه دى و كمان هينتج شريط للفايز
مرام / و دا من ايه ان شاء الله
سميحه / شوفي حتى لو وحش يا مرام ناس كتير هتدعيله على اللى عمله ده
مرام / هتلاقي كلو من الضرايب هو انتى مش عرفاه
سميحه / مرام ... مهما كان نقول اللى لينا و اللى علينا الجدع من يومه كريم نقول ندبح عجل يقول خليهك تلاته و عمره ما بخل فى الخير
مرام / ربنا وحده العالم بالنوايا
سميحه / بالظبط و زى ما قولت نقول اللى لينا و اللى علينا نامى يلا نامى
......................
فى الشركه تانى يوم
ايمان / دى طلعت روحى امبارح
سعد / مش انا قولت لحضرتك
ايمان / بس مش كدا دا انا قعدت اتحايل عليها لما ريقي نشف و اقولها يا بنتى والله اترقيت و مرتبي زاد يا بنتى الشركه عملت برنامج طبى للعاملين و هيتكفلو بعلاج ماما يا بنتى دا رزقك انا عمرى مشفت دماغ كدا
سعد / قولتلك والله كرامتها عاليه جدا
ايمان / مش كدا
سعد / امال لو عرفتى لما روحتها امبارح هرتنى اسالى و مهديتش الا لما اتاكدت من كل ده
ايمان / بصراحه فى حياتى ما شوفت كدا دى قالتهالى صريحه حد باعتنى بالفلوس كانها عارفه ان الناس بتلملها
سعد / احنا حاولنا نديهالها بمليون طريقه ابدا الحمد لله انها خلصت على قد كدا
.................................
فى مكتب مازن
مازن قاعد مع شريف فى اوضه الاجتماعات و فى حد بيقدم بريزينتايشن موبايل شريف يتهز ياخده يبص فيه يلاقى اسم مرام يزغد مازن بكوعه بالراحه يبص يتخض
مازن / انا اسف جدا بس لازم بريك عشر دقايق عن اذنكوا
مازن يشد شريف بره
مازن / رد
شريف / الو
مرام / ازيك صباح الخير
شريف / صباح النور ازيك
مازن / افتح الاسبيكر
شريف يهز راسه لا مازن يعمل انه هيضربه بالبوكس
مرام / سورى لو كنت بتكلم فى وقت مش مناسب بس كنت عاوزه اسالك عن حاجه
شريف / لا اؤمرى عادى انا فاضى اصلا
مرام / امممم بص انا مش عارفه ابدء الموضوع ازاى بس انا عوزاك تسالى محامى عن حاجه انت عارف ان مليش خبره و كدا و اخاف اسال حد يتوهنى
شريف / لا مفيش داعى قوليلى ايه المشكله و انا هتصرف
مرام / هو ينفع حد يصور حد من غير اذنه
شريف يبص لمازن مازن يتجنن و يهز رايه ايه
شريف / اكيد لا طبعا
مرام / طب لو شيماء او رؤى اتعرضوا للموقف ده انت هتعمل ايه
شريف / فى حد عمل معاكى كدا
مرام / اه و انا مش عارفه اروح فين بالظبط لو عاوزه اعمل بلاغ اروح لوحدى بالصور دى و لا اخد محامى معايا و لا المفروض اعمل ايه انا قولت اسالك انت اكيد تفهم فى الحاجات دى اكتر منى
شريف / طب واحده واحده عشان افهم انتى تعرفى اللى بعت الصور دى
مرام / اه
شريف / طب هتقولى يعنى
مرام / حبيبك سى زفت
شريف يمسك نفسه من الضحك بالعافيه و يبص لمازن
شريف / مازن ؟؟؟
مازن يهز راسه ايه و يحاول ياخد التليفون شريف يمنعه
مرام / قوله لو اللى حصل ده اتكرر انا هبلغ عنه بلاش قله ادب قوله ميصورنيش تانى و يبطل الحركات دى مش هنعيده تانى كان فى و خلص
شريف / تمام هقوله حاضر
مرام / شكرا يا شريف و اسفه على الازعاج سلام
شريف يقف و يبص لمازن
مازن / ايه بتقولك ايه انطق
شريف / مرام عرفت انك بتصورها و بتشتكى منك و لو مبطلتش هتبلغ عنك
مازن / يعنى فتحت الفلاشه و شافت اللى فيها
شريف / انت بعتلها الصور انت بتستهبل انت بتفتن على نفسك انت عبيط
مازن / كنت برتجل
شريف / بترتجل هههههههههههههههه تمام انت عارف مرام ليه كلمتنى انا و مكلمتكش انت تهزقك و تمسح بيك الارض صدقنى كنت هستمتع اكتر لو كانت عملت كدا عشان ترتجل كويس
مازن / عشان عملالى بلوك و مش عاوزه تفكه
شريف / عشان لما تكررها تبقى فوشى و اتهزق انا مهى خلاص جته الحمار نحست فقررت تتشطر عالبردعه انت بتنبسط لما بتهزقك
مازن / اوى
شريف / انت بتتكلم جد
مازن يهز راسه بمنتهى الاستمتاع و هو مغمض عينه
شريف / ههههههههههههههههههه طب ما تقولى و انا اخدك رايح جاى
مازن/ تؤ هى بس بص تتعصب تتنرفز تضرب حتى ان شالله تموتنى حتى اى حاجه منها بتعجبنى المهم اسمع صوتها و اشوفها و اللمسها خلاص
شريف يحط ايده على اوره مازن
مازن / انا مش سخن اوعى
شريف / لا يا حبيبى مش سخن انت لاسع اوعى اما ادخل اكمل الميتينج قبل ما اتعدى
مازن / ههههههههههههههههههههههه
...............................
فى الصيدليه بعد كام يوم
عمر / يعنى ايه مفيش خروجات دا انا اروح فيكوا فى داهيه دا انا خاطب مخصوص عشان اخرج دا انا بقالى سته و عشرين سنه مستنى الحلال اجمل اللى بيقولو عليه ده
شيماء / هههههههههههههههههه طب بس اهدى انا بس قولت اننا فى فتره الميد ترم و كدا اصبر شويه ما انت عارف الكليه و قرفها
عمر / ما انا باجى اقعد معاكوا بالليل فيها ايه لما نقضي الوقت ده بره فى البيت مبقعدش معاكى لوحدينا خالص
شيماء / دانت ناوى على كبير بقي و بعدين ما احنا لوحدينا اهو فرقت ايه
عمر / دى صيدليه مينفعش طبعا
شيماء / و انت عاوز تروح فين طيب
عمر / كافيه عالنيل مركب جنينه اهو اى مكان رومانسى نقول فيه كلمتين حلويين
شيماء / هتعرف تقول يعنى
عمر / هجرب مش يمكن الاضاءه و المزيكا و الجو الرومانسي يخلونى اعرف
شيماء / عاوز تفهمنى انك عمرك ما قولت ما قولت كلام حلو لواحده
عمر / العلاقه الوحيده اللى كانت فى حياتى كنت فى تانيه ابتدائي و انتهت باحلى خازوق ما شاء الله
شيماء / هههههههههههههههههه
عمر / يوميها بابا مكنش معاه فكه و مكنش معايا سندوتشات و هو متاخر على الشغل المهم ادانى خمسه جنيه وقتها كانت مبلغ انا مصروفى اصلا كان ربع جنيه المهم قالى ان دا مصروف الاسبوع و انى بقيت راجل و ليا مرتب و اتعلم احوش و كدا المهم طبعا دخلت الفصل ملك معايا خمسه جنيه بقي
شيماء تقرب بالكرسي شويه و هى مهتمه
عمر / كان اسمها يمنى و شعرها ديل حصان اصفر طويل و عنيها زرقه و مجننه الفصل كله المهم فى الفسحه بقي جت قعدت جنبي و انا طبعا ملياردير بقي خمسه جنيه بقولك
شيماء / هههههههههههههههههه ضحكت عليك يعني
عمر / روحت البيت خدت علقه سواد و ابويا حلف لاكمل باقي الاسبوع من غير مصروف بس قولت مش مهم المهم يمنى و الحب و قعدت احسب لو حوشت مصروفي كل يوم هتجوزها بعد قد ايه بس الحمد لله صحيت مالوهم ده تاني يوم علاطول لما سابتني وراحت لواد بمصاصه و من يومها و انا مقاطع جنس الحريم كلو
شيماء/ حقك بصراحه انت اتخزوقت جامد بس برده مقولتليش عرفت تقول كلام حلو و لا ايه
عمر / كلام ايه يا بنتي بقولك خمسه جنيه دا هى اللى قالت و عادت و انا كنت زى الاهبل عمال احاسب عالطلبات عنيك حلوه اوى يا عمر طال عمرك خديلك ازازه كوكاكولا فكراها ام خمسه و تلاتين قرش دى
شيماء / اه فكراها ... على فكره عنيك حلوه اوى يا عمر
عمر / طال عمرك و ادى احلى دبدوب لعيون عمر
عمر يطلع شنطه هدايا من تحت المكتب شيماء تبص تلاقي دبدوب احمر
شيماء/ هههههههههههههههههه دانت لقطه ... و احمر كمان
عمر / عشان تعرفي بس من الصبح والله و انا بفكر في طريقه رومانسيه اديهولك بيها جت كدا ... على فكره بيقول اى لوف يو
شيماء/ بيقول ايه
عمر/ اى لوف يو
شيماء / طويب
عمر / يعني بحبك يعني اى لوف يو يعني بحبك
زبون يدخل عمر يقوم و شيماء تبصله و هى مبتسمه و ترجع تبص على الدبدوب و بعدين تبص لعمر تاني
....................
فى الكليه بعد فتره
الدكتور / الفصل الخامس و السادس ملغى و المره الجايه هنبدا فى الفصل السابع فاضل محاضرتين و نخلص المنهج اى حد عنده اسئله ... تقدروا تتفضلا
الكل يتحرك
محمود / ياااااه مش قادر اتخيل اننا اخيرا هنخلص من الهم ده
مرام / على رايك
تليفون مرام يضرب
مرام / دا سليمان اكيد هيسالني ليه بقالى فتره مخلتوش ياخدنى و يجبني من الشغل هقوله ايه
محمود / قوليله و انت مال امك
مرام / عيب يا محمود الحق عليه يعني راجل و بيجري على اكل عيشه
محمود / الواد ده غتت و انا مش بحبه
مرام / اهو قفل اهو الحمد لله خلصنا
التليفون يرن تانى مرام ترد
مرام / الو
سليمان / ازيك ايه الاخبار فينك
مرام /فى الكليه سورى كنت فى محاضره خير
سليمان / اصلك طولتى الغيبه يعني لا بنشوفك و لا بتكلمينا قولت لاكون عملت حاجه من غير قصد
مرام / لا ابدا مفيش حاجه والله انت عارف لنا بحتاجلك بكلمك
سليمان / يا ستى ربنا ما يحوجك لا ليا و لا لغيرى بس ابقي حتى اسالي دا احنا حتى جيران و لا ايه
مرام / اكيد ان شاء الله
سليمان / هتخلصى امتى اعدى اخدك
…………………………..
