السكة شمال ٢ ( كامله ) بقلم / لولو_محمد

الحلقه ١٧

((((((السكة شمال ٢))))))))
#لولو_محمد
الحلقه ١٧
محمود / يا بت قولتلك القفا فى الجو ده بيوجع متخلينيش الزقك على قفاكى و اه واقف عليا بخساره عشان انا عارف انه مش من مصلحتك مرام انا خايف عليكى
مرام / ضربوا الاعور على عينه وسع خلينى اروح و روح شوف كنت رايح فين
محمود / كنت نازل اجيب شيكولاته بس انتى جبتيها خلاص اروح بقى
مرام تبصله و تبص عالناصيه مازن لسه واقف تمشى من سكات و تدخل البيت و محمود يدخل وراها مازن يدخل الحاره و يبص عالناس اللى قاعده عالقهوه و يخبط على باب البيت اللى فيه الرجاله واحد يفتح
مازن / ابعت اتنين تلاته يقعدوا عالقهوه عشان يبقوا عينا فى الشارع
الراجل يشاور لاتنين و يروحوا يقعدوا عالقهوه و مازن يدخل و يقفل الباب وراه
........................
شريف / عامل ايه
مازن / زفت
مازن يدخل الاوضه شريف يقوم يدخل وراه يلاقيه رايح جاى بيفرك و متعصب
مازن / ارتاحت هى كدا يعنى انبسطت كدا انهى عقل ربنا اداهولها ده انا كنت فاكرها ذكيه كنت معجب اوى بعقلها طلعت غبيه و مبتفهمش
شريف / اهدى ياسطى
مازن / طب انا قصرت فى ايه غلطت فى ايه الراجل كان هيبوس ايدها عشان تهدى انما ابدا طلقنى منه طلقنى منه ايه ده هو فى كدا .. تعرف انا لو من الماذون ده كنت حدفتها بدفتر الطلاق فوشها فلقت دماغها
شريف / هههههههههههههههه معلش اقعد
مازن / و بنت الكلب التانيه قدامها يوم اربعه و عشرين ساعه اربعه و عشرين ساعه كل ساعه منهم فيها 60 دقيقه يعنى معرفش اليوم كام دقيقه بس كتير
شريف / الف ربعميه و اربعين
مازن / كتير يعنى اهو كتير تنقى الدقيقه اللى مرام ماسكه فيها الموبايل عشان تتنيل تتصل ليه
شريف / يا حزنى
مازن / و مرام ترد تلاقى بنت الكلب بتقولها احمد شافنى و انا نازله من عندك
شريف / ايه النحس ده قلبى عندك يابنى والله.. و مرام عملت ايه ساعتها
مازن / هتعمل ايه يعنى انا خدت الموبايل منها و التانيه نزلت من العربيه و مهما تتكلم بقى خلاص
شريف / نفسى الاقى تفسير منطقى للى بيحصل معاك ده غير انك فقر مش لاقى
مازن / و لا ابويا شوفت اب كدا شوفت فى حياتك اب بيحارب ابنه كدا دا لو يطول يجيب سكينه تلمه و يدبها فى قلبى و يدفنى و انا لسه فيا الروح و يورثنى كان عمل ايه الابهات دى يا اخى
شريف / انا بفكر نبعت لابوك نبلغه انك طلقت و نشوف هيعمل ايه يمكن يتهد عنك شويه
مازن / يا فرحتى يا شماتك فيا يا زياد يا مين يلايمنى عليك دلوقت تعرف انا هاين عليا اجيبه اعلقه بدل البوكسينج باج كدا و افضل انفض فيه انفض فيه لما اطفحه طقم سنانه ... الصفين
شريف / بايدك تدوقه من نفس الكاس
مازن / لا لا لا تعرف احسن عقاب لزياد و لبنى انهم يكونوا سوا انها تفضل تتعذب معاه و انها تفضل تقرطسه كدا و تركبه زى البغل
شريف / وجهه نظر تحترم ممكن تهدى بقى خيلتنى
مازن / مش طايق نفسى يا شريف هطق هموت هو احنا بقى هنفضل قاعدين مستنين سى زفت ده نشوف ناوى على ايه
شريف / طب اعمل ايه طيب قولى و انا اعمل
مازن يقعد و هو بيفرك
........................
فى دبى
احمد قاعد حاطت رجل على رجل على فوتيه مودرن و ماسك ملف فى ايده جميله تدخل من وراه و توطى عليه و تحضنه من ورا
جميله / السكه مش سالكه مازن بنفسه معسكر قدام بابها و توفيق مش عاجبه انك مانعه عن مازن بيقول يدخل يخلص منهم هما الاتنين و ينجز
احمد / قوليله لو وقع فى ايده محدش هيعرف يخلصه من ايديه خليه يستنى هى كدا كدا هترجع الحاره يبقى يستقبلها براحته
جميله /  اصلا مفتكرش مازن هيفضل معسكر على بابها كتير يعنى اكيد محاولاته المستميته للصلح دى هيبقى ليها نهايه يعنى
احمد / فال الله و لا فالك مازن لو زهق منها و طلق دلوقت قولى على الاسهم الجديده يا رحمن يا رحيم
جميله / اول مره مكنش متفقه معاك خالص انا شايفه ان مازن لو طلق اكيد هيبقى مش طايق ابوه فهيتخانقوا اكتر و انت عارف الباقى بقى
احمد / بس ابوه راجل قيحه مش هيرضى يبيع
جميله / مهو عشان قيحه هيخاف على كل جنيه بيخسره و هيبيع
احمد / عارفه يا جيجي لو ده حصل ليكى منى هديه محصلتش
جميله / انا هديتى انى ابقى جنبك يا قلبى
احمد / هههههههههههههههه مبروم على مبروم ميرولش يا جيجي وفرى الحركات دى لحد غيرى
جميله / اخص عليك يا بيبى كدا برده
احمد يبتسم و يحط الملف عالترابيزه و يقوم يمشى
..........................
فى البيت القديم
فى اوضه مرام مرام قاعده فى الارض بتعيط و سميحه وخداها فى حضنها
سميحه / الله مش هو ده اللى كنتى عوزاه بتعيطى ليه بقى
مرام / عمرى مكنت متخبله انه هيسيبنى بالبساطه دى كان نفسى يتمسك بيا اكتر ادى اللى كنت فاكره انه هيحارب الدنيا عشانى كسرنى و رمانى
سميحه / يا بنتى مش انتى اللى صممتى عالطلاق
مرام / محبنيش و لا عمره حبنى و لا عمره حب حد دا بالنسباله كنت مجرد واحده ملقاش طريقه تانيه يوصلها بيها الا الجواز حكايه جديده يتباهى بيها وسط صحابه العرر
سميحه / ميسيئلناش فى حاجه انتى اتجوزتى على سنه الله و رسوله
مرام / و انتى فاكره اللى عمله ده يا تيته حصل ليه دلوقت طلقنى عشان انا مفضوحه ضربنى فى مقتل و فضل واقف يتفرج عليا و انا بطلع فى الروح
سميحه / مش عارفه اقولك ايه
مرام / اى حد هيقول مسكين مازن عمل كل حاجه عشان يراضيها بس محدش عارف ان مازن كان نايم مع بنت الكلب لبنى و انا فى امس الحاجه ليه هنا بيخونى و معداش على جوازنا اسبوع بيخونى مع حبيبه اخوه الواطى الحيوان
سميحه / و انتى عرفتى منين
مرام / اتصلت بيه و انا جنبه و قالتله احمد شافنى و انا نازله من عندك يارب يقول لزياد و يفضحهم و يموتوا بعض و نخلص منهم كلهم ربنا ياخده لا ربنا يطول فى عمره لحد مشوفه مذلول و متعذب و متهان زى معمل فيا بالظبط يارب اوجع قلبه زى موجع قلبى
مديحه تدخل شايله صينيه اكل تقفل الباب و تحطها عالارض جنب مرام مرام تمسح دموعها
مديحه / مكلتيش من صباحيه ربنا كليلك لقمه
مرام / اديتيهم الشيكولاته يا عمتى قولتيلهم دى حلاوه طلاقى
مديحه / اديتهم و عنتلك واحده
مرام / مش عاوزه الف هنا عليكى
مديحه / عامله ايه يا بنتى
مرام / كويسه الحمد لله
مديحه / راحوا شافوا عفش مستعمل بس نضيف و هيفرشوا الشقه
مرام / كتر خيرهم
مديحه / انا هسيبك تاكلى لقمه العياط لو كان بيصلح اللى اتكسر مكناس بطلنا عياط بس الدكحه بقى بتطول العمر و تعرفى ايه بيطول العمر اكتر حته الفرخه دى
مديحه تقطع حته فرخه صغيره و تحطها على بق مرام مرام تزق ايدها
مرام / مليش نفس والله يا عمتى
مديحه / والله مهى راجعه هتكسفى ايدى و لا ايه
مديحه تقرب ايدها تانى مرام تاكلها منها مديحه تتنهد
مديحه / الف هنا كملى و لعلمك ستك مداقتش الزاد هى رخره كلى و اكليها معاكى و انا لو منك يا حجه محطش لقمه فى بقى الا لما هى تحط لقمه قصادها
مديحه تبوس راس مرام و تسيبهم و تقوم تطلع بره و تقفل الباب
سميحه / انا جعانه و مختش الدوا بس انتى لو مكلتيش انا مش هاكل
مرام / هاكل يا تيته حاضر
……………………
فى الصيدليه
عمر / على فكره انتى لو استمريتى عالوضع ده انتى اللى هتحتاجى علاج مش هى
شيماء / ليك حق مانت متعرفهاش مرام دى من الشخصيات اللى ممكن تقابلها مره او اتنين و تحبها جدا بشوشه و متواضعه و كريمه
عمر / ناس كتير دافعت عنها عالصفحه و قريت مواقف كتير حلوه الناس حكياها بس مفتكرش ان فيهم حد متاثر اوى كدا زيك
شيماء / يمكن عشان انا قريبه من الاحداث اوى
عمر / تعرفي ان موضوع الرهان اللى بيقلب بحب ده اتهرس فى مليون فيلم قبل كدا فى الاخر البطل بيصالح البطله و هى بتسامحه و بينتهى الفيلم بيهم و هما نازلين بوس فى بعض
شيماء / بس احنا مش فى فيلم
عمر / و ما الدنيا الا مسرح كبير
شيماء / هو انت كل حاجه عندك هزار كدا
عمر / بالعكس انا عمرى مكنت جد زى دلوقت بصي كل واحد فينا بطل حكايته و شخصيه طيبه فى حكايه شخص تانى و شخصيه شريره فى حكايه شخص تالت
شيماء / فى ناس مستحيل اتنين يختلفوا عليهم
عمر / دا اى كلام على فكره احنا بشر مش ملايكه
شيماء / لانا فهماك و لا انت فاهمنى خلاص غير السيره
عمر / طب حاولى معايا اخر مره
شيماء / تعرف لما ترسم احلام و تصحى و تدايق و تكتشف ان اللى جنبك بيحلم بكابوس فتخاف تنام تانى
عمر / لا طبعا دانا احمد ربنا و اكمل نوم يمكن اكمل الحلم الجميل اللى كنت بحلم بيه
شيماء / ما يمكن يطلع كابوس
عمر / ابقي عملت اللى عليا و كمان شبعت نوم محدش بيبطل نوم
شيماء/ برضو مش فاهم انا بقول ايه
عمر / لو فى عندك ماده صعبه و الدكتور بتاعها مشهور ان نص الدفعه لازم تشيل الماده هتعملى ايه هتسيبى الكليه و لا مش هتزاكرى و تقولى مانا كدا كدا هسقط و لا هتعملى كل اللى تقدرى عليه انك تنجحى
شيماء / هزاكر و انجح طبعا
عمر / يعنى مش معنى ان نص الدفعه شالت الماده ان النص التانى منجحوش و فيهم اللى جابوا امتياز يعنى
شيماء تبصله
عمر / مش معنى انى مريت بتجربه و ان فى ناس حواليا تجربتهم طلعت اسوء منى ان العيب فى الحب العيب انى اللوم الحب محدش بيقدر يعيش من غير حب
شيماء / غريبه ان انت اللى تقول كدا
عمر / ليه يعنى
شيماء / عشان نظرتك فى الجواز بس
عمر / لا نظرتى فى الجواز دى عشان لسه محبتش مش اكتر
شيماء / يعنى مش العكس
عمر / للاسف لا انا مرتبطتش فى حياتى قبل كدا و العلاقه الوحيده اللى دخلتها فى تالته ابتدائي  كنت معجب بواحده بس هى سابتنى و راحت تلعب مع عيل تنح امه عملاله سندوتشات مربي فراوله و انا امى كانت عملالى جبنه بطماطم
شيماء / ههههههههههههههههههه
شيماء تدحك اوى و عمر باصصلها و مبتسم
..................
فى الفيلا فى دبى
لبنى نايمه جنب زياد و هو بيتكلم فى التليفون
زياد / جرا ايه يابنى كل ده مستنيك تفرحنى
احمد / مازن معسكر هو و شريف قدام البيت فقولت نستنى اما نمشى
زياد / انت عبيط يا احمد
لبنى تصحى
زياد / مش قولتلك متعملش اى حاجه من دماغك الا لما ترجعلى
لبنى / فى ايه
احمد / انت عاوزهم يموتوا بعض يعنى
زياد / لا طبعا مش هيقتلوه و لا هيقدروا عليه اساسا بس مفيش مشكله من تعويرتين تلاته يرقدوه
لبنى / مين ده
احمد / انت فاكر توفيق لو مازن وقع تحت ايده هيرحمه
زياد / و لا مازن هيرحم توفيق لو وقع تحت ايده عشان كدا بقولك محدش فيهم هيموت التانى انت عارف ان مازن ملوش فى الدم
احمد / انا مفيش احب على قلبى من انى اموت مازن بس انت اللى مانعنى لو قولتلهم يروحوا دلوقت و مازن مات مترجعش تلومنى
زياد / مش هيموت نفذ زمانه نام اصلا مش هتلاقى وقت احسن من ده دانت مصيبه و ابقى كلمنى لما تخلص سلام
زياد يقفل السكه
لبنى / انتوا هتعملوا ايه فى مازن
زياد / مازن ايه بس اللى هنعمل فيه حاجه لا طبعا
لبنى / انا سمعاك بتقول مازن ملوش فى الدم و موت و توفيق فى ايه فهمنى
زياد / يا بنتى اهدى مفيش حاجه الموضوع كله مرام بس مازن خد شقه قدامها و معسكر فيها
لبنى تقوم تجيب الموبايل جرى زياد يشده من ايدها
زياد / انتى بتعملى ايه
لبنى / ملكش دعوه بيا هات الموبايل
زياد / انتى اتجننتى يا لبنى و لا ايه هتكلمى مازن بجد هتبيعينى ليه
لبنى / لا مش هبيعك هبيع احمد و لو منك اتصل بمازن و احزره و اكسب عنده بونط و اسيبه هو و احمد يولعوا فى بعض بس انت كرهك لمازن عميك
زياد / انا مبكرهش مازن
لبنى / امال بتعمل كدا ليه
زياد / عشانك عشان انفذ وعدى ليكى
لبنى / قولتلك مش عاوزه و خلاص مستنين معاد الفرح فاضل ايه بتعمل كدا ليه انت مش بتعمل ده عشانى انت بتعمل ده عشان نفسك
لبنى تحط ايدها على بطنها و تبان انها بتتالم
لبنى / اااااه
زياد / مالك يا لبنى فى ايه مالك
لبنى / بطنى بتوجعنى بطنى بتوجعنى اوى يا زياد
لبنى ترمى نفسها فى الارض و زياد يسندها لحد ما تنزل فى الارض و هى عامله نفسها بتتالم و تسحب منه الموبايل و هو مرتبك
لبنى / البيبى يا زياد اللحقنى يا زياد كلم ماما يا زياد
زياد / حاضر حاضر
زياد يجرى يجيب الموبايل لبنى تقوم تجرى عالحمام و تعمل نفسها بترجع و الموبايل فى ايدها زياد يبص وراه يلاقى باب الحمام بيتقفل يجرى عليه
زياد / لبنى لبنى
لبنى تفتح الباب و تعمل دايخه زياد يسندها للسرير و هى مستموته فيها
لبنى / جبت كل اللى فى بطنى ساعدنى انام عالسرير
زياد / تعالى يا قلبى تعالى
لبنى / انا تعبانه خالص يا زياد كلم ماما يا زياد
زياد / لا انا هنادى لماما اسرع
لبنى / ماشى اى حاجه بس بسرعه يا حبيبى بسرعه
زياد يجرى بره لبنى تلعب فى الموبايل و ترميه عالكومدينو و تعمل تعبانه
لبنى / اااه يانا اااه يا بطنى ااااه مش قادره يا زياد
لبنى تبص عالباب و ترجع تنام تانى
........................
فى مصر
فى الحاره اللى فيها البيت القديم فى شقه مازن مازن واقف بيبص مالشباك على بيت مرام شريف يدخل الاوضه و شايل صينيه عليها كبايتين شاى
شريف / شاى ؟؟
مازن يمد ايده و ياخد الكبايه
شريف / و انت متخيل انها فى الجو ده ممكن تتهبل زيك كدا و تقف فى الشباك تعد النجوم فانت تشوفها مثلا
مازن / كنت بعد الايام عشان تبقى فى حضنى شوف دلوقت بعد الامتار اللى بتفصل بنا انا ليه بيحصل معايا كدا يا شريف ليه مش مكتوبلى ابقى سعيد
شريف / استغفر الله العظيم متقولش كدا اكيد ربنا عاينلك حاجه كويسه
مازن / احسن من مرام
شريف / و ليه متكونش مرام نفسها ليه خلاص افترضت ان الموضوع انتهى و مش هيتصلح
رساله توصل لموبايل مازن مازن يطلعه من جيبه و يبص فيه و ملامحه تتغير و يبص عالشارع مفيش اى حد رايح جاى
شريف / فى ايه
مازن / لبنى باعته رساله بتقولى خد بالك النهرده من توفيق
شريف يمشى يطلع بره و مازن واقف يبص يمين و شمال مفيش حد يتصل بحد
مازن / ايوه يا محمود اسف لو صحيتك ... تمام خد بالك بقى سلام
.......................
فى اوضه مرام
مرام قاعده بتعمل كوفيه الباب يخبط تحط الطرحه على راسها و تفتح تلاقى محمود
محمود / اممم هى ماما نايمه 
مرام / اه نايمه اصحيهالك
محمود / انتى لسه زعلانه منى
مرام / انت بتخبط عليا دلوقت عشان تسالنى ان كنت زعلانه منك و لا لا
مروه تفتح باب الاوضه و تقف حاطه ايدها فى وسطها و الاتنين بيبصوا عليها
محمود / لا كنت عاوز ماما فى حاجه كدا بس مدام نايمه بعدين بقى
محمود يمشى و مروه تبص لمرام من فوق لتحت و ترفع حاجبها
مروه / دا حتى لسه معداش يوم مالعده
مروه تدخل تقفل الباب مرام تفضل واقفه و تروح ترزع عالباب مروه تفتحلها
مرام / انا استحملتك كتير انتى فاكره نفسك ايه
كل اللى فى البيت يصحوا
مروه / فى ايه مالك بتزعقى كدا ليه انتى اللى فاكره نفسك فين
مديحه / فى ايه فى ايه
محمود / فى ايه يا مروه
مروه / انا اللى في ايه يا اخى عيب عليك دانت فى بيت محترم
اسعد / انتى بتتكلمى كدا ليه يا بت
مروه / اسالهم يا بابا متسالنيش انا
مرام / انتى مريضه انتى انا كنت فكراكى عيله و مش عارفه انتى بتعملى ايه بس طلعتى مريضه
الست / جرا ايه يا جماعه هو فى ايه محد يفهمنا فى ايه يا مروه ايه اللى حصل
مرام / اللى حصل انى مش هقعد فى البيت ده و لا ثانيه بعد كدا حتى لو هقعد عالبلاط
مروه / حسك طلع دلوقت و صوتك على لما عرفتى انهم فرشولك الشقه هناك و ليكى مكان ترجعيله
الست / عيب يا بت ادخلى اوضتك
محمود / لا لا و على ايه احنا اللى ماشيين لموا حاجتكوا
اسعد / اهدى بس يا محمود يابنى متاخدش على كلامها
محمود / حقك عليا يا معلم بس
اسعد / ما بسش دا بيتك و لو فى حد هيمشى يبقى احنا و بت الكلب دى هتعتزر
مروه / بتنصرهم عليا يابا
اسعد / لما تكونى ناقصه ربايه يبقى اه
مرام / ملوش لازمه
مروه / طبعا لازم تبانى الملاك البرئ
محمود / انتى فعلا مريضه
مروه / حليت فى عنيك لما اطلقت مش كدا
اسعد يلطش مروه قلم على وشها تقلع دبلتها و ترميها فى الارض و تدخل الاوضه
الست / انبسطتى كدا ياريت تكونى مبسوطه
الست تدخل اوضتها و تقفل الباب
اسعد / والله انا وشى منكوا فى الارض
محمود / انا اصلا مش فاهم هى عملت كل ده ليه انا كنت جاى عاوز ماما والله
مديحه / خير يا محمود فى ايه عاوز ايه
فجاه صوت دربكه عالى فى الشارع و ضرب نار الكل يجرى ناحيه البلكونه
مديحه / يا ساتر يارب فى ايه
و قبل ما يوصلوا البلكونه يسمعوا صوت عالسلم
راجل 1/ الشقه دى
فثانيه محمود يزق كرسى انتريه عريض ناحيه الباب و مديحه و اسعد يزقوا الكنبه و يسدوا الباب و البلطجيه بره بيحاولوا يكسروا الباب يكسروا الازاز اللى فى الباب ام مروه تاخد بناتها و تدخلهم الاوضه جوه و هما بيسرخوا و سميحه واقفه حاضنه مرام اللى متخشبه و عينها عالباب كانها مستنيه اضاها اللى هيدخل من وراه و فجاه صوت تلت طلقات ورا بعض مرام تتنفض مع كل طلقه فيهم و صوت رجاله بتاوه و تتالم بره و ناس بتضرب فيهم
صوت راجل 2 / امشى قدامى يابن الكلب امشى
راجل 3 / كلو تمام يا باشا
صوت خبط عالباب مرام تتفزع
مازن / محمود
محمود و اسعد يحركوا الكنبه و الكرسى من ورا الباب و يفتحوا الباب
مازن / انتوا كويسين
محمود / مسكتو توفيق
مازن / مكنش معاهم بس مسكنا معظمهم
مازن يبص ناحيه مرام عنيها عليه مليانه دموع
مازن / انتى كويسه
الكل عنيه ناحيه مرام دمعه تنزل من عينها تقع هى بعدها فى الارض و سميحه تصرخ و مازن يدخل يجرى عليها عنين مرام تقفل على منظر مازن و هو ملهوف عليها
.........................
فى الكباريه
توفيق يحدف التليفون على اخر دراعه
توفيق / دانا لو باعت شويه نسوان من اللى بيرقصوا تحت دول كانوا خلصوها يا ولاد الكلب
راجل 1/ اهدى يا تيفا
توفيق / اهدى ايه و زفت ايه على دماغك و دماغ اللى جابتك ... هى العيال اللى اتمسكت دى ايه نظامها
راجل 1/ يا عم هو انا تلميذ العيال دى متعرفش عنك حاجه دول حتى مجايب حماده حدوته كل الاتفاق كان معاه
توفيق / مجايبه خايبه زى وشه
راجل 2/ يا سيدى حماده بتاعنا و مش هينطق
توفيق / و لا ينطق يا متخلف انا بتكلم عالباشا اللى بره هقوله ايه بلح الرجاله اللى بعتهم لبسوا طرح انت عارف الليله دى كنا هنطلع منها بكام
راجل 1/ انا كنت فاكرك هتعمل كدا عشان تعلم عالعروسه
توفيق / غشيم انا لو عاوز اعلم عليها هعلم بايدى اووووف ملحوقه متعوضه غوروا من وشى دلوقت
الرجاله تطلع بره و توفيق يطلع كوكايين و يسطر و يسحب و يعمل دمااااغ
…………………..
فى اوضه لبني في دبى
فريده بتاخد من لبني كبايه فاضيه و زياد واقف متوتر
لبني / ميرسي اوى يا طنط بجد تعبتك معايا
فريده / و لا تعب و لا حاجه احسن دلوقت
لبني / ايوه الحمد لله
زياد / متاكده احنا ممكن نجيب دكتور او نروح مستشفي
لبني / الموضوع مش مستاهل دى اعراض حمل عاديه زى ما طنط قالت
فريده / برده لازم تروحى تتابعى يا لبنى عشان الدكتور يكتبلك فيتامينات تناسبك
لبنى / مهو انا هروح ان شاء الله مع ماما اول ما ننزل مصر
فريده / و انتى لسه هتستنى اما ننزل مصر بكره الصبح اول حاجه هنعملها اننا هنروح سوا مانا لازم اطمن على ولى العهد الصغنن
زياد / لا يا ست الكل سامحينى انا عاوز احلى برينسيس
فريده / بالنسبالى كل اللى يجيبه ربنا كويس اهم حاجه حبيبه قلبى تقوملنا بالسلامه
لبنى تبتسم
فريده / انا هسيبكوا ترتاحوا بقى و اروح ارتاح انا كمان عشان مش هتتخيلى الخضه اللى زياد خضهانى
زياد/ تصبحى على خير يا ماما
فريده تبتسم و تسيبهم و تمشى زياد يحضن لبنى
زياد / ينفع كدا يعنى مش تاخدى بالك من نفسك
لبنى / انا طول عمرى بكره الحمل بسبب الحاجات الرخمه و المقرفه اللى بتحصل دى و لسه بكره لما بطنى تكبر و يبقى شكلى مكعبر
زياد / عشان الورد يا بيبى عشان الورد البيبى ده هيربطنا سوا اكتر هيقربنا من بعض اكتر
لبنى / زياد انا فى حاجه عاوزه اكلمك فيها بس بليز يا زياد بليز تسمعنى بقلبك
زياد / انا قلبى معاكى يا بيبى قولى
لبنى / زياد انا عاوزه البيبى يجى فى جو هادى عاوزين نركز ازاى نبنيله مستقبله بلس انى خايفه اوى من ربنا يا زياد
زياد / ليه يا بيبى هو احنا بنعمل حاجه غلط
لبنى / معرفش بس يعنى انت فاهم
زياد / انتى عاوزه ايه يا قلبى ابعد عن مرام و مازن
لبنى / لا يا بيبى انا عاوزه نبعد عن الدنيا عن الجو الزباله الملل اللى كنا عايشين فيه عاوزه اغمض عينى و افتحها و الاقيك اكبر و اغنى و اشهر رجل اعمال فى الوطن العربى و الدنيا كلها عاوزه انام و انا مش خايفه ان اسهم البرصه تقع و لا ان مناقصه تقف علينا و لا لا نفسى كدا بنتى او ابنى يمشى فى الدنيا مش فارق معاه حد من كتر فلوسه
زياد يبوس ايدها
زياد / هيحصل يا بيبى كل ده هيحصل
لبنى / مش هيحصل و احنا حاطين فى دماغنا ناس خلاص علمنا عليهم
زياد / مهو للاسف يا بيبى قلبك الطيب هو اللى مخليكى مش شايفه المشكله انا لو سبت مازن يفوق و يقف على رجله هو مش هيسيبنى فى حالى
لبنى / اووووف يعنى هنفضل فى الهم ده طول عمرنا
زياد / تؤ هينتهى بس فوقته انا بس عاوزك تصبرى عليا و تفصلى نفسك نهائى عن التوتر ده تمام
لبنى تهز راسها يبوس راسها و يبصلها بحب
........................
فى البيت القديم
مرام تفتح عنيها تلاقى الكل حواليها
مازن / مرام ..مرام
مرام تقوم تقعد بالراحه و تبص حواليها و ثوانى و تقوم تدخل الحمام و تفضل ترجع ام مروه تطع مالاوضه
الست / بعد اذنك يا معلم ثوانى
اسعد / عن اذنكوا
اسعد يروح معاها الاوضه يلاقى بناته بيعيطوا
اسعد / فى ايه مالكوا
الست / اسمع انا مشيت معاك فى دور بنت الاصول ده للاخر و بقيت انا و بناتى خدامين عند الست الهانم و اهلها و قولت ماشى اهم ضيوف لكن معنديش استعداد استمر فيه على حساب بناتى و حياتهم
اسعد / مفيش حد اتعور و اهدى ووطى صوتك
الست / مش هوطى صوتى يانا يا الناس دى و حتى لما نرجع الحاره انا عاوزه ابعد بناتى عنهم انت مش شايف كل يومين بلطجيه و فيلم رعب انا مالى انا بالهم ده
اسعد / اللهم طولك يا روح ممكن نتكلم فى الموضوع ده بعدين
الست / و لا بعدين و لا قبلين بص على بناتك بص على رهقتهم البنات اتفزعوا كان ممكن يحصلهم حاجه كان ممكن يحصلى حاجه قولى محناش فارقين معاك للدرجادى
اسعد / خلاص الشقه بتتفرش و هيمشوا و الموضوع هيخلص اهدى بقى
الست / انا هاخد البنات و اروح عند اختى مش قاعده معاهم فى مكان واحد ثانيه واحده و لو فيها طلاقى
الباب يخبط الست تفتح تلاقى سميحه
الست / نعم
.............................